ຂ່າວຫຼ້າສຸດ

ການປະຕິຮູບເຕີບໂຕສີຂຽວຂອງລາວ ໄດ້ຮັບການຊຸກຍູ້ຈາກ WB

828 31 ພ.ພ. 2019 ຂ່າວໜ້າ​ໜຶ່ງ

    ວັນ​ທີ 28 ພຶດ­ສະ­ພາ 2019 ຢູ່​ວໍ​ຊິງ​ຕັນ ສ ອາ​ເມ​ຣິ​ກາ ຄະ­ນະ​ກຳ­ມະ­ການ​ບໍ­ລິ­ຫານ​ງານ​ທະ­ນາ­ຄານ​ໂລກ (WB) ໄດ້​ອະ­ນຸ­ມັດ​ສິນ​ເຊື່ອ​ມູນ​ຄ່າ 40 ລ້ານ​ໂດ​ລາ​ສະ­ຫະ­ລັດ ຫຼື ປະ­ມານ 335 ຕື້​ກີບ ສະ­ໜັບ­ສະ­ໜູນ​ຮູບ​ແບບ​ການ​ເຕີບ​ໂຕ​ແບບ​ຍືນ​ຍົງ​ຂອງ​ລາວ ແຜນ​ງານ​ດ້ານ​ນະ­ໂຍ­ບາຍ​ການ​ພັດ­ທະ­ນາ​ການ​ເຕີບ​ໂຕ​ສີ ຂຽວ​ໄລ­ຍະ 2 ສົ່ງ­ເສີມ​ການ​ປະ­ຕິ​ຮູບ ເພື່ອ​ເສີມ​ສ້າງ​ຄວາມ​ເຂັ້ມ­ແຂງ​ໃຫ້​ຄວາມ​ຍືນ​ຍົງ ດ້ານ​ການ​ເງິນ​ງົບ­ປະ­ມານ ແລະ ການ​ເງິນ​ການ​ທະ­ນາ­ຄານ ແລະ ເຊື່ອມ​ສານ​ບັນ­ດາ​ຫຼັກ­ການ ວ່າ​ດ້ວຍ​ການ​ເຕີບ​ໂຕ​ສີ­ຂຽວ​ເຂົ້າ​ໃນ​ການ​ວາງ​ແຜນ­ການ​ພັດ­ທະ­ນາ ເຊິ່ງ​ແຜນ​ງານ​ນີ້ ສອດ­ຄ່ອງ​ກັບ​ວິ­ໄສ​ທັດ​ວ່າ​ດ້ວຍ​ການ​ເຕີບ​ໂຕ​ສີ­ຂຽວ​ຂອງ​ລັດ­ຖະ­ບານ​ລາວ ຕາມ​ທີ່​ລະ­ບຸ​ໄວ້​ຢ່າງ​ຊັດ​ເຈນ​ໃນ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ແຫ່ງ​ຊາດ ຄັ້ງ​ທີ 8 ແລະ ຍຸດ​ທະ​ສາດ​ການ​ເຕີບ​ໂຕ​ສີ­ຂຽວ​ແຫ່ງ​ຊາດ 2030 ສະ­ບັບ​ໃໝ່.

    ທ່ານ ກິ​ແກ້ວ ຈັນ­ທະ​ບູ​ຣີ ຮອງ​ລັດ­ຖະ­ມົນ­ຕີ​ກະ­ຊວງ​ແຜນ­ການ ແລະ ການ​ລົງ­ທຶນ ກ່າວ​ວ່າ: ການ​ຫັນ­ປ່ຽນ​ໄປ​ສູ່​ຮູບ​ແບບ​ການ​ພັດ­ທະ­ນາ​ທີ່​ມີ​ສີ­ຂຽວ​ຂຶ້ນ ສາ­ມາດ​ຊ່ວຍ​ໃຫ້­ການ​ເຕີບ​ໂຕ​ທາງ​ເສດ­ຖະ­ກິດ​ອັນ​ເຂັ້ມ­ແຂງ​ຂອງ​ລາວ​ມີ​ຄວາມ​ຍືນ​ຍົງ ແລະ ເຮັດ​ໃຫ້​ປະ­ເທດ​ມີ​ຄວາມ​ທົນ​ທານ​ຕໍ່​ການ​ປ່ຽນ­ແປງ​ດ້ານ​ສະ­ພາບ​ດິນ​ຟ້າ​ອາ­ກາດ ແຜນ​ງານ​ສະ­ໜັບ­ສະ­ໜູນ​ການ​ປະ­ຕິ​ຮູບ​ດ້ານ​ນະ­ໂຍ­ບາຍ ເພື່ອ​ເຊື່ອມ​ສານ​ເອົາ​ຫຼັກ­ການ​ວ່າ​ດ້ວຍ​ການ​ເຕີບ​ໂຕ​ສີ­ຂຽວ​ເຂົ້າ​ໄປ​ມີ​ບົດ­ບາດ​ໃນ​ທຸກ​ຂະ­ແໜງ ເຊັ່ນ: ເຮັດ​ໃຫ້​ໂຄງ​ລ່າງ​ພື້ນ­ຖານ​ມີ​ຄວາມ​ທົນ​ທານ​ຕໍ່​ຄວາມ​ສ່ຽງ​ດ້ານ​ສະ­ພາບ​ດິນ​ຟ້າ​ອາ­ກາດ ຄຸ້ມ​ຄອງ​ມົນ​ລະ​ພິດ​ທີ່​ເປັນ​ອັນ­ຕະ­ລາຍ​ຕໍ່​ສຸ­ຂະ­ພາບ ແລະ ກຳ­ລັງ​ການ​ຜະ­ລິດ​ຂອງ​ຄົນ ແລະ ປັບ­ປຸງ​ການ​ຄຸ້ມ​ຄອງ​ແຫຼ່ງ​ນ້ຳ ປ່າ­ໄມ້ ແລະ ເຂດ​ປ່າ​ສະ­ຫງວນ ຮູບ​ແບບ​ການ​ເຕີບ​ໂຕ​ທີ່​ເນັ້ນ​ຄວາມ​ສະ­ອາດ ແລະ ມີ​ການ​ນຳ​ໃຊ້​ຊັບ­ພະ­ຍາ­ກອນ​ຢ່າງ​ມີ​ປະ​ສິດ­ທິ​ຜົນ​ຫຼາຍ​ກວ່າ​ເກົ່າ ຈະ​ຊ່ວຍ­ເຫຼືອ​ປະ­ຊາ­ຊົນ​ທີ່​ທຸກ​ຍາກ ຜູ້​ທີ່​ບໍ່​ສາ­ມາດ​ປ້ອງ​ກັນ​ຕົວ​ເອງ​ໄດ້​ຈາກ​ມົນ​ລະ​ພິດ ຄວາມ​ສ່ຽງ​ດ້ານ​ສະ­ພາບ​ດິນ​ຟ້າ​ອາ­ກາດ ແລະ ການ​ຕັດ​ໄມ້​ທຳ­ລາຍ​ປ່າ.

    ທ່ານ​ນາງ ແອລ໌​ເລັນ ໂກ­ສະ​ຕິນ ຜູ້­ອຳ­ນວຍ­ການ WB ປະ­ຈຳ​ມຽນ​ມາ ກຳ­ປູ­ເຈຍ ແລະ ລາວ ກ່າວ​ວ່າ: ລາວ ໄດ້​ອະ­ນຸ­ມັດ​ການ​ປະ­ຕິ​ຮູບ​ທີ່​ສຳ­ຄັນ​ຫຼາຍ​ຢ່າງ ລວມ​ເຖິງ​ການ​ສ້າງ­ຕັ້ງ​ສວນ​ອຸ­ທິ­ຍານ​ແຫ່ງ​ຊາດ​ແຫ່ງ​ທຳ​ອິດ​ຂອງ​ປະ­ເທດ ການ​ອອກ​ກົດ­ໝາຍ​ສະ­ບັບ​ໃໝ່​ວ່າ​ດ້ວຍ​ນ້ຳ ເພື່ອ​ປັບ­ປຸງ​ການ​ຄຸ້ມ​ຄອງ​ລຸ່ມ​ແມ່­ນ້ຳ ການ​ສະ­ກັດ​ກັ້ນ​ການ​ຕັດ​ໄມ້​ຜິດ​ກົດ­ໝາຍ ແລະ ການ​ຄຸ້ມ​ຄອງ​ມົນ​ລະ​ພິດ ເຊິ່ງ​ເປັນ​ຕົວ​ທຳ­ລາຍ​ທຶນ ພວກ​ເຮົາ​ມີ​ຄວາມ​ຍິນ​ດີ​ທີ່​ຈະ​ສະ­ໜັບ­ສະ­ໜູນ​ຄວາມ​ພະ­ຍາ­ຍາມ​ເຫຼົ່າ​ນີ້ ຂະ­ນະ​ດຽວ​ກັນ​ການ​ເສີມ​ຂະ­ຫຍາຍ​ຄວາມ​ຍືນ​ຍົງ​ດ້ານ​ງົບ­ປະ­ມານ ແລະ ການ​ເງິນ​ຂອງ​ປະ­ເທດ ຍັງ​ໄດ້​ຊ່ວຍ­ເຫຼືອ​ລາວ​ແກ້​ໄຂ​ບັນ­ຫາ​ພາ­ລະ​ດ້ານ​ໜີ້​ສິນ ແລະ ການ​ຂາດ​ດຸນ​ດ້ານ​ການ​ເງິນ ໂດຍ​ການ​ສະ­ໜັບ­ສະ­ໜູນ​ຂອບ​ວຽກ​ການ​ເງິນ​ໄລ­ຍະ​ກາງ ທີ່​ເລັ່ງ​ໃສ່​ປັບ­ປຸງ​ການ​ສ້າງ​ລາຍ​ຮັບ ສ້າງ​ຄວາມ​ເຂັ້ມ­ແຂງ​ໃຫ້­ການ​ຄຸ້ມ​ຄອງ​ໜີ້​ສິນ ແລະ ການ​ຄຸ້ມ​ຄອງ​ການ​ເງິນ​ຂອງ​ລັດ ແລະ ເສີມ​ຂະ­ຫຍາຍ​ສະ­ຖຽນ​ລະ​ພາບ​ຂອງ​ຂະ­ແໜງ­ການ​ເງິນ ແຜນ​ງານ​ຄັ້ງ​ນີ້ ແມ່ນ​ຊຸດ​ທີ 2 ໃນ 3 ຊຸດ ຈະ​ເສີມ​ສ້າງ​ຈາກ​ບັນ­ດາ​ຮາກ​ຖານ ທີ່​ໄດ້​ຮັບ​ການ­ຈັດ­ຕັ້ງ​ໃນ​ແຜນ​ງານ​ດ້ານ​ນະ­ໂຍ­ບາຍ​ການ​ພັດ­ທະ­ນາ​ການ​ເຕີບ​ໂຕ​ສີ­ຂຽວ ຄັ້ງ​ທີ 1 ທີ່​ໄດ້​ຖືກ​ອະ­ນຸ­ມັດ​ປີ 2017.

ຂ່າວທີ່ກ່ຽວຂ້ອງ