ຂ່າວຫຼ້າສຸດ

ເບີ່ງບ້ານເຂົາເອົາບົດຮຽນ 04-06-2019

777 04 ມິ.ຖ. 2019 ຫົວຂໍ້ຂ່າວອື່ນໆ

    ມື້­ນີ້​ມີ​ເລື່ອງ​ເກົ່າໆ​ເອົາ​ມາ​ເວົ້າ​ໃໝ່ ກ່ຽວ​ກັບ​ການ​ລົງ­ໂທດ​ຜູ້​ຊື້-ຂາຍ​ຂໍ້​ສອບ​ຢູ່​ກູ​ບາ ແລະ ມາດ​ຕະ­ການ​ຂອງ​ມຽນ​ມາ ໃນ​ການ​ລົງ­ໂທດ​ຕໍ່​ຄູ-ອາ­ຈານ ທີ່​ຮັບ​ສິນ​ບົນ ແລະ ສ້ຳ​ລາດ​ບັງ​ຫຼວງ.

    ທີ່​ກູ​ບາ: ໃນ​ໄລ­ຍະ​ນີ້ ຢູ່​ລາວ​ພວກ​ເຮົາ​ແມ່ນ​ລະ­ດູ​ການ​ສອບ­ເສັງ​ຂອງ​ເຫຼົ່າ​ນັກ­ຮຽນ ນັກ​ສຶກ​ສາ ດັ່ງ­ນັ້ນ ຈຶ່ງ​ຂໍ​ສະ­ເໜີ​ບົດ­ຮຽນ​ຂອງ​ປະ­ເທດ​ກູ​ບາ ໃນ​ການ​ລົງ­ໂທດ​ຜູ້​ທີ່​ມີ​ສ່ວນ​ພົວ­ພັນ​ກັບ​ການ​ຂາຍ ຫຼື ເຮັດ​ໃຫ້​ຂໍ້​ສອບ­ເສັງ​ຮົ່ວ ເພື່ອ​ເອົາ​ເງິນ​ເຂົ້າ­ຖົງ ຫຼື ເພື່ອ​ຜົນ​ປະ­ໂຫຍດ​ຂອງ​ຄົນ​ໃນ​ຄອບ­ຄົວ ຂ່າວ​ນີ້​ເກີດ​ຂຶ້ນ​ແຕ່​ທ້າຍ​ປີ 2014 ຢູ່​ປະ­ເທດ​ກູ​ບາ ໂດຍ​ທາງ​ການ​ໄດ້​ຕັດ­ສິນ​ລົງ­ໂທດ​ຈຳ​ຄຸກ​ອາ­ຈານ​ສອນ​ຈຳ­ນວນ 6 ຄົນ ແລະ ພະ­ນັກ­ງານ​ໂຮງ­ພິມ 1 ຄົນ ໄລ­ຍະ​ຈຳ​ຄຸກ​ນັ້ນ​ມີ​ແຕ່ 18 ເດືອນ (ປີ​ເຄິ່ງ) ຫາ 8 ປີ ຄະ­ດີ​ລັກ ແລະ ຊື້-ຂາຍ​ຂໍ້​ສອບ­ເສັງ​ທີ່​ວ່າ​ນັ້ນ​ແດງ​ຂຶ້ນ​ໃນ​ເດືອນ​ມິ­ຖຸ­ນາ ປີ 2014 ເຊິ່ງ​ເປັນ​ເຫດ​ໃຫ້​ທາງ​ກະ­ຊວງ​ສຶກ​ສາ​ທິ​ການ​ກູ​ບາ ຕ້ອງ​ໄດ້​ຍົກ­ເລີກ​ຜົນ​ການ​ສອບ­ເສັງ​ເຂົ້າ​ສະ​ຖາ​ບັນ ແລະ ມະ­ຫາ­ວິ­ທະ­ຍາ­ໄລ​ທັງ​ໝົດ​ທີ່​ມີ​ຂຶ້ນ​ໃນ​ເດືອນ​ພຶດ­ສະ­ພາ​ປີ​ນັ້ນ​ເອງ ຂໍ້​ສອບ​ທີ່​ມີ​ການ​ຊື້-ຂາຍ​ນັ້ນ ແມ່ນ​ກ່ຽວ​ກັບ​ວິ­ຊາ​ຄະ­ນິດ­ສາດ ພາ­ສາ (ແອັດ​ສະ​ປາຍ) ແລະ ວິ­ຊາ​ປະ­ຫວັດ­ສາດ ເປັນ​ອັນ­ວ່າ ທັງ 3 ວິ­ຊາ​ທີ່​ຮົ່ວ​ໄຫຼ​ນີ້ ຕ້ອງ​ມີ​ການ​ສອບ­ເສັງ​ຄືນ­ໃໝ່​ທັງ​ໝົດ ຄະ­ດີ​ໂກງ​ຂໍ້​ສອບ​ນັ້ນ ໄດ້​ເຮັດ​ໃຫ້​ມີ​ການ​ສູນ​ເສຍ​ດ້ານ​ການ​ເງິນ​ເປັນ​ຈຳ­ນວນ​ຫຼາຍ​ພັນ​ໂດ​ລາ ລາຍ​ລະ­ອຽດ​ຂອງ​ການ​ຊື້-ຂາຍ​ຂໍ້​ສອບ​ຄັ້ງ​ນັ້ນ ເລີ່ມ​ຈາກ​ໂຮງ­ພິມ​ບ່ອນ​ພິມ​ເອ­ກະ­ສານ​ຂໍ້​ສອບ ພະ­ນັກ­ງານ​ຫົວ​ໃສ​ໃຈ​ຄົດ​ຄົນ​ໜຶ່ງ ປະ­ຈຳ​ຢູ່​ໂຮງ­ພິມ​ໄດ້​ສວຍ­ໂອ­ກາດ​ລັກ​ເອົາ​ຂໍ້​ສອບ​ໄປ​ຂາຍ​ໃຫ້​ບັນ­ດາ​ຄູ-ອາ­ຈານ​ໃນ​ລາ­ຄາ​ງາມໆ ສ່ວນ​ຄູ-ອາ­ຈານ​ນັ້ນ​ໄດ້​ເອົາ​ຂໍ້​ສອບ​ໄປ​ຂາຍ​ຕໍ່­ໃຫ້​ນັກ​ສຶກ​ສາ ເພື່ອ​ຊອກ​ເງິນ​ເຂົ້າ­ຖົງ ແຕ່​ສຸດ​ທ້າຍ​ບາບ​ກໍ​ບໍ່​ເອົາ​ຊະ­ນະ​ບຸນ​ໄດ້ ສານ​ໄດ້​ຕັດ­ສິນ​ລົງ­ໂທດ​ພະ­ນັກ­ງານ​ໂຮງ­ພິມ​ໜັກ​ວ່າ​ໝູ່ ຄື ຕິດ​ຄຸກ 8 ປີ ອາ­ຈານ​ມະ­ຫາ­ວິ­ທະ­ຍາ­ໄລ 2 ຄົນ ຖືກ​ຕັດ­ສິນ​ຈຳ​ຄຸກ​ຜູ້​ລະ 4 ປີ ສ່ວນ​ເຫຼືອ​ນັ້ນ​ຖືກ​ຕັດ­ສິນ​ຈຳ​ຄຸກ​ຂັ້ນ​ເບົາ­ບາງ​ກວ່າ ໃນ​ນັ້ນ ມີ​ອາ­ຈານ​ລະ­ດັບ​ສາດ­ສະ­ດາ­ຈານ​ໜຶ່ງ​ຄົນ ທີ່​ໄດ້​ຊື້​ເອົາ​ຂໍ້​ສອບ​ໃຫ້​ພວກ​ລູກໆ​ຂອງ​ຕົນ​ເອງ ຜູ້​ກະ­ທຳ​ຜິດ​ທັງ 7 ຄົນ​ຮັບ­ຜິດ­ຊອບ​ໃຊ້​ຄ່າ​ເສຍ​ຫາຍ​ຜິດ​ທັງ 7 ຄົນ ທັງ​ໝົດ​ເກີດ​ຈາກ​ເຫດ­ການ​ດັ່ງ­ກ່າວ (ປະ­ມານ 29.800 ໂດ​ລາ​ສະ­ຫະ­ລັດ) ສຳ­ລັບ​ຄູ-ອາ­ຈານ​ນັ້ນ ແມ່ນ​ຖືກ​ຕັດ​ສິດ​ໃນ​ການ​ສິດ­ສອນ ບັນ­ຫາ​ລັກ­ລອບ​ໂກງ ຫຼື ເຮັດ​ຂໍ້​ສອບ​ຮົ່ວ​ຢູ່​ຕ່າງ­ປະ­ເທດ​ນັ້ນ ເຂົາ​ມີ​ມາດ​ຕະ­ການ​ລົງ­ໂທດ​ຢ່າງ​ເດັດ­ຂາດ ເມື່ອ 3 ປີ​ກ່ອນ​ໜ້າ​ນີ້ ທາງ​ການ​ກຳ­ປູ­ເຈຍ ກໍ​ໄດ້​ອອກ​ລະ­ບຽບ​ການ​ລົງ­ໂທດ​ຢ່າງ​ໜັກ​ຕໍ່​ຜູ້​ຄ້າ-ຂາຍ ຫຼື ເຮັດ​ຂໍ້​ສອບ​ຮົ່ວ.

    ຢູ່​ມຽນ​ມາ: ໃນ​ປີ 2014 ທາງ​ການ​ມຽນ​ມາ ໄດ້​ກຳ­ນົດ​ມາດ​ຕະ­ການ​ເດັດ­ຂາດ​ຕໍ່​ຄູ-ອາ­ຈານ​ທີ່​ຮັບ​ສິນ​ບົນ ແລະ ສໍ້​ລາດ​ບັງ​ຫຼວງ ເຊັ່ນ: ເປີດ​ການ​ສິດ­ສອນ “ພິ­ເສດ” ສຳ­ລັບ​ນັກ­ຮຽນ​ທີ່​ຢາກ​ໄດ້​ຄະ­ແນນ​ສູງໆ ຫຼື ຢາກ​ສອບ­ເສັງ​ສຶກ​ສາ​ຕໍ່​ໄດ້ ທາງ​ການ​ມຽນ​ມາ​ເຫັນ​ວ່າ ການ​ປະ­ພຶດ​ແບບ​ນີ້ ເປັນ​ການ​ຈຳ­ແນກ​ຕໍ່​ນັກ­ຮຽນ-ນັກ​ສຶກ​ສາ​ຈາກ​ຄອບ­ຄົວ​ທຸກ​ຍາກ ນອກ­ຈາກ​ນັ້ນ ບາງ​ໂຮງ­ຮຽນ​ທີ່​ມີ​ຊື່​ສຽງ ຍັງ​ເກັບ​ຄ່າ​ເຂົ້າ​ຮຽນ​ສູງ​ເຖິງ 1.000 ໂດ​ລາ​ສະ­ຫະ­ລັດ​ຕໍ່​ຄົນ ດັ່ງ­ນັ້ນ ທາງ​ການ​ຂອງ​ມຽນ​ມາ ຈຶ່ງ​ໄດ້​ກຳ­ນົດ​ມາດ​ຕະ­ການ​ແກ້​ໄຂ​ບັນ­ຫາ​ດັ່ງ­ກ່າວ.

ຂ່າວທີ່ກ່ຽວຂ້ອງ