ອາກ​ແຊກ​ໄບ​ຊານ ຍົກເລີກ​ສັນຍາ​ຊື້​ເຮືອບິນ 10 ລຳ ກັບ Boeing

217 05 ມິ.ຖ. 2019 ຂ່າວຕ່າງປະເທດ
ອາກ​ແຊກ​ໄບ​ຊານ ຍົກເລີກ​ສັນຍາ​ຊື້​ເຮືອບິນ 10 ລຳ ກັບ Boeing

   ເມື່ອ​ວັນ​ທີ 2 ມິຖຸນາ​ນີ້ ບໍລິສັດ​ການບິນ​ແຫ່ງ​ຊາດ​ອາ​ແຊກ​ໄບ​ຊານ (AZAL) ໄດ້​ປະກາດ​ຍົກເລີກ​ສັນຍາ​ສັ່ງ​ຊື້​ເຮືອບິນ  737 MAX ຈຳນວນ 10 ລຳ ກັບ​ບໍລິສັດ​ຜະລິດ​ເຮືອບິນ ໂບ​ອິງ Boeing ຫຼັງ​ຈາກ​ທີ່​ເກີດ​ອຸບັດເຫດ ທີ່​ພົວພັນ​ເຖິງ​ເຮືອບິນ​ປະເພດ​ດັ່ງກ່າວ ຊຶ່ງ​ເກີດ​ຂຶ້ນ​ຢູ່​ໃນ ເອ​ທີ​ໂອ​ປີ ແລະ ອິນ​ໂດ​ເນ​ເຊຍ ເມື່ອ​ບໍ່​ດົນ​ມາ​ນີ້. ໂຄສົກ​ຂອງ  AZAL ໃຫ້​ຮູ້​ວ່າ ບໍລິສັດ​ນີ້​ໄດ້​ປະຕິເສດ​ຕໍ່​ການ​ຊື້​ເຮືອບິນ​ດັ່ງກ່າວ ຍ້ອນ​ເຫດຜົນ​ດ້ານ​ຄວາມ​ປອດ​ໄພ.

    ກ່ອນ​ໜ້າ​ນີ້ ອົງການ​ຄຸ້ມ​ຄອງ​ການບິນ​ຂອງ ສ ອາ​ເມ​ຣິ​ກາ (FAA) ແຈ້ງ​ໃຫ້​ຮູ້​ວ່າ ໄດ້​ກວດ​ພົບ​ບັນຫາ​ໃໝ່​ອີກ​ໜຶ່ງ​ລາຍການ ນອກ​ເໜືອ​ຈາກ​ຄວາມ​ຂັດຂ້ອງ​ໃນ​ສ່ວນ​ຂອງ​ຊອບ​ແວ ທີ່​ພົວພັນ​ເຖິງ​ເຮືອບິນ 737 MAX ຂອງ Boeing ທີ່​ຖືກ​ຫ້າມ​ບິນ​ໄປ​ແລ້ວ​ນັ້ນ. ຕາມ​ນັ້ນແລ້ວ​ກໍ​ແມ່ນ ເຮືອບິນ​ປະເພດ 737 MAX ຈຳນວນ 300 ກວ່າ​ລຳ ແລະ ເຮືອບິນ 737 ປະເພດ​ເກົ່າ​ກວ່າ​ນັ້ນ ອາດ​ຈະ​ມີ​ພາກສ່ວນ​ທີ່​ຜະລິດ​ບໍ່​ຖືກຕ້ອງ​ຕາມ​ການ​ອອກ​ແບບ.

    ຈົນ​ມາ​ຮອດ​ເວລາ​ນີ້ Boeing ກໍ​ຍັງ​ບໍ່​ນຳ​ສະເໜີ​ບົດ​ອັບ​ເດດ​ການ​ແກ້​ໄຂ​ຄວາມ​ຂັດຂ້ອງ​ໃນ​ສ່ວນ​ຊອບ​ແວ​ຂອງ​ເຮືອບິນ 737 MAX  ນັ້ນ​ຂຶ້ນ​ໄປ​ຍັງ FAA ທ່າມກາງ​ທີ່  Boeing ພວມ​ພະຍາຍາມ​ເພື່ອ​ໃຫ້ FAA ເຫັນ​ດີ​ໃຫ້​ຢຸດຕິ​ຄຳ​ສັ່ງ​ຫ້າມ​ບິນ​ກັບ​ເຮືອບິນ​ປະເພດ 737 MAX.

ຂ່າວທີ່ກ່ຽວຂ້ອງ