ຂ່າວຫຼ້າສຸດ

ປູກໄມ້ເພີ່ມຄວາມຂຽວໃຫ້ປ່າສະຫງວນແຫ່ງຊາດ ພູເຂົາຄວາຍ

401 04 ມິ.ຖ. 2019 ຂ່າວໜ້າ​ໜຶ່ງ
ປູກໄມ້ເພີ່ມຄວາມຂຽວໃຫ້ປ່າສະຫງວນແຫ່ງຊາດ ພູເຂົາຄວາຍ

    ວັນ​ທີ 31 ພຶດ­ສະ­ພາ 2019 ອົງ­ການ​ປົກ­ຄອງ​ເມືອງ​ໄຊ​ທາ­ນີ ຮ່ວມ​ກັບ​ຫ້ອງ­ການ​ກະ­ສິ­ກຳ ແລະ ປ່າ­ໄມ້ ເມືອງ​ໄຊ​ທາ­ນີ ພະ​ແນກ​ກະ­ສິ­ກຳ ແລະ ປ່າ­ໄມ້ ນະ­ຄອນ­ຫຼວງ​ວຽງ​ຈັນ (ນວ) ແລະ ອຳ­ນາດ​ການ​ປົກ­ຄອງ​ບ້ານ​ນາ​ຄັນ​ທຸງ ໂດຍ​ການ​ສະ­ໜັບ­ສະ­ໜູນ​ຈາກ​ບໍ­ລິ­ສັດ ປີ​ໂຕຣ​ລ້ຽມ​ເທຣດ​ດິ້ງ​ລາວ ມະ­ຫາ­ຊົນ ໄດ້​ຈັດ​ພິ­ທີ​ປູກ​ຕົ້ນ­ໄມ້​ໃນ​ໂອ­ກາດ​ວັນ​ປູກ​ໄມ້​ແຫ່ງ​ຊາດ ແລະ ວັນ­ເດັກ­ນ້ອຍ​ສາ­ກົນ 1 ມິ­ຖຸ­ນາ ຢູ່​ສະ­ຖານ­ທີ່​ທ່ອງ​ທ່ຽວ​ພັກ​ຊອຍ​ວອຍ ປ່າ​ສະ­ຫງວນ​ແຫ່ງ​ຊາດ​ພູ­ເຂົາ​ຄວາຍ ເມືອງ​ໄຊ​ທາ­ນີ ຈຳ­ນວນ​ຫຼາຍ​ພັນ​ເບັ້ຍ ມີ​ທ່ານ ລາດ​ຊະ­ນີ​ວົງ ອະ​ມາ​ຣາ​ທິ​ທາ­ດາ ປະ­ທານ​ຄະ­ນະ​ກວດ­ກາ​ພັກ ຫົວ­ໜ້າ​ພະ​ແນກ​ກວດ­ກາ​ລັດ ນວ ທ່ານ ຈັນ­ທະ​ລາ ອິນ​ທະ­ລັງ​ສີ ເຈົ້າ­ເມືອງ​ໄຊ​ທາ­ນີ ທ່ານ​ນາງ ຄຳ​ຟອງ ພູມ​ວົງ​ໄຊ ຮອງ​ປະ­ທານ​ສະ­ພາ​ປະ­ຊາ­ຊົນ ນວ ທ່ານ​ຮອງ​ຫົວ­ໜ້າ​ກົມ​ປ່າ­ໄມ້ ທ່ານ​ຫົວ­ໜ້າ​ກອງ­ພັນ​ໃຫຍ່ 941 ພະ­ນັກ­ງານ ອຳ­ນາດ​ການ​ປົກ­ຄອງ​ບ້ານ ນັກ­ທຸ­ລະ­ກິດ ພະ­ນັກ­ງານ​ບໍ­ລິ­ສັດ ປະ­ຊາ­ຊົນ​ບ້ານ​ອ້ອມ​ຂ້າງ ນັກ​ສຶກ​ສາ​ມະ­ຫາ­ວິ­ທະ­ຍາ­ໄລ​ແຫ່ງ​ຊາດ ແລະ ເຍົາ­ວະ​ຊົນ​ເຂົ້າ​ຮ່ວມ.

    ນວ ມີ​ປ່າ​ສະ­ຫງວນ​ແຫ່ງ​ຊາດ 2 ແຫ່ງ ກວມ​ເອົາ​ເນື້ອ­ທີ່ 74.000 ເຮັກ­ຕາ ເທົ່າ​ກັບ 18,8% ໃນ​ນັ້ນ ມີ​ປ່າ​ສະ­ຫງວນ​ພູ​ພະ­ນັງ ແລະ ພູ­ເຂົາ​ຄວາຍ ເຊິ່ງ​ລັດ­ຖະ­ບານ​ໄດ້​ກຳ­ນົດ​ເປັນ​ເຂດ​ຍຸດ​ທະ​ສາດ​ປ້ອງ​ກັນ​ຊາດ ປ້ອງ​ກັນ​ຄວາມ​ສະ­ຫງົບ ແລະ ສະ­ຫງວນ​ຊັບ­ພະ­ຍາ­ກອນ​ປ່າ­ໄມ້ ແລະ ຊີ­ວະ​ນາໆພັນ​ທີ່​ສວຍ​ງາມ ແລະ ອຸ­ດົມ​ຮັ່ງ­ມີ ທັງ​ເປັນ​ການ​ປະ­ຕິ­ບັດ ສ ສີ­ຂຽວ ຂອງ ນວ ເພື່ອ​ບັນ­ລຸ​ເປົ້າ​ໝາຍ​ສ້າງ ນວ ເປັນ​ເມືອງ​ສີ­ຂຽວ ອຸ­ດົມ­ສົມ­ບູນ​ໄປ​ດ້ວຍ​ສະ­ພາບ​ແວດ​ລ້ອມ​ຊີ­ວະ​ນາໆພັນ ເພື່ອ​ບັນ­ລຸ​ຍຸດ​ທະ​ສາດ​ແຕ່​ປີ 2019 ໃຫ້​ມີ​ອັດ­ຕາ​ການ​ປົກ​ຫຸ້ມ​ຂອງ​ປ່າ­ໄມ້ 65% ແລະ ປີ 2020 ໃຫ້​ບັນ­ລຸ 70% ຂອງ​ພື້ນ​ທີ່​ທັງ​ໝົດ ເຊິ່ງ​ມາ​ຮອດ​ປັດ­ຈຸ­ບັນ ການ​ປູກ​ໄມ້​ຟື້ນ​ຟູ​ປ່າ​ໃນ​ເຂດ​ສະ­ຫງວນ​ຂອງ ນວ ມີ​ເຖິງ 11.500 ເຮັກ­ຕາ ອັນ​ໄດ້​ເຮັດ​ໃຫ້​ດິນ​ປອກ​ໂຫຼ້ນ ປ່າ​ຊຸດ­ໂຊມ​ກາຍ­ເປັນ​ປ່າ​ເພີ່ມ​ຂຶ້ນ ໃນ​ການ​ປູກ​ໄມ້​ຟື້ນ​ຟູ​ປ່າ​ໃນ​ເຂດ​ປ່າ​ສະ­ຫງວນ​ຜ່ານ​ມາ ຕາມ​ການ​ສຳ​ຫຼວດ​ເຫັນ​ວ່າ​ເປີ­ເຊັນ​ລອດ​ຕາຍ​ມີ​ເຖິງ 80% ຖື​ວ່າ​ຕົ້ນ­ໄມ້​ທີ່​ຕາຍ​ມີ​ພຽງ​ແຕ່ 20% ແລະ ຄາດ​ຄະ­ເນ​ວ່າ​ໃນ​ໄລ­ຍະ 20 ປີ ຕົ້ນ­ໄມ້​ທີ່​ປູກ​ຈະ​ມີ­ໜ້າ​ຕ້າງ​ປະ­ມານ 18-20 ຊັງ​ຕີ​ແມັດ ທີ່​ຈະ​ກາຍ­ເປັນ​ປ່າ­ໄມ້​ທີ່​ເປັນ​ເສດ­ຖະ­ກິດ​ຂອງ​ຊາດ​ໃນ​ອະ­ນາ­ຄົດ.

    ສຳ­ລັບ​ປີ 2019 ສາ­ມາດ​ເກັບ​ແກ່ນ​ໄມ້​ໄດ້ 1.003 ກິ​ໂລ ແລະ ຜະ­ລິດ​ເບ້ຍ​ໄມ້​ໄດ້ 1.318.037 ເບັ້ຍ ແລະ ເກັບ​ກຳ​ເນື້ອ­ທີ່​ຮອງ​ຮັບ​ເພື່ອ​ປູກ​ໄມ້​ທົ່ວ ນວ ມີ 300 ເຮັກ­ຕາ ຄື: ເມືອງ​ສັງ​ທອງ 120 ເຮັກ­ຕາ ໄຊ​ທາ­ນີ 100 ເຮັກ­ຕາ ປາກ​ງື່ມ 40 ເຮັກ­ຕາ ນາ​ຊາຍ​ທອງ 25 ເຮັກ­ຕາ ຫາດ​ຊາຍ​ຟອງ ສີ​ໂຄດ​ຕະ­ບອງ ແລະ ເມືອງ​ໄຊ​ເສດ​ຖາ ເມືອງ​ລະ 5 ເຮັກ­ຕາ ນອກ­ຈາກ​ນີ້ ນວ ຍັງ​ເອົາ­ໃຈ­ໃສ່​ຟື້ນ​ຟູ​ປ່າ­ໄມ້​ທຳ​ມະ​ຊາດ ປົກ​ປັກ​ຮັກ­ສາ​ສິ່ງ­ແວ­ດລ້ອມ​ເນື້ອ­ທີ່ 5 ເຮັກ­ຕາ ມີ​ເບັ້ຍ​ໄມ້​ນຳ​ມາ​ປູກ 5.000 ເບັ້ຍ ເປັນ​ປະ­ເພດ​ພັນ​ໄມ້​ພື້ນ­ເມືອງ ເຊັ່ນ: ໄມ້​ຂະ​ຍຸງ ແລະ ໄມ້​ແຕ້​ຂ່າ ສ່ວນ​ໃຫຍ່​ເປັນ​ໄມ້​ຜະ­ລິດ​ຂ້າມ​ປີ ແລະ ຈຳ­ນວນ​ໜຶ່ງ​ມີ​ຂະ­ໜາດ​ລວງ​ສູງ​ແຕ່ 50 ຊັງ​ຕີ​ແມັດ​ຂຶ້ນ​ໄປ​ທີ່​ນຳ​ມາ​ປູກ​ຢູ່​ໃນ​ເຂດ​ປ່າ​ສະ­ຫງວນ​ແຫ່ງ​ຊາດ​ພູ­ເຂົາ​ຄວາຍ​ແຫ່ງ​ນີ້ ເພື່ອ​ເປັນ​ການ​ຟື້ນ​ຟູ​ປ່າ ຂະ­ຫຍາຍ​ພັນ​ໄມ້​ທີ່​ມີ​ຄຸນ­ຄ່າ ສ້າງ​ຄວາມ​ສົມ­ບູນ​ທາງ​ລະ­ບົບ​ນິ­ເວດ ແລະ ສິ່ງ­ແວ­ດລ້ອມ ທັງ​ເປັນ​ການ​ພັດ­ທະ­ນາ​ເສດ­ຖະ­ກິດ​ຂອງ​ຊາດ​ໃນ​ອະ­ນາ­ຄົດ.

ຂ່າວທີ່ກ່ຽວຂ້ອງ