ນາຍົກລາວ ແລະ ຫວຽດນາມ ຊຸກຍູ້ກິດຈະກຳພື້ນຖານໂຄງລ່າງທີ່ສຳຄັນ

1.233 04 ມິ.ຖ. 2019 ຂ່າວໜ້າ​ໜຶ່ງ
ນາຍົກລາວ ແລະ ຫວຽດນາມ ຊຸກຍູ້ກິດຈະກຳພື້ນຖານໂຄງລ່າງທີ່ສຳຄັນ

    ວັນ​ທີ 1 ມິ­ຖຸ­ນາ 2019 ທີ່​ນະ­ຄອນ­ຫຼວງ​ຮ່າ​ໂນ້ຍ ທ່ານ ຫງວຽນ​ຊວນ​ຟຸກ ນາ­ຍົກ­ລັດ­ຖະ­ມົນ­ຕີ​ຫວຽດ­ນາມ ໄດ້​ໃຫ້­ການ​ຕ້ອນ­ຮັບ​ທ່ານ ທອງ​ລຸນ ສີ​ສຸ​ລິດ ນາ­ຍົກ­ລັດ­ຖະ­ມົນ­ຕີ ທີ່​ກັບ​ຈາກ​ການ​ຢ້ຽມ­ຢາມ ແລະ ເຂົ້າ​ຮ່ວມ​ກອງ​ປະ­ຊຸມ​ອະ­ນາ­ຄົດ​ອາ­ຊີ​ຢູ່​ປະ­ເທດ​ຍີ່­ປຸ່ນ ປະ­ສົບ​ຜົນ­ສຳ­ເລັດ.

    ໂອ­ກາດ​ນີ້ ທ່ານ​ນາ­ຍົກ­ລັດ­ຖະ­ມົນ­ຕີ​ຫວຽດ­ນາມ ກ່າວ​ວ່າ: ລັດ­ຖະ­ບານ ກະ­ຊວງ ຂະ­ແໜງ­ການ​ຂັ້ນ​ຕ່າງໆ​ຂອງ​ສອງ​ປະ­ເທດ ພວມ​ຕັ້ງ­ໜ້າ​ປະ­ຕິ­ບັດ​ຂໍ້​ຕົກ­ລົງ​ສະ­ບັບ​ຕ່າງໆ ເຊິ່ງ​ກົມ​ການ­ເມືອງ​ສອງ​ປະ­ເທດ​ໄດ້​ວາງ​ອອກ ໃນ​ນັ້ນ ມີ​ບັນ­ດາ​ຂົງ­ເຂດ ແລະ ວຽກ​ງານ​ສຳ­ຄັນ​ຫຼາຍ​ຢ່າງ​ບັນ­ລຸ​ໄດ້­ຜົນ​ງານ​ຢ່າງ​ຕັ້ງ­ໜ້າ ປັດ­ຈຸ­ບັນ 2 ປະ­ເທດ​ພວມ​ຊຸກ­ຍູ້​ການ​ພົວ­ພັນ​ຮ່ວມ​ມື​ໃນ​ຫຼາຍ​ຂົງ­ເຂດ ໂດຍ​ສະ­ເພາະ ບັນ­ດາ​ກິດ­ຈະ­ກຳ​ພື້ນ­ຖານ​ໂຄງ​ລ່າງ​ສຳ­ຄັນ ເຊັ່ນ: ທ່າ​ກຳ­ປັ່ນ ຫວຸ໊ງ​ອ໋າງ ເສັ້ນ­ທາງ​ດ່ວນ ວຽງ​ຈັນ-ຮ່າ​ໂນ້ຍ ໂດຍ​ທ່ານ​ນາ­ຍົກ­ລັດ­ຖະ­ມົນ­ຕີ​ຢັ້ງ­ຢືນ​ວ່າ ຫວຽດ­ນາມ ຍາມ​ໃດ​ກໍ​ພະ­ຍາ­ຍາມ​ເຮັດ​ສຸດ​ຄວາມ​ສາ­ມາດ​ຂອງ​ຕົນ ເພື່ອ​ເພີ່ມ​ທະ­ວີ​ການ​ຮ່ວມ​ມື​ກັບ​ລາວ​ຊ່ວຍ­ເຫຼືອ​ປະ­ຊາ­ຊົນ​ລາວ​ອ້າຍ​ນ້ອງ ໃນ​ພາ­ລະ­ກິດ​ພັດ­ທະ­ນາ​ປະ­ເທດ​ຊາດ.

    ທ່ານ ທອງ​ລຸນ ສີ​ສຸ​ລິດ ໄດ້​ກ່າວ​ສະ­ແດງ​ຄວາມ​ຂອບ­ໃຈ​ຕໍ່​ການ​ຕ້ອນ­ຮັບ​ຢ່າງ​ອົບ​ອຸ່ນ ແລະ ຕີ​ລາ­ຄາ​ສູງ​ຕໍ່​ການ​ຜັນ​ຂະ­ຫຍາຍ​ບັນ­ດາ​ໂຄງ­ການ​ເຊື່ອມ​ຕໍ່​ເສັ້ນ­ທາງ​ຄົມ­ມະ­ນາ­ຄົມ ລະ­ຫວ່າງ 2 ປະ­ເທດ ຄື: ເສັ້ນ­ທາງ​ດ່ວນ ວຽງ​ຈັນ-ຮ່າ​ໂນ້ຍ ເສັ້ນ­ທາງ​ລົດ­ໄຟ ຮ່າ​ຕິງ-ຄຳ​ມ່ວນ ແມ່ນ​ມີ​ຄວາມ​ໝາຍ​ສຳ­ຄັນ​ໃນ​ການ​ຊຸກ­ຍູ້ ການ​ແລກ­ປ່ຽນ​ການ​ຄ້າ​ລະ­ຫວ່າງ​ສອງ​ປະ­ເທດ ກໍ​ຄື ໃນ​ແລວ​ເສດ­ຖະ­ກິດ​ຕາ­ເວັນ​ອອກ-ຕາ­ເວັນ­ຕົກ ເຊິ່ງ​ນາ­ຍົກ­ລັດ­ຖະ­ມົນ­ຕີ​ທັງ 2 ໄດ້​ເນັ້ນ​ໜັກ​ເປັນ​ພິ­ເສດ​ເຖິງ​ຄວາມ​ຕັດ­ສິນ​ໃຈ​ການ​ຊຸກ­ຍູ້ ແລະ ນຳ​ວົງ​ເງິນ​ການ​ຄ້າ 2 ຝ່າຍ​ເພີ່ມ​ຂຶ້ນ ສ້າງ​ບາດ­ກ້າວ​ບຸກ​ທະ­ລຸ​ໃນ​ໄລ­ຍະ​ທີ່​ຈະ​ມາ​ເຖິງ.

    ພ້ອມ​ນີ້ ທ່ານ​ນາ­ຍົກ­ລັດ­ຖະ­ມົນ­ຕີ​ຫວຽດ­ນາມ ໄດ້​ຢືນ­ຢັນ​ວ່າ​ເຖິງ​ຈະ​ມີ​ຄວາມ​ຫຍຸ້ງ­ຍາກ​ຫຼາຍ​ຢ່າງ ແຕ່​ຫວຽດ­ນາມ​ກໍ​ພ້ອມ​ໃນ​ການ​ຊຸກ­ຍູ້​ຮ່ວມ​ມື​ກັບ​ລາວ ເພື່ອ​ສົ່ງ­ເສີມ​ການ­ຈັດ­ຕັ້ງ​ປະ­ຕິ­ບັດ​ໂຄງ­ການ​ພື້ນ­ຖານ​ໂຄງ​ລ່າງ​ຂອງ 2 ປະ­ເທດ ຫວຽດ­ນາມ ພ້ອມ​ທີ່​ຈະ​ໃຫ້­ການ​ຊ່ວຍ­ເຫຼືອ ແລະ ແບ່ງ­ປັນ​ປະ­ສົບ​ການ​ກັບ​ລາວ​ໃນ​ຂະ​ບວນ​ການ​ສ້າງ­ສາ ແລະ ພັດ­ທະ­ນາ​ປະ­ເທດ ມີ​ຄວາມ​ຍິນ​ດີ​ທີ່​ເຫັນ​ວ່າ­ການ​ພົວ­ພັນ​ສອງ​ຝ່າຍ​ສືບ­ຕໍ່​ໄດ້​ຮັບ​ການ​ເສີມ​ຂະ­ຫຍາຍ ໂດຍ​ສະ­ເພາະ ໃນ​ເດືອນ​ທຳ​ອິດ​ຂອງ​ປີ 2019 ທັງ 2 ຝ່າຍ​ໄດ້​ປະ­ຕິ­ບັດ​ກິດ­ຈະ­ກຳ​ທີ່​ສຳ­ຄັນ​ຈຳ­ນວນ​ໜຶ່ງ ປະ­ກອບ­ສ່ວນ​ເພື່ອ​ສົ່ງ­ເສີມ​ສາຍ​ພົວ­ພັນ​ລະ­ຫວ່າງ 2 ປະ­ເທດ.

ຂ່າວທີ່ກ່ຽວຂ້ອງ