ຂ່າວຫຼ້າສຸດ

ງານຄ້າຍນັກຮຽນພັກແລ້ງ ກຸ່ມປະເທດອາຊຽນສົ່ງເສີມການທ່ອງທ່ຽວ

822 06 ມິ.ຖ. 2019 ຂ່າວໜ້າ​ໜຶ່ງ
ງານຄ້າຍນັກຮຽນພັກແລ້ງ ກຸ່ມປະເທດອາຊຽນສົ່ງເສີມການທ່ອງທ່ຽວ

    ງານ​ຄ້າຍ​ນັກ­ຮຽນ​ພັກ­ແລ້ງ​ກຸ່ມ​ປະ­ເທດ​ອາ​ຊຽນ ຄັ້ງ​ທີ 3 ທີ່​ລາວ​ເຮົາ​ເປັນ​ເຈົ້າ­ພາບ ຈັດ​ຂຶ້ນ​ວັນ​ທີ 3-7 ມິ­ຖຸ­ນາ 2019 ທີ່​ສວນ​ຜູ້­ໄທ ທີ­ລະ ນະ­ຄອນ­ຫຼວງ​ວຽງ​ຈັນ ຈັດ​ໂດຍ​ມະ­ຫາ­ວິ­ທະ­ຍາ­ໄລ​ແຫ່ງ​ຊາດ ໂຮງ­ຮຽນ​ພອນ​ສະ­ຫວັນ​ຊົນ­ເຜົ່າ​ກຽມ​ມະ­ຫາ­ວິ­ທະ­ຍາ­ໄລ ແລະ ໂຮງ­ຮຽນ​ກຽດ​ຕິ​ສັກ​ນາ­ນາ​ຊາດ ມີ​ທ່ານ ພຸດ ສິມ​ມະ​ລາ​ວົງ ຮອງ​ລັດ­ຖະ­ມົນ­ຕີ​ກະ­ຊວງ​ສຶກ​ສາ​ທິ​ການ ແລະ ກີ­ລາ ທ່ານ ຄຳ​ພຸດ ພົມ​ມະ​ສອນ ຜູ້­ອຳ­ນວຍ­ການ​ໂຮງ­ຮຽນ​ພອນ​ສະ­ຫວັນ​ຊົນ­ເຜົ່າ ກຽມ​ມະ­ຫາ­ວິ­ທະ­ຍາ­ໄລ ປະ­ທານ​ຈັດ​ງານ​ຄ້າຍ​ນັກ­ຮຽນ​ພັກ­ແລ້ງ​ກຸ່ມ​ປະ­ເທດ​ອາ​ຊຽນ ຄັ້ງ​ທີ 3 ພ້ອມ​ດ້ວຍ​ຮອງ​ຜູ້­ອຳ­ນວຍ­ການ​ໂຮງ­ຮຽນ​ກຽດ​ຕິ​ສັກ​ນາ­ນາ​ຊາດ ພາກ­ສ່ວນ​ກ່ຽວ­ຂ້ອງ ແລະ ນັກ­ຮຽນ-ນັກ​ສຶກ​ສາ​ຈາກ​ບັນ­ດາ​ປະ­ເທດ​ສະ­ມາ­ຊິກ​ອາ​ຊຽນ​ເຂົ້າ​ຮ່ວມ.

    ທ່ານ ຄຳ​ພຸດ ພົມ​ມະ​ສອນ ກ່າວ​ວ່າ: ງານ​ຄ້າຍ​ນັກ­ຮຽນ​ພັກ­ແລ້ງ​ກຸ່ມ​ປະ­ເທດ​ອາ​ຊຽນ ໄດ້​ກຳ­ເນີດ​ຂຶ້ນ​ຈາກ​ການ​ຮ່ວມ​ມື​ຂອງ​ບັນ­ດາ​ປະ­ເທດ​ສະ­ມາ­ຊິກ​ອາ​ຊຽນ ມີ​ຈຸດ­ປະ­ສົງ​ໃນ​ການ​ເຊື່ອມ​ສານ​ສາຍ­ສຳ­ພັນ​ມິດ­ຕະ­ພາບ ໃນ​ກຸ່ມ​ຂອງ​ນັກ­ຮຽນ-ນັກ​ສຶກ​ສາ​ໃນ​ບັນ­ດາ​ປະ­ເທດ​ສະ­ມາ­ຊິກ​ອາ​ຊຽນ ເປັນ​ການ​ເປີດ​ໂອ­ກາດ​ໃຫ້​ໄວ​ໜຸ່ມ ນັກ­ຮຽນ-ນັກ​ສຶກ​ສາ​ໄດ້​ພົບ​ປະ​ແລກ­ປ່ຽນ​ທາງ​ດ້ານ​ຄວາມ​ຮູ້ ວັດ­ທະ­ນະ­ທຳ ແລະ ວິ­ຖີ​ຊີ­ວິດ​ຂອງ​ບັນ­ດາ​ປະ­ເທດ​ອາ​ຊຽນ​ດ້ວຍ​ກັນ ໃຫ້​ມີ​ໂອ­ກາດ​ໄດ້​ຮຽນ​ຮູ້​ວັດ­ທະ­ນະ­ທຳ​ເຊິ່ງ​ກັນ ແລະ ກັນ ເປັນ​ການ​ເຊື່ອມ​ສາຍ­ສຳ­ພັນ​ໃຫ້​ແໜ້ນ​ແຟ້ນ​ກວ່າ​ເກົ່າ ໂດຍ​ຜ່ານ​ບັນ­ດາ​ກິດ­ຈະ­ກຳ​ຕ່າງໆ​ຮ່ວມ​ກັນ ເຊິ່ງ​ກິດ­ຈະ­ກຳ​ດັ່ງ­ກ່າວ ຄັ້ງ​ທີ 1 ປີ 2017 ຈັດ​ຢູ່​ປະ­ເທດ​ຫວຽດ­ນາມ ມີ 5 ປະ­ເທດ​ສະ­ມາ­ຊິກ​ອາ​ຊຽນ​ເຂົ້າ​ຮ່ວມ ຄັ້ງ​ທີ 2 ປີ 2018 ຈັດ​ຢູ່​ປະ­ເທດ​ໄທ ມີ 7 ປະ­ເທດ​ເຂົ້າ​ຮ່ວມ ແລະ ຄັ້ງ​ທີ 3 ປີ 2019 ຈັດ​ຢູ່​ປະ­ເທດ​ລາວ.

ຂ່າວທີ່ກ່ຽວຂ້ອງ