ສູ້ຊົນເກັບລາຍຮັບໃຫ້ໄດ້ຕາມແຜນ ແລະ ຄຸ້ມຄອງລາຍຈ່າຍຢ່າງປະຢັດ

1.193 06 ມິ.ຖ. 2019 ຂ່າວໜ້າ​ໜຶ່ງ
ສູ້ຊົນເກັບລາຍຮັບໃຫ້ໄດ້ຕາມແຜນ ແລະ ຄຸ້ມຄອງລາຍຈ່າຍຢ່າງປະຢັດ

    ທ່ານ ທອງ​ລຸນ ສີ​ສຸ​ລິດ ນາ­ຍົກ­ລັດ­ຖະ­ມົນ­ຕີ ລາຍ​ງານ​ຕໍ່​ກອງ​ປະ­ຊຸມ​ສະ­ໄໝ​ສາ­ມັນ​ເທື່ອ​ທີ 7 ຂອງ​ສະ­ພາ​ແຫ່ງ​ຊາດ ຊຸດ​ທີ VIII ໃນ​ວັນ​ທີ 5 ມິ­ຖຸ­ນາ 2019 ວ່າ: ການ­ຈັດ­ຕັ້ງ​ປະ­ຕິ­ບັດ​ແຜນ​ງົບ­ປະ­ມານ​ແຫ່ງ​ລັດ 4 ເດືອນ​ຕົ້ນ​ປີ 2019 ດ້ານ​ລາຍ​ຮັບ​ບັນ­ລຸ​ໄດ້ 6.320 ຕື້​ກີບ ເທົ່າ​ກັບ 24% ຂອງ​ແຜນ­ການ​ປີ ລາຍ​ຮັບ​ພາຍ​ໃນ ປະ­ຕິ­ບັດ​ໄດ້ 6.242,5 ຕື້​ກີບ ແລະ ລາຍ​ຮັບ​ຈາກ​ການ​ຊ່ວຍ­ເຫຼືອ​ລ້າ​ປະ­ຕິ­ບັດ​ໄດ້ 78,8 ຕື້​ກີບ ລາຍ​ຈ່າຍ​ປະ­ຕິ­ບັດ​ໄດ້ 6.668 ຕື້​ກີບ ເທົ່າ​ກັບ 19,9% ຂອງ​ແຜນ­ການ​ປີ ໃນ​ນີ້ ສູນ​ກາງ​ປະ­ຕິ­ບັດ​ໄດ້ 4.727 ຕື້​ກີບ ເທົ່າ​ກັບ 19,6% ຂອງ​ແຜນ­ການ​ປີ ແລະ ທ້ອງ­ຖິ່ນ​ປະ­ຕິ­ບັດ​ໄດ້ 1.941 ຕື້​ກີບ ເທົ່າ​ກັບ 20,8% ຂອງ​ແຜນ­ການ​ປີ ຜ່ານ​ການ­ຈັດ­ຕັ້ງ​ປະ­ຕິ­ບັດ​ແຜນ​ລາຍ​ຮັບ-ລາຍ​ຈ່າຍ​ງົບ­ປະ­ມານ​ແຫ່ງ​ລັດ 4 ເດືອນ​ທີ່​ຜ່ານ​ມາ ມີ​ການ​ຂາດ​ດຸນ 347 ຕື້​ກີບ.

    ນອກ​ນີ້ ຍັງ​ມີ​ການ​ທົດ​ແທນ​ຄືນ​ຕົ້ນ​ທຶນ​ໜີ້​ສິນ​ພາຍ​ໃນ ແລະ ຕ່າງ­ປະ­ເທດ​ຢູ່​ແຫຼ່ງ​ດຸ່ນ​ດ່ຽງ 2.432 ຕື້​ກີບ ການ​ລະ­ດົມ​ທຶນ​ເພື່ອ​ມາ​ດຸ່ນ​ດ່ຽງ​ງົບ­ປະ­ມານ​ຈາກ​ພາຍ​ໃນ ແລະ ຕ່າງ­ປະ­ເທດ ປະ­ຕິ­ບັດ​ໄດ້ 3.453 ຕື້​ກີບ ເທົ່າ​ກັບ 19,6% ຂອງ​ແຜນ­ການ ເຖິງ​ຢ່າງ­ໃດ​ກໍ​ຕາມ ລັດ­ຖະ­ບານ​ກໍ​ຍັງ​ຕີ​ລາ­ຄາ​ວ່າ​ໂດຍ​ລວມ​ແລ້ວ ສະ­ພາບ​ການ​ພັດ­ທະ­ນາ​ທາງ​ດ້ານ​ເສດ­ຖະ­ກິດ ຍັງ​ສືບ­ຕໍ່​ຂະ­ຫຍາຍ­ຕົວ​ໃນ​ລະ­ດັບ 6,5% ຖື​ເປັນ​ອັດ­ຕາ​ການ​ເຕີບ​ໂຕ​ທີ່​ສູງ​ເມື່ອ​ທຽບ​ກັບ​ຫຼາຍ​ປະ­ເທດ​ໃນ​ພາກ​ພື້ນ ແຕ່​ເປັນ​ອັດ­ຕາ​ທີ່​ຊ້າ​ລົງ​ເມື່ອ​ທຽບ​ຫຼາຍ​ປີ­ຜ່ານ­ມາ ການ​ເຕີບ​ໂຕ​ຂອງ​ເສດ­ຖະ­ກິດ​ຊ້າ​ລົງ ການ​ປັບ­ປຸງ​ສົ່ງ­ເສີມ ແລະ ນຳ​ໃຊ້​ທ່າ­ແຮງ​ດ້ານ​ທ່ອງ​ທ່ຽວ​ຍັງ​ເຮັດ​ບໍ່​ທັນ​ໄດ້​ດີ ການ​ປັບ­ປຸງ​ວິ​ສາ​ຫະ​ກິດ​ລັດ ຍັງ​ມີ​ຄວາມ​ຫຼ້າ​ຊ້າ ການ​ແກ້​ໄຂ​ປາ­ກົດ­ການ​ຫຍໍ້­ທໍ້​ໃນ​ສັງ­ຄົມ ເປັນ­ຕົ້ນ ບັນ­ຫາ​ຢາ​ເສບ​ຕິດ ການ​ປຸ້ນ​ຈີ້​ຊີງ​ຊັບ ຂີ້­ລັກ ງັດ​ແງະ ອຸ­ບັດ­ເຫດ ແລະ ໄພ​ສັງ­ຄົມ​ອື່ນໆ ເຖິງ​ວ່າ​ໄດ້​ເອົາ­ໃຈ­ໃສ່​ແກ້​ໄຂ​ແຕ່​ກໍ​ຍັງ​ມີ​ລັກ­ສະ­ນະ​ແຜ່​ຫຼາຍ ແລະ ສົ່ງ​ຜົນ​ທາງ​ລົບ​ຕໍ່​ສັງ­ຄົມ ໂດຍ​ສະ­ເພາະ ໄວ​ໜຸ່ມ ແລະ ບັນ­ຫາ​ອື່ນໆ ສຳ­ລັບ​ສະ­ພາບ​ເສດ­ຖະ­ກິດ​ທີ່​ຍັງ​ຂະ­ຫຍາຍ­ຕົວ​ຊ້າ​ໃນ​ປັດ­ຈຸ­ບັນ ປາ­ກົດ­ການ​ໜຶ່ງ​ທີ່​ເກີດ​ຂຶ້ນ​ໃນ​ໄລ­ຍະ​ເວ­ລາ​ທີ່​ປະ­ເທດ​ເຮົາ​ກຳ­ລັງ​ເຂົ້າ​ສູ່​ຂະ​ບວນ​ການ​ປັບ​ໂຄງ​ສ້າງ​ທາງ​ດ້ານ​ເສດ­ຖະ­ກິດ ໂດຍ​ສະ­ເພາະ ໃນ​ເງື່ອນ­ໄຂ​ພວກ​ເຮົາ​ກຳ­ລັງ​ພະ­ຍາ­ຍາມ ຫຼຸດ­ຜ່ອນ​ການ​ເອື່ອຍ​ອີງ­ໃສ່​ການ​ລົງ­ທຶນ​ໃນ​ຂະ­ແໜງ​ພະ­ລັງ­ງານ ແລະ ບໍ່​ແຮ່ ແລະ ການ​ກູ້​ຢືມ​ຈາກ​ພາຍ​ນອກ​ມາ​ລົງ­ທຶນ​ໃສ່​ການ​ສ້າງ​ພື້ນ­ຖານ​ໂຄງ​ລ່າງ ທີ່​ມີ​ປະ​ສິດ­ທິ​ຜົນ​ທາງ​ດ້ານ​ເສດ­ຖະ­ກິດ​ຕ່ຳ ຊຸກ­ຍູ້​ການ​ຜະ­ລິດ​ເປັນ​ສິນ­ຄ້າ ການ​ສົ່ງ­ເສີມ​ອຸດ­ສາ­ຫະ­ກຳ​ປຸງ​ແຕ່ງ ການ­ທ່ອງ­ທ່ຽວ ແລະ ການ​ບໍ­ລິ­ການ​ຜ່ານ​ການ​ສົ່ງ­ເສີມ​ການ​ເຊື່ອມ​ຈອດ ແລະ ການ​ພັດ­ທະ­ນາ​ທ່າ­ແຮງ​ທາງ​ດ້ານ​ເສດ­ຖະ­ກິດ​ອື່ນໆ​ຂອງ​ປະ­ເທດ ກວດ­ກາ ເກືອດ​ຫ້າມ ແລະ ປະ­ຕິ­ບັດ​ມາດ​ຕະ­ການ​ທີ່​ເດັດ­ຂາດ​ຕໍ່​ການ­ເຄື່ອນ­ໄຫວ ເສດ­ຖະ­ກິດ​ທີ່​ຂັດ​ກັບ​ແນວ­ທາງ​ນະ­ໂຍ­ບາຍ ຜິດ​ກົດ­ໝາຍ ແລະ ບໍ່​ສອດ­ຄ່ອງ​ກັບ​ລະ­ບຽບ​ການ​ທີ່​ກ່ຽວ­ຂ້ອງ ເປັນ­ຕົ້ນ ການ​ປາບ​ປາມ ການ​ຄ້າ­ຂາຍ​ຢາ​ເສບ​ຕິດ ການ​ຕັດ ແລະ ສົ່ງ​ໄມ້​ທ່ອນ​ອອກ​ປະ­ເທດ ການ​ລັກ­ລອບ​ໜີ​ພາ­ສີ ແລະ ການ­ເຄື່ອນ­ໄຫວ​ອື່ນໆ ເຊິ່ງ​ເປັນ​ການ​ຈຳ­ກັດ ແລະ ອັດ​ຊ່ອງ​ທາງ​ຂອງ​ກະ­ແສ​ເງິນ​ທີ່​ບໍ່​ຖືກ­ຕ້ອງ​ເຂົ້າ​ປະ­ເທດ ແລະ ອື່ນໆ.

    ທ່ານ ທອງ​ລຸນ ສີ​ສຸ​ລິດ ໄດ້​ກ່າວ​ຕື່ມ​ວ່າ: ລັດ­ຖະ­ບານ​ຄາດ​ຄະ­ເນ​ຄວາມ​ອາດ​ສາ­ມາດ ໃນ​ການ​ຈັດ​ເກັບ​ລາຍ​ຮັບ​ພາຍ​ໃນ 6 ເດືອນ​ຕົ້ນ​ປີ 2019 ຈະ​ສາ­ມາດ​ບັນ­ລຸ​ໄດ້ 50% ຂອງ​ແຜນ­ການ​ປີ ພ້ອມ​ດຽວ​ກັນ​ນັ້ນ ໝົດ​ປີ​ຈະ​ສູ້​ຊົນ​ຈັດ​ເກັບ​ລາຍ​ຮັບ​ພາຍ​ໃນ​ໃຫ້​ບັນ­ລຸ​ແຜນ­ການ​ທີ່​ສະ­ພາ​ແຫ່ງ​ຊາດ​ຮັບ­ຮອງ ສຳ­ລັບ​ລາຍ​ຈ່າຍ​ຈະ​ຄຸ້ມ​ຄອງ​ຢ່າງ​ປະ­ຢັດ ແລະ ຮັດ­ກຸມ ບໍ່​ໃຫ້​ເກີນ​ເພ­ດານ​ທີ່​ໄດ້​ຮອງ​ຮັບ​ຈາກ​ສະ­ພາ​ແຫ່ງ​ຊາດ.

ຂ່າວທີ່ກ່ຽວຂ້ອງ