ຂ່າວຫຼ້າສຸດ

ເສີມຂະຫຍາຍການປະຕິຮູບ ດ້ານການເຕີບໂຕສີຂຽວ

507 04 ມິ.ຖ. 2019 ຂ່າວໜ້າ​ໜຶ່ງ
ເສີມຂະຫຍາຍການປະຕິຮູບ ດ້ານການເຕີບໂຕສີຂຽວ

    ວັນ​ທີ 31 ພຶດ­ສະ­ພາ 2019 ທີ່​ນະ­ຄອນ­ຫຼວງ​ວຽງ​ຈັນ ທ່ານ​ນາງ ທິບ​ພະ​ກອນ ຈັນ­ທະ​ວົງ­ສາ ຮອງ​ລັດ­ຖະ­ມົນ­ຕີ​ກະ­ຊວງ​ການ​ເງິນ ແລະ ທ່ານ ນິ​ໂຄ​ລາ ພອນ​ທາ​ຣາ ຫົວ­ໜ້າ​ຫ້ອງ­ການ​ທະ­ນາ­ຄານ​ໂລກ​ປະ­ຈຳ ສປປ ລາວ ໄດ້​ເຊັນ​ສັນ­ຍາ​ຮັບ­ຮອງ​ເອົາ​ແຜນ​ງານ​ດ້ານ​ນະ­ໂຍ­ບາຍ​ການ​ພັດ­ທະ­ນາ ການ​ເຕີບ​ໂຕ​ສີ­ຂຽວ​ໃນ​ໄລ­ຍະ​ສອງ ທີ່​ມີ​ມູນ​ຄ່າ 40 ລ້ານ​ໂດ​ລາ​ສະ­ຫະ­ລັດ ແລະ ໄດ້​ຮັບ​ທຶນ​ຈາກ​ສະ­ມາ­ຄົມ​ເພື່ອ​ການ​ພັດ­ທະ­ນາ​ສາ­ກົນ (International Development Association) ແຜນ­ການ​ດັ່ງ­ກ່າວ​ແມ່ນ​ແນ­ໃສ່​ການ​ຊຸກ­ຍູ້​ໃຫ້ ສປປ ລາວ ກ້າວ​ໄປ​ສູ່​ການ​ເຕີບ​ໂຕ​ທີ່​ຍືນ​ຍົງ.

    ແຜນ​ງານ​ສະ­ໜັບ­ສະ­ໜູນ​ການ​ປະ­ຕິ​ຮູບ​ທາງ​ດ້ານ​ນະ­ໂຍ­ບາຍ ເພື່ອ​ເສື່ອມ​ສານ​ເອົາ​ຫຼັກ­ການ​ວ່າ​ດ້ວຍ​ການ​ເຕີບ​ໂຕ​ສີ­ຂຽວ ເຂົ້າ​ໄປ​ມີ​ບົດ­ບາດ​ຢູ່​ໃນ​ທົ່ວ​ທຸກ​ຂະ­ແໜງ ເຊັ່ນ: ເຮັດ​ໃຫ້​ໂຄງ​ລ່າງ​ພື້ນ­ຖານ​ມີ​ຄວາມ​ທົນ​ທານ​ຕໍ່​ຄວາມ​ສ່ຽງ​ທາງ​ດ້ານ​ສະ­ພາບ​ດິນ​ຟ້າ​ອາ­ກາດ ຄຸ້ມ​ຄອງ​ມົນ​ລະ​ພິດ​ທີ່​ເປັນ​ອັນ­ຕະ­ລາຍ​ຕໍ່​ສຸ­ຂະ­ພາບ ແລະ ກຳ­ລັງ​ການ​ຜະ­ລິດ​ຂອງ​ຄົນ ແລະ ປັບ­ປຸງ​ການ​ຄຸ້ມ​ຄອງ​ແຫຼ່ງ​ນ້ຳ ປ່າ­ໄມ້ ແລະ ເຂດ​ປ່າ​ສະ­ຫງວນ ຮູບ​ແບບ​ການ​ເຕີບ​ໂຕ​ທີ່​ເນັ້ນ​ຄວາມ​ສະ­ອາດ ແລະ ມີ​ການ​ນຳ​ໃຊ້​ຊັບ­ພະ­ຍາ­ກອນ​ຢ່າງ​ມີ​ປະ​ສິດ­ທິ​ຜົນ​ຫຼາຍ​ກວ່າ​ເກົ່າ ຈະ​ຊ່ວຍ­ເຫຼືອ​ປະ­ຊາ­ຊົນ​ທີ່​ທຸກ​ຍາກ ຜູ້​ທີ່​ບໍ່​ສາ­ມາດ​ປ້ອງ​ກັນ​ຕົວ​ເອງ​ໄດ້​ຈາກ​ມົນ​ລະ​ພິດ​ຄວາມ​ສ່ຽງ​ທາງ​ດ້ານ​ສະ­ພາບ​ດິນ​ຟ້າ​ອາ­ກາດ ແລະ ການ​ຕັດ​ໄມ້​ທຳ­ລາຍ​ປ່າ.

    ທ່ານ ນິ​ໂຄ​ລາ ພອນ​ທາ​ຣາ ກ່າວ​ວ່າ: ສປປ ລາວ ໄດ້​ມີ​ຄວາມ​ຄືບ​ໜ້າ​ຫຼາຍ​ໃນ​ການ​ກ້າວ​ໄປ​ເຖິງ​ການ​ເຕີບ​ໂຕ​ທີ່​ມີ​ສີ­ຂຽວ​ກວ່າ​ເກົ່າ ເຊິ່ງ​ໃນ​ນັ້ນ​ລວມ​ມີ​ຍຸດ​ທະ​ສາດ​ການ​ເຕີບ​ໂຕ​ສີ­ຂຽວ​ຮອດ​ປີ 2030 ໃນ​ຕົ້ນ​ປີ​ທີ່​ຜ່ານ​ມາ ສປປ ລາວ ໄດ້​ສຳ­ເລັດ​ການ​ສ້າງ­ຕັ້ງ​ອຸ­ທິ­ຍານ​ແຫ່ງ​ຊາດ​ແຫ່ງ​ທຳ​ອິດ​ຂອງ​ປະ­ເທດ ກົດ­ໝາຍ​ສະ­ບັບ​ໃໝ່​ວ່າ​ດ້ວຍ​ນ້ຳ ກໍ​ໄດ້​ປັບ­ປຸງ​ການ​ຄຸ້ມ​ຄອງ​ລຸ່ມ​ແມ່­ນ້ຳ ພວກ​ເຮົາ​ມີ​ຄວາມ​ຍິນ​ດີ​ສະ­ໜັບ­ສະ­ໜູນ​ຄວາມ​ພະ­ຍາ­ຍາມ​ປະ­ຕິ​ຮູບ​ດັ່ງ­ກ່າວ ໃນ​ຂະ­ນະ​ທີ່​ລັດ­ຖະ­ບານ​ກໍ​ກຳ­ລັງ​ສ້າງ​ຄວາມ​ເຂັ້ມ­ແຂງ ດ້ານ​ຂອບ​ການ​ເງິນ​ງົບ­ປະ­ມານ​ນອກ­ຈາກ​ຈະ​ປົກ​ປ້ອງ​ຊັບ­ພະ­ຍາ­ກອນ​ທຳ​ມະ​ຊາດ​ຂອງ ສປປ ລາວ ແລ້ວ ຮູບ​ແບບ​ການ​ເຕີບ​ໂຕ​ທີ່​ມີ​ສະ­ຖຽນ​ລະ​ພາບ​ດ້ານ​ການ​ເງິນ ແລະ ດ້ານ​ສິ່ງ­ແວ­ດລ້ອມ ສາ­ມາດ​ສ້າງ​ສະ­ພາບ​ແວດ​ລ້ອມ​ທີ່​ດີ​ສຳ­ລັບ​ປະ­ຊາ­ຊົນ​ຂອງ ສປປ ລາວ ແລະ ສ້າງ​ໂອ­ກາດ​ການ​ທຳ​ມາ​ຫາ​ກິນ.

    ແຜນ​ງານ​ດັ່ງ­ກ່າວ​ນີ້ ຍັງ​ໄດ້​ຊ່ວຍ­ເຫຼືອ ສປປ ລາວ ໃຫ້​ມີ​ສະ­ຖຽນ​ລະ​ພາບ​ດ້ານ​ການ​ເງິນ ງົບ­ປະ­ມານ ໂດຍ​ແນ­ໃສ່​ສະ­ໜັບ­ສະ­ໜູນ​ຂອບ​ວຽກ​ການ​ເງິນ​ໄລ­ຍະ​ກາງ ທີ່​ເລັ່ງ​ໃສ່​ປັບ­ປຸງ​ການ​ເກັບ​ລາຍ​ຮັບ ເສີມ​ສ້າງ​ຄວາມ​ເຂັ້ມ­ແຂງ​ໃຫ້​ແກ່​ການ​ຄຸ້ມ​ຄອງ​ໜີ້​ສິນ ແລະ ການ​ຄຸ້ມ​ຄອງ​ການ​ເງິນ​ຂອງ​ລັດ ແລະ ເສີມ​ຂະ­ຫຍາຍ​ສະ­ຖຽນ​ລະ​ພາບ​ຂອງ​ຂະ­ແໜງ­ການ​ເງິນ ແຜນ​ງານ​ຄັ້ງ​ນີ້ ຊຶ່ງ​ແມ່ນ​ຊຸດ​ທີ 2 ໃນ​ທັງ​ໝົດ 3 ຊຸດ ແມ່ນ​ເສີມ​ສ້າງ​ຈາກ​ບັນ­ດາ​ຮາກ​ຖານ​ທີ່​ໄດ້​ຮັບ​ການ­ຈັດ­ຕັ້ງ ໃນ​ແຜນ​ງານ​ດ້ານ​ນະ­ໂຍ­ບາຍ​ການ​ພັດ­ທະ­ນາ​ການ​ເຕີບ​ໂຕ​ສີ­ຂຽວ ຄັ້ງ​ທີ 1 ທີ່​ໄດ້​ຖືກ​ອະ­ນຸ­ມັດ​ໃນ​ປີ 2017.

ຂ່າວທີ່ກ່ຽວຂ້ອງ