ຂ່າວຫຼ້າສຸດ

7 ໜ່ວຍພັກ ພະແນກ ຖວທ ໄດ້ຮັບນາມມະຍົດ

756 31 ພ.ພ. 2019 ຂ່າວໜ້າ​ໜຶ່ງ
7 ໜ່ວຍພັກ ພະແນກ ຖວທ ໄດ້ຮັບນາມມະຍົດ

    ພິ­ທີ​ມອບ​ນາມ­ມະ­ຍົດ​ໜ່ວຍ​ພັກ​ປອດ​ໃສ ເຂັ້ມ­ແຂງ ໜັກ​ແໜ້ນ ໃຫ້ 7 ໜ່ວຍ​ພັກ ທີ່​ຂຶ້ນ​ກັບ​ພະ​ແນກ​ຖະ­ແຫຼງ​ຂ່າວ​ວັດ­ທະ­ນະ­ທຳ ແລະ ທ່ອງ​ທ່ຽວ ນະ­ຄອນ­ຫຼວງ​ວຽງ​ຈັນ (ຖວ​ທ ນວ) ຈັດ​ຂຶ້ນ​ວັນ​ທີ 30 ພຶດ­ສະ­ພາ 2019 ຢູ່​ພະ​ແນກ​ດັ່ງ­ກ່າວ ໂດຍ​ມີ​ສະ­ຫາຍ ບຸນ​ທ່ຽງ ຂຸນ​ສີ ຄະ­ນະ​ປະ­ຈຳ​ພັກ ປະ­ທານ​ແນວ​ລາວ​ສ້າງ​ຊາດ ນວ ສະ­ຫາຍ ຄຳ​ປະ­ດິດ ເຂັມ​ມາ­ນິດ ເລ­ຂາ​ຄະ­ນະ​ພັກ​ຮາກ​ຖານ ຫົວ­ໜ້າ​ພະ​ແນກ ຖວ​ທ ນວ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ສະ­ຫາຍ ຄຳ​ປະ­ດິດ ເຂັມ​ມາ­ນິດ ໄດ້​ຍົກ​ໃຫ້​ເຫັນ​ການ­ຈັດ­ຕັ້ງ​ປະ­ຕິ­ບັດ ວຽກ​ງານ​ກໍ່­ສ້າງ​ໜ່ວຍ​ພັກ​ປອດ​ໃສ ເຂັ້ມ­ແຂງ ໜັກ​ແໜ້ນ 7 ໜ່ວຍ​ພັກ ໃນ 9 ໜ່ວຍ​ພັກ​ພາຍ​ໃນ​ຂອງ​ພະ​ແນກ ຖວ​ທ ນວ ຄື: ໜ່ວຍ​ພັກ​ຄະ­ນະ​ຈັດ​ຕັ້ງ ຂົງ­ເຂດ​ວັດ­ທະ­ນະ­ທຳ ທ່ອງ​ທ່ຽວ ວຽງ​ຈັນ​ໃໝ່ ແລະ ວຽງ​ຈັນ​ທຸ­ລະ​ກິດ-ສັງ­ຄົມ ວິ­ທະ­ຍຸ-ໂທລະ­ພາບ ໂຮງ­ພິມ ນວ ແລະ ໜ່ວຍ​ພັກ​ບໍ­ລິ­ສັດ ເຄ­ຫາ​ການ​ຄ້າ ຈຳ­ກັດ ເຊິ່ງ​ຜ່ານ​ການ­ຈັດ­ຕັ້ງ​ປະ­ຕິ­ບັດ​ຕົວ​ຈິງ ປີ 2018 ໜ່ວຍ​ພັກ​ດັ່ງ­ກ່າວ ສາ­ມາດ​ຈັດ​ຕັ້ງ​ປະ­ຕິ­ບັດ ແລະ ຍາດ​ແຍ່ງ​ຜົນ­ງານ​ຕາມ​ມາດ­ຖານ​ເງື່ອນ­ໄຂ​ທີ່​ວາງ​ໄວ້ ຈຶ່ງ​ນຳ​ສະ­ເໜີ​ຂັ້ນ​ເທິງ ມອບ​ນາມ­ມະ­ຍົດ​ໜ່ວຍ​ພັກ​ປອດ​ໃສ ເຂັ້ມ­ແຂງ ໜັກ​ແໜ້ນ.

    ສະ­ຫາຍ ບຸນ​ທ່ຽງ ຂຸນ​ສີ ໄດ້​ສະ­ແດງ​ຄວາມ​ຊົມ­ເຊີຍ​ຕໍ່​ການ­ຈັດ­ຕັ້ງ​ປະ­ຕິ­ບັດ​ກໍ່­ສ້າງ​ໜ່ວຍ​ພັກ​ປອດ​ໃສ ເຂັ້ມ­ແຂງ ໜັກ​ແໜ້ນ ພ້ອມ​ທັງ​ໄດ້​ເນັ້ນ​ໃຫ້​ສືບ­ຕໍ່​ມູນ­ເຊື້ອ ໃນ​ການ​ສ້າງ​ໜ່ວຍ​ພັກ​ປອດ​ໃສ ເຂັ້ມ­ແຂງ ໜັກ​ແໜ້ນ ສິ່ງ​ທີ່​ຄວນ​ເອົາ­ໃຈ­ໃສ່​ສຳ­ຄັນ ແມ່ນ​ການ​ກຳ​ແໜ້ນ​ເນື້ອ​ໃນ​ກໍ່­ສ້າງ​ໜ່ວຍ​ພັກ​ປອດ​ໃສ ເຂັ້ມ­ແຂງ ໜັກ​ແໜ້ນ ຄະ­ນະ​ນຳ ສະ­ມາ­ຊິກ​ພັກ​ທຸກ​ສະ­ຫາຍ​ຕ້ອງ​ກຳ​ແໜ້ນ​ຫຼັກ­ການ​ຕ່າງໆ​ຂອງ​ພັກ ລະ­ບຽບ​ກົດ­ໝາຍ​ຂອງ​ລັດ ແລະ ສະ­ມາ­ຊິກ​ພັກ ເພື່ອ​ປະ­ກອບ­ສ່ວນ​ໃນ​ຂະ​ບວນ​ການ​ຕ້ອນ­ຮັບ​ໃສ່​ກອງ​ປະ­ຊຸມ​ໃຫຍ່ 3 ຂັ້ນ ແຕ່​ນີ້​ຫາ​ປີ 2020 ໂດຍ​ແນ­ໃສ່​ບັນ­ຫາ 3 ຫຼຸດ 3 ເພີ່ມ ແລະ 3 ຂະ​ບວນ​ການ ເຊິ່ງ​ປີ 2019 ເປັນ​ປີ​ສຸດ​ທ້າຍ​ຂອງ​ການ­ຈັດ­ຕັ້ງ​ຜັນ​ຂະ­ຫຍາຍ ສ້າງ​ຮາກ​ຖານ​ພັກ​ໃຫ້​ມີ​ຄວາມ​ປອດ​ໃສ ເຂັ້ມ­ແຂງ ໜັກ​ແໜ້ນ ໃຫ້​ໄດ້ 80% ຂຶ້ນ​ໄປ.

    ໃນ​ພິ­ທີ​ຄັ້ງ​ນີ້ ຍັງ​ໄດ້​ມອບ​ບັດ​ສະ­ມາ­ຊິກ​ພັກ​ໃຫ້​ໜ່ວຍ​ພັກ​ໜັງ­ສື­ພິມ​ວຽງ​ຈັນ​ໃໝ່ ແລະ ວຽງ​ຈັນ​ທຸ­ລະ​ກິດ-ສັງ­ຄົມ ແລະ ໜ່ວຍ​ພັກ​ໂຮງ­ແຮມ​ລ້ານ​ຊ້າງ​ຕື່ມ​ອີກ.

ຂ່າວທີ່ກ່ຽວຂ້ອງ