ລາວ-ຕີມໍເລສເຕ ເພີ່ມທະວີການຮ່ວມມືສອງຝ່າຍ

1.203 07 ມິ.ຖ. 2019 ຂ່າວໜ້າ​ໜຶ່ງ
ລາວ-ຕີມໍເລສເຕ ເພີ່ມທະວີການຮ່ວມມືສອງຝ່າຍ

    ໂດຍ​ຕອບ​ສະ­ໜອງ​ຕາມ​ຄຳ​ເຊີນ​ຂອງ​ທ່ານ ສະ­ເຫຼີມ​ໄຊ ກົມ​ມະ​ສິດ ລັດ­ຖະ­ມົນ­ຕີ​ກະ­ຊວງ​ການ​ຕ່າງ­ປະ­ເທດ ສປປ ລາວ ທ່ານ ດິ​ໂອ​ນິ​ຊິ​ໂອ ດາ​ຄອສ໌​ຕາ​ບາ​ໂບ ໂຊ​ອາ​ເຣສ໌ ລັດ­ຖະ­ມົນ­ຕີ​ກະ­ຊວງ​ການ​ຕ່າງ­ປະ­ເທດ ແລະ ການ​ຮ່ວມ​ມື ຕີ​ມໍ​ເລ​ສ​ເຕ ພ້ອມ​ດ້ວຍ​ຄະ­ນະ​ໄດ້​ເດີນ­ທາງ​ມາ​ຢ້ຽມ­ຢາມ​ລາວ​ຢ່າງ​ເປັນ​ທາງ​ການ​ໃນ​ວັນ​ທີ 5-8 ມິ­ຖຸ­ນາ ນີ້ ເພື່ອ​ເສີມ​ຂະ­ຫຍາຍ​ສາຍ​ພົວ­ພັນ​ມິດ­ຕະ­ພາບ ແລະ ການ​ຮ່ວມ​ມື​ອັນ​ດີ​ລະ­ຫວ່າງ​ສອງ​ປະ­ເທດ.

    ວັນ​ທີ 6 ມິ­ຖຸ­ນາ 2019 ທີ່​ກະ­ຊວງ​ການ​ຕ່າງ­ປະ­ເທດ ທ່ານ ສະ­ເຫຼີມ​ໄຊ ກົມ​ມະ​ສິດ ໄດ້​ໃຫ້​ກຽດ​ຕ້ອນ­ຮັບ ແລະ ພົບ​ປະ​ສອງ​ຝ່າຍ​ກັບ​ທ່ານ ດິ​ໂອ​ນິ​ຊິ​ໂອ ດາ​ຄອສ໌​ຕາ​ບາ​ໂບ ໂຊ​ອາ​ເຣສ໌ ໂອ­ກາດ​ນີ້ ທ່ານ ສະ­ເຫຼີມ​ໄຊ ກົມ​ມະ​ສິດ ໄດ້​ສະ­ແດງ​ຄວາມ​ຕ້ອນ­ຮັບ ແລະ ຕີ​ລາ­ຄາ​ສູງ​ຕໍ່​ການ​ມາ​ຢ້ຽມ­ຢາມ​ລາວ​ເປັນ​ຄັ້ງ​ທຳ​ອິດ​ຂອງ​ທ່ານ ດິ​ໂອ​ນິ​ຊິ​ໂອ ດາ​ຄອສ໌​ຕາ ບາ​ໂບ​ໂຊ​ອາ​ເຣສ໌ ພາຍ­ຫຼັງ​ທີ່​ໄດ້​ດຳ­ລົງ​ຕຳ­ແໜ່ງ​ເປັນ​ລັດ­ຖະ­ມົນ­ຕີ​ຕ່າງ­ປະ­ເທດ ແລະ ການ​ຮ່ວມ​ມື​ຂອງ ຕີ​ມໍ​ເລ​ສ​ເຕ ເຊິ່ງ​ເປັນ​ການ​ປະ­ກອບ­ສ່ວນ​ອັນ​ສຳ­ຄັນ​ເຂົ້າ​ໃນ​ການ​ເສີມ​ຂະ­ຫຍາຍ​ສາຍ​ພົວ­ພັນ​ມິດ­ຕະ­ພາບ ແລະ ການ​ຮ່ວມ​ມື​ລະ­ຫວ່າງ​ລາວ ແລະ ຕີ​ມໍ​ເລ​ສ​ເຕ ໃຫ້​ມີ​ບາດ­ກ້າວ​ໃໝ່ ແລະ ຂະ­ຫຍາຍ­ຕົວ​ສູງ​ຂຶ້ນ​ຕື່ມ​ອີກ​ກ້າວ​ໜຶ່ງ ພ້ອມ​ນີ້ ສອງ​ຝ່າຍ​ໄດ້​ຕີ​ລາ­ຄາ​ສູງ​ຕໍ່​ການ​ພົວ­ພັນ​ຮ່ວມ​ມື​ຂອງ​ສອງ​ປະ­ເທດ​ທີ່​ມີ​ບາດ­ກ້າວ​ຂະ­ຫຍາຍ­ຕົວ​ຢ່າງ​ຕັ້ງ­ໜ້າ ຕະ­ຫຼອດ​ໄລ­ຍະ​ນັບ​ແຕ່​ສ້າງ­ຕັ້ງ​ສາຍ​ພົວ­ພັນ​ການ​ທູດ​ຮ່ວມ​ກັນ​ໃນ​ວັນ​ທີ 29 ກໍ­ລະ­ກົດ 2002 ເປັນ­ຕົ້ນ​ມາ ເຫັນ​ໄດ້​ຈາກ​ການ​ແລກ­ປ່ຽນ​ການ​ຢ້ຽມ­ຢາມ​ຂອງ​ການ​ນຳ​ສອງ​ປະ­ເທດ ການ​ໃຫ້­ການ​ສະ­ໜັບ­ສະ­ໜູນ​ຊຸກ­ຍູ້​ຊ່ວຍ­ເຫຼືອ​ເຊິ່ງ​ກັນ ແລະ ກັນ ທັງ​ໃນ​ເວ­ທີ​ພາກ​ພື້ນ ແລະ ສາ­ກົນ ຢ່າງ​ສະ­ເໝີ​ຕົ້ນ​ສະ­ເໝີ​ປາຍ ການ​ຮ່ວມ​ມື​ສອງ​ຝ່າຍ​ທາງ​ດ້ານ​ການ​ຄ້າ-ການ​ລົງ­ທຶນ ເຫັນ​ວ່າ​ຍັງ​ມີ​ຂໍ້​ຈຳ­ກັດ ສອງ​ຝ່າຍ​ສະ­ແດງ​ຄວາມ​ຍິນ​ດີ​ຈະ​ສືບ­ຕໍ່​ຊຸກ­ຍູ້​ໃຫ້​ມີ​ການ​ຮ່ວມ​ມື​ກັນ​ຫຼາຍ​ຂຶ້ນ ເປັນ­ຕົ້ນ ການ​ສົ່ງ­ເສີມ​ການ​ຮ່ວມ​ມື​ດ້ານ​ເສດ­ຖະ­ກິດ ການ​ຄ້າ ແລະ ເຕັກ­ນິກ ຂະ­ແໜງ­ການ​ອຸດ­ສາ­ຫະ­ກຳ ການ​ປູກ­ຝັງ ແລະ ລ້ຽງ­ສັດ ຂົນ­ສົ່ງ​ສິນ­ຄ້າ ແຮງ​ງານ ການ­ທ່ອງ­ທ່ຽວ ການ​ເຝິກ­ອົບ­ຮົມ​ວິ­ຊາ​ຊີບ ການ​ພົບ​ປະ​ແລກ­ປ່ຽນ​ຂອງ​ພາກ​ທຸ­ລະ​ກິດ ສະ­ພາ​ການ​ຄ້າ ແລະ ອຸດ­ສາ­ຫະ­ກຳ ແລະ ອື່ນໆ ສືບ­ຕໍ່​ຄົ້ນ­ຄວ້າ​ທ່າ­ແຮງ​ບົ່ມ​ຊ້ອນ​ຂອງ​ສອງ​ຝ່າຍ​ເພື່ອ​ຮ່ວມ​ມື​ກັນ​ໃນ​ອະ­ນາ­ຄົດ ເປັນ­ຕົ້ນ ການ​ແລກ­ປ່ຽນ​ຄວາມ​ຮູ້​ດ້ານ​ການ​ປະ­ມົງ ການ​ຂຸດ​ຄົ້ນ​ນ້ຳ­ມັນ ແລະ ອາຍ​ກາ​ສ ການ​ປູກ​ກາ­ເຟ ແລະ ເຂົ້າ ການ​ຮ່ວມ​ມື​ດ້ານ​ການ­ທ່ອງ­ທ່ຽວ ແລະ ການ­ບິນ ເພື່ອ​ສົ່ງ­ເສີມ​ໃຫ້​ມີ​ການ​ໄປ­ມາ­ຫາ­ສູ່​ກັນ ແລະ ຮັດ​ແໜ້ນ​ຄວາມ​ເຂົ້າ​ອົກ​ເຂົ້າ­ໃຈ​ລະ­ຫວ່າງ​ປະ­ຊາ­ຊົນ​ສອງ​ປະ­ເທດ ສືບ­ຕໍ່​ຈັດ​ຕັ້ງ​ປະ­ຕິ­ບັດ​ສັນ­ຍາ​ທີ່​ໄດ້​ລົງ​ນາມ​ຮ່ວມ​ກັນ​ແລ້ວ​ນັ້ນ ໃຫ້​ໄດ້​ຮັບ​ໝາກ­ຜົນ​ຢ່າງ​ເປັນ​ຮູບ​ປະ​ທຳ ນອກ​ນີ້ ສອງ​ຝ່າຍ​ຍັງ​ໄດ້​ລາຍ​ງານ​ສະ­ພາບ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ ໂດຍ​ລວມ​ຂອງ​ຕົນ ແລະ ແລກ­ປ່ຽນ​ທັດ­ສະ­ນະ​ຕໍ່​ບັນ­ຫາ​ພາກ​ພື້ນ ແລະ ສາ­ກົນ​ໃຫ້​ກັນ​ຊາບ.

ຂ່າວທີ່ກ່ຽວຂ້ອງ