ຜູ້ນຳ​ຣັດ​ເຊຍ ແລະ ຈີນ ເຫັນ​ດີ​ຍົກ​ລະດັບ​ການ​ພົວພັນ​ລະຫວ່າງ​ສອງ​ຝ່າຍ

580 07 ມິ.ຖ. 2019 ຂ່າວຕ່າງປະເທດ
ຜູ້ນຳ​ຣັດ​ເຊຍ ແລະ ຈີນ ເຫັນ​ດີ​ຍົກ​ລະດັບ​ການ​ພົວພັນ​ລະຫວ່າງ​ສອງ​ຝ່າຍ

    ຣັດ​ເຊຍ ແລະ ຈີນ ໄດ້​ເຫັນ​ດີ​ເປັນ​ເອກະສັນ​ກັນ​ເມື່ອ​ວັນ​ທີ 5 ມິຖຸນາ​ນີ້ ກ່ຽວ​ກັບ​ການ​ຍົກ​ລະດັບ​ການ​ພົວພັນ​ລະຫວ່າງ​ສອງ​ປະເທດ ຂຶ້ນ​ສູ່​ລະດັບ​ການ​ພົວພັນ​ຄູ່​ຮ່ວມ​ຍຸດ​ທະ​ສາດ​ຮອບດ້ານ ຂອງ​ການ​ຮ່ວມ​ມື​ໃນ​ຍຸກ​ໃໝ່. ການ​ຕົກລົງ​ດັ່ງກ່າວ ຖືກ​ນຳ​ອອກ​ມາ​ຢູ່​ໃນ​ການ​ພົບ​ປະ​ເຈລະຈາ ລະຫວ່າງ​ປະທານາທິບໍດີ​ຣັດ​ເຊຍ ວາ​ລາ​ດີ​ເມຍ ປູ​ຕິນ ກັບ​ປະທານ​ປະເທດ​ຈີນ ສີ​ ຈິ້ນ​ຜິງ ທີ່ຢູ່​ລະຫວ່າງ​ການ​ຢ້ຽມຢາມ​ຣັດ​ເຊຍ.

    ໃນ​ການ​ເຈລະຈາ​ດັ່ງກ່າວ ຜູ້ນຳ​ທັງ​ສອງ​ໄດ້​ຕີ​ລາຄາ​ການ​ພົວພັນ​ລະຫວ່າງ​ສອງ​ປະເທດ ໃນ​ໄລຍະ​ທີ່​ຜ່ານ​ມາ ທ່າມກາງ​ທີ່​ຣັດ​ເຊຍ ແລະ ຈີນ ພວມ​ພະຍາຍາມ​ເພີ່ມ​ທະວີ​ການ​ຮ່ວມ​ມື ໃນ​ຂະນະ​ທີ່​ຄວາມ​ເຄັ່ງ​ຕຶງ​ກັບ ສ ອາ​ເມ​ຣິ​ກາ ເພີ່ມ​ຂຶ້ນ.

    ຄາດ​ວ່າ ໃນ​ໂອກາດ​ການ​ຢ້ຽມຢາມ​ຣັດ​ເຊຍ ຂອງ​ຜູ້ນຳ​ຈີນ​ໃນ​ເທື່ອ​ນີ້ ສອງ​ຝ່າຍ​ຈະ​ໄດ້​ລົງ​ນາມ​ຂໍ້​ຕົກລົງ​ປະມານ 30 ສະບັບ ແລະ ຈະ​ມີ​ຖະແຫຼງການ​ອອກ​ມາ ກ່ຽວ​ກັບ​ການ​ເພີ່ມ​ທະວີ​ຄວາມ​ໝັ້ນຄົງ​ຍຸດ​ທະ​ສາດ. ໃນ​ຂະນະ​ດຽວ​ກັນ ປະທານ ສີ ​ຈິ້ນ​ຜິງ ກໍ​ຈະ​ເຂົ້າ​ຮ່ວມ​ເວທີ​ປາ​ໄສ​ເສດຖະກິດ​ຢູ່​ທີ່​ນະຄອນ ແຊງ ເປ​ແຕກ​ບວກ ໃນ​ຖານະ​ທີ່​ເປັນ​ແຂກ​ຮັບ​ເຊີນ​ກິ​ຕິ​ມະ​ສັກ ແລະ ຈະ​ມີ​ຄຳ​ປາ​ໄສ​ຕໍ່​ວາລະ​ປະຊຸມ​ຄົບ​ຄະນະ​ຂອງ​ເວທີ​ປາ​ໄສ​ນີ້​ດ້ວຍ.

ຂ່າວທີ່ກ່ຽວຂ້ອງ