ຂ່າວຫຼ້າສຸດ

ຕິດການພະນັນ ບໍ່ແມ່ນພັນທຸກຳ

1.488 05 ມິ.ຖ. 2019 ນານາສາລະ

    ສຳ­ລັບ​ບັນ­ຫາ​ຢາ​ເສບ​ຕິດ ຫຼື ການ​ພະ­ນັນ ບາງ​ຄົນ​ອາດ​ຍັງ​ຖື​ເບົາ ໂດຍ​ເຫັນ​ວ່າ​ແກ້​ງ່າຍ ບໍ່​ຮ້າຍ​ແຮງ ແຕ່​ຄວາມ​ຈິງ​ແລ້ວ ເຖິງ​ແມ່ນ​ການ​ຕິດ​ການ​ພະ­ນັນ​ບໍ່​ແມ່ນ​ພະ­ຍາດ​ຕິດ­ຕໍ່​ທາງ​ພັນ­ທຸ​ກຳ ແຕ່​ມັນ​ກໍ​ແມ່ນ​ພະ­ຍາດ​ຊະ­ນິດ​ໜຶ່ງ​ທີ່​ຮ້າຍ​ແຮງ ສ້າງ​ຄວາມ​ເສຍ​ຫາຍ​ໃຫຍ່​ຫຼວງ​ໃຫ້​ຊາດ ແລະ ສັງ­ຄົມ​ໄດ້ ຂ້າ­ພະ­ເຈົ້າ​ຮູ້­ຈັກ​ໄວ​ລຸ້ນ​ຄົນ​ໜຶ່ງ​ຕິດ​ການ​ພະ­ນັນ​ບານ ຜູ້­ກ່ຽວ​ໄດ້​ສ້າງ​ຄອບ­ຄົວ​ມີ​ລູກ​ໜຶ່ງ​ຄົນ ເງິນ​ຄອບ­ຄົວ​ຫາ​ມາ​ໄດ້​ແມ່ນ​ຫຼິ້ນ​ການ​ພະ­ນັນ​ໝົດ ເຖິງ​ຂັ້ນ​ຕິດ​ໜິ້​ຈົນ​ພີ່­ນ້ອງ​ຂາຍ​ນາ​ມາ​ໃຊ້​ໜີ້​ໃຫ້​ຄອບ­ຄົວ​ຈຶ່ງ​ຂໍ​ປະ​ຮ້າງ ເພາະ​ຜູ້­ກ່ຽວ​ບໍ່​ຍອມ​ປ່ຽນ​ນິ­ໄສ ແລະ ພຶດ­ຕິ​ກຳ...

    ຕົວ­ຢ່າງ​ຂອງ​ໄວ​ລຸ້ນ​ຂ້າງ​ເທິງ​ນັ້ນ ພຽງ​ແຕ່​ຍົກ​ມາ​ກໍ​ເຫັນ​ໄດ້​ວ່າ ການ​ພະ­ນັນ​ເຮັດ​ໃຫ້​ຜູ້­ກ່ຽວ​ສູນ​ເສຍ​ອະ­ນາ­ຄົດ ແລະ ນຳ­ໄປ​ສູ່​ຄອບ­ຄົວ​ແຕກ​ແຍກ ແລະ ບັນ­ຫາ​ສັງ­ຄົມ ເຊິ່ງ​ເຄີຍ​ຂຽນ​ໄວ້​ໃນ​ບົດ​ກ່ອນ​ວ່າ ການ​ຕິດ​ການ​ພະ­ນັນ ມັນ​ແມ່ນ​ອະ­ບາຍ​ຍະ​ມຸກ ຄື​ຫົນ­ທາງ​ແຫ່ງ​ຄວາມ​ເສື່ອມ​ຂອງ​ຊີ­ວິດ ພ້ອມ​ນີ້ ສັງ­ຄົມ​ກໍ​ບໍ່​ຄວນ​ເຂົ້າ­ໃຈ​ແຄບ ເພາະ​ການ​ຕິດ​ຫຼິ້ນ​ກິນ​ຟຸມ​ເຟືອຍ ຫຼື ຫຼິ້ນ​ໄພ້​ໄຮ​ໂລ​ກໍ​ແມ່ນ​ອະ­ບາຍ​ຍະ​ມຸກ ມີ​ແຕ່​ນຳ­ພາ​ຕົນ​ເອງ​ສູ່​ຄວາມ​ເສື່ອມ​ເສຍ​ກຽດ­ຕິ­ຍົດ ເຊິ່ງ​ທ່ານ​ຜູ້​ອ່ານ​ຄົງ​ຈະ​ເຫັນ​ບາງ​ຄອບ­ຄົວ​ຜົວ ຫຼື ເມຍ ຕິດ​ໝູ່­ຄູ່​ດື່ມ​ເບຍ ຫຼິ້ນ​ໄພ້​ໃນ​ຕູບ​ນ້ອຍ ສວນ​ອາ­ຫານ ນຳ​ມາ​ເຊິ່ງ​ການ​ແຕກ​ແຍກ​ໃນ​ຄອບ­ຄົວ.

    ຄະ­ດີ​ປະ​ຮ້າງ​ຢູ່​ສານ​ຈຶ່ງ​ມີ​ທ່າ​ອ່ຽງ​ສູງ​ຂຶ້ນ ຍ້ອນ​ວ່າ​ຫຼາຍ​ຄົນ​ໄດ້​ຜ່າຍ​ແພ້​ຕໍ່​ຄ່າ​ນິ­ຍົມ​ດ້ານ​ບໍ­ລິ­ໂພກ​ນິ­ຍົມ ໂດຍ​ຄິດ​ເອົາ​ວ່າ ເກີດ​ມາ​ຊາດ​ດຽວ​ກໍ​ຂໍ​ຫຼິ້ນ​ກິນ​ໃຫ້​ກຸ້ມ​ຄ່າ ສ່ວນ​ຕົວ​ເຊື່ອ​ວ່າ ການ​ຫຼິ້ນ​ກິນ​ຟຸມ​ເຟືອຍ ຫຼື ແລ່ນ­ນຳ​ບໍ­ລິ­ໂພກ​ນິ­ຍົມ ກໍ​ແມ່ນ​ສາ­ເຫດ​ໜຶ່ງ​ບີບ​ໃຫ້​ຄົນ​ຄິດ​ຫາ​ເງິນ​ຄຳ​ໃນ​ທາງ​ທີ່​ຜິດ​ລະ­ບຽບ​ກົດ­ໝາຍ ບັນ­ຫາ​ດັ່ງ­ກ່າວ ຈຶ່ງ​ທວງ​ຖາມ​ເຖິງ​ລະ­ບົບ​ການ​ສຶກ​ສາ​ທີ່​ປູກ­ຝັງ​ຄ່າ​ນິ­ຍົມ ແລະ ສິນ​ລະ​ທຳ​ໃສ່​ຫົວ­ໃຈ​ຊາວ​ໜຸ່ມ​ເຍົາ­ວະ​ຊົນ ເຊິ່ງ​ບໍ່​ຄວນ​ຮູ້­ສຶກ​ພູມ­ໃຈ​ວ່າ ມີ​ກົດ­ໝາຍ​ຮອງ​ຮັບ​ແລ້ວ​ຈະ​ລະ­ຖິ້ມ​ຮີດ­ຄອງ ແລະ ສິນ​ລະ​ທຳ​ທີ່​ເປັນ​ສິ່ງ​ຄວບ​ຄຸມ​ຈິດ­ໃຈ​ຂອງ​ຄົນ​ບໍ່​ໃຫ້​ຫຼົງ​ຜິດ.

    ດັ່ງ­ນັ້ນ ບັນ­ຫາ​ຄົນ​ຕິດ​ການ​ພະ­ນັນ ຈຶ່ງ​ເກີດ​ມາ​ຈາກ​ຫຼາຍ​ສາ­ເຫດ ເຊັ່ນ: ການ​ຮັບ​ຮູ້​ຂໍ້​ມູນ​ທີ່​ຜິດໆ​ຈາກ​ໝູ່​ເພື່ອນ ຫຼື ລັດ­ທິ​ບໍ­ລິ­ໂພກ​ນິ­ຍົມ ນັກ​ຂຽນ​ຕ່າງ­ປະ­ເທດ​ຊື່ Maia Szalavitz ເຄີຍ​ຕິດ​ຢາ​ເສບ​ຕິດ​ໄດ້​ສະ­ຫຼຸບ​ວິ​ໃຈ​ເປັນ​ບົດ­ຮຽນ​ລ້ຳ​ຄ່າ​ໄວ້​ວ່າ ບັນ­ຫາ​ເສບ​ຕິດ ຕິດ​ກັນ​ພະ­ນັນ​ເກີດ​ຈາກ​ສິ່ງ​ທີ່​ເຂົາ​ຮັບ​ຮູ້​ມາ​ແບບ​ຜິດໆ ແລະ ຍັງ​ເຕືອນ​ໄວ້​ວ່າ ການ​ເສບ​ຕິດ​ທຸກ​ຊະ­ນິດ​ຫຼອກ​ລວງ​ໃຫ້​ຄົນ​ເຮົາ ມີ​ຄວາມ­ສຸກ​ຄວາມ​ພໍ­ໃຈ​ຊົ່ວ­ຄາວ​ທໍ່​ນັ້ນ.

    ບັນ­ຫາ​ບາງ​ຢ່າງ​ມີ​ລັກ­ສະ­ນະ​ໄຟ​ລາມ​ທົ່ງ ເຊິ່ງ​ຝ່າຍ​ກ່ຽວ­ຂ້ອງ​ບໍ່​ຄວນ​ໃຈ­ເຢັນ​ຖື​ເບົາ​ແບບ​ວ່າ: ງົວ​ເສຍ​ຈິ່ງ​ລ້ອມ​ຄອກ ເພາະ​ໄຟ​ລາມ​ທົ່ງ​ຖ້າ​ມັນ​ລຸ­ກລາມ​ອອກ​ກວ້າງ​ຍິ່ງ​ແກ້​ຍາກ ແລະ ບໍ່​ຄວນ​ລໍ­ຖ້າ​ໃຫ້​ງົວ​ເສຍ​ຈິ່ງ​ລ້ອມ​ຄອກ ແຕ່​ຄວນ​ສ້າງ​ຄອກ (ວິ­ທີ​ປ້ອງ​ກັນ​ໄວ້) ໄວ້​ປ້ອງ​ກັນ​ເພື່ອ​ບໍ່​ໃຫ້​ບັນ­ຫາ​ສັງ­ຄົມ​ບານ​ປາຍ ຄົນ​ເຮົາ​ບໍ່​ຄວນ​ຫຼົງ​ແລ່ນ­ນຳ​ເສດ­ຖະ­ກິດ​ຄວາມ​ຫຼູ​ຫຼາ​ເກີນ​ໄປ ຈົນ​ຫຼົງ​ລືມ​ກຽດ​ສັກ​ສີ​ມະ­ນຸດ​ຂອງ​ຕົນ !.

ດັ້ນ​ກີບ​ເມກ

ຂ່າວທີ່ກ່ຽວຂ້ອງ