ຂ່າວຫຼ້າສຸດ

ວິ​ສາ​ຫະ​ກິດ​ຈີນ 4 ແຫ່ງ​ໄດ້​ຮັບ​ໃບ​ອະນຸຍາດ​ນຳ​ໃຊ້​ເຕັກນິກ 5G ທາງ​ທຸລະ​ກິດ

429 10 ມິ.ຖ. 2019 ຂ່າວຕ່າງປະເທດ
ວິ​ສາ​ຫະ​ກິດ​ຈີນ 4 ແຫ່ງ​ໄດ້​ຮັບ​ໃບ​ອະນຸຍາດ​ນຳ​ໃຊ້​ເຕັກນິກ 5G ທາງ​ທຸລະ​ກິດ

    ວັນ​ທີ 6 ມິຖຸນາ​ນີ້ ທີ່​ນະຄອນຫຼວງ​ປັກ​ກິງ ກະຊວງ​ອຸດສາຫະກຳ ແລະ ເຕັກ​ໂນ​ໂລ​ຊີ​ຂໍ້​ມູນ​ຂ່າວສານ​ຈີນ ໄດ້​ມອບ​ໃບ​ອະນຸຍາດ​ນຳ​ໃຊ້​ເຕັກນິກ 5G ທາງ​ທຸລະ​ກິດ​ໃຫ້​ແກ່​ວິ​ສາ​ຫະ​ກິດ​ຂອງ​ຈີນ 4 ແຫ່ງ ຄື ChinaMobile China Telecom  China Unicom ແລະ China Broadcast Network.

    ຕາມ​ການ​ຮ້ອງ​ຂໍ​ຈາກ​ວິ​ສາ​ຫະ​ກິດ 4 ແຫ່ງ​ດັ່ງກ່າວ ກະຊວງ​ອຸດສາຫະກຳ ແລະ​ເຕັກ​ໂນ​ໂລ​ຊີ​ຂໍ້​ມູນ​ຂ່າວສານ​ຈີນ ໄດ້​ມອບ​ໃບ​ອະນຸຍາດ​ດຳເນີນ​ທຸລະ​ກິດ​ໂທລະ​ຄົມ​ພື້ນຖານ ຕາມ​ລະບຽບ​ກົດໝາຍ ໂດຍ​ໄດ້​ອະນຸຍາດ​ໃຫ້​ວິ​ສາ​ຫະ​ກິດ 4 ແຫ່ງ​ນັ້ນ ດຳເນີນ ທຸລະ​ກິດ​ໃຫ້​ບໍລິການ​ການ​ສື່ສານ​ເຄື່ອນ​ທີ່​ດີ​ຈີ​ຕອນ​ລຸ້ນ​ທີ 5.

   ທ່ານ ໝຽວ​ເຫວີຍ ລັດຖະມົນຕີ​ກະຊວງ​ອຸດສາຫະກຳ ແລະ ເຕັກ​ໂນ​ໂລ​ຊີ​ຂໍ້​ມູນ​ຂ່າວສານ ຈີນ​ໄດ້​ມອບ​ໃບ​ອະນຸຍາດ​ໃນ​ມື້​ດັ່ງກ່າວ ແລະ ໄດ້​ກ່າວ​ເນັ້ນ​ໃຫ້​ບັນດາ​ວິ​ສາ​ຫະ​ກິດ ຕ້ອງ​ຖື​ຕະຫຼາດ ແລະ ການ​ບໍລິການ​ເປັນໃຈ​ກາງ ຊຸກຍູ້​ການ​ເຊື່ອມ​ໂຍງ​ການ​ນຳ​ໃຊ້ 5G ແລະ ການ​ພັດທະນາ​ດ້ວຍ​ການ​ປະດິດ​ສ້າງ​ໃໝ່​ຢ່າງ​ຕັ້ງໜ້າ ສຸມ​ໃສ່​ເຄືອ​ຂ່າຍ​ອິນ​ເຕີ​ເນັດ​ອຸດສາຫະກຳ IOT IOV ແລະ​ຂົງເຂດ​ອື່ນໆ ເພື່ອ​ສ້າງ​ປັນຍາ​ປະດິດ​ໃຫ້​ແກ່​ຂະແໜງການ​ທີ່​ກ່ຽວຂ້ອງ​ໃຫ້​ຫຼາຍ​ກວ່າ​ເກົ່າ ຊຸກຍູ້​ໃຫ້​ຂະແໜງການ​ຕ່າງໆ​ພັດທະນາ​ຫັນ​ເປັນ​ດີ​ຈີ​ຕອນ ເຄືອ​ຂ່າຍ ແລະ ​ອັ​ສະ​ລິ​ຍະ.

    ການ​ມອບ​ໃບ​ອະນຸຍາດ​ດຳເນີນ​ທຸລະ​ກິດ ດ້ານ​ການ​ບໍລິການ​ເຄືອ​ຂ່າຍ​ອິນ​ເຕີ​ເນັດ​ລະບົບ 5G ຈະ​ສາມາດ​ບັນລຸ​ເປົ້າ​ໝາຍ​ການ​ສ້າງ​ເຄືອ​ຂ່າຍ​ຢູ່​ໃນ​ຕົວ​ເມືອງ ແລະ ທ້ອງຖິ່ນ​ຈຳນວນ​ໜຶ່ງ​ໃນ​ຂອບ​ເຂດ​ທີ່​ກວ້າງຂວາງ ຜະລິດ​ຕະ​ພັນ​ທີ່​ກ່ຽວຂ້ອງ​ຂອງ​ລະບົບ 5G ກໍ​ຈະ​ເຂົ້າ​ສູ່​ຕະຫຼາດ​ເທື່ອ​ລະ​ກ້າວ.

ຂ່າວທີ່ກ່ຽວຂ້ອງ