ຂ່າວຫຼ້າສຸດ

ສ້າງຄວາມເຂັ້ມແຂງດ້ານການປົກປ້ອງ-ສືບສວນການຄ້າມະນຸດ

892 31 ພ.ພ. 2019 ຂ່າວໜ້າ​ໜຶ່ງ

    ກົມ​ພັດ­ທະ­ນາ​ສີ­ມື​ແຮງ​ງານ ແລະ ຈັດ​ຫາ​ງານ ກະ­ຊວງ​ແຮງ​ງານ ແລະ ສະ­ຫວັດ­ດີ​ການ-ສັງ­ຄົມ (ຮສສ) ໃນ​ນາມ​ຫົວ­ໜ້າ​ຈຸດ​ປະ­ສານ​ງານ​ແຮງ​ງານ​ເຄື່ອນ​ຍ້າຍ​ອາ​ຊຽນ ຈັດ​ກອງ​ປະ­ຊຸມ​ສ້າງ​ຄວາມ​ເຂັ້ມ­ແຂງ​ໃຫ້​ພະ­ນັກ­ງານ​ແຮງ​ງານ​ໃນ​ການ​ປົກ​ປ້ອງ ແລະ ການ​ສຶບ​ສວນ​ການ​ຄ້າ​ມະ­ນຸດ ແລະ ການ​ປັບ­ປຸງ ການ​ປະ­ສານ​ງານ ຮ່ວມ​ກັບ​ຜູ້​ບັງ­ຄັບ​ໃຊ້​ກົດ­ໝາຍ​ອາ­ຍາ​ໃນ​ອາ​ຊຽນ ຂຶ້ນ​ວັນ​ທີ 27-28 ພຶດ­ສະ­ພາ 2019 ຢູ່​ນະ­ຄອນ­ຫຼວງ​ພະ​ບາງ ໂດຍ​ເປັນ​ປະ­ທານ​ຂອງ​ທ່ານ ພົງ​ໄຊ​ສັກ ອິນ​ຖາ​ລາດ ຫົວ­ໜ້າ​ກົມ​ຄຸ້ມ​ຄອງ​ແຮງ​ງານ ຫົວ­ໜ້າ​ໜ່ວຍ​ງານ​ເຈົ້າ​ໜ້າ­ທີ່​ອາ­ວຸ­ໂສ​ແຮງ​ງານ​ອາ​ຊຽນ​ຂອງ ສປປ ລາວ ຕາງ­ໜ້າ​ຫົວ­ໜ້າ​ຄະ­ນະ​ຜູ້​ແທນ​ລາວ ໂດຍ​ທ່ານ ຄອນ​ສີ ມະ­ຫາ­ວົງ ຮອງ​ຫົວ­ໜ້າ​ກົມ​ພັດ­ທະ­ນາ​ສີ­ມື​ແຮງ​ງານ ແລະ ຈັດ​ຫາ​ງານ ຫົວ­ໜ້າ​ຈຸດ​ປະ­ສານ​ງານ​ແຮງ​ງານ​ເຄື່ອນ​ຍ້າຍ​ອາ​ຊຽນ​ຂອງ ສປປ ລາວ ມີ​ຜູ້­ຕາງ­ໜ້າ​ປະ­ເທດ​ສະ­ມາ­ຊິກ​ອາ​ຊຽນ ຂະ­ແໜງ​ແຮງ​ງານ ຕຳ­ຫຼວດ​ສະ­ກັດ​ກັ້ນ​ການ​ຕ້ານ​ການ​ຄ້າ​ມະ­ນຸດ ແລະ ຊ່ຽວ­ຊານ​ດ້ານ​ການ​ກວດ­ກາ​ກົດ­ໝາຍ​ອາ­ຍາ ເຂົ້າ​ຮ່ວມ.

    ເພື່ອ​ສ້າງ​ຄວາມ​ຮັບ​ຮູ້-ເຂົ້າ­ໃຈ​ດ້ານ​ກົດ­ໝາຍ​ທີ່​ກ່ຽວ­ຂ້ອງ ແລະ ການ​ມີ​ສ່ວນ​ຮ່ວມ​ໃນ​ຂະ​ບວນ​ການ​ຍຸ­ຕິ​ທຳ ການ​ຕ້ານ​ການ​ຄ້າ​ມະ­ນຸດ​ດ້ານ​ແຮງ​ງານ ສ້າງ​ຄວາມ​ເຂັ້ມ­ແຂງ​ໃຫ້​ເຈົ້າ​ໜ້າ­ທີ່​ກວດ­ກາ​ແຮງ​ງານ​ໃນ​ການ​ປົກ​ປ້ອງ ແລະ ສືບ­ສວນ​ການ​ລະ­ເມີດ​ສິດ­ທິ​ດ້ານ​ແຮງ​ງານ ແລະ ອຳ­ນວຍ​ຄວາມ​ສະ­ດວກ​ດ້ານ​ການ​ປະ­ສານ​ງານ ແລະ ການ​ຮ່ວມ​ມື​ໃຫ້​ມີ​ປະ​ສິດ­ທິ​ຜົນ​ກວ່າ​ເກົ່າ ເຂົ້າ­ໃຈ​ເຖິງ​ນິ​ຍາມ​ຂອງ​ສາ­ກົນ ແລະ ພາກ​ພື້ນ ກ່ຽວ​ກັບ​ແຮງ​ງານ​ຖືກ​ບັງ­ຄັບ ແລະ ການ​ຄ້າ​ມະ­ນຸດ ເພື່ອ​ກຳ­ນົດ​ຂໍ້​ແນະ­ນຳ​ກ່ຽວ​ກັບ​ການ​ປະ­ສານ​ງານ ແລະ ການ​ຮ່ວມ​ມື​ລະ­ຫວ່າງ​ໜ່ວຍ​ງານ​ກວດ­ກາ​ແຮງ​ງານ ໜ່ວຍ​ງານ​ສ້າງ​ລະ­ບຽບ​ການ​ຄຸ້ມ​ຄອງ​ບໍ­ລິ­ສັດ​ຈັດ​ຫາ​ງານ ແລະ ໜ່ວຍ​ງານ​ສະ­ກັດ​ກັ້ນ ແລະ ຕ້ານ​ການ​ຄ້າ​ມະ­ນຸດ.

    ກອງ​ປະ­ຊຸມ​ດັ່ງ­ກ່າວ ໄດ້​ຮັບ​ການ​ສະ­ໜັບ​ສະ​ໝູນ​ດ້ານ​ງົບ­ປະ­ມານ​ຈາກ​ລັດ­ຖະ­ບານ​ອົດ​ສະ​ຕຣາ​ລີ (DFAT) ໂດຍ​ຜ່ານ​ມູນ​ນິ­ທິ​ກອງ​ທຶນ​ອາ­ຊີ ແລະ ໄດ້​ຮັບ​ການ​ສະ­ໜັບ­ສະ­ໜູນ​ດ້ານ​ວິ­ຊາ​ການ​ຈາກ​ອົງ­ການ​ແຮງ​ງານ​ສາ­ກົນ ໜ່ວຍ​ງານ​ສະ­ກັດ​ກັ້ນ​ການ​ຕ້ານ​ການ​ຄ້າ​ມະ­ນຸດ ອົດ​ສະ​ຕຣາ​ລີ ອາ​ຊຽນ ແລະ ກອງ​ເລ­ຂາ​ອາ​ຊຽນ.

ຂ່າວທີ່ກ່ຽວຂ້ອງ