ຂ່າວຫຼ້າສຸດ

ຫວຽດນາມ​ ມີ​ສິນຄ້າ​ສົ່ງ​ອອກ 19 ລາຍການ ທີ່​ບັນລຸ​ມູນ​ຄ່າ​ເກີນ 1 ຕື້​ໂດ​ລາ

460 06 ມິ.ຖ. 2019 ຂ່າວຕ່າງປະເທດ
ຫວຽດນາມ​ ມີ​ສິນຄ້າ​ສົ່ງ​ອອກ 19 ລາຍການ ທີ່​ບັນລຸ​ມູນ​ຄ່າ​ເກີນ 1 ຕື້​ໂດ​ລາ

    ຂ່າວສານ​ຫວຽດນາມ ອ້າງ​ຕາມ​ຂໍ້​ມູນ​ສະຖິຕິ​ຈາກ​ກະຊວງ​ອຸດສາຫະກຳ ການ​ຄ້າ​ຫວຽດນາມ ໃຫ້​ຮູ້​ວ່າ ຫຼັງ​ຈາກ​ສິ້ນ​ສຸດ 5 ເດືອນ​ຕົ້ນ​ປີ 2019 ແລ້ວ ມູນ​ຄ່າ​ສິນຄ້າ​ສົ່ງ​ອອກ​ຂອງ​ທົ່ວ​ປະເທດ​ຫວຽດນາມ ຄາດ​ວ່າ​ບັນລຸ 100,74 ຕື້​ໂດ​ລາ​ສະຫະລັດ ເພີ່ມ​ຂຶ້ນ 6,7% ເມື່ອ​ທຽບໃສ່​ໄລຍະ​ເວລາ​ດຽວ​ກັນ​ຂອງ​ປີ 2018. ໃນ​ນັ້ນ ທີ່​ປະກອບສ່ວນ​ໃຫຍ່​ສຸດ ຍັງ​ຄົງ​ເປັນ​ໝວດ​ສິນຄ້າ​ອຸດສາຫະກຳ​ປຸງ​ແຕ່ງ ທີ່​ຄາດ​ວ່າ​ບັນລຸ​ມູນ​ຄ່າ 84,03 ຕື້​ໂດ​ລາ​ສະຫະລັດ ກວມ​ເອົາ 83,4% ຂອງ​ຍອດ​ມູນ​ຄ່າ​ການ​ສົ່ງ​ອອກ  ແລະ​ເພີ່ມ​ຂຶ້ນ 8,6% ເມື່ອ​ທຽບໃສ່​ເວລາ​ດຽວ​ກັນ​ຂອງ​ປີ​ກາຍ.

    ຫຼັງ​ຈາກ 5 ເດືອນ​ຕົ້ນ​ປີ​ນີ້ ທົ່ວ​ປະເທດ​ຫວຽດນາມ ມີ 19 ລາຍການ​ສິນຄ້າ​ສົ່ງ​ອອກ ທີ່​ບັນລຸ​ມູນ​ຄ່າ​ເກີນ 1 ຕື້ ໂດ​ລາ​ສະຫະລັດ ໃນ​ນັ້ນ​ມີ 14 ລາຍການ​ສິນຄ້າ ທີ່​ຂຶ້ນ​ກັບ​ໝວດ​ສິນຄ້າ​ອຸດສາຫະກຳ​ປຸງ​ແຕ່ງ.

    ເຈົ້າ​ໜ້າທີ່​ກະຊວງ​ອຸດສາຫະກຳ ການ​ຄ້າ​ຫວຽດນາມ ເວົ້າ​ວ່າ ໃນ​ໝວດ​ສິນຄ້າ​ອຸດສາຫະກຳ​ການ​ຜະລິດ​ນັ້ນ ສິນຄ້າ​ປະເພດ​ໂທລະສັບ ແລະ ອາ​ໄຫຼ່ ມີ​ມູນ​ຄ່າ​ການ​ສົ່ງ​ອອກ​ໃຫຍ່​ສຸດ ໂດຍ​ບັນລຸ 19,9 ຕື້​ໂດ​ລາ​ສະຫະລັດ ກວມ​ເອົາ 19,7% ຂອງ​ຍອດ​ມູນ​ຄ່າ​ສິນຄ້າ​ສົ່ງ​ອອກ ແລະ​ເພີ່ມ​ຂຶ້ນ 3% ທຽບໃສ່​ໄລຍະ​ເວລາ​ດຽວ​ກັນ​ຂອງ​ປີ​ກາຍ. ຮອງ​ລົງ​ມາ​ກໍ​ແມ່ນ​ເຄື່ອງໃຊ້​ໄຟຟ້າ ຄອມ​ພີວ​ເຕີ ແລະ ເຄື່ອງ​ອາ​ໄຫຼ່ ບັນລຸ 12,3 ຕື້​ໂດ​ລາ​ສະຫະລັດ ເພີ່ມ​ຂຶ້ນ 11,1%; ສິນຄ້າ​ຕັດຫຍິບ ບັນລຸ 12,1 ຕື້​ໂດ​ລາ​ສະຫະລັດ ເພີ່ມ​ຂຶ້ນ 10,3% ແລະ ອື່ນໆ.

ຂ່າວທີ່ກ່ຽວຂ້ອງ