ສປປ ເກົາຫຼີ ຮັບ​ມື​ກັບ​ໄພ​ແຫ້ງແລ້ງ

175 05 ມິ.ຖ. 2019 ຂ່າວຕ່າງປະເທດ
ສປປ ເກົາຫຼີ ຮັບ​ມື​ກັບ​ໄພ​ແຫ້ງແລ້ງ

     ໂທລະພາບ​ສູນ​ກາງ​ເກົາຫຼີ ໄດ້​ຮຽກຮ້ອງ​ເມື່ອ​ວັນ​ທີ 2 ມິຖຸນາ​ນີ້ ໃຫ້​ປະຊາຊົນ​ສະ​ສົມ​ນ້ຳ ແລະ​ໃຫ້​ສຳເລັດ​ການ​ປັກ​ດຳ​ເຂົ້າ​ໂດຍ​ໄວ ທ່າມກາງ​ທີ່​ສະພາບ​ແຫ້ງແລ້ງ ບໍ່​ມີ​ທີ​ທ່າ​ວ່າ​ຈະ​ຫຼຸດ​ລົງ ຢູ່​ໃນ​ບາງ​ເຂດ​ຂອງ​ປະເທດ​ນີ້.

    ເຈົ້າ​ໜ້າທີ່​ທ່ານ​ໜຶ່ງ ຈາກ​ສະ​ຖາ​ບັນ​ວິທະຍາສາດ​ກະສິກຳ​ຂອງ ​ສປປ ເກົາຫຼີ ກ່າວ​ຜ່ານ​ໂທລະພາບ​ແຫ່ງ​ລັດ​ຂອງ ​ສປປ ເກົາຫຼີ ວ່າ​ປະລິມານ​ນ້ຳ​ຝົນ​ຢູ່​ໃນ​ເທດ​ທິດຕາເວັນຕົກ​ສ່ຽງ​ໃຕ້​ຂອງ​ປະເທດ​ນີ້ ເມື່ອ​ເດືອນ​ພຶດສະພາ​ທີ່​ຜ່ານ​ມາ ເກືອບ​ແຕະ​ລະດັບ 0 ໃນ​ຂະນະ​ທີ່​ການ​ພະຍາກອນ​ອາກາດ ໃນ​ຊຸມ​ມື້​ຕົ້ນ​ເດືອນ​ມິຖຸນາ​ນີ້ ບໍ່​ເປັນ​ທີ່​ໜ້າ​ພໍໃຈ ເມື່ອ​ວ່າ​ປະລິມານ​ນ້ຳ​ຝົນ​ສືບຕໍ່​ຫຼຸດ​ລົງ.

    ເຈົ້າ​ໜ້າທີ່​ດັ່ງກ່າວ​ເວົ້າ​ວ່າ ທຸກໆ​ເຂດ​ຂອງ ​ສປປ ເກົາຫຼີ ຕ້ອງ​ໄດ້​ສະ​ສົມ​ນ້ຳ​ໃຫ້​ຫຼາຍ​ທີ່​ສຸດ​ເທົ່າ​ທີ່​ສາມາດ​ເຮັດ​ໄດ້ ແລະ​ໃຫ້​ສຳເລັດ​ການ​ປັກ​ດຳ​ເຂົ້າ​ໃຫ້​ໄວ. ຖ້າ​ຫາ​ກວ່າ​ວຽກ​ງານ​ດັ່ງກ່າວ​ຖືກ​ໂຈະ​ໄປ ກໍ​ຈະ​ເຮັດ​ໃຫ້​ປະລິມານ​ການ​ຜະລິດ​ໃນ​ລະດູ​ນາປີ​ຍິ່ງ​ຕ່ຳ​ລົງ.

    ກ່ອນ​ໜ້າ​ນັ້ນ ສື່ສານ​ໃນ ​ສປປ ເກົາຫຼີ ກໍ​ໄດ້​ຮຽກ​ຮ້ອງທຸກໆ​ຄວາມ​ພະຍາຍາມ ເພື່ອ​ຮອງ​ຮັບ​ກັບ​ໄພ​ແຫ້ງແລ້ງ ທ່າມກາງ​ທີ່​ສະພາບ​ແຫ້ງແລ້ງ​ຂຶ້ນ​ສູ່​ລະດັບ​ສູງ​ສຸດ. ໜັງສືພິມ ໂຮ​ດົງ ຊິນ​ມູນ ສຽງ​ຂອງ​ພັກ​ແຮງ​ງານ​ເກົາຫຼີ ໃຫ້​ຮູ້​ວ່າ ປະລິມານ​ນ້ຳ​ຝົນ ທີ່​ແທກ​ໄດ້​ໃນ 5 ເດືອນ​ຕົ້ນ​ປີ​ນີ້ ຢູ່​ທີ່​ລະດັບ​ຕ່ຳ​ສຸດ ນັບ​ແຕ​​ີ​ປີ 1917 ເປັນຕົ້ນ​ມາ. ສະພາບ​ອາກາດ​ຮຸນ​ແຮງ​ດັ່ງກ່າວ ໄດ້​ຮັບ​ການ​ຄາດ​ຄະເນ​ວ່າ ຈະ​ກະທົບ​ຕໍ່​ສະພາບ​ຄວາມ​ສະຫງົບ​ດ້ານ​ສະບຽງ​ອາຫານ​ຢູ່​ໃນ​ປະເທດ​ນີ້.

    ເມື່ອ​ເດືອນ​ກ່ອນ ໂຄງການ​ອາຫານ​ໂລກ (WFP)  ແລະ​ ອົງການ​ອາຫານ ແລະ ​ກະສິກຳ​ຂອງ​ສະຫະ​ປະຊາ​ຊາດ (FAO) ໄດ້​ປະກາດ​ບົດ​ລາຍ​ງານ​ອອກ​ມາ ຫຼັງ​ຈາກ​ການ​ໄປ​ສຳ​ຫຼວດ​ເບິ່ງ​ຢູ່​ໃນ ​ສປປ ເກົາຫຼີ ໂດຍ​ແຈ້ງ​ໃຫ້​ຮູ້​ວ່າ ປະລິມານ​ການ​ຜະລິດ​ລະດູ​ນາປີ ຢູ່​ໃນ​ປະເທດ​ດັ່ງກ່າວ ໃນ​ປີ 2018 ຢູ່​ໃນ​ລະດັບ​ຕ່ຳ​ສຸດ ນັບ​ແຕ່​ປີ 2008 ເປັນຕົ້ນ​ມາ ແລະ ຄາດ​ວ່າ​ປະມານ 10 ລ້ານ​ຄົນ (ເທົ່າ​ກັບ 40% ຂອງ​ຈຳນວນ​ປະຊາກອນ​ໃນ ​ສປປ ເກົາຫຼີ) ພວມ​ຕ້ອງການ​ຄວາມ​ຊ່ວຍເຫຼືອ​ສະບຽງ​ອາຫານ.

ຂ່າວທີ່ກ່ຽວຂ້ອງ