ຂ່າວຫຼ້າສຸດ

ນະຄອນຫຼວງວຽງຈັນ ໄຂທົດລອງນຳໃຊ້ເຕົາເຜົາຂີ້ເຫຍື້ອ

856 30 ພ.ພ. 2019 ຂ່າວໜ້າ​ໜຶ່ງ
ນະຄອນຫຼວງວຽງຈັນ ໄຂທົດລອງນຳໃຊ້ເຕົາເຜົາຂີ້ເຫຍື້ອ

    ພິ­ທີ​ໄຂ​ທົດ​ລອງ​ນຳ​ໃຊ້​ເຕົາ​ເຜົາ​ຂີ້​ເຫຍື້ອ ພາຍ​ໃຕ້​ໂຄງ­ການ​ທົດ​ລອງ ເພື່ອ​ປັບ­ປຸງ​ການ​ຄຸ້ມ​ຄອງ​ຂີ້​ເຫຍື້ອ​ດ້ານ​ການ​ແພດ ແລະ ຂີ້​ເຫຍື້ອ​ອັນ­ຕະ­ລາຍ ຢູ່​ນະ­ຄອນ­ຫຼວງ​ວຽງ​ຈັນ (ນວ) ຈັດ​ຂຶ້ນ​ວັນ​ທີ 27 ພຶດ­ສະ­ພາ 2019 ຢູ່​ສະ­ໜາມ​ບຳ­ບັດ​ຂີ້​ເຫຍື້ອ ບ້ານ​ຜາ​ສຸກ ເມືອງ​ໄຊ​ທາ­ນີ ນວ ໂດຍ​ມີ​ທ່ານ​ນາງ ວິ­ໄລ​ວອນ ຈັນ­ທະ​ລາ­ຕີ ຫົວ­ໜ້າ​ຫ້ອງ­ການ​ຄຸ້ມ​ຄອງ ແລະ ບໍ­ລິ­ການ​ຕົວ​ເມືອງ​ວຽງ​ຈັນ (ຄບຕ) ທ່ານ ຊະ­ນະ​ດະ ຮອງ​ຫົວ­ໜ້າ​ອົງ­ການ​ໄຈ​ກາ ປະ­ຈຳ ສປປ ລາວ ທ່ານ ສາ​ຢາ​ມາ ຈູມ​ອີ​ວິ​ໂລ ຜູ້­ອຳ­ນວຍ­ການ​ບໍ­ລິ­ສັດ​ສາ​ຢາ​ມາ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ​ນາງ ວິ­ໄລ​ວອນ ຈັນ­ທະ​ລາ­ຕີ ກ່າວ​ວ່າ: ໂຄງ­ການ​ດັ່ງ­ກ່າວ ເປັນ​ໂຄງ­ການ​ທີ່ ນວ ມີ​ຄວາມ​ຕ້ອງ­ການ ເປັນ​ໂຄງ­ການ​ທີ່​ສຳ­ຄັນ​ໃນ​ການ​ຮັກ­ສາ​ຄວາມ​ສະ­ອາດ ຄວາມ​ປອດ​ໄພ​ດ້ານ​ສິ່ງ­ແວ­ດລ້ອມ ກໍ​ຄື​ການ​ຮັກ­ສາ​ຄຸ້ມ​ຄອງ​ພະ­ຍາດ​ຕິດ­ແປດ ທີ່​ອາດ​ເກີດ​ຂຶ້ນ​ຈາກ​ຂີ້​ເຫຍື້ອ​ຕິດ­ເຊື້ອ ເຊິ່ງ​ຜ່ານ​ມາ ຄບຕ ມີ​ເຕົາ​ເຜົາ​ຂີ້​ເຫຍື້ອ​ຕິດ­ເຊື້ອ​ຈາກ​ໂຮງ­ໝໍ ພຽງ 1 ເຄື່ອງ ແລະ ນຳ​ໃຊ້​ມາ​ຫຼາຍ​ປີ​ແລ້ວ ກຳ­ລັງ​ແຮງ​ຂອງ​ການ​ເຜົາ​ບໍ່​ສາ­ມາດ​ຕອບ​ສະ­ໜອງ ໄດ້​ກັບ​ປະ­ລິ­ມານ​ຂີ້​ເຫຍື້ອ​ໂຮງ­ໝໍ​ທີ່​ເພີ່ມ​ຂຶ້ນ ນອກ​ນີ້ ຍັງ​ພົບ​ບັນ­ຫາ​ໃນ​ເວ­ລາ​ເຄື່ອງ​ຈັກ​ຂັດ­ຂ້ອງ ຕ້ອງ​ໄດ້​ຢຸດ​ການ​ເຜົາ​ເຮັດ​ໃຫ້​ຂີ້​ເຫຍື້ອ​ຕົກ​ຄ້າງ ນວ ຈຶ່ງ​ໄດ້​ເຫັນ​ດີ​ໃຫ້ ຄບຕ ຮ່ວມ​ຈັດ​ຕັ້ງ​ປະ­ຕິ­ບັດ​ໂຄງ­ການ​ດັ່ງ­ກ່າວ ຫ້ອງ­ການ ຄບຕ ຈຶ່ງ​ໄດ້​ລົງ​ນາມ​ບົດ​ບັນ​ທຶນ​ຮ່ວມ​ມື​ກັບ​ອົງ­ການ​ໄຈ​ກາ ແລະ ບໍ­ລິ­ສັດ​ຄາ​ຢາ​ມາ ພ້ອມ​ທັງ​ພະ­ຍາ­ຍາມ​ປະ­ຕິ­ບັດ​ຕາມ​ເນື້ອ​ໃນ​ການ​ຕົກ­ລົງ ດ້ວຍ​ການ​ປະ­ສານ​ສົມ­ທົບ​ກັບ​ພາກ­ສ່ວນ​ກ່ຽວ­ຂ້ອງ ເພື່ອ​ດຳ­ເນີນ​ການ​ຂໍ­ອະ­ນຸ­ຍາດ ແລະ ອຳ­ນວຍ​ຄວາມ​ສະ­ດວກ​ດ້ານ​ຕ່າງໆ ໃຫ້​ແກ່​ການ­ຈັດ­ຕັ້ງ​ປະ­ຕິ­ບັດ​ໂຄງ­ການ​ດັ່ງ­ກ່າວ ໄດ້​ດຳ­ເນີນ​ໄປ​ຕາມ​ແຜນ­ການ ເປັນ­ຕົ້ນ ການ​ອະ­ນຸ­ຍາດ​ຍົກ­ເວັ້ນ​ພາ­ສີ​ນຳ​ເຂົ້າ​ເຄື່ອງ​ຈັກ ການ​ຂໍ­ອະ­ນຸ­ຍາດ​ສິ່ງ­ແວ­ດລ້ອມ ນອກ​ນີ້ ນວ ເຫັນ​ດີ​ໃຫ້​ນຳ​ໃຊ້​ພື້ນ​ທີ່​ສະ­ໜາມ​ບຳ­ບັດ​ຂີ້​ເຫຍື້ອ ເປັນ​ຈຸດ​ບ່ອນ​ຕັ້ງ​ເຕົາ​ເຜົາ ແລະ ເຫັນ​ດີ​ໃຫ້​ຫ້ອງ­ການ ຄບຕ ເປັນ​ເຈົ້າ​ການ​ຮັບ­ຜິດ­ຊອບ​ໃນ​ການ​ກະ­ກຽມ​ສ້າງ​ໂຮງ​ເຮືອນ ລວມ​ທັງ​ລະ­ບົບ​ໄຟ­ຟ້າ ນ້ຳ​ປະ­ປາ ເພື່ອ​ຕອບ​ສະ­ໜອງ​ໃຫ້​ການ­ຈັດ­ຕັ້ງ​ປະ­ຕິ­ບັດ ມູນ​ຄ່າ​ການ​ກໍ່­ສ້າງ 190 ລ້ານ​ກວ່າ​ກີບ.

    ເພື່ອ​ຮັບ­ປະ­ກັນ​ໃຫ້­ການ​ດຳ­ເນີນ​ງານ​ໃນ­ຕໍ່­ໜ້າ ຫ້ອງ­ການ ຄບຕ ໄດ້​ສົ່ງ​ຄະ­ນະ​ວິ­ຊາ​ການ​ທີ່​ກ່ຽວ­ຂ້ອງ ໄປ​ເຝິກ­ອົບ­ຮົມ ເບິ່ງ​ວຽກ​ງານ​ຕົວ​ຈິງ​ຢູ່​ປະ­ເທດ​ຍີ່­ປຸ່ນ ແລະ ໄດ້​ສົ່ງ​ວິ­ຊາ​ການ​ເຂົ້າ​ຮ່ວມ​ຕິດ­ຕາມ​ຢ່າງ​ໃກ້­ຊິດ ໃນ​ການ​ປະ­ກອບ​ຕິດ​ຕັ້ງ​ເຄື່ອງ​ຈັກ​ຄັ້ງ​ນີ້ ພາຍ­ຫຼັງ​ທີ່​ສຳ­ເລັດ​ການ​ຕິດ​ຕັ້ງ ແລະ ດຳ­ເນີນ​ການ​ເຜົາ​ຂີ້​ເຫຍື້ອ​ທົດ​ລອງ​ແລ້ວ ນອກ​ນີ້ ຍັງ​ຈະ​ສືບ­ຕໍ່​ສ້າງ​ຮົ້ວ ມຸງ​ຫຼັງ­ຄາ ຢູ່​ສະ­ຖານ­ທີ່​ແຫ່ງ​ນີ້​ຕື່ມ​ໃຫ້​ສຳ­ເລັດ​ຕາມ​ແຜນ­ການ.

ຂ່າວທີ່ກ່ຽວຂ້ອງ