ຮອງນາຍົກ ຊີ້ແຈງຫຼາຍບັນຫາສຳຄັນທີ່ ສສຊ ຊັກຖາມ

1.638 07 ມິ.ຖ. 2019 ຂ່າວໜ້າ​ໜຶ່ງ
ຮອງນາຍົກ ຊີ້ແຈງຫຼາຍບັນຫາສຳຄັນທີ່ ສສຊ ຊັກຖາມ

    ກອງ​ປະ­ຊຸມ​ສະ­ໄໝ​ສາ­ມັນ​ເທື່ອ​ທີ 7 ຂອງ​ສະ­ພາ​ແຫ່ງ​ຊາດ ຊຸດ​ທີ VIII  ໃນ​ວັນ​ທີ 6 ມິ­ຖຸ­ນາ 2019 ທີ່​ສະ­ພາ​ແຫ່ງ​ຊາດ (ຫຼັກ6) ໂດຍ​ເປັນ​ປະ­ທານ​ຂອງ​ທ່ານ​ນາງ ປາ­ນີ ຢາ​ທໍ່​ຕູ້ ປະ­ທານ​ສະ­ພາ​ແຫ່ງ​ຊາດ ມີ​ບັນ­ດາ​ລັດ­ຖະ­ມົນ­ຕີ ແລະ ສະ­ມາ­ຊິກ​ສະ­ພາ​ແຫ່ງ​ຊາດ (ສສຊ) ເຂົ້າ​ຮ່ວມ.

   ສຳ­ລັບ​ກອງ​ປະ­ຊຸມ​ມື້​ທີ​ສອງ ທ່ານ ສົມ​ດີ ດວງ​ດີ ຮອງ​ນາ­ຍົກ­ລັດ­ຖະ­ມົນ­ຕີ ລັດ­ຖະ­ມົນ­ຕີ​ກະ­ຊວງ​ການ​ເງິນ ໄດ້​ຂຶ້ນ​ຊີ້​ແຈງ​ຕໍ່​ຄຳ​ຊັກ​ຖາມ​ຂອງ ສສຊ ກ່ຽວ​ກັບ​ການ­ຈັດ­ຕັ້ງ​ປະ­ຕິ­ບັດ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ແຫ່ງ​ຊາດ ແລະ ແຜນ​ງົບ­ປະ­ມານ​ແຫ່ງ​ລັດ 4 ເດືອນ ຄາດ​ຄະ­ເນ 6 ເດືອນ​ຕົ້ນ​ປີ ເປັນ­ຕົ້ນ: ຄວາມ​ຄືບ​ໜ້າ­ການ​ແກ້​ໄຂ​ບັນ­ຫາ​ໜີ້​ສິນ​ສາ­ທາ­ລະ­ນະ ໂດຍ​ສະ­ເພາະ ໜີ້​ພາຍ​ໃນ ແລະ ຕ່າງ­ປະ­ເທດ ຕໍ່​ໜີ້​ສິນ​ຕ່າງ­ປະ­ເທດ​ທີ່​ກະ­ຊວງ​ການ​ເງິນ​ກູ້​ມາ​ໂດຍ​ກົງ​ຫຼື ພາກ​ວິ​ສາ​ຫະ​ກິດ​ເອ­ກະ​ຊົນ​ກູ້​ມາ ເຊິ່ງ​ບັນ­ຫາ​ນີ້​ໄດ້­ແກ່​ຍາວ​ມາ​ດົນ ແລະ ໄດ້​ຍົກ​ຂຶ້ນ​ມາ​ເວົ້າ​ໃນ​ຫຼາຍ​ກອງ​ປະ­ຊຸມ​ແລ້ວ ແຕ່​ເນື່ອງ​ຈາ​ກວ່າ​ບັນ­ຫາ​ງົບ​ປະ​ມາ​ໄດ້​ມີ​ການ​ແກ່­ຍາວ​ມາ​ຕະ­ຫຼອດ ຈຶ່ງ​ເຮັດ​ໃຫ້​ໜີ້​ສິນ​ຢູ່​ໃນ​ລະ­ດັບ​ສູງ​ສົມ­ຄວນ​ຫຼາຍ​ກວ່າ 60% ຂອງ GDP ໂດຍ​ສະ­ເພາະ ກັບ​ໜີ້​ການ​ລົງ­ທຶນ​ຂອງ​ຕ່າງ­ປະ­ເທດ​ຍັງ​ສູງ ແຕ່​ແນວ­ໃດ​ກໍ​ດີ​ລັດ​ຖະ ບານ​ໄດ້​ມີ​ຄວາມ​ພະ­ຍາ­ຍາມ​ໃນ​ການ​ຊຳ­ລະ​ໜີ້​ໃຫ້​ທັນ​ຕາມ​ກຳ­ນົດ​ເວ­ລາ ສ່ວນ​ໜີ້​ການ​ລົງ­ທຶນ​ຂອງ​ລັດ​ໄດ້​ມີ​ຫຼາຍ​ມາດ​ຕະ­ການ​ແກ້​ໄຂ​ຜ່ານ​ມາ ໂດຍ​ການ​ອ່ວຍ​ໜີ້​ສາມ​ແຈ​ຂຶ້ນ​ແຜນ​ງົບ­ປະ­ມານ​ປົກ­ກະ­ຕິ ເພື່ອ​ຊຳ­ລະ​ໜີ້​ການ​ລົງ­ທຶນ ເຮັດ​ໃຫ້​ມີ​ການ​ຫຼຸດ­ຜ່ອນ​ໜີ້​ສິນ​ໄດ້​ຈຳ­ນວນ​ໜຶ່ງ ພ້ອມ​ທັງ​ມີ​ນະ­ໂຍ­ບາຍ​ຈຳ­ກັດ​ໃນ​ການ​ກໍ່­ສ້າງ​ໃໝ່ ໂຄງ­ການ​ທີ່​ເຫັນ​ວ່າ​ມີ​ຄວາມ​ຈຳ­ເປັນ​ອັນ​ຮີບ​ດ່ວນ ສຸມ​ໃສ່​ແກ້​ໄຂ​ໂຄງ­ການ​ທີ່​ໄດ້​ສືບ­ຕໍ່​ໃຫ້​ສຳ­ເລັດ ແລະ ມີ​ການ​ກວດ­ກາ​ຄືນ​ມູນ​ຄ່າ​ຂອງ​ໂຄງ­ການ​ທີ່​ເຫັນ​ວ່າ​ບໍ່​ສົມ​ເຫດ​ສົມ​ຜົນ ສະ­ເພາະ​ການ​ຊຳ­ລະ​ດອກ​ເບ້ຍ ໃນ​ປີ​ນີ້​ລັດ­ຖະ­ບານ​ຈະ​ບໍ່​ຢືມ​ເງິນ​ຈາກ​ຕ່າງ­ປະ­ເທດ​ມາ​ເພື່ອ​ຊຳ­ລະ​ດອກ ແຕ່​ຈະ​ຫັນ​ການ​ລະ­ດົມ​ພາຍ​ໃນ​ເພື່ອ​ຊຳ­ລະ​ແທນ​ຮອດ​ປີ 2020 ໃຫ້​ເອົາ​ລາຍ​ຮັບ​ທັບ​ລາຍ​ຈ່າຍ​ໃຫ້​ຢູ່​ກັນ ໝາຍ​ຄວາມ​ຮັບ​ເທົ່າ­ໃດ​ຂຶ້ນ​ແຜນ​ຈ່າຍ​ເທົ່າ​ນັ້ນ ຮອດ​ປີ 2021-2022 ລາຍ​ຮັບ​ພາຍ​ໃນ​ຕ້ອງ​ໄດ້​ມີ​ການ​ບຸກ​ບືນ​ຂຶ້ນ ເຊິ່ງ​ໃນ 2-3 ປີ​ຕໍ່­ໜ້າ​ໜີ້​ສິນ​ຂອງ​ພວກ​ເຮົາ​ຍັງ​ຈະ​ກົດ​ດັນ​ຢູ່.

    ການ​ຄ້ຳ­ປະ­ກັນ​ໃຫ້​ລັດ​ວິ​ສາ​ຫະ​ກິດ ແລະ ທຸ­ລະ​ກິດ​ເອ­ກະ​ຊົນ ສຳ­ລັບ​ງົບ­ປະ­ມານ​ລັດ​ຄ້ຳ­ປະ­ກັນ​ຍັງ​ຄ້ຳ­ປະ­ກັນ​ຢູ່​ມາ​ຮອດ​ປັດ­ຈຸ­ບັນ ແມ່ນ​ຍັງ​ຊຳ­ລະ​ໄດ້​ປົກ­ກະ­ຕິ ໜີ້​ຂອງ​ລັດ​ວິ​ສາ​ຫະ​ກິດ ສ່ວນ​ໃຫຍ່​ແມ່ນ​ບໍ່​ທັນ​ຮອດ​ໄລ­ຍະ​ການ​ຊຳ­ລະ​ຕົ້ນ​ທຶນ​ໃນ​ໄລ­ຍະ​ການ​ກູ້​ຢືນ​ເບື້ອງ​ຕົ້ນ ຍັງ​ປອດ​ດອກ​ເບ້ຍ ຍັງ​ປອດ​ຕົ້ນ​ທຶນ ແຕ່​ຍັງ​ບໍ່​ທັນ​ໄດ້​ສຳ​ລະ​ຕົ້ນ​ທຶນ​ເທື່ອ ສຳ­ລັບ​ການ​ກູ້​ໃໝ່​ກໍ​ຄື​ກັນ​ໃນ​ໂຄງ­ການ​ຕ່າງໆ ຈະ​ໄດ້​ເບິ່ງ​ຖ້າ­ວ່າ​ບໍ່​ສາ­ມາດ​ກຸ້ມ​ຕົນ​ເອງ​ຂອງ​ໂຄງ­ການ​ກໍ​ຈະ​ບໍ່​ອະ­ນຸ­ຍາດ​ໃຫ້​ກູ້​ຢືມ ການ​ກູ້​ຢືມ​ທັງ​ໜີ້​ຂອງ​ລັດ​ເອງ ແລະ ໜີ້​ທຸ­ລະ​ກິດ ໄດ້​ມີ​ການ​ປຶກ­ສາ​ຫາ­ລື​ກັນ​ຢ່າງ​ຖີ່​ຖ້ວນ​ທີ່​ສຸດ ສະ­ຖິ­ຕິ​ຖານ​ເກັບ​ກຳ​ລາຍ​ຮັບ​ທີ່​ຖາ­ວອນ​ຄົບ​ຖ້ວນ​ສ້າງ​ລາຍ​ຮັບ ແມ່ນ​ປະ­ຕິ­ບັດ​ຕາມ​ຄຳ​ສັ່ງ​ນາ­ຍົກ ເລກ​ທີ 40 ເພື່ອ​ກວດ­ກາ​ລາຍ​ຮັບ​ຄືນ­ໃໝ່ ເລີ່ມ​ປີ 2016 ໄດ້​ສົມ­ທົບ​ກັບ​ຂະ­ແໜງ­ການ​ທ້ອງ­ຖິ່ນ​ກວດ­ກາ​ສັງ​ລວມ​ຂໍ້​ມູນ 2019 ເຫັນ​ວ່າ​ມີ​ຫົວ­ໜ່ວຍ​ເພີ່ມ​ຂຶ້ນ​ຈາກ​ການ​ກວດ­ກາ​ດັ່ງ­ກ່າວ ມາ​ຮອດ​ປັດ­ຈຸ­ບັນ​ຍັງ​ສືບ­ຕໍ່​ເຮັດ​ເກັບ​ກຳ​ຖານ​ຂໍ້​ມູນ​ລາຍ​ຮັບ ໂດຍ​ສະ­ເພາະ ຢູ່​ນະ­ຄອນ­ຫຼວງ​ໄດ້​ເຮັດ 4 ຕົວ​ເມືອງ ລົງ​ໄປ​ສຳ​ຫຼວດ​ຄືນ­ໃໝ່​ຖານ​ລາຍ​ຮັບ​ຖື​ວ່າ​ມີ​ຕົວ​ເລກ​ເພີ່ມ​ຂຶ້ນ ເພື່ອ​ເຮັດ​ໃຫ້­ການ​ເກັບ​ລາຍ​ຮັບ​ຜ່ານ​ລະ­ບົບ​ທີ່​ທັນ​ສະ­ໄໝ.

ຂ່າວທີ່ກ່ຽວຂ້ອງ