ຂ່າວຫຼ້າສຸດ

ປະກາດຊັ້ນໃຫ້ນາຍທະຫານນະຄອນຫຼວງ

672 05 ມິ.ຖ. 2019 ຂ່າວໜ້າ​ໜຶ່ງ
ປະກາດຊັ້ນໃຫ້ນາຍທະຫານນະຄອນຫຼວງ

    ພິ­ທີ​ປະ­ກາດ​ຊັ້ນ​ໃຫ້​ນາຍ​ທະ­ຫານ​ຢູ່​ກອງ​ບັນ­ຊາ​ການ ທະ­ຫານ​ນະ­ຄອນ­ຫຼວງ​ວຽງ​ຈັນ (ນວ) ຈັດ​ຂຶ້ນ​ວັນ​ທີ 31 ພຶດ­ສະ­ພາ 2019 ເປັນ​ປະ­ທານ​ຂອງ​ທ່ານ ພົ​ຈວ ສີ​ພອນ ຈັນ​ສົມ​ວົງ ຫົວ­ໜ້າ​ການ­ເມືອງ​ກອງ​ບັນ­ຊາ​ການ​ທະ­ຫານ ນວ ມີ​ຄະ­ນະ​ພັກ-ຄະ­ນະ​ບັນ­ຊາ​ຈາກ​ອົງ­ການ 5 ຫ້ອງ ກົມ​ກອງ​ອ້ອມ​ຂ້າງ ແລະ ພະ­ແນກ­ການ​ທີ່​ກ່ຽວ­ຂ້ອງ ພ້ອມ​ດ້ວຍ​ນາຍ​ທະ­ຫານ​ທີ່​ໄດ້​ຮັບ​ການ​ເລື່ອນ​ຊັ້ນ​ໃໝ່​ເຂົ້າ​ຮ່ວມ.

    ໂອ­ກາດ​ນີ້ ທ່ານ ພັນ​ໂທ ເຂັມ​ເພັດ ຫັນ​ທະ​ວົງ ຫົວ­ໜ້າ​ພະ​ແນກ​ພະ­ນັກ­ງານ​ທະ­ຫານ ນວ ໄດ້​ຂຶ້ນ​ຜ່ານ​ຂໍ້​ຕົກ­ລົງ​ຂອງ​ກະ­ຊວງ​ປ້ອງ​ກັນ​ປະ­ເທດ ເຊິ່ງ​ອີງ​ຕາມ​ກົດ­ໝາຍ​ນາຍ​ທະ­ຫານ​ກອງ­ທັບ​ປະ­ຊາ­ຊົນ​ລາວ (ສະ­ບັບ​ປັບ­ປຸງ) ວ່າ​ດ້ວຍ​ການ​ເລື່ອນ​ຊັ້ນ ແລະ ເລື່ອນ​ທຽບ​ຊັ້ນ​ໃຫ້​ນາຍ​ທະ­ຫານ ແລະ ອີງ​ຕາມ​ການ​ຄົ້ນ­ຄວ້າ​ນຳ​ສະ­ເໜີ​ຂອງ​ກົມ​ໃຫຍ່​ການ­ເມືອງ​ກອງ­ທັບ ກະ­ຊວງ​ປ້ອງ​ກັນ​ປະ­ເທດ ຈຶ່ງ​ໄດ້​ຕົກ­ລົງ​ເລື່ອນ​ຊັ້ນ ແລະ ເລື່ອນ​ທຽບ​ຊັ້ນ​ໃຫ້​ນາຍ​ທະ­ຫານ​ຢູ່​ກອງ​ບັນ­ຊາ​ການ​ທະ­ຫານ ນວ ຈຳ­ນວນ 170 ຄົນ ຍິງ 29 ຄົນ ຄື: ເລື່ອນ​ຊັ້ນ​ຮ້ອຍ​ເອກ​ຂຶ້ນ​ຊັ້ນ​ພັນ​ຕີ 14 ຄົນ ເລື່ອນ​ທຽບ​ຊັ້ນ​ຮ້ອຍ​ເອກ​ຂຶ້ນ​ຊັ້ນ​ພັນ​ຕີ 6 ຄົນ ເລື່ອນ​ຊັ້ນ​ຮ້ອຍ​ໂທ​ຂຶ້ນ​ຊັ້ນ​ຮ້ອຍ​ເອກ 15 ຄົນ ເລື່ອນ​ທຽບ​ຊັ້ນ​ຮ້ອຍ​ໂທ​ຂຶ້ນ​ຊັ້ນ​ຮ້ອຍ​ເອກ 12 ຄົນ ເລື່ອນ​ຊັ້ນ​ຮ້ອຍ​ຕີ​ຂຶ້ນ​ຮ້ອຍ​ໂທ 61 ຄົນ ເລື່ອນ​ທຽບ​ຊັ້ນ​ຮ້ອຍ​ຕີ​ຂຶ້ນ​ຮ້ອຍ​ໂທ 19 ຄົນ ເລື່ອນ​ຊັ້ນ​ວາ­ທີ​ຂຶ້ນ​ຮ້ອຍ​ຕີ 32 ຄົນ ແລະ ເລື່ອນ​ທຽບ​ຊັ້ນ​ຮ້ອຍ​ຕີ 11 ຄົນ.

    ໂອ­ກາດ​ນີ້ ທ່ານ​ຫົວ­ໜ້າ​ການ­ເມືອງ​ກອງ​ບັນ­ຊາ​ການ​ທະ­ຫານ ນວ ໄດ້​ໃຫ້​ກຽດ​ຂຶ້ນ​ປະ­ດັບ​ຊັ້ນ​ໃຫ້​ນາຍ​ທະ­ຫານ​ຂອງ​ຕົນ ພ້ອມ​ທັງ​ເນັ້ນ ຈົ່ງ​ພ້ອມ​ກັນ​ສືບ­ຕໍ່​ເອົາ­ໃຈ­ໃສ່​ເຝິກ­ຝົນ​ຫຼໍ່​ຫຼອມ​ພັດ­ທະ­ນາ​ຕົນ​ເອງ​ໃນ​ທຸກ​ດ້ານ ມີ​ແບບ­ແຜນ​ວິ­ທີ​ເຮັດ​ວຽກ​ໃນ​ການ​ນຳ­ພາ-ບັນ­ຊາ ຍົກ​ສູງ​ຄວາມ​ຮັບ­ຜິດ­ຊອບ​ໜ້າ­ທີ່​ການ­ເມືອງ​ຂອງ​ຕົນ ໂດຍ​ເຮັດ​ວຽກ​ເປັນ​ໝູ່​ຄະ­ນະ ມີ​ຄວາມ​ເສຍ­ສະ­ຫຼະ​ສູງ​ຕໍ່­ໜ້າ​ທີ່ ແລະ ເປັນ​ແບບ­ຢ່າງ​ໃຫ້​ແກ່​ນາຍ ແລະ ພົນ­ທະ­ຫານ ເພື່ອ​ພ້ອມ​ກັນ​ສຸມ​ໃສ່​ເຮັດ​ສຳ­ເລັດ​ທຸກ​ໜ້າ­ທີ່ ຕາມ​ການ­ຈັດ­ຕັ້ງ​ຂັ້ນ​ເທິງ​ມອບ​ໝາຍ​ໃຫ້.

ຂ່າວທີ່ກ່ຽວຂ້ອງ