ຂ່າວຫຼ້າສຸດ

ໄພ​ແຫ້ງແລ້ງ​ຢູ່​ພາກ​ໃຕ້​ທະວີບ​ອາ​ຟະ​ຣິກ​ກາ​ຮ້າຍ​ແຮງ​ທີ່​ສຸດ​ໃນ​ຮອບ 40 ປີ

574 06 ມິ.ຖ. 2019 ຂ່າວຕ່າງປະເທດ
ໄພ​ແຫ້ງແລ້ງ​ຢູ່​ພາກ​ໃຕ້​ທະວີບ​ອາ​ຟະ​ຣິກ​ກາ​ຮ້າຍ​ແຮງ​ທີ່​ສຸດ​ໃນ​ຮອບ 40 ປີ

    ຍອດ​ປະລິມານ​ນ້ຳ​ຝົນ ຢູ່​ໃນ​ບັນດາ​ປະເທດ​ທີ່​ຂຶ້ນ​ກັບ​ປະຊາ​ຄົມ​ພັດທະນາ​ພາກ​ໃຕ້​ທະວີບ​ອາ​ຟະ​ຣິກ​ກາ (SADC) ໃນ​ລະດູ​ການ 2018-2019 ໄດ້​ຫຼຸດ​ລົງ​ສູ່​ລະດັບ​ຕ່ຳ​ສຸດ ນັບ​ແຕ່​ປີ 1982 ເປັນຕົ້ນ​ມາ ແລະ ເປັນ​ຜົນ​ກະທົບ​ຮ້າຍ​ແຮງ​ຕໍ່​ການ​ລ້ຽງ​ຊີບ ແລະ ການ​ດຳລົງ​ຊີວິດ​ຂອງ​ຫຼາຍ​ສິບ​ລ້ານ​ຄົນ ຢູ່​ໃນ​ເຂດ​ດັ່ງກ່າວ.

ແຈ້ງ​ການ​ໃໝ່​ຫຼ້າ​ສຸດ​ຂອງ SADC ໃຫ້​ຮູ້​ວ່າ ບັນດາ​ປະເທດ​ທີ່​ໄດ້​ຮັບ​ຜົນ​ກະທົບ​ໜັກໜ່ວງ​ທີ່​ສຸດ ປະກອບ​ມີ ອັງ​ໂກ​ລາ ນາ​ມີ​ບີ ​ບົ​ສວາ​ນາ ຊຳ​ບີ ແລະ ຊິມ​ບັບ​ເວ. ລະດັບ​ນ້ຳ​ຜົນ​ຕ່ຳ​ເປັນ​ປະຫວັດ​ການ​ໃນ​ລະດູ​ການ ນັບ​ແຕ່​ເດືອນ​ຕຸລາ ປີ 2018 ຮອດ​ເດືອນ​ມີນາ ປີ 2019 ໄດ້​ຮັດ​ແຄບ​ເນື້ອທີ່​ການ​ປູກຝັງ​ໄປ​ຫຼາຍ​ພໍ​ສົມຄວນ ພ້ອມ​ທັງ​ກົດ​ໜ່ວງ​ຕໍ່​ຂະ​ບວນ​ການ​ແຕກ​ໜໍ່​ຈໍ່​ແໜງ ແລະ ຄວາມ​ເຕີບ​ໂຕ​ຂອງ​ຕົ້ນ​ພືດ​ກະສິກຳ.

    ຄຽງ​ຄູ່​ກັນ​ນັ້ນ ປະລິມານ​ນ້ຳ​ຝົນ​ທີ່​ຕ່ຳ​ເປັນ​ປະຫວັດ​ການ ຍັງ​ໄດ້​ເຮັດ​ໃຫ້​ເປັນ​ຜົນ​ກະທົບ​ຮ້າຍ​ແຮງ​ຕໍ່​ເນື້ອທີ່ ແລະ ຄຸນ​ນະ​ພາບ​ການ​ປູກ​ຫຍ້າ ເພື່ອ​ຮັບ​ໃຊ້​ໃຫ້​ແກ່​ການ​ລ້ຽງສັດ​ປະເພດ​ໃຫຍ່ ກໍ​ຄື​ນ້ຳ​ໃຊ້​ໃຫ້​ແກ່​ການ​ຫົດ​ພືດ​ກະສິກຳ ແລະ ການ​ບໍລິໂພກ​ຂອງ​ປະຊາຊົນ. ມາ​ຮອດ​ເວລາ​ນີ້ 3 ປະເທດ​ທີ່​ເປັນ​ສະມາຊິກ​ຂອງ SADC ໄດ້ແກ່ ອັງ​ໂກ​ລາ ນາ​ມີ​ບີ ແລະ​ຊຳ​ບີ ໄດ້​ປະກາດ​ພາວະ​ສຸກ​ເສີນ​ລະດັບ​ຊາດ ຍ້ອນ​ໄພ​ແຫ້ງແລ້ງ.

   ກ່ອນ​ໜ້າ​ນີ້ ເມື່ອ​ເດືອນ​ພຶດສະພາ​ທີ່​ຜ່ານ​ມາ ກອງ​ທຶນ​ສຳລັບ​ເດັກນ້ອຍ ຂອງ​ອົງການ​ສະຫະ​ປະຊາ​ຊາດ (UNICEF) ແຈ້ງ​ໃຫ້​ຮູ້​ວ່າ ໄພ​ແຫ້ງແລ້ງ​ແກ່ຍາວ​ຢູ່​ໃນ​ອັງ​ໂກ​ລາ ໄດ້​ເຮັດ​ໃຫ້​ປະຊາຊົນ​ໃນ​ປະເທດ​ນີ້ 2,3 ກວ່າ​ຄົນ ຕ້ອງ​ໄດ້​ດຳລົງ​ຊີວິດ​ຢູ່​ໃນ​ສະພາບ​ຂາດແຄນ​ສະບຽງ​ອາຫານ ຍ້ອນ​ວ່າ​ການເຄື່ອນໄຫວ​ລ້ຽງສັດ ແລະ ການ​ຜະລິດ​ໄດ້​ຮັບ​ຜົນ​ກະທົບ ໃນ​ຂະນະ​ທີ່​ມີ​ເດັກນ້ອຍ​ຫຼາຍ​ພັນ​ຄົນ ປະ​ເຊີນ​ກັບ​ການ​ຂາດ​ໂພ​ສະ​ນາ​ການ​ໃນ​ຂັ້ນ​ທີ່​ຕ້ອງ​ໄດ້​ດູ​ແລ​ດ້ານ​ການ​ແພດ​ໃຫ້​ທັນ​ການ.

    ໃນ​ຂະນະ​ດຽວ​ກັນ ປັດຈຸບັນ​ນີ້ ລັດຖະບານ​ນາ​ມີ​ບີ ພວມ​ໃຫ້​ຄວາມ​ຊ່ວຍເຫຼືອ​ໃນ​ການ​ເກັບ​ຊື້​ສັດລ້ຽງ​ປະເພດ​ໃຫຍ່ ແລະ​ສັດ​ປີກ ຂອງ​ບັນດາ​ຄອບຄົວ​ປະຊາຊົນ ພ້ອມ​ທັງ​ສະໜອງ​ຖັງ​ບັນຈຸ​ນ້ຳ ໃຫ້​ແກ່​ເຂດ​ຊຸມ​ຊົນ​ຕ່າງໆ ທີ່​ບໍ່​ມີ​ແຫຼ່ງ​ນ້ຳ ແລະ ເພີ່ມ​ທະວີ​ການ​ຂຸດ​ເຈາະ​ນ້ຳສ້າງ.

ຂ່າວທີ່ກ່ຽວຂ້ອງ