ອີ​ຣັກ ເປີດ​ເຂດ​ຂຽວ​ເປັນ​ເທື່ອ​ທຳ​ອິດ​ໃນ​ຮອບ 16 ປີ

493 06 ມິ.ຖ. 2019 ຂ່າວຕ່າງປະເທດ
ອີ​ຣັກ ເປີດ​ເຂດ​ຂຽວ​ເປັນ​ເທື່ອ​ທຳ​ອິດ​ໃນ​ຮອບ 16 ປີ

   ເມື່ອ​ບໍ່​ດົນ​ມາ​ນີ້ ທາງ​ການ​ອີ​ຣັກ ໄດ້​ເປີດ​ເຂດ​ຂຽວ ຢູ່​ໃນ​ນະຄອນຫຼວງ​ແບກ​ແດດ ເປັນ​ເທື່ອ ທຳ​ອິດ ຫຼັງ​ຈາກ​ທີ່​ໄດ້​ປິດ​ມາ​ເປັນ​ເວລາ 16 ປີ ທັງ​ນີ້​ກໍ​ເພື່ອ​ໃຫ້​ປະຊາຊົນ​ໄດ້​ເຂົ້າ​ເຖິງ ນັບ​ວ່າ​ເປັນ​ການ ດຳເນີນ​ການ ທີ່​ສະແດງ​ໃຫ້​ເຫັນ​ເຖິງ​ຄວາມ​ເຊື່ອ​ໝັ້ນ ກ່ຽວ​ກັບ​ສະພາບ​ການ​ດ້ານ​ຄວາມ​ສະຫງົບ ຂອງ​ອີ​ຣັກ ຫຼັງ​ຈາກ​ເກີດ​ສົງຄາມ​ມາ​ເປັນ​ເວລາ​ຫຼາຍ​ປີ.

    ພົນ​ຈັດຕະວາ ຈາ​ຊິມ ຢາ​ເຮຍ ອັດ ອາລີ ໃຫ້​ຮູ້​ວ່າ ເຂດ​ຂຽວ ທີ່​ເປັນ​ສະຖານທີ່​ຕັ້ງ ຂອງ​ສະຖານທູດ ສ ອາ​ເມ​ຣິ​ກາ ແລະ ບັນດາ​ຫ້ອງການ​ຂອງ​ລັດຖະບານ​ອີ​ຣັກ ນັ້ນ​ໄດ້​ເປີດ​ເປັນ​ເວລາ 24 ຊົ່ວໂມງ ໃນ​ແຕ່​ລະ​ວັນ ໂດຍ​ທີ່​ບໍ່​ມີ​ເງື່ອນໄຂ​ໃດໆ.

    ເຂດ​ຂຽວ​ດັ່ງກ່າວ ຕັ້ງ​ຢູ່​ຝັ່ງ​ຕາເວັນຕົກ​ແມ່ນ້ຳ ຕີກ​ຣິ​​ສ ຊຶ່ງ​ມີ​ເນື້ອທີ່​ກວ້າງ​ປະມານ 10​ ກມ 2 ນັ້ນ​ເປັນ​ໜຶ່ງ​ໃນ​ບັນດາ​ເຂດ​ຮັກສາ​ຄວາມ​ສະຫງົບ​ຢ່າງ​ເຂັ້ມ​ງວດ​ທີ່​ສຸດ​ໃນ​ໂລກ ແລະ ກໍ​ເປັນ “ເຂດ​ດິນແດນ​ຫ້າມ” ສຳລັບ​ສາມັນ​ຊົນ​ອີ​ຣັກ​ເກືອບ​ທັງ​ໝົດ ຫຼັງ​ຈາກ​ທີ່​ເກີດ​ສົງຄາມ​ອີ​ຣັກ ໃນ​ປີ 2003. ຢູ່​ໃນ​ເຂດ​ຂຽວ ປະກອບ​ມີ​ອາຄານ​ສະພາ​ແຫ່ງ​ຊາດ ແລະ ຫ້ອງ​ວ່າການ​ນາຍົກລັດຖະມົນຕີ​ອີ​ຣັກ  ພ້ອມ​ດ້ວຍ​ຫຼາຍ​ອົງການ​ທີ່​ສຳຄັນ ຕະຫຼອດ​ຮອດ​ເຮືອນ​ຢູ່​ຂອງ​ບັນດາ​ເຈົ້າ​ໜ້າທີ່​ຊັ້ນ​ນຳ ແລະ ບັນດາ ສະຖານທູດ​ຂອງ​ຕ່າງປະເທດ ປະຈຳ​ອີ​ຣັກ.

    ຊາວ​ອີ​ຣັກ​ທີ່​ມີ​ບັດ​ຮັກສາ​ຄວາມ​ສະຫງົບ​ພິເສດ​ເທົ່າ​ນັ້ນ ຈຶ່ງ​ສາມາດ​ເຂົ້າ​ໄປ​ໃນ​ເຂດ​ຂຽວ ດັ່ງກ່າວ​ໄດ້. ໃນ​ຫຼາຍ​ປີ​ທີ່​ຜ່ານ​ມາ ລັດຖະບານ​ອີ​ຣັກ​ໄດ້​ພະຍາຍາມ ແລະ ໃຫ້​ສັນຍາ​ວ່າ ຈະ​ເປີດ​ການ​ຄົມມະນາຄົມ​ຢູ່​ໃນ​ເຂດ​ຂຽວ ແຕ່​ກໍ​ບໍ່​ສາມາດ​ເປີດ​ໄດ້ ຍ້ອນ​ກັງວົນ​ໃນ​ເລື່ອງ​ຄວາມ​ສະຫງົບ. ເມື່ອ​ຕົ້ນ​ປີ​ນີ້ ທາງ​ການ​ອີ​ຣັກ ໄດ້​ຄ່ອຍໆ​ເລີ່ມ​ໂຍະຍານ​ການ​ຈຳກັດ​ຢູ່​ໃນ​ເຂດ​ດັ່ງກ່າວ ທີ່​ໄດ້​ຮັບ​ການ ປ້ອງ​ກັນ​ຢ່າງ​ເຂັ້ມ​ງວດ​ນັ້ນ.

ຂ່າວທີ່ກ່ຽວຂ້ອງ