ຂ່າວຫຼ້າສຸດ

ໄຟຟ້າ ຈັດກິດຈະກຳປູກໄມ້ ແລະ ປ່ອຍປາຄືນສູ່ທຳມະຊາດ

590 05 ມິ.ຖ. 2019 ຂ່າວໜ້າ​ໜຶ່ງ
ໄຟຟ້າ ຈັດກິດຈະກຳປູກໄມ້ ແລະ ປ່ອຍປາຄືນສູ່ທຳມະຊາດ

    ບໍ­ລິ­ສັດ ຜະ­ລິດ​ໄຟ­ຟ້າ​ລາວ ມະ­ຫາ­ຊົນ (ຜຟຟລ) ຈັດ​ພິ­ທີ​ປູກ​ໄມ້ ແລະ ປ່ອຍ​ປາ​ທີ່​ບໍ­ລິ­ເວນ​ເຂື່ອນ​ໄຟ­ຟ້າ​ນ້ຳ​ມັງ 3 ເມືອງ​ທຸ­ລະ­ຄົມ ແຂວງ​ວຽງ​ຈັນ ໃນ​ວັນ​ທີ 31 ພຶດ­ສະ­ພາ 2019 ໃນ​ໂອ­ກາດ​ວັນ​ປູກ​ຕົ້ນ­ໄມ້​ແຫ່ງ​ຊາດ (1 ມິ­ຖຸ­ນາ) ໂດຍ​ເປັນ​ປະ­ທານ​ຂອງ​ທ່ານ ຄຳ​ມະ­ນີ ອິນ​ທິ​ລາດ ລັດ­ຖະ­ມົນ­ຕີ​ກະ­ຊວງ​ພະ­ລັງ­ງານ ແລະ ບໍ່​ແຮ່ ປະ­ທານ​ສະ­ພາ​ບໍ­ລິ­ຫານ ຜຟຟລ ທ່ານ ເສດ​ໄຟ ວິ­ໄລ​ໄຟ ຮອງ​ເຈົ້າ­ເມືອງ​ທຸ­ລະ­ຄົມ ມີ​ບັນ­ດາ​ຄະ­ນະ​ສະ­ພາ​ບໍ­ລິ­ຫານ ຄະ­ນະ​ອຳ­ນວຍ​ການ​ໃຫຍ່ ແລະ ພະ­ນັກ­ງານ ຜຟຟລ ອຳ­ນາດ​ການ​ປົກ­ຄອງ​ທ້ອງ­ຖິ່ນ ແລະ ນັກ­ຮຽນ​ເຂົ້າ​ຮ່ວມ

    ສຳ­ລັບ​ກິດ­ຈະ­ກຳ​ຄັ້ງ​ນີ້ ປູກ​ຕົ້ນ­ໄມ້ 650 ຕົ້ນ ແລະ ປ່ອຍ​ປາ 20.000 ກວ່າ​ໂຕ ລົງ​ສູ່​ເຂດ​ວັງ​ສະ­ຫງວນ​ຂອງ​ເຂື່ອນ​ໄຟ­ຟ້າ​ແຫ່ງ​ດັ່ງ­ກ່າວ ເພື່ອ​ເປັນ​ການ​ສົ່ງ­ເສີມ​ຊີ­ວະ​ນາໆພັນ ແລະ ຮັກ­ສາ​ສິ່ງ­ແວ­ດລ້ອມ​ໃຫ້​ມີ​ຄວາມ​ສົມ​ດູນ ທັງ​ເປັນ​ການ​ສ້າງ​ທັດ​ສະ​ນິ​ຍະ​ພາບ​ທີ່​ສວຍ​ສົດ​ງົດ​ງາມ ນອກ​ນີ້ ຜຟຟລ ຍັງ​ໄດ້​ນຳ​ເອົາ​ອຸ­ປະ­ກອນ​ການ​ຮຽນ​ຈຳ­ນວນ​ໜຶ່ງ ມອບ​ໃຫ້​ໂຮງ­ຮຽນ​ປະ­ຖົມ​ສົມ­ບູນ 4 ແຫ່ງ ຄື: ໂຮງ­ຮຽນ​ປະ­ຖົມ​ບ້ານ​ພູ­ເຂົາ​ຄວາຍ​ໃໝ່ ບ້ານ​ນ້ຳ​ຫຍາມ ບ້ານ​ພູ​ປ່າ​ມັນ ແລະ ບ້ານ​ວັງ​ເຮືອ ເພື່ອ​ນຳ​ໃຊ້​ເຂົ້າ​ໃນ​ການ​ເຮັດ​ກິດ­ຈະ­ກຳ​ຕ່າງໆ​ຂອງ​ໂຮງ­ຮຽນ.

    ທ່ານ​ນາງ ລັດ­ຕະ­ນາ ປະ­ທຸມ​ວັນ ຜູ້­ອຳ­ນວຍ­ການ​ໃຫຍ່​ບໍ­ລິ­ສັດ ຜຟຟລ ກ່າວ​ວ່າ: ໃນ​ແຕ່​ລະ​ປີ​ບໍ­ລິ­ສັດ​ໄດ້​ພ້ອມ​ກັນ​ສ້າງ​ຂະ​ບວນ​ການ​ປູກ​ຕົ້ນ­ໄມ້​ໃຫ້​ກາຍ­ເປັນ​ປ່າ ແລະ ຮ່ວມ​ກັນ​ຮັກ­ສາ​ຊີ­ວະ​ນາໆພັນ ໃຫ້​ອຸ­ດົມ­ສົມ­ບູນ​ດ້ວຍ​ການ​ປ່ອຍ​ປາ ແລະ ຮັກ­ສາ​ປ່າ ເພີ່ມ​ພູນ​ຄວາມ​ອຸ­ດົມ­ສົມ­ບູນ​ຂອງ​ລະ­ບົບ​ນິ­ເວດ ເຊິ່ງ​ແມ່ນ​ໜຶ່ງ​ໃນ​ພາ­ລະ­ກິດ​ຂອງ ຜຟຟລ ຄື: ເອົາ­ໃຈ­ໃສ່​ຕໍ່​ສັງ­ຄົມ ແຫຼ່ງ​ນ້ຳ ແລະ ສິ່ງ­ແວ­ດລ້ອມ ສະ­ນັ້ນ ຈຶ່ງ​ມີ​ເປົ້າ​ໝາຍ​ໃນ​ການ​ສົ່ງ­ເສີມ​ການ​ອະ­ນຸ​ຮັກ ແລະ ຄຸ້ມ​ຄອງ​ຊັບ­ພະ­ຍາ­ກອນ​ທຳ​ມະ​ຊາດ​ຢ່າງ​ຕໍ່​ເນື່ອງ ຄຽງ​ຄູ່​ກັບ​ການ​ພັດ­ທະ­ນາ ແລະ ການ​ຜະ­ລິດ​ພະ­ລັງ­ງານ​ໄຟ­ຟ້າ ເພື່ອ​ສະ­ໜອງ​ໃຫ້​ແກ່​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ຂອງ​ຊາດ​ໃຫ້​ໝັ້ນ­ຄົງ ແລະ ຍືນ​ຍົງ.

    ທ່ານ ຄຳ​ມະ­ນີ ອິນ​ທິ​ລາດ ກ່າວ​ວ່າ: ການ​ຈັດ​ກິດ­ຈະ­ກຳ​ຄັ້ງ​ນີ້ ເພື່ອ​ຊຸກ­ຍູ້​ໃຫ້​ທຸກ​ຄົນ​ພາຍ​ໃນ​ຊາດ ຈົ່ງ​ຮ່ວມ​ມື​ກັນ​ປົກ​ປັກ​ຮັກ­ສາ ແລະ ສົ່ງ­ເສີມ​ຄວາມ​ອຸ­ດົມ­ສົມ­ບູນ​ຂອງ​ປ່າ­ໄມ້ ກໍ​ຄື ຕົ້ນ​ກຳ­ເນີດ​ຂອງ​ແຫຼ່ງ​ນ້ຳ​ທີ່​ເປັນ​ຊັບ­ພະ­ຍາ­ກອນ​ທຳ​ມະ​ຊາດ ທັງ​ເປັນ​ການ​ປຸກ­ລະ­ດົມ​ຈິດ​ສຳ­ນຶກ ໃຫ້​ເຫັນ​ຄວາມ​ສຳ­ຄັນ​ຂອງ​ເດັກ­ນ້ອຍ​ທີ່​ປຽບ​ດັ່ງ​ຊັບ­ພະ­ຍາ­ກອນ​ມະ­ນຸດ ເຊິ່ງ​ຈະ​ກາຍ­ເປັນ​ຜູ້​ໃຫຍ່​ໃນ​ພາຍ​ໜ້າ ແລະ ຈະ​ເປັນ​ບຸ​ຄະ­ລາ​ກອນ​ທີ່​ສຳ­ຄັນ ແລະ ຈະ​ນຳ­ພາ​ປະ­ເທດ​ຊາດ​ກ້າວ​ໄປ​ສູ່​ຄວາມ​ຈະ­ເລີນ​ຮຸ່ງ­ເຮືອງ​ຕໍ່​ໄປ.

ຂ່າວທີ່ກ່ຽວຂ້ອງ