ຂ່າວຫຼ້າສຸດ

WB ປັບ​ຫຼຸດ​ຕົວ​ເລກ​ຄາດ​ຄະເນ​ການຂະຫຍາຍຕົວ​ຂອງ​ເສດຖະກິດ​ທົ່ວ​ໂລກ

373 07 ມິ.ຖ. 2019 ຂ່າວຕ່າງປະເທດ
WB ປັບ​ຫຼຸດ​ຕົວ​ເລກ​ຄາດ​ຄະເນ​ການຂະຫຍາຍຕົວ​ຂອງ​ເສດຖະກິດ​ທົ່ວ​ໂລກ

    ໃນ​ບົດ​ລາຍ​ງານ ກ່ຽວ​ກັບ​ຄວາມ​ຫວັງ​ຂອງ​ເສດຖະກິດ​ທົ່ວ​ໂລກ ທີ່​ໄດ້​ນຳ​ອອກ​ມາ​ເປີດເຜີຍ​ເມື່ອ​ວັນ​ທີ 4 ມິຖຸນາ​ນີ້ ທະນາຄານ​ໂລກ (WB) ໄດ້​ປັບ​ຫຼຸດ​ຕົວ​ເລກ​ຄາດ​ຄະເນ​ຄວາມ​ເຕີບ​ໂຕ​ຂອງ​ເສດຖະກິດ​ໂລກ ໃນ​ເມື່ອ​ວ່າການ​ພິພາດ​ທາງ​ດ້ານ​ການ​ຄ້າ​ເພີ່ມ​ຂຶ້ນ ແລະ ຈັງຫວະ​ຄວາມ​ເຕີບ​ໂຕ​ຂອງ​ບັນດາ​ພື້ນຖານ​ເສດຖະກິດ​ຂະໜາດ​ໃຫຍ່​ຫຼຸດ​ລົງ. WB ຢັ້ງຢືນ​ວ່າ ເສດຖະກິດ​ທົ່ວ​ໂລກ ຈະ​ເຕີບ​ໂຕ​ທີ່ 2,6% ໃນ​ປີ​ນີ້ ເປັນ​ການ​ຫຼຸດ​ລົງ 0,3 ຈຸດ​ສ່ວນ​ຮ້ອຍ ເມື່ອ​ທຽບໃສ່​ການ​ຄາດ​ຄະເນ​ທີ່​ນຳ​ອອກ​ມາ​ເມື່ອ​ເດືອນ​ມັງກອນ ແລະ​ກໍ​ຕ່ຳ​ກວ່າ​ລະດັບ​ຄວາມ​ເຕີບ​ໂຕ​ທີ່ 3% ຂອງ​ປີ​ກາຍ.

    ສຳລັບ​ຢູ່​ໃນ​ເຂດ​ອາຊີ​ຕາເວັນ​ອອກ ແລະ ປາ​ຊີ​ຟິກ ຄວາມ​ເຕີບ​ໂຕ​ເສດຖະກິດ​ອາດ​ຈະ​ບັນລຸ​ພຽງ​ທີ່ 5,9% ນັບ​ວ່າ​ເປັນ​ເທື່ອ​ທຳ​ອິດ​ທີ່​ລົງ​ສູ່ ຕ່ຳ​ກວ່າ​ລະດັບ 6% ນັບ​ແຕ່​ເກີດ​ວິ​ກິດ​ການ​ການ​ເງິນ​ໃນ​ອາຊີ ເມື່ອ 20 ກວ່າ​ປີກ​ອ່ານ​ໜ້າ​ນີ້​ເປັນຕົ້ນ​ມາ ໃນ​ຂະນະ​ດຽວ​ກັນ ການ​ຄາດ​ຄະເນ​ຄວາມ​ເຕີບ​ໂຕ​ຂອງ​ເສດຖະກິດ​ຈີນ ຍັງ​ຄົງ​ຢູ່​ທີ່​ລະດັບ 6,2% ໃນ​ປີ​ນີ້.

    ຄວາມ​ຫວັງ​ເຕີບ​ໂຕ​ຂອງ​ເສດຖະກິດ ສ ອາ​ເມ​ຣິ​ກາ ບໍ່​ມີ​ການ​ປ່ຽນແປງ ໂດຍ​ຍັງ​ຄົງ​ຢູ່​ທີ່ 2,5% ແຕ່​ວ່າການ​ສົ່ງ​ອອກ​ສິນຄ້າ​ຂອງ​ປະເທດ​ນີ້ ໄປ​ຍັງ​ເອີ​ຣົບ ແລະ ອາຊີ ຈະ​ຊັກ​ຊ້າ​ລົງ​ຢ່າງ​ເຫັນ​ໄດ້​ຈະແຈ້ງ. ໃນ​ຂະນະ​ດຽວ​ກັນ ສະພາບ​ເສດຖະກິດ​ຂອງ​ເຂດ​ໃຊ້​ເງິນ​ເອີ​ໂຣ ມີ​ວາມ​ຂີ້ຮ້າຍ​ລົງ​ໄປ​ຢ່າງ​ໄວວາ ດ້ວຍ​ລະດັບ​ການ​ຄາດ​ຄະເນ​ຄວາມ​ເຕີບ​ໂຕ ໄດ້​ຮັບ​ການ​ດັດແກ້​ຫຼຸດ​ລົງ​ຈາກ 1,6% ລົງ​ສູ່ 1,2% ເມື່ອ​ການ​ສົ່ງ​ອອກ​ສິນຄ້າ​ໄປ​ຍັງ​ຈີນ ອາຊີ​ກາງ ແລະ ຕະຫຼາດ​ອື່ນໆ ຫຼຸດ​ລົງ.

   ເຄາະ​ຮ້າຍ​ທີ່​ໃຫຍ່​ໂຕ​ທີ່​ສຸດ ທີ່​ມີ​ຕໍ່​ເສດຖະກິດ​ທົ່ວ​ໂລກ ກໍ​ແມ່ນ ຄວາມ​ສ່ຽງ​ເພີ່ມ​ຂຶ້ນ ຂອງ​ຄວາມ​ຂັດ​ແຍ່ງ​ທາງ​ດ້ານ​ການ​ຄ້າ ລະຫວ່າງ​ບັນດາ​ພື້ນຖານ​ເສດຖະກິດ​ຂະໜາດ​ໃຫຍ່ ຊຶ່ງ​ຫຼ້າ​ສຸດ ກໍ​ແມ່ນ​ການ​ທີ່​ປະທານາທິບໍດີ ສ ອາ​ເມ​ຣິ​ກາ ໂດ​ນາ​​ລ ທຣຳ ແຈ້ງ​ອອກ​ມາ​ເມື່ອ​ທ້າຍ​ອາທິດ​ທີ່​ຜ່ານ​ມາ ເຖິງ​ການ​ທີ່​ຈະ​ເກັບ​ພາສີ​ຕໍ່​ສິນຄ້າ​ຂອງ​ປະເທດ​ເມັກ​ຊິກ ຍ້ອນ​ເກີດ​ຄວາມ​ຂັດ​ແຍ່ງ​ກ່ຽວ​ກັບ​ນະໂຍບາຍ​ຕໍ່​ຜູ້​ເຂົ້າ​ເມືອງ​ຕັ້ງ​ຖິ່ນ​ຖານ. ການ​ຄ້າ​ຂອງ​ທົ່ວ​ໂລກ​ໃນ​ປີ​ນີ້ ໄດ້​ຮັບ​ການ​ຖື​ວ່າ​ຈະ​ເຕີບ​ໂຕ​ພຽງ​ທີ່ 2,6% ນັບ​ວ່າ​ເປັນ​ລະດັບ​ຕ່ຳ​ສຸດ ນັບ​ແຕ່​ເກີດ​ວິ​ກິດ​ການ​ການ​ເງິນ ເມື່ອ​ປີ 2008 ເປັນຕົ້ນ​ມາ ແລະ ​ຫຼຸດ 1 ຈຸດ​ສ່ວນ​ຮ້ອຍ ເມື່ອ​ທຽບໃສ່​ການ​ຄາດ​ຄະເນ​ໄວ້​ເມື່ອ​ເດືອນ​ມັງກອນ​ທີ່​ຜ່ານ​ມາ.

ຂ່າວທີ່ກ່ຽວຂ້ອງ