ລາວ-ນອກແວ ຍົກເວັ້ນວີຊາສຳລັບຜູ້ຖືໜັງສືຜ່ານແດນການທູດ

517 04 ມິ.ຖ. 2019 ຂ່າວໜ້າ​ໜຶ່ງ

    ສັນ­ຍາ​ການ​ຍົກ­ເວັ້ນ​ວີ​ຊາ​ສຳ­ລັບ​ຜູ້​ຖື​ໜັງ­ສື­ຜ່ານ­ແດນ​ການ​ທູດ ລະ­ຫວ່າງ ສປປ ລາວ ແລະ ຣາ​ຊະ​ອາ­ນາ­ຈັກ​ນອກ​ແວ ທີ່​ໄດ້​ຮັບ​ການ​ລົງ​ນາມ​ໃນ​ວັນ​ທີ 1 ສິງ­ຫາ 2018 ທີ່​ປະ­ເທດ ສິງ­ກະ­ໂປ ຈະ​ມີ​ຜົນ​ບັງ­ຄັບ​ໃຊ້​ໃນ​ວັນ​ທີ 1 ມິ­ຖຸ­ນາ 2019 ເປັນ­ຕົ້ນ​ໄປ ເຊິ່ງ​ມີ​ເນື້ອ​ໃນ​ສຳ­ຄັນ​ດັ່ງ​ລຸ່ມ​ນີ້: ຄົນ​ສັນ­ຊາດ​ຂອງ​ຄູ່​ສັນ­ຍາ​ຝ່າຍ​ໜຶ່ງ​ທີ່​ຖື​ໜັງ­ສື­ຜ່ານ­ແດນ​ການ​ທູດ ທີ່​ມີ​ອາ­ຍຸ​ນຳ​ໃຊ້ ເຊິ່ງ​ບໍ່​ແມ່ນ​ຜູ້​ທີ່​ໄດ້​ຮັບ​ການ​ແຕ່ງ­ຕັ້ງ​ໄປ​ປະ­ຈຳ­ການ ຢູ່​ໃນ​ດິນ­ແດນ​ຂອງ​ຄູ່​ສັນ­ຍາ​ຝ່າຍ​ໜຶ່ງ ສາ­ມາດ​ເດີນ­ທາງ​ເຄື່ອນ​ໄຫວ​ທາງ​ລັດ​ຖະ​ການ ເຂົ້າ-ອອກ ຜ່ານ ແລະ ພັກ​ເຊົາ​ຢູ່​ດິນ­ແດນ​ຂອງ​ຄູ່​ສັນ­ຍາ​ຝ່າຍ​ໜຶ່ງ​ໄດ້ ໃນ​ແຕ່​ລະ​ຄັ້ງ​ບໍ່​ເກີນ 90 ວັນ ຈາກ​ໄລ­ຍະ​ເວ­ລາ 180 ວັນ ໄລ­ຍະ​ການ​ພັກ​ເຊົາ​ສູງ​ສຸດ 90 ວັນ​ດັ່ງ­ກ່າວ​ແມ່ນ​ນັບ​ລວມ​ທຸກໆ​ຄັ້ງ​ທີ່​ເດີນ­ທາງ​ເຂົ້າ​ພັກ​ເຊົາ ຫຼື ເຂົ້າ​ພັກ​ເຊົາ​ຄັ້ງ​ດຽວ 90 ວັນ.

    ພາຍ​ໃຕ້​ສັນ­ຍາ​ສະ­ບັບ​ນີ້ ຈະ​ບໍ່​ໄດ້​ຍົກ­ເວັ້ນ​ວີ​ຊາ​ໃຫ້​ແກ່​ຄົນ​ສັນ­ຊາດ​ຂອງ​ຄູ່​ສັນ­ຍາ ລວມ​ທັງ​ສະ­ມາ­ຊິກ​ຄອບ­ຄົວ​ທີ່​ຖື​ໜັງ­ສື­ຜ່ານ­ແດນ​ການ​ທູດ ທີ່​ໄປ​ປະ­ຈຳ­ການ​ຢູ່​ສະ­ຖານ­ທູດ ຫຼື ສະ­ຖານ​ກົງ­ສຸນ ຫຼື ອົງ​ການ­ຈັດ­ຕັ້ງ​ສາ­ກົນ ທີ່​ຕັ້ງ​ຢູ່​ດິນ­ແດນ​ຂອງ​ຄູ່​ສັນ­ຍາ​ອີກ​ຝ່າຍ​ໜຶ່ງ ໃນ​ນັ້ນ ລວມ​ທັງ​ສະ­ມາ­ຊິກ​ຄອບ­ຄົວ​ຂອງ​ເຂົາ­ເຈົ້າ.

ຂ່າວທີ່ກ່ຽວຂ້ອງ