ສ້າງຄວາມເຂັ້ມແຂງ ວຽກງານຫຼຸດຜ່ອນຄວາມສ່ຽງໄພພິບັດ

485 04 ມິ.ຖ. 2019 ຂ່າວໜ້າ​ໜຶ່ງ

    ສູນ​ກຽມ­ພ້ອມ​ປ້ອງ​ກັນ​ໄພ­ພິ­ບັດ​ອາ­ຊີ ຮ່ວມ​ກັບ​ກົມ​ສັງ­ຄົມ​ສົງ­ເຄາະ ກະ­ຊວງ​ແຮງ​ງານ ແລະ ສະ­ຫວັດ­ດີ​ການ-ສັງ­ຄົມ ພາຍ​ໃຕ້​ໂຄງ­ການ​ຮ່ວມ​ມື​ທີ່​ກຳ­ລັງ​ຈັດ​ຕັ້ງ​ປະ­ຕິ­ບັດ​ລະ­ຫວ່າງ​ສູນ​ກຽມ­ພ້ອມ​ປ້ອງ​ກັນ​ໄພ­ພິ­ບັດ​ອາ­ຊີ ແລະ ຫ້ອງ­ການ​ອົງ­ການ​ສະ­ຫະ​ປະ­ຊາ​ຊາດ ເພື່ອ​ການ​ຫຼຸດ­ຜ່ອນ​ຄວາມ​ສ່ຽງ​ໄພ­ພິ­ບັດ ໄດ້​ຈັດ​ກອງ​ປະ­ຊຸມ​ປຶກ­ສາ​ຫາ­ລື​ກ່ຽວ​ກັບ​ການ​ສ້າງ​ຄວາມ​ເຂັ້ມ­ແຂງ ວຽກ​ງານ​ຫຼຸດ­ຜ່ອນ​ຄວາມ​ສ່ຽງ​ຈາກ​ໄພ­ພິ­ບັດ​ຈັດ​ຂຶ້ນ​ວັນ​ທີ 3 ມິ­ຖຸ­ນາ 2019 ທີ່​ໂຮງ­ແຮມ​ເດີ​ນິວ​ໂລດ ນະ­ຄອນ­ຫຼວງ​ວຽງ​ຈັນ ໂດຍ​ເປັນ​ປະ­ທານ​ຂອງ​ທ່ານ ວິ­ໄລ​ພົງ ສີ​ສົມ​ຫວັງ ວ່າ­ການ​ຫົວ­ໜ້າ​ກົມ​ສັງ­ຄົມ​ສົງ­ເຄາະ ທ່ານ ຕີ​ໂມ​ທີ​ວິ​ລ​ຄັອກ ຕາງ­ໜ້າ​ຫ້ອງ­ການ​ສະ­ຫະ​ປະ­ຊາ​ຊາດ ເພື່ອ​ການ​ຫຼຸດ­ຜ່ອນ​ຄວາມ​ສ່ຽງ​ໄພ­ພິ­ບັດ ທ່ານ ຮັນ​ສ​ກູດ​ແມນ ອຳ­ນວຍ​ການ​ບໍ­ລິ­ຫານ​ສູນ​ກຽມ­ພ້ອມ​ປ້ອງ​ກັນ​ໄພ­ພິ­ບັດ​ອາ­ຊີ ຜູ້​ປະ­ສານ​ງານ​ໄພ­ພິ­ບັດ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ເພື່ອ​ປຶກ­ສາ​ຫາ­ລື​ກ່ຽວ​ກັບ​ວຽກ​ງານ ການ​ຫຼຸດ­ຜ່ອນ​ຄວາມ​ສ່ຽງ​ໄພ­ພິ­ບັດ ທີ່​ກຳ­ລັງ​ຈັດ​ຕັ້ງ​ປະ­ຕິ­ບັດ​ໂດຍ​ກະ­ຊວງ​ແຮງ​ງານ ແລະ ສະ­ຫວັດ­ດີ​ການ-ສັງ­ຄົມ ກະ­ຊວງ​ຕ່າງໆ​ທີ່​ກ່ຽວ­ຂ້ອງ ແລະ ບັນ­ດາ​ຄູ່​ຮ່ວມ​ງານ​ດ້ານ​ວິ­ຊາ​ການ ໃຫ້​ຂໍ້​ສະ­ເໜີ​ກ່ຽວ​ກັບ​ແຜນ­ການ​ຫຼຸດ­ຜ່ອນ​ຄວາມ​ສ່ຽງ​ຈາກ​ໄພ­ພິ­ບັດ​ໃນ​ອະ­ນາ­ຄົດ​ຢູ່​ລາວ ໂດຍ​ເນັ້ນ​ໃສ່​ສ້າງ​ຄວາມ​ເຂັ້ມ­ແຂງ​ດ້ານ​ການ​ຫຼຸດ­ຜ່ອນ​ຄວາມ​ສ່ຽງ​ໄພ­ພິ­ບັດ ໂດຍ​ສະ­ເພາະ ແນວ­ທາງ​ເພື່ອ​ບັນ­ລຸ​ເປົ້າ​ໝາຍ​ຫຼຸດ­ຜ່ອນ​ຄວາມ​ສ່ຽງ ພາຍ​ໃຕ້​ຂອບ​ແຜນ​ງານ​ເຊັນ​ໄດ​ເພື່ອ​ຫຼຸດ­ຜ່ອນ​ຄວາມ​ສ່ຽງ​ໄພ­ພິ­ບັດ 2015-2030 ທີ່​ກ່ຽວ​ກັບ​ການ​ສ້າງ​ຍຸດ​ທະ​ສາດ​ການ​ຫຼຸດ­ຜ່ອນ​ຄວາມ​ສ່ຽງ​ໄພ­ພິ­ບັດ​ລະ­ດັບ​ຊາດ ແລະ ທ້ອງ­ຖິ່ນ ພາຍ​ໃນ​ປີ 2020 ເປັນ​ບາດ­ກ້າວ​ທີ່​ສຳ­ຄັນ ເພື່ອ​ບັນ­ລຸ​ບັນ­ດາ​ເປົ້າ​ໝາຍ​ສາ­ກົນ​ອື່ນໆ​ພາຍ​ໃນ​ປີ 2030 ນອກ​ນີ້ ຍັງ​ໄດ້​ປຶກ­ສາ​ຫາ­ລື​ກ່ຽວ​ກັບ​ຄວາມ​ອາດ​ສາ­ມາດ​ຂອງ​ອົງ​ການ­ຈັດ­ຕັ້ງ​ຄຸ້ມ​ຄອງ​ຄວາມ​ສ່ຽງ​ໄພ­ພິ­ບັດ​ໃນ​ການ​ເຂົ້າ​ເຖິງ ລວບ​ລວມ ແລະ ລາຍ​ງານ​ຂໍ້​ມູນ​ທີ່​ຈຳ­ເປັນ​ໃນ​ການ​ຕິດ­ຕາມ​ກວດ­ກາ​ການ​ບັນ­ລຸ​ເປົ້າ​ໝາຍ​ດັ່ງ­ກ່າວ ຄວາມ​ເຂົ້າ­ໃຈ​ຂໍ້​ມູນ​ພື້ນ­ຖານ​ຈະ​ຊ່ວຍ​ໃຫ້​ລັດ­ຖະ­ບານ​ລາວ ອົງ­ການ​ສະ­ຫະ​ປະ­ຊາ​ຊາດ ແລະ ບັນ­ດາ​ອົງ​ການ­ຈັດ­ຕັ້ງ​ອື່ນໆ​ທີ່​ກ່ຽວ­ຂ້ອງ​ສາ­ມາດ​ຊອກ​ຫາ​ໂອ­ກາດ​ໃນ​ການ­ຈັດ­ຕັ້ງ​ປະ­ຕິ­ບັດ​ບັນ­ດາ​ຍຸດ​ທະ​ສາດ ແລະ ແຜນ­ການ​ການ​ຫຼຸດ­ຜ່ອນ​ຄວາມ​ສ່ຽງ​ໄພ­ພິ­ບັດ​ໃນ​ອະ­ນາ­ຄົດ.

ຂ່າວທີ່ກ່ຽວຂ້ອງ