ຂ່າວຫຼ້າສຸດ

ຈັນທະບູລີ ໄຂການສອບເສັງຈົບຊັ້ນປະຖົມສຶກສາ

677 31 ພ.ພ. 2019 ຂ່າວໜ້າ​ໜຶ່ງ

    ເມືອງ​ຈັນ­ທະ​ບູ​ລີ ນະ­ຄອນ­ຫຼວງ​ວຽງ​ຈັນ (ນວ) ຈັດ​ພິ­ທີ​ໄຂ​ສອບ­ເສັງ​ຈົບ​ຊັ້ນ​ປະ­ຖົມ​ສຶກ​ສາ (ປ5) ທົ່ວ​ເມືອງ ຂຶ້ນ​ວັນ​ທີ 28-29 ພຶດ­ສະ­ພາ 2019 ຢູ່​ໂຮງ­ຮຽນ​ປະ­ຖົມ​ສົມ­ບູນ​ນາ​ໄຮ່​ດຽວ ໂດຍ​ມີ​ທ່ານ ບຸນ​ເຖິງ ສຸ­ວັນ­ນະ​ສີ ຮອງ​ເຈົ້າ­ເມືອງ​ຈັນ­ທະ​ບູ​ລີ ທ່ານ​ນາງ ຄຳ​ຫວັນ ລາດ​ຊະ​ຂັນ­ຕີ ຫົວ­ໜ້າ​ຂະ­ແໜງ​ສຶກ​ສາ­ກ່ອນ​ໄວ​ຮຽນ ພະ​ແນກ​ສຶກ​ສາ​ທິ​ການ ແລະ ກີ­ລາ ນວ ພ້ອມ​ດ້ວຍ​ຫົວ­ໜ້າ​ຫ້ອງ­ການ​ສຶກ​ສາ​ທິ​ການ ແລະ ກີ­ລາ​ເມືອງ​ຈັນ­ທະ​ບູ​ລີ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ທອງ​ດີ ແກ້ວ​ມີ​ໄຊ ຫົວ­ໜ້າ​ຫ້ອງ­ການ​ສຶກ​ສາ​ທິ​ການ ແລະ ກີ­ລາ ເມືອງ​ຈັນ­ທະ​ບູ​ລີ ກ່າວ​ວ່າ: ການ​ສອບ­ເສັງ​ຈົບ​ຊັ້ນ​ປະ­ຖົມ​ສຶກ​ສາ​ທົ່ວ​ເມືອງ ສົກ­ຮຽນ 2018-2019 ມີ​ໂຮງ­ຮຽນ​ຊັ້ນ​ປະ­ຖົມ 35 ແຫ່ງ ໃນ​ນີ້ ໂຮງ­ຮຽນ​ລັດ 15 ແຫ່ງ ມີ​ໂຮງ­ຮຽນ​ທີ່​ເຂົ້າ​ຮ່ວມ​ສອບ­ເສັງ 33 ແຫ່ງ ລັດ 15 ແຫ່ງ ໃນ​ນີ້ ມີ​ມູນ​ລະ​ປະ­ຖົມ 2 ແຫ່ງ ມີ​ຜູ້​ສອບ­ເສັງ 1.411 ຄົນ ຍິງ 723 ຄົນ ແບ່ງ​ເປັນ 4 ສູນ ມີ 56 ຫ້ອງ ສອບ­ເສັງ 3 ວິ­ຊາ ຄື: ຫັດ​ແຕ່ງ-ຂຽນ​ທວາຍ ຄະ­ນິດ­ສາດ ແລະ ວິ­ຊາ​ໂລກ​ອ້ອມ​ຕົວ.

    ທ່ານ ບຸນ​ເຖິງ ສຸ­ວັນ­ນະ​ສີ ໄດ້​ສະ­ແດງ​ຄວາມ​ຊົມ­ເຊີຍ​ຄູ-ອາ­ຈານ ແລະ ຜູ້​ປົກ­ຄອງ​ທີ່​ເອົາ­ໃຈ­ໃສ່​ຊຸກ­ຍູ້​ລູກ​ຫຼານ ລວມ​ທັງ​ນັກ­ຮຽນ​ທີ່​ເອົາ­ໃຈ­ໃສ່​ຄົ້ນ­ຄວ້າ​ຮ່ຳ­ຮຽນ ແລະ ເຂົ້າ​ຮ່ວມ​ການ​ສອບ­ເສັງ​ຄັ້ງ​ນີ້ ພ້ອມ​ທັງ​ຮຽກ­ຮ້ອງ​ເຖິງ​ຄະ­ນະ​ກຳ­ມະ­ການ​ເອົາ­ໃຈ­ໃສ່​ປະ­ຕິ­ບັດ​ໜ້າ­ທີ່​ໃຫ້​ສຳ­ເລັດ ນັກ​ສອບ­ເສັງ​ທຸກ​ຄົນ​ຈົ່ງ​ເອົາ­ໃຈ­ໃສ່​ປະ­ຕິ­ບັດ 12 ຂໍ້​ຫ້າມ ຕັ້ງ­ໃຈ​ສອບ­ເສັງ ເພື່ອ​ຮັບ­ປະ­ກັນ​ໃຫ້­ການ​ສອບ­ເສັງ​ຄັ້ງ​ນີ້ ປະ­ສົບ​ຜົນ­ສຳ­ເລັດ​ຕາມ​ລະ­ດັບ​ຄາດ­ໝາຍ.

ຂ່າວທີ່ກ່ຽວຂ້ອງ