ຟື້ນຟູສວນພຶກສາສາດ ຫ້ວຍຍາງ-ດົງໝາກຄາຍ ໃຫ້ກາຍເປັນປ່າໄມ້ທີ່ສົມບູນ

437 04 ມິ.ຖ. 2019 ຂ່າວໜ້າ​ໜຶ່ງ
ຟື້ນຟູສວນພຶກສາສາດ ຫ້ວຍຍາງ-ດົງໝາກຄາຍ ໃຫ້ກາຍເປັນປ່າໄມ້ທີ່ສົມບູນ

    ກະ­ຊວງ​ກະ­ສິ­ກຳ ແລະ ປ່າ­ໄມ້ (ກປ) ຮ່ວມ​ກັບ​ກະ­ຊວງ​ຊັບ­ພະ­ຍາ­ກອນ​ທຳ​ມະ​ຊາດ ແລະ ສິ່ງ­ແວ­ດລ້ອມ (ກຊສ) ຈັດ​ພິ­ທີ​ປູກ​ຕົ້ນ­ໄມ້​ໃນ​ວັນ​ປູກ​ຕົ້ນ­ໄມ້​ແຫ່ງ​ຊາດ 1 ມິ­ຖຸ­ນາ ວັນ​ສິ່ງ­ແວ­ດລ້ອມ​ແຫ່ງ​ຊາດ ແລະ ວັນ​ສິ່ງ­ແວ­ດລ້ອມ​ໂລກ 5 ມິ­ຖຸ­ນາ ຂຶ້ນ​ວັນ​ທີ 1 ມິ­ຖຸ­ນາ 2019 ທີ່​ສວນ­ພຶກ­ສາ­ສາດ (ຫ້ວຍ​ຍາງ-ດົງ​ໝາກ­ຄາຍ) ເມືອງ​ໄຊ​ທາ­ນີ ນະ­ຄອນ­ຫຼວງ​ວຽງ​ຈັນ (ນວ) ມີ​ທ່ານ ພັນ​ຄຳ ວິ­ພາ​ວັນ ຮອງ​ປະ­ທານ​ປະ­ເທດ ທ່ານ ລຽນ ທິ​ແກ້ວ ລັດ­ຖະ­ມົນ­ຕີ​ກະ­ຊວງ ກປ ທ່ານ ສົມ​ມາດ ພົນ​ເສ­ນາ ລັດ­ຖະ­ມົນ­ຕີ ກຊສ ພ້ອມ​ດ້ວຍ​ບັນ­ດາ​ລັດ­ຖະ­ມົນ­ຕີ ຮອງ​ລັດ­ຖະ­ມົນ­ຕີ ອົງ­ການ​ທຽບ​ເທົ່າ ທູ­ຕາ­ນຸ­ທູດ ພະ­ນັກ­ງານ ຊາວ​ໜຸ່ມ ແລະ ເຍົາ­ວະ​ຊົນ​ເຂົ້າ​ຮ່ວມ.

    ທ່ານ ລຽນ ທິ​ແກ້ວ ກ່າວ​ວ່າ: ຜ່ານ​ການ­ເຄື່ອນ­ໄຫວ​ຕົວ​ຈິງ​ໄລ­ຍະ​ຜ່ານ​ມາ​ສັງ­ເກດ​ເຫັນ​ວ່າ ເນື້ອ­ທີ່​ປູກ​ຕົ້ນ­ໄມ້​ໄດ້​ເພີ່ມ​ຂຶ້ນ​ຢ່າງ​ຕໍ່​ເນື່ອງ​ຈາກ 452 ເຮັກ­ຕາ ປີ 1978 ມາ​ເປັນ 1.384 ເຮັກ­ຕາ ປີ 1985 ເພີ່ມ​ຂຶ້ນ​ສາມ​ເທົ່າ​ໂຕ ຖ້າ​ທຽບ­ໃສ່​ຕົວ​ເລກ​ການ​ປູກ​ໄມ້​ກ່ອນ​ການ​ກຳ­ນົດ​ວັນ​ປູກ​ຕົ້ນ­ໄມ້​ແຫ່ງ​ຊາດ ໂດຍ​ສືບ­ຕໍ່​ຈັດ​ຕັ້ງ​ປະ­ຕິ­ບັດ​ຂະ​ບວນ​ການ​ດັ່ງ­ກ່າວ ບວກ​ກັບ​ການ​ປັບ­ປຸງ​ນະ­ໂຍ­ບາຍ-ນິ­ຕິ​ກຳ​ທີ່​ກ່ຽວ­ຂ້ອງ ການ​ຊີ້​ນຳ-ນຳ­ພາ​ຢ່າງ​ໃກ້­ຊິດ​ຂອງ​ການ​ນຳ​ພັກ​ລັດ​ຂັ້ນ​ຕ່າງໆ ຄວາມ​ຕື່ນ​ຕົວ​ຂອງ​ປະ­ຊາ­ຊົນ​ບັນ­ດາ­ເຜົ່າ ແລະ ການ​ເປີດ​ກວ້າງ​ການ​ລົງ­ທຶນ ໄດ້​ເຮັດ​ໃຫ້​ເນື້ອ­ທີ່​ປູກ​ໄມ້​ເພີ່ມ​ຂຶ້ນ​ຢ່າງ​ຕໍ່​ເນື່ອງ ແລະ ຕົກ​ມາ​ເຖິງ​ທ້າຍ​ປີ 2018 ສາ­ມາດ​ປູກ​ໄມ້​ໃນ​ທົ່ວ​ປະ­ເທດ​ໄດ້​ທັງ​ໝົດ 486.600 ເຮັກ­ຕາ ໃນ​ນັ້ນ ເປັນ​ການ​ລົງ­ທຶນ​ຂອງ​ຜູ້​ປະ­ກອບ​ການ 66,5% ປະ­ຊາ­ຊົນ 33% ແລະ ລັດ 0,5% ຖ້າ​ເບິ່ງ​ດ້ານ​ໂຄງ​ປະ­ກອບ​ຂອງ​ຊະ­ນິດ​ພັນ​ໄມ້​ເຫັນ​ວ່າ​ມີ: ໄມ້​ຢາງ­ພາ­ລາ​ກວມ​ເອົາ 56,7% ໄມ້​ວິກ 16% ໄມ້​ສັກ 10,2% ໄມ້​ເກດ­ສະ­ໜາ 6,5% ແລະ ສ່ວນ​ທີ່​ເຫຼືອ 10,6% ເປັນ​ຊະ­ນິດ​ໄມ້​ພັນ​ພື້ນ­ເມືອງ​ອື່ນໆ.

    ຈຸດ­ປະ­ສົງ​ການ​ປູກ​ຕົ້ນ­ໄມ້​ຄັ້ງ​ນີ້ ເພື່ອ​ຟື້ນ​ຟູ​ສວນ​ພຶດ​ສາ​ສາດ​ຫ້ວຍ​ຍາງ-ດົງ​ໝາກ­ຄາຍ ໃຫ້​ກາຍ­ເປັນ​ສະ­ພາບ​ປ່າ­ໄມ້​ທີ່​ສົມ­ບູນ ເປັນ​ແຫຼ່ງ​ເຕົ້າ­ໂຮມ​ເຊື້ອ​ພັນ​ໄມ້​ຊະ­ນິດ​ຕ່າງໆ​ທີ່​ມີ​ຄຸນ­ຄ່າ ແລະ ຫາ​ຍາກ​ຂອງ​ລາວ ເພີ່ມ​ເນື້ອ­ທີ່​ສີ­ຂຽວ​ໃຫ້​ກາຍ­ເປັນ​ປອດ​ຫາຍ­ໃຈ​ເອົາ​ອາ­ກາດ​ທີ່​ສະ­ອາດ ແລະ ຫຼຸດ­ຜ່ອນ​ມົນ​ລະ​ພິດ​ໃນ​ອາ­ກາດ​ໃຫ້​ແກ່​ຊາວ ນວ.

    ສວນ­ພຶກ­ສາ­ສາດ​ແຫ່ງ​ນີ້​ມີ​ເນື້ອ­ທີ່​ທັງ​ໝົດ 268 ເຮັກ­ຕາ ເຊິ່ງ​ເຫັນ​ວ່າ​ຈະ​ຕ້ອງ​ໄດ້​ມີ​ການ​ຟື້ນ​ຟູ ແລະ ປູກ​ໄມ້​ຊະ­ນິດ​ຕ່າງໆ ເພື່ອ​ເຮັດ​ໃຫ້​ໂຄງ​ປະ­ກອບ​ດ້ານ​ຊະ­ນິດ​ພັນ​ໄມ້ ມີ​ຄວາມ​ຫຼາກ​ຫຼາຍ​ຍິ່ງ​ຂຶ້ນ ກາຍ­ເປັນ​ສະ­ຖານ­ທີ່​ເພື່ອ​ການ​ຄົ້ນ­ຄວ້າ​ທາງ​ດ້ານ​ວິ­ທະ­ຍາ­ສາດ ແລະ ການ​ສຶກ​ສາ​ຮ່ຳ­ຮຽນ​ທາງ​ດ້ານ​ວະ​ນາ​ວັດ​ວິ­ທະ­ຍາ​ໃຫ້​ນັກ​ສຶກ​ສາ​ໃນ​ອະ­ນາ­ຄົດ ສຳ­ລັບ​ປີ 2019 ກະ­ຊວງ​ກະ­ສິ­ກຳ ແລະ ປ່າ­ໄມ້ ມີ​ແຜນ​ປູກ​ຕົ້ນ­ໄມ້​ຮ່ວມ​ກັນ​ໃນ​ເນື້ອ­ທີ່ 5 ເຮັກ­ຕາ ມີ 4.166 ຕົ້ນ ແລະ ມີ 7 ຊະ­ນິດ​ໄມ້ ຄື: ໄມ້​ຂະ​ຍຸງ ໄມ້​ດູ່​ເລືອດ ໄມ້​ດູ່​ລາຍ ໄມ້​ແຕ້​ຂ່າ ໄມ້​ປະ­ດົງ ໄມ້­ຍາງ ແລະ ໄມ້­ແຄນ​ເຮືອ.

ຂ່າວທີ່ກ່ຽວຂ້ອງ