ຫວຽດນາມ - ຍີ່ປຸ່ນ ເຈລະຈາ​ການ​ເປັນ​ຄູ່​ຮ່ວມ​ຍຸດ​ທະ​ສາດ​ຄັ້ງ​ທີ 7

436 05 ມິ.ຖ. 2019 ຂ່າວຕ່າງປະເທດ
ຫວຽດນາມ - ຍີ່ປຸ່ນ ເຈລະຈາ​ການ​ເປັນ​ຄູ່​ຮ່ວມ​ຍຸດ​ທະ​ສາດ​ຄັ້ງ​ທີ 7

    ຂ່າວສານ​ຫວຽດນາມ ລາຍ​ງານ​ວ່າ ການ​ເຈລະຈາ​ກ່ຽວ​ກັບ​ການ​ເປັນ​ຄູ່​ຮ່ວມ​ຍຸດ​ທະ​ສາດ ຫວຽດນາມ - ຍີ່ປຸ່ນ ຄັ້ງ​ທີ 7 ໄດ້​ຈັດ​ຂຶ້ນ​ເມື່ອ​ວັນ​ທີ 3 ມິຖຸນາ​ນີ້ ທີ່​ນະຄອນຫຼວງ ຮ່າ​ໂນ້ຍ ຂອງ​ຫວຽດນາມ ໂດຍ​ມີ​ຮອງ​ລັດຖະມົນຕີ​ການ​ຕ່າງປະເທດ​ຫວຽດນາມ ເລ​ຮ່ວ​​າຍ​ຈຸງ ແລະ​ຮອງ​ລັດຖະມົນຕີ​ການ​ຕ່າງປະເທດ​ຍີ່ປຸ່ນ ຕາ​ເກ​ໂອ ໂມ​ຣິ ເປັນ​ປະທານ​ຮ່ວມ​ກັນ.

   ຂ່າວ​ແຈ້ງວ່າ ສອງ​ຝ່າຍ​ໄດ້​ຕີ​ລາຄາ​ສູງ​ຕໍ່​ການ​ພັດທະນາ​ຢ່າງ​ຕັ້ງໜ້າ ແລະ ຮອບດ້ານ ຂອງ​ການ​ພົວພັນ​ລະຫວ່າງ​ສອງ​ປະເທດ ຫວຽດນາມ ແລະ ຍີ່ປຸ່ນ ໃນ​ໄລຍະ​ທີ່​ຜ່ານ​ມາ ພ້ອມ​ທັງ​ໄດ້​ແລກປ່ຽນ​ຄວາມ​ຄິດ​ຄວາມ​ເຫັນ ກ່ຽວ​ກັບ​ທິດ​ທາງ ແລະ​ມາດ​ຕະການ​ຕົວ​ຈິງ ເພື່ອ​ນຳ​ເອົາ​ການ​ພົວພັນ​ຄູ່​ຮ່ວມ​ຍຸດ​ທະ​ສາດ ທີ່​ກວ້າງຂວາງ ເລິກເຊິ່ງ ລະຫວ່າງ​ຫວຽດນາມ ກັບ​ຍີ່ປຸ່ນ  ໄປ​ສູ່​ການ​ພັດທະນາ​ທີ່​ນັບ​ມື້​ນັບ​ເຂົ້າ​ສູ່​ຕົວ​ຈິງ ແລະ​ມີ​ປະສິດທິພາບ ໃນ​ຂົງເຂດ​ການເມືອງ-ການ​ຕ່າງປະເທດ ປ້ອງ​ກັນ​ຊາດ ປ້ອງ​ກັນ​ຄວາມ​ສະຫງົບ.

    ໃນ​ຂະນະ​ດຽວ​ກັນ ສອງ​ຝ່າຍ​ກໍ​ໄດ້​ແລກປ່ຽນ​ຄວາມ​ຄິດ​ຄວາມ​ເຫັນ ກ່ຽວ​ກັບ​ບັນດາ​ບັນຫາ​ຂອງ​ສາກົນ ແລະ ​ພາກ​ພື້ນ ຊຶ່ງ​ຕ່າງ​ຝ່າຍ​ຕ່າງ​ກໍ​ໃຫ້​ຄວາມ​ສົນໃຈ.

ຂ່າວທີ່ກ່ຽວຂ້ອງ