ຂ່າວຫຼ້າສຸດ

ເປີດການນຳໃຊ້ຫຼັກສູດຊັ້ນປະຖົມສຶກສາ ສະບັບປັບປຸງໃໝ່

927 06 ມິ.ຖ. 2019 ຂ່າວໜ້າ​ໜຶ່ງ
ເປີດການນຳໃຊ້ຫຼັກສູດຊັ້ນປະຖົມສຶກສາ ສະບັບປັບປຸງໃໝ່

    ພິທີ​ເປີດ​ນຳ​ໃຊ້​ຫຼັກສູດ​ຊັ້ນ​ປະຖົມ​ສຶກ​ສາ​ສະບັບ​ປັບປຸງ​ໃໝ່ ຈັດ​ຂຶ້ນ​ວັນ​ທີ 5 ມິຖຸນາ 2019 ທີ່​ໂຮງຮຽນ​ປະຖົມ​ສົມບູນ​ບ້ານ​ທົ່ງ​ກາງ ເມືອງ​ສີ​ສັດຕະ​ນາກ ນະຄອນຫຼວງ​ວຽງ​ຈັນ ມີ​ທ່ານ ບຸນ​ກອງ ແສງ​ມະນີ ຮອງ​ລັດຖະມົນຕີກະຊວງ​ສຶກ​ສາ​ທິ​ການ ແລະ ກີລາ ທ່ານ​ນາງ ຄຳ​ເພົາ ເອີນ​ທະ​ວັນ ຮອງ​ລັດຖະມົນຕີ​ກະຊວງ​ການ​ຕ່າງປະເທດ ທ່ານ​ນາງ ຊາ​ແມນ ຊາ​ໂຕນ ທູດ​ຮັບຜິດຊອບ​ວຽກ​ງານ​ແມ່ຍິງ ແລະ ເດັກ​ຂອງ​ປະເທດ​ອົດ​ສະ​ຕຣາ​ລີ ເປັນ​ແຂກ​ກິດ​ຕິ​ມະ​ສັກ ໂອກາດ​ເດີນທາງ​ມາ​ຢ້ຽມຢາມ ແລະ ເຮັດ​ວຽກ​ຢູ່​ລາວ ທ່ານ​ທູດ​ອົດ​ສະ​ຕຣາ​ລີ​ປະຈຳ​ລາວ ອົງ​ການຈັດຕັ້ງ​ສາກົນ​ຜູ້​ໃຫ້​ທຶນ ພະນັກ​ງານ​ຄູ-ອາຈານ ນັກຮຽນ ແລະ ພາກສ່ວນ​ກ່ຽວຂ້ອງ​ເຂົ້າ​ຮ່ວມ.

    ໃນ​ໄລຍະ 4 ປີຜ່ານມາ ກະຊວງ​ສຶກ​ສາ​ທິ​ການ ແລະ ກີລາ ໄດ້​ພັດທະນາ​ຫຼັກສູດ​ຊັ້ນ​ປະຖົມ​ສຶກ​ສາ​ສະບັບ​ປັບປຸງໃໝ່ ພ້ອມ​ກັບ​ສື່​ການ​ຮຽນ-ການ​ສອນ​ໃໝ່ ແລະ ແຜນ​ເຝິກອົບຮົມ​ຄູ​ປະຈຳການ ໂດຍ​ໄດ້​ຮັບ​ການ​ສະໜັບສະໜູນ​ຈາກ​ລັດຖະບານ​ປະເທດ​ອົດ​ສະ​ຕຣາ​ລີ ສະຫະພາບ​ເອີ​ຣົບ ແລະ ລັດຖະບານ​ສະຫະລັດ​ອາ​ເມ​ຣິ​ກາ ໂດຍ​ຜ່ານ​ແຜນ​ງານ​ປັບປຸງ​ຄຸນ​ນະ​ພາບ ແລະ ຂະຫຍາຍ​ໂອກາດ​ເຂົ້າ​ຮຽນ​ສຳລັບ​ການ​ສຶກ​ສາ​ຂັ້ນ​ພື້ນຖານ​ໃນ​ລາວ (ບີ​ຄວາ) BEQUAL ຫຼັກສູດ​ດັ່ງກ່າວ​ ຈະ​ໄດ້​ຈັດ​ຕັ້ງ​ປະຕິບັດ​ເທື່ອ​ລະ​ຂັ້ນ​ຮຽນ ເຊິ່ງ​ເລີ່ມ​ຈາກ​ຂັ້ນ ປ1 ໃນ​ເດືອນ​ກັນຍາ 2019 ແລະ ຂັ້ນ​ຕໍ່​ໄປ​ຈົນ​ເຖິງ​ຂັ້ນ ປ5 ໃນ​ສົກຮຽນ 2023-2024.

    ທ່ານ ກອງ​ສີ ແສງ​ມະນີ ກ່າວ​ວ່າ: ຫຼັກສູດ​ຊັ້ນ​ປະຖົມ​ສຶກ​ສາ​ສະບັບ​ປັບປຸງ​ໃໝ່ ​ສຸມ​ໃສ່​ການ​ຮຽນ​ທີ່​ເນັ້ນ​ການ​ປະຕິບັດ​ຕົວ​ຈິງ ແລະ ເອົາ​ນັກຮຽນ​ເປັນໃຈ​ກາງ ນັກຮຽນ​ຈະ​ໄດ້​ຮຽນ​ໂດຍ​ການ​ເຮັດ​ກິດຈະກຳ​ຕ່າງໆ ແລະ ນຳ​ໃຊ້​ຄວາມ​ຮູ້​ໃໝ່​ໃນ​ຫ້ອງ​ຮຽນ​ຮ່ວມ ພ້ອມ​ນັ້ນ ຍັງ​ມີ​ວິທີ​ການ​ຮຽນ​ການ​ສອນ​ແບບ​ໃໝ່ ເຊັ່ນ: ການ​ຮຽນ​ການ​ສອນ​ວິຊາ​ພາສາ​ລາວ ທີ່​ຈະ​ຊ່ວຍ​ໃຫ້​ເດັກນ້ອຍ​ຮຽນ​ອ່ານ ແລະ ຮຽນ​ຂຽນ​ໄດ້​ງ່າຍ​ຂຶ້ນ.

    ທ່ານ​ນາງ ຊາ​ແມນ ຊາ​ໂຕນ ກ່າວ​ວ່າ: ລັດຖະບານ​ອົດ​ສະ​ຕຣາ​ລີ ແລະ ຜູ້​ຮ່ວມ​ທຶນ​ມີ​ຄວາມ​ຍິນ​ດີ​ທີ່​ໄດ້​ໃຫ້ການ​ສະໜັບສະໜູນ ​ກະຊວງ​ສຶກ​ສາ​ທິ​ການ ແລະ ກີລາ ໃນ​ການຈັດຕັ້ງ​ປະຕິບັດ​ຫຼັກສູດ​ປະຖົມ​ສຶກ​ສາ​ສະບັບ​ປັບປຸງ​ໃໝ່ ​ໃນ​ທົ່ວ​ປະເທດ ຫຼັກສູດ​ນີ້​ແມ່ນ​ບາດກ້າວ​ທຳ​ອິດ​ທີ່​ສຳຄັນ ​ໃນ​ການ​ປັບປຸງ​ຜົນ​ການ​ຮຽນ​ຂອງ​ເດັກນ້ອຍ​ລາວ ໂດຍ​ສະເພາະ ເດັກນ້ອຍ​ດ້ອຍ​ໂອກາດ ເປັນຕົ້ນ ເດັກ​ຍິງ ເດັກ​ພິການ ແລະ ເດັກ​ຊົນເຜົ່າ ເພື່ອ​ເຮັດ​ໃຫ້​ຫຼັກສູດ​ສະບັບ​ປັບປຸງ​ໃໝ່​ນີ້​ໄດ້​ຮັບ​ຜົນສຳເລັດ ມັນ​ຕ້ອງການ​ການ​ສິດສອນ​ທີ່​ມີ​ຄຸນ​ນະ​ພາບ ແລະ ຄວາມ​ເອົາໃຈໃສ່​ຈາກ​ທຸກ​ພາກສ່ວນ ແລະ ທຸກ​ຂັ້ນ​ໃນ​ທົ່ວ​ປະເທດເປັນ​ການ​ປະຕິ​ຮູບ​ທີ່​ສຳຄັນ ເຊິ່ງ​ຈະ​ມີ​ວິທີ​ການ​ໃໝ່​ສົ່ງເສີມ​ການ​ຮຽນ​ຮ່ວມ ແລະ ການ​ສອນ​ຫ້ອງ​ຄວບ​ຫຼາຍ​ຂຶ້ນ ແລະ ນຳ​ໃຊ້​ວິທີ​ການ​ປະ​ເມີນ​ນັກຮຽນ​ແບບ​ໃໝ່ ເພື່ອ​ວັດແທກ​ຄວາມ​ເຂົ້າໃຈ ທັກ​ສະ ແລະ ທັດສະນະ​ຄະຕິ​ຂອງ​ນັກຮຽນ ປະກອບສ່ວນ​ວິວັດທະນາ​ການ​ນັກຮຽນ ​ໃຫ້​ໄດ້​ຮັບ​ການ​ພັດທະນາ​ຢ່າງ​ຕໍ່​ເນື່ອງ ແລະ ມີ​ປະ​ສິດທິ​ຜົນ​ສູງ.

ຂ່າວທີ່ກ່ຽວຂ້ອງ