ສ ອາ​ເມ​ຣິ​ກາ ຮັບຮອງ​ບ້ວງ​ເງິນ​ຊ່ວຍເຫຼືອ​ຜູ້​ປະສົບ​ໄພ​ທຳ​ມະ​ຊາດ

476 06 ມິ.ຖ. 2019 ຂ່າວຕ່າງປະເທດ
ສ ອາ​ເມ​ຣິ​ກາ ຮັບຮອງ​ບ້ວງ​ເງິນ​ຊ່ວຍເຫຼືອ​ຜູ້​ປະສົບ​ໄພ​ທຳ​ມະ​ຊາດ

   ຫຼັງ​ຈາກ​ທີ່​ໄດ້​ໂຈະ​ມາ​ເປັນ​ເວລາ​ຫຼາຍ​ເດືອນ ໃນ​ທີ່​ສຸດ​ມາ​ໃນ​ວັນ​ທີ 3 ມິຖຸນາ​ນີ້ ສະພາ​ແຫ່ງ​ຊາດ ສ ອາ​ເມ​ຣິ​ກາ ກໍ​ໄດ້​ຮັບຮອງ​ບ້ວງ​ເງິນ​ຊ່ວຍເຫຼືອ​ຜູ້​ປະສົບ​ໄພ​ທຳ​ມະ​ຊາດ ເປັນ​ມູນ​ຄ່າ 19,1 ຕື້ ໂດ​ລາ​ສະຫະລັດ ເພື່ອ​ຊ່ວຍເຫຼືອ​ຜູ້​ໄດ້​ຮັບ​ເຄາະ​ຮ້າຍ ຈາກ​ຜົນ​ກະທົບ​ຂອງ​ສະພາບ​ນ້ຳ​ຖ້ວມ ໄຟ​ໄໝ້​ປ່າ ແລະ ອື່ນໆ ທີ່​ໄດ້​ເຮັດ​ໃຫ້​ຊຸມ​ຊົນ​ຢູ່​ໃນ​ຫຼາຍ​ທ້ອງຖິ່ນ ນັບ​ຕັ້ງແຕ່​ເຂດ ປອກ​ໂຕ ຣີ​ໂກ ໄປ​ຈົນ​ຮອດ​ລັດ ຄາ​ລີ​ຟໍ​ເນຍ ໄດ້​ຮັບ​ຄວາມ​ເສຍ​ຫາຍ​ຢ່າງ​ຫຼວງຫຼາຍ.

    ຫຼັງ​ຈາກ​ທີ່​ໄດ້​ຮັບ​ການ​ຮັບຮອງ​ຈາກ​ສອງ​ສະພາ​ແລ້ວ ຮ່າງ​ກົດໝາຍ​ກໍ​ຈະ​ຖືກ​ສົ່ງ​ໄປ​ຍັງ​ທຳ​ນຽບ​ຂາວ ເພື່ອ​ໃຫ້​ປະທານາທິບໍດີ ສ ອາ​ເມ​ຣິ​ກາ ໂດ​ນາ​​ລ ທຣຳ ລົງ​ນາມ​ໃຫ້​ສັດຕະຍາບັນ.

    ບ້ວງ​ເງິນ​ຊ່ວຍເຫຼືອ​ດັ່ງກ່າວ ປະກອບ​ດ້ວຍ​ການ​ສະໜອງ​ທຶນ ໃຫ້​ແກ່​ການ​ພັດທະນາ ພື້ນຖານ​ໂຄງ​ລ່າງ ຊ່ວຍເຫຼືອ​ຊຸມ​ຊົນ​ໃນ​ເຂດ​ຊົນນະບົດ ແລະ ແກ້​ໄຂ​ຄວາມ​ເສຍ​ຫາຍ​ທີ່​ເກີດ​ຈາກ ໄພພິບັດ​ທຳມະ​ຊາດ ຢູ່​ໃນ​ເຂດ​ດິນແດນ ປອກ​ໂຕ ຣີ​ໂກ ແລະ ບັນດາ​ລັດ​ເຊັ່ນ ຄາ​ລີ​ຟໍ​ເນຍ ຟລໍ​ຣີ​ດາ ໄອ​ໂອ​ວາ ເທັກ​ຊັດ ນອດ​ຄາ​ໂຣ​ໄລ​ນາ ແລະ ເຊົາ ຄາ​ໂຣ​ໄລ​ນາ.

    ນອກຈາກ​ນັ້ນແລ້ວ ບ້ວງ​ເງິນ​ຊ່ວຍເຫຼືອ ຍັງ​ລວມ​ເຖິງ 3 ຕື້ ໂດ​ລາ​ສະຫະລັດ ທີ່​ໃຫ້​ຄວາມ​ຊ່ວຍເຫຼືອ​ບັນດາ​ກະສິກອນ ທີ່​ໄດ້​ຮັບ​ຄວາມ​ເສຍ​ຫາຍ​ໃນ​ລະດູ​ການ​ຜະລິດ ທີ່​ເກີດ​ຈາກ​ໄພພິບັດ​ທຳ​ມະ​ຊາດ.

ຂ່າວທີ່ກ່ຽວຂ້ອງ