ຂ່າວຫຼ້າສຸດ

ກະສິກຳ ວາງແຜນປູກໄມ້ທົ່ວປະເທດ ເນື້ອທີ່ 10.000 ເຮັກຕາ

786 30 ພ.ພ. 2019 ຂ່າວໜ້າ​ໜຶ່ງ
ກະສິກຳ ວາງແຜນປູກໄມ້ທົ່ວປະເທດ ເນື້ອທີ່ 10.000 ເຮັກຕາ

    ເພື່ອ​ເປັນ​ການ​ສະ­ເຫຼີມ­ສະ­ຫຼອງ​ວັນ​ປູກ​ຕົ້ນ­ໄມ້​ແຫ່ງ​ຊາດ ແລະ ວັນ​ເດັກ​ສາ­ກົນ (1 ມິ­ຖຸ­ນາ) ໃຫ້​ເປັນ​ຂະ​ບວນ​ການ​ຟົດ­ຟື້ນ ເພື່ອ​ແນ­ໃສ່​ປູກ​ໄມ້​ຟື້ນ​ຟູ​ປ່າ ເພື່ອ​ເພີ່ມ​ເນື້ອ­ທີ່​ປົກ​ຫຸ້ມ​ຂອງ​ປ່າ­ໄມ້​ໃຫ້​ໄດ້ 70% ໃນ​ປີ 2020.

    ທ່ານ ຊູ​ຊາດ ໄຊ​ຍະ​ກຸມ­ມານ ຫົວ­ໜ້າ​ກົມ​ປ່າ­ໄມ້ ກະ­ຊວງ​ກະ­ສິ­ກຳ ແລະ ປ່າ­ໄມ້ ສຳ­ພາດ​ວັນ​ທີ 28 ພຶດ­ສະ­ພາ 2019 ວ່າ: ກະ­ຊວງ​ກະ­ສິ­ກຳ​ປ່າ­ໄມ້ ກໍ​ຄື​ກົມ​ປ່າ­ໄມ້ ໄດ້​ວາງ​ແຜນ​ປູກ​ໄມ້​ທົ່ວ​ປະ­ເທດ 10.000 ເຮັກ­ຕາ ປັດ­ຈຸ­ບັນ​ສາ­ມາດ​ສັງ​ລວມ​ເນື້ອ­ທີ່​ປູກ​ໄມ້​ໃນ 17 ແຂວງ ນະ­ຄອນ­ຫຼວງ​ວຽງ​ຈັນ 9.000 ເຮັກ­ຕາ ກະ­ກຽມ​ເບ້ຍ​ໄມ້​ສະ­ໜອງ​ການ​ປູກ​ໃນ​ທົ່ວ​ປະ­ເທດ 1.793.637 ເບ້ຍ ໂດຍ​ເນັ້ນ​ໃສ່ 2 ລັກ­ສະ­ນະ​ຄື: ໃນ​ພື້ນ​ທີ່​ສຳ­ນັກ­ງານ​ຫ້ອງ­ການ ຕົວ​ເມືອງ ແລະ ບ້ານ ແມ່ນ​ເນັ້ນ​ໃສ່​ໄມ້​ປະ­ດັບ ແລະ ໄມ້​ໃຫ້​ໝາກ ແລະ ເນື້ອ­ທີ່​ປູກ​ໄມ້​ເປັນ​ສິນ­ຄ້າ ແມ່ນ​ເນັ້ນ​ໃສ່​ຊະ­ນິດ​ພັນ​ໄມ້​ພື້ນ­ເມືອງ ແລະ ໄມ້​ນຳ​ເຂົ້າ​ເຊັ່ນ: ໄມ້​ວິກ ກະ­ຖິນ​ເທ­ພາ ກະ­ຖິນ​ນາ​ລົງ ສະ­ເພາະ​ກົມ​ປ່າ­ໄມ້ ໄດ້​ກະ­ກຽມ​ເບ້ຍ​ໄມ້ 125.200 ເບ້ຍ ຄື: ໄມ້​ຂະ​ຍຸງ ໄມ້​ດູ່​ຄັ່ງ ໄມ້​ດູ່​ລາຍ ໄມ້​ແຕ້​ຂ່າ ໄມ້​ຄຳ​ພີ ໄມ້​ກໍ່ ໄມ້​ສັກ ຫວາຍ​ໂຕນ ຫວາຍ​ແຍ້ ໄມ້​ຄູນ​ອິນ​ເດຍ ໝາກ­ມີ້ ໝາກ­ຂາມ ຖົ່ວ​ດາວ​ອິນ­ທາ ແລະ ໝາກ­ແຄ້ງ­ຂົມ ເພື່ອ​ຕອບ​ສະ­ໜອງ​ເບ້ຍ​ໄມ້​ໃຫ້​ພາກ­ສ່ວນ​ຕ່າງໆ​ພາກ​ລັດ ແລະ ເອ­ກະ​ຊົນ.

    ກະ­ຊວງ​ກະ­ສິ­ກຳ ແລະ ປ່າ­ໄມ້ ສົມ­ທົບ​ກັບ​ກະ­ຊວງ​ຊັບ­ພະ­ຍາ­ກອນ​ທຳ​ມະ​ຊາດ ແລະ ສິ່ງ­ແວ­ດລ້ອມ ແລະ ນະ­ຄອນ­ຫຼວງ​ວຽງ​ຈັນ ສ້າງ​ຂະ​ບວນ​ການ​ປູກ​ໄມ້ ໃນ​ໂອ­ກາດ​ສະ­ເຫຼີມ­ສະ­ຫຼອງ​ວັນ​ປູກ​ຕົ້ນ­ໄມ້​ແຫ່ງ​ຊາດ ແລະ ວັນ­ເດັກ­ນ້ອຍ​ສາ­ກົນ ເຊິ່ງ​ມີ​ແຜນ​ຈະ​ປູກ​ໄມ້​ໃນ​ເນື້ອ​ທີ 5 ເຮັກ­ຕາ​ໃນ​ເຂດ​ສວນ­ພຶກ­ສາ­ສາດ ປະ­ກອບ​ມີ ໄມ້​ຂະ​ຍຸງ ໄມ້​ດູ່ ໄມ້​ປະ­ດົງ ໄມ້​ແຕ້​ຄ່າ ໄມ້­ແຄນ ໄມ້​ດູ່​ລາຍ ແລະ ໄມ້­ຍາງ ນອກ​ນີ້ ຍັງ​ໄດ້​ຮ່ວມ​ກັບ​ພະ​ແນກ​ກະ­ສິ­ກຳ ແລະ ປ່າ­ໄມ້​ນະ­ຄອນ­ຫຼວງ​ວຽງ​ຈັນ ເປັນ​ເຈົ້າ​ການ​ຈັດ​ງານ​ວາງ­ສະ­ແດງ​ເບ້ຍ​ໄມ້ ຄາດ​ວ່າ​ຈະ​ຈັດ​ຂຶ້ນ​ຕົ້ນ​ເດືອນ​ມິ­ຖຸ­ນາ ເພື່ອ​ສ້າງ​ຂະ​ບວນ​ການ ປູກ​ຈິດ​ສຳ­ນຶກ​ໃຫ້​ສັງ­ຄົມ ຫັນ​ມາ​ສົ່ງ­ເສີມ​ການ​ກ້າ​ເບ້ຍ​ໄມ້ ແລະ ການ​ປູກ​ໄມ້ ເຫັນ​ຄວາມ​ສຳ­ຄັນ​ຂອງ​ປ່າ­ໄມ້ ໂດຍ​ສະ­ເພາະ​ຄຸນ​ປະ­ໂຫຍດ​ຂອງ​ປ່າ­ໄມ້ ແລະ ຕົ້ນ­ໄມ້​ຕໍ່​ສິ່ງ​ທີ່​ມີ​ຊີ­ວິດ.

    ໃນ​ໂອ­ກາດ​ສະ­ເຫຼີມ­ສະ­ຫຼອງ​ວັນ​ປູກ​ຕົ້ນ­ໄມ້​ແຫ່ງ​ຊາດ ແລະ ວັນ​ເດັກ​ສາ­ກົນ​ວັນ​ທີ 1 ມິ­ຖຸ­ນາ ທີ່​ຈະ​ມາ​ເຖິງ ຂໍ​ຮຽກ­ຮ້ອງ​ມາ​ຍັງ​ບັນ­ດາ​ສຳ­ນັກ­ງານ​ຫ້ອງ­ການ ພະ­ແນກ­ການ ທະ­ຫານ ຕຳ­ຫຼວດ ພຸດ​ທະ​ສາ ສະ​ນິ​ກະ​ຊົນ ວັດ​ວາ​ອາ​ຮາມ ໂຮງ­ຮຽນ ໂຮງ­ໝໍ ຮ່ວມ​ໃຈ​ກັນ​ປູກ​ໄມ້​ໃຫ້​ກາຍ­ເປັນ​ປະ­ເພ­ນີ ເປັນ​ກິດ­ຈະ­ກຳ​ປະ­ຈຳ​ວັນ ແນ­ໃສ່​ຄວາມ​ສວຍ​ງາມ ແລະ ພື້ນ​ທີ່​ປ່າ​ສີ­ຂຽວ ຕາມ​ແຜນ​ຍຸດ​ທະ​ສາດ​ປ່າ­ໄມ້ ຮອດ​ປີ 2020 ໃຫ້​ປ່າ­ໄມ້​ມີ​ຄວາມ​ປົກ​ຫຸ້ມ 70%.

ຂ່າວທີ່ກ່ຽວຂ້ອງ