ເຜີຍແຜ່ການແກ້ໄຂບັນຫາພະຍາດມະເຮັງທໍ່ນ້ຳບີ

582 04 ມິ.ຖ. 2019 ຂ່າວໜ້າ​ໜຶ່ງ
ເຜີຍແຜ່ການແກ້ໄຂບັນຫາພະຍາດມະເຮັງທໍ່ນ້ຳບີ

    ກອງ​ປະ­ຊຸມ​ເຜີຍ­ແຜ່​ການ​ແກ້​ໄຂ​ບັນ­ຫາ​ພະ­ຍາດ​ມະ​ເຮັງ​ທໍ່​ນ້ຳ­ບີ ໃນ ສປປ ລາວ ຈັດ​ຂຶ້ນ​ວັນ​ທີ 31 ພຶດ­ສະ­ພາ 2019 ຢູ່​ໂຮງ­ໝໍ​ມະ­ໂຫ­ສົດ ໂດຍ​ມີ​ທ່ານ ບຸນ​ກອງ ສີ​ຫາ​ວົງ ລັດ­ຖະ­ມົນ­ຕີ​ກະ­ຊວງ​ສາ­ທາ­ລະ­ນະ​ສຸກ ພ້ອມ​ດ້ວຍ​ທ່ານ​ຜູ້­ອຳ­ນວຍ­ການ​ໂຮງ­ໝໍ​ມະ­ໂຫ­ສົດ ຫົວ­ໜ້າ​ສະ​ຖາ​ບັນ​ສາ­ທາ­ລະ­ນະ​ສຸກ​ສາດ ແລະ ການ​ແພດ​ເຂດ​ຮ້ອນ ຫົວ­ໜ້າ​ສະ​ຖາ​ບັນ​ວິ­ໄຈ​ມະ​ເຮັງ​ທໍ່​ນ້ຳ­ບີ ມະ­ຫາ­ວິ­ທະ­ຍາ­ໄລ​ຂອນ​ແກ່ນ ປະ­ເທດ​ໄທ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ນັບ​ແຕ່​ປີ 2017 ເປັນ­ຕົ້ນ​ມາ ຄວາມ​ພະ­ຍາ­ຍາມ​ໃນ​ການ​ແກ້​ໄຂ​ພະ­ຍາດ​ມະ​ເຮັງ​ທໍ່​ນ້ຳ­ບີ ໃນ ສປປ ລາວ ໄດ້​ເລີ່ມ​ຂຶ້ນ​ພາຍ​ໃຕ້​ການ​ຮ່ວມ​ມື​ລະ­ຫວ່າງ​ສະ​ຖາ​ບັນ​ສາ­ທາ­ລະ­ນະ​ສຸກ​ສາດ ແລະ ການ​ແພດ​ເຂດ​ຮ້ອນ ສປປ ລາວ ສະ​ຖາ​ບັນ​ວິ­ໄຈ​ມະ​ເຮັງ​ທໍ່​ນ້ຳ­ບີ ມະ­ຫາ­ວິ­ທະ­ຍາ­ໄລ​ຂອນ​ແກ່ນ ປະ­ເທດ​ໄທ ແລະ ສະ​ຖາ​ບັນ​ການ​ແພດ​ເຂດ​ຮ້ອນ ແລະ ສາ­ທາ­ລະ­ນະ​ສຸກ​ສາດ​ສະ​ວິດ ປະ­ເທດ​ສະ​ວິດ ໂຄງ­ການ​ດັ່ງ­ກ່າວ​ໄດ້​ລົງ​ເຮັດ​ວຽກ​ຕົວ​ຈິງ​ໃນ​ຊຸມ​ຊົນ ແລະ ໄດ້​ຄົ້ນ​ບົ່ງ­ມະ­ຕິ​ຄົນ​ເຈັບ​ຜູ້​ທີ່​ເກີດ​ເປັນ​ມະ​ເຮັງ​ທໍ່​ນ້ຳ­ບີ​ຂັ້ນ​ເລີ່ມ​ຕົ້ນ ເຊິ່ງ​ພະ­ຍາດ​ດັ່ງ­ກ່າວ​ເກີດ​ຈາກ​ການ​ຕິດ­ເຊື້ອ​ແມ່​ກາ​ຝາກ ໃບ​ໄມ້​ໃນ​ຕັບ ຈາກ​ການ​ກິນ​ປາ​ດິບ ຫຼື ປາ​ທີ່​ປຸງ​ສຸກໆ​ດິບໆ ແລະ ໃນ​ລາຍ­ການ​ອາ­ຫານ​ຫຼາຍ​ຢ່າງ​ຂອງ​ລາວ ພາ­ໃຫ້​ເກີດ​ມີ​ການ​ຕິດ­ເຊື້ອ ແລະ ສະ​ສົມ​ເປັນ​ເວ­ລາ​ຫຼາຍ​ປີ.

    ທ່ານ​ນາງ ແສງ​ຈັນ ກຸນ​ນາ​ວົງ ຫົວ­ໜ້າ​ສະ​ຖາ​ບັນ​ສາ­ທາ­ລະ­ນະ​ສຸກ​ສາດ ແລະ ການ​ແພດ​ເຂດ​ຮ້ອນ ກ່າວ​ວ່າ: ການ​ກວດ​ຄົ້ນ​ຫາ​ການ​ຕິດ­ເຊື້ອ​ພະ­ຍາດ​ໃບ​ໄມ້​ໃນ​ຕັບ ແລະ ການ­ບົ່ງ­ມະ­ຕິ​ມະ​ເຮັງ​ທໍ່​ນ້ຳ­ບີ​ຂັ້ນ​ເລີ່ມ​ຕົ້ນ​ໃນ​ຊຸມ​ຊົນ ມີ​ຄວາມ​ສຳ­ຄັນ​ໃນ​ການ​ເຂົ້າ​ເຖິງ​ບັນ­ຫາ​ການ​ຕິດ­ເຊື້ອ​ພະ­ຍາດ​ທີ່​ຮ້າຍ​ແຮງ ມະ​ເຮັງ​ທໍ່​ນ້ຳ­ບີ ກໍ​ຄື ພະ­ຍາດ​ມະ​ເຮັງ​ອື່ນໆ ຖ້າ​ຄົນ​ເຈັບ​ໄດ້​ຮັບ​ການ­ບົ່ງ­ມະ­ຕິ​ແຕ່​ຂັ້ນ​ເລີ່ມ​ຕົ້ນ ບວກ​ກັບ​ການ​ໄດ້​ຮັບ​ການ​ປິ່ນ­ປົວ​ຢ່າງ​ຖືກ­ຕ້ອງ ຈະ​ສາ­ມາດ​ເຮັດ​ໃຫ້​ຄົນ​ເຈັບ​ມີ​ຊີ­ວິດ​ຢູ່​ໄດ້​ອີກ​ຫຼາຍ​ປີ ການ​ປິ່ນ­ປົວ​ພະ­ຍາດ​ດັ່ງ­ກ່າວ ຕ້ອງ​ມີ​ຄວາມ​ຮູ້​ດ້ານ​ການ​ແພດ​ທີ່​ເລິກ­ເຊິ່ງ ມີ​ເຄື່ອງ­ມື​ທີ່​ທັນ​ສະ­ໄໝ ແລະ ຫວັງ​ວ່າ​ຈະ​ສາ­ມາດ​ນຳ​ເອົາ​ວິ­ທີ​ການ­ຜ່າ­ຕັດ​ປິ່ນ­ປົວ​ເຂົ້າ​ມາ​ໃນ​ລະ­ບົບ​ການ​ແພດ​ຂອງ ສປປ ລາວ ເຊິ່ງ​ໂຄງ­ການ​ຈະ​ເນັ້ນ​ໃສ່​ການ​ພັດ­ທະ­ນາ​ດ້ານ​ທັກ​ສະ​ຂອງ​ແພດ​ໝໍ​ໃນ​ລາວ ເພື່ອ​ໃຫ້​ເຂົາ­ເຈົ້າ​ສາ­ມາດ​ດູ​ແລ​ຮັກ­ສາ ແລະ ຄຸ້ມ​ຄອງ​ກໍ­ລະ­ນີ​ຄົນ​ເຈັບ​ມະ​ເຮັງ​ທໍ່​ນ້ຳ­ບີ​ຢ່າງ​ມີ​ຄຸນ​ນະ​ພາບ.

ຂ່າວທີ່ກ່ຽວຂ້ອງ