ເຊີນຊົມມວຍລາວ ຊີງຂັນຫົວໜ້າພະແນກ ສສກ ນວ

1.449 31 ພ.ພ. 2019 ວົງຈອນກີລາ
ເຊີນຊົມມວຍລາວ ຊີງຂັນຫົວໜ້າພະແນກ ສສກ ນວ

    ພິ­ທີ​ຖະ­ແຫຼງ​ຂ່າວ​ການ​ແຂ່ງ­ຂັນ​ກີ­ລາ​ມວຍ​ລາວ ຮຸ່ນ​ນ້ຳ­ໜັກ 55 ກິ​ໂລ (ມວຍ​ຮອບ) ຊີງ​ຂັນ​ທ່ານ​ຫົວ­ໜ້າ​ພະ​ແນກ​ສຶກ​ສາ​ທິ​ການ ແລະ ກີ­ລາ ນະ­ຄອນ­ຫຼວງ​ວຽງ​ຈັນ (ສສກ ນວ) ຄັ້ງ​ທີ l ປະ­ຈຳ​ປີ 2019 ເພື່ອ​ເລືອກ­ເຟັ້ນ​ນັກ­ກີ­ລາ​ພອນ​ສະ­ຫວັນ​ດີ­ເດັ່ນ ກຽມ​ເຂົ້າ​ຮ່ວມ​ກີ­ລາ​ແຫ່ງ​ຊາດ ປີ 2020 ຈັດ​ຂຶ້ນ​ວັນ​ທີ 28 ພຶດ­ສະ­ພາ 2019 ຢູ່​ສູນ​ກີ­ລາ​ໃນ​ຮົ່ມ​ບຶງ​ຂະ​ຫຍອງ ເມືອງ​ສີ​ສັດ­ຕະ​ນາກ ນວ ໂດຍ​ມີ​ທ່ານ ສົມ​ພອນ ສອນ​ດາ­ລາ ຮອງ​ຫົວ­ໜ້າ​ພະ​ແນກ ສສກ ນວ ທ່ານ ກອງ​ແກ້ວ ແຫ່ງ​ດາ​ວົງ​ໄຊ ຫົວ­ໜ້າ​ຂະ­ແໜງ​ກີ­ລາ​ລະ­ດັບ​ສູງ ທ່ານ ຄຳ​ເສັງ ສູນ​ດາ­ລາ ປະ­ທານ​ສະ­ຫະ­ພັນ​ມວຍ​ລາວ-ມວຍ​ສາ­ກົນ ແລະ ມວຍ​ປັນ​ຈັກ​ສີ​ລັດ ນວ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ຄຳ​ເສັງ ສູນ​ດາ­ລາ ກ່າວ​ວ່າ: ການ​ແຂ່ງ­ຂັນ​ດັ່ງ­ກ່າວ ຈະ​ເລີ່ມ​ແຕ່​ວັນ​ທີ 31 ພຶດ­ສະ­ພາ-5 ກໍ­ລະ­ກົດ 2019 ມີ​ນັກ­ກີ­ລາ​ເຂົ້າ​ຮ່ວມ​ມວຍ​ຮອບ 8 ຄົນ ຈາກ 6 ຄ້າຍ ແບ່ງ​ເປັນ 2 ກຸ່ມ ຄື: ກຸ່ມ A ແລະ ກຸ່ມ B ແຕ່​ລະ​ກຸ່ມ​ແຂ່ງ­ຂັນ​ພົບ​ກັນ​ໝົດ ເສຍ 2 ຄັ້ງ ຕົກ​ຮອບ ໃນ​ນີ້​ມື້​ທຳ​ອິດ (31 ພຶດ­ສະ­ພາ) ຈະ​ເລີ່ມ​ແຕ່​ເວ­ລາ 20:00 ໂມງ​ເປັນ­ຕົ້ນ​ໄປ ສະ­ເພາະ​ມວຍ​ຮອບ ມີ 2 ຄູ່ ກຸ່ມ A ຄື: ເກົ້າ​ແສນ ຂວັນ​ໃຈ​ສີ​ໂຄດ ພົບ ເດັ່ນ​ນະ­ຄອນ ເພັດ​ນະ­ຄອນ ຂຸນ​ເຫຼັກ ສະ­ໂມ­ສອນ​ຄຳ​ເສັງ ພົບ ເພັດ​ບຸນ​ຄ້ຳ ມຸງ­ຄຸນ​ເພັດ ສ່ວນ​ມວຍ​ນອກ​ລາຍ­ການ ມີ ກອງ​ກັງ­ວານ ປກສ ພົບ ແສງ​ເພັດ ສິດ​ທອງ​ຈັນ (ໄທ) ຮຸ່ນ​ນ້ຳ­ໜັກ 52 ກິ​ໂລ ເພັດ​ນ້ຳ­ຂອງ ພົບ ເພັດ​ໃໝ ສໍ​ທະ­ວີ​ຊັບ (ໄທ) ຂຸນ​ຊັບ ສສ ຄຳ​ເສັງ ພົບ ເພັດ​ບຸນ​ມີ ມຸງ­ຄຸນ​ເພັດ ຮຸ່ນ​ນ້ຳ­ໜັກ 51 ກິ​ໂລ ແລະ ສຽມ​ຄົມ ຂວັນ​ໃຈ​ສີ​ໂຄດ ພົບ ວັນ​ສົງ­ການ ສໍ​ຈະ­ເລີນ​ສຸກ ຮຸ່ນ​ນ້ຳ­ໜັກ 58 ກິ​ໂລ.

    ສ່ວນ​ວັນ​ທີ 7 ມິ­ຖຸ­ນາ ຈະ​ເປັນ​ການ​ແຂ່ງ­ຂັນ​ມວຍ​ຮອບ ກຸ່ມ B ຄູ່​ທີ 1 ແມັກ​ນ້ອຍ ສໍ​ຈະ­ເລີນ​ສິງ ພົບ ຕະ­ກຸນ​ແທ້ ສໍ​ວິ­ລະ​ສິດ ຄູ່​ທີ 2 ເມຍ​ຕະ​ລຸຍ ສະ­ໂມ­ສອນ​ຄຳ​ເສັງ ພົບ ເດັ່ນ​ເມືອງ​ເໜືອ ສໍ​ຈະ­ເລີນ​ສຸກ ນອກ​ນີ້​ຍັງ​ມີ​ການ​ແຂ່ງ­ຂັນ​ມວຍ​ໃນ​ລາຍ­ການ ອາ­ທິດ​ລະ 6 ຄູ່.

ຂ່າວທີ່ກ່ຽວຂ້ອງ