ຄູກັນນ້ຳ ເຂື່ອນເຊປຽນ-ເຊນ້ຳນ້ອຍແຕກ ເກີດຈາກການຊຶມຂອງນ້ຳ ບໍ່ແມ່ນເຫດສຸດວິໄສ

1.175 29 ພ.ພ. 2019 ຂ່າວໜ້າ​ໜຶ່ງ
ຄູກັນນ້ຳ ເຂື່ອນເຊປຽນ-ເຊນ້ຳນ້ອຍແຕກ ເກີດຈາກການຊຶມຂອງນ້ຳ ບໍ່ແມ່ນເຫດສຸດວິໄສ

    ວັນ​ທີ 28 ພຶດ­ສະ­ພາ 2019 ທີ່​ສຳ­ນັກ­ງານ​ນາ­ຍົກ­ລັດ­ຖະ­ມົນ­ຕີ ທ່ານ ສິງ​ເພັດ ບຸນ​ສະ​ຫວັດ​ທິ​ພັນ ຮອງ​ປະ­ທານ​ອົງ­ການ​ກວດ­ກາ ຮອງ​ປະ­ທານ​ຄະ­ນະ​ສືບ­ສວນ-ສອບ​ສວນ​ເຂື່ອນ​ໄຟ­ຟ້າ​ເຊ​ປຽນ-ເຊ​ນ້ຳ​ນ້ອຍ ເມືອງ​ສະ­ໜາມ​ໄຊ ແຂວງ​ອັດ​ຕະ​ປື ໃຫ້​ຖະ­ແຫຼງ​ຂ່າວ​ຜົນ​ຂອງ​ການ​ສືບ­ສວນ-ສອບ​ສວນ​ຫາ​ສາ­ເຫດ​ຄູ​ກັນ​ນ້ຳ D ເຂື່ອນ​ໄຟ­ຟ້າ​ເຊ​ປຽນ-ເຊ​ນ້ຳ​ນ້ອຍ​ແຕກ​ວ່າ: ວັນ​ທີ 8 ສິງ­ຫາ 2018 ລັດ­ຖະ­ບານ​ໄດ້​ແຕ່ງ­ຕັ້ງ​ຄະ­ນະ​ຮັບ­ຜິດ­ຊອບ​ສືບ­ສວນ-ສອບ​ສວນ​ສາ­ເຫດ​ຄູ​ກັນ​ນ້ຳ D ຂອງ​ເຂື່ອນ​ເຊ​ປຽນ-ເຊ​ນ້ຳ​ນ້ອຍ​ແຕກ​ພັງ (ຄະ­ນະ​ສືບ­ສວນ-ສອບ​ສວນ​ແຫ່ງ​ຊາດ) ເປັນ​ປະ­ທານ​ຂອງ​ທ່ານ ບຸນ​ທອງ ຈິດ​ມະ­ນີ ຮອງ​ນາ­ຍົກ­ລັດ­ຖະ­ມົນ­ຕີ ປະ­ທານ​ອົງ­ການ​ກວດ­ກາ​ລັດ­ຖະ­ບານ ເພື່ອ​ດຳ­ເນີນ​ການ​ກວດ­ກາ​ຫາ​ສາ­ເຫດ ເພື່ອ​ລາຍ​ງານ​ຕໍ່​ລັດ­ຖະ­ບານ ປະ­ຊາ­ຊົນ​ລາວ ສາ­ກົນ ແລະ ຜູ້​ມີ​ສ່ວນ​ຮ່ວມ​ອື່ນໆ​ຮັບ​ຊາບ.

    ເພື່ອ​ຮັບ­ປະ­ກັນ​ໃຫ້­ການ​ສືບ­ສວນ-ສອບ​ສວນ​ດຳ­ເນີນ​ໄປ​ຢ່າງ​ຖືກ­ຕ້ອງ ແລະ ສອດ­ຄ່ອງ​ກັບ​ລະ­ບຽບ​ການ ສະ­ພາບ​ຄວາມ​ເປັນ​ຈິງ ມີ​ຄວາມ​ປອດ​ໃສ ແລະ ເຊື່ອ​ຖື​ໄດ້ ລັດ­ຖະ­ບານ​ໄດ້​ມອບ​ໃຫ້​ຄະ­ນະ​ສືບ­ສວນ-ສອບ​ສວນ​ແຫ່ງ​ຊາດ​ແຕ່ງ­ຕັ້ງ ແລະ ມອບ​ສິດ​ເຕັມ​ສ່ວນ​ໃຫ້​ຄະ­ນະ​ຊ່ຽວ­ຊານ​ເອ­ກະ­ລາດ ທີ່​ມີ​ຊື່​ສຽງ​ໃນ​ເວ­ທີ​ສາ­ກົນ ເປັນ​ຜູ້​ດຳ­ເນີນ​ການ​ສືບ​ຫາ​ສາ­ເຫດ​ໄປ​ຄຽງ​ຄູ່​ກັບ​ການ​ດຳ­ເນີນ​ງານ​ຂອງ​ຄະ­ນະ​ສືບ­ສວນ-ສອບ​ສວນ​ແຫ່ງ​ຊາດ ເຊິ່ງ​ຄະ­ນະ​ຊ່ຽວ­ຊານ​ເອ­ກະ­ລາດ ປະ­ກອບ​ດ້ວຍ​ທ່ານ Anton J.Schleiss ຈາກ​ປະ­ເທດ​ສະ​ວິດ ປະ­ທານ​ກິດ​ຕິ​ມະ​ສັກ​ອົງ­ການ​ເຂື່ອນ​ໃຫຍ່​ສາ­ກົນ (ICOLD) ທ່ານ Ahmed F. Chraibi ຈາກ​ປະ­ເທດ​ມາ​ຣົກ ອະ­ດີດ​ຮອງ​ປະ­ທານ ICOLD ແລະ ທ່ານ Jean-Pierre Tournier ຈາກ​ປະ­ເທດ​ກາ​ນາ​ດາ ຮອງ​ປະ­ທານ ICOLD ພ້ອມ​ນີ້ ລັດ­ຖະ­ບານ​ຍັງ​ໄດ້​ເຊີນ​ຫຼາຍ​ພາກ­ສ່ວນ​ຂອງ​ຕ່າງ­ປະ­ເທດ ເຂົ້າ​ຮ່ວມ​ເປັນ​ຜູ້​ສັງ­ເກດ​ການ​ໃນ​ຂະ​ບວນ​ການ​ສືບ­ສວນ-ສອບ​ສວນ ເພື່ອ​ຊອກ​ຫາ​ສາ­ເຫດ​ຄູ​ກັນ​ນ້ຳ D ແຕກ​ພັງ ໃນ​ຂະ­ນະ​ດຽວ​ກັນ​ລັດ­ຖະ­ບານ​ລາວ​ເຂົ້າ­ໃຈ​ວ່າ ບໍ­ລິ­ສັດ ສ ເກົາ­ຫຼີ ທີ່​ມີ​ສ່ວນ​ຮ່ວມ​ໃນ​ການ​ພັດ­ທະ­ນາ​ໂຄງ­ການ ກໍ​ໄດ້​ດຳ­ເນີນ​ການ​ສືບ​ຫາ​ສາ­ເຫດ​ເຊັ່ນ​ກັນ.

    ຄະ­ນະ​ຊ່ຽວ­ຊານ​ເອ­ກະ­ລາດ ໄດ້​ສຶກ​ສາ​ສາ​ເຫດ­ການ​ແຕກ​ພັງ ໂດຍ​ອີງ­ໃສ່​ການ​ສຶກ​ສາ​ຄົ້ນ­ຄວ້າ​ຂໍ້​ມູນ​ທີ່​ໄດ້​ຮັບ​ຈາກ​ພາກ­ສ່ວນ​ກ່ຽວ­ຂ້ອງ ອີງ­ໃສ່​ການ​ສັງ­ເກດ​ການ​ໃນ​ເວ­ລາ​ລົງ​ກວດ­ກາ​ພາກ​ສະ­ໜາມ ນັບ​ແຕ່​ເດືອນ​ສິງ­ຫາ 2018 ເປັນ­ຕົ້ນ​ມາ ພ້ອມ​ທັງ​ຜົນ​ຂອງ​ການ​ສຳ​ຫຼວດ​ທາງ​ທໍ­ລະ­ນີ ເຕັກ­ນິກ​ທີ່​ຄະ­ນະ​ຊ່ຽວ­ຊານ​ເອ­ກະ­ລາດ ໄດ້​ແນະ­ນຳ​ໃຫ້​ສຳ​ຫຼວດ​ຄືນ ພາຍ­ຫຼັງ​ການ​ແຕກ​ພັງ​ຂອງ​ເຂື່ອນ​ກັນ​ນ້ຳ D ແລະ ໄດ້​ສົ່ງ​ບົດ​ລາຍ​ງານ​ສຸດ​ທ້າຍ​ສະ­ບັບ​ວັນ​ທີ 20 ມີ­ນາ 2019 ກ່ຽວ​ກັບ​ຜົນ​ການ​ສືບ­ສວນ​ໃຫ້​ຄະ­ນະ​ສືບ­ສວນ-ສອບ​ສວນ​ແຫ່ງ​ຊາດ ດັ່ງ­ນັ້ນ ຄະ­ນະ​ສືບ­ສວນ-ສອບ​ສວນ​ແຫ່ງ​ຊາດ ຈຶ່ງ​ຂໍ​ແຈ້ງ​ຜົນ​ການ​ກວດ­ກາ​ຫາ​ສາ­ເຫດ​ທີ່​ຄະ­ນະ​ຊ່ຽວ­ຊານ​ເອ­ກະ­ລາດ ໄດ້​ສະ­ຫຼຸບ​ໃນ​ບົດ​ລາຍ​ງານ​ສຸດ​ທ້າຍ​ຂອງ​ຕົນ​ຄື: ການ​ແຕກ​ພັງ​ຂອງ​ຄູ​ກັນ​ນ້ຳ D ທີ່​ເກີດ​ຂຶ້ນ​ວັນ​ທີ 23 ກໍ­ລະ­ກົດ 2018 ເຊິ່ງ​ຢູ່​ໃນ​ໄລ­ຍະ​ເກັບ​ກັກ​ນ້ຳ​ເຂົ້າ​ອ່າງ ເຖິງ​ແມ່ນ​ວ່າ​ມີ​ຝົນ­ຕົກ​ຕິດ­ຕໍ່​ກັນ​ຫຼາຍ​ວັນ​ກ່ອນ​ມື້​ຄູ​ກັນ​ນ້ຳ​ແຕກ​ພັງ​ກໍ​ຕາມ ແຕ່​ໃນ​ເວ­ລາ​ການ​ແຕກ​ພັງ​ໄດ້​ເລີ່ມ​ຕົ້ນ​ຂຶ້ນ​ນັ້ນ ລະ­ດັບ​ນ້ຳ​ໃນ​ອ່າງ­ເກັບ­ນ້ຳ​ຍັງ​ຕ່ຳ​ກວ່າ​ລະ­ດັບ​ສັນ​ເຂື່ອນ​ຫຼາຍ ສະ­ນັ້ນ ບໍ່​ສາ­ມາດ​ເອີ້ນ​ເຫດ­ການ​ແຕກ​ພັງ​ຄັ້ງ​ນີ້​ວ່າ​ເປັນ​ເຫດ​ສຸດ​ວິ­ໄສ (Force Majeure) ຕາມ​ທີ່​ໄດ້​ກຳ­ນົດ​ໄວ້​ໃນ​ສັນ­ຍາ​ສຳ​ປະ­ທານ ເຊິ່ງ​ຄະ­ນະ​ຊ່ຽວ­ຊານ​ເອ­ກະ­ລາດ​ກວດ​ພົບ​ວ່າ ສາ­ເຫດ​ຕົ້ນ­ຕໍ​ຂອງ​ການ​ແຕກ​ພັງ​ແມ່ນ​ກ່ຽວ­ຂ້ອງ​ກັບ​ຄວາມ​ສາ­ມາດ ໃນ​ການ​ຊຶມ​ນ້ຳ​ສູງ​ຂອງ​ຮາກ​ຖານ​ເຂື່ອນ​ກັນ​ນ້ຳ ປະ­ກອບ​ມີ​ຊັ້ນ​ດິນ​ທີ່​ສາ­ມາດ​ຖືກ​ກັດ​ເຊາະ​ໄດ້​ງ່າຍ ໂດຍ​ສະ­ເພາະ​ການ​ປາ­ກົດ​ມີ​ຮູ​ທໍ່​ນ້ອຍ​ທີ່​ມີ​ການ​ເຊື່ອມ​ຕໍ່​ເຊິ່ງ​ກັນ ແລະ ກັນ ໃນ​ຊັ້ນ​ດິນ ໄປ​ພ້ອມ​ກັບ​ການ​ເພີ່ມ​ຂຶ້ນ​ຂອງ​ລະ­ດັບ​ນ້ຳ​ໃນ​ໄລ­ຍະ​ການ​ເກັບ​ກັກ​ນ້ຳ​ໃນ​ອ່າງ ກະ­ແສ​ການ​ຊຶມ​ຂອງ​ນ້ຳ​ຕາມ​ເສັ້ນ­ທາງ​ໄຫຼ​ຂອງ​ນ້ຳ​ຕາມ​ທາງ​ນອນ ກໍ​ເລີ່ມ​ຂຶ້ນ​ໃນ​ຮາກ​ຖານ​ບວກ​ກັບ​ຄວາມ​ສາ­ມາດ​ໃນ​ການ​ຊຶມ​ນ້ຳ​ສູງ​ຂອງ​ດິນ ປາ­ກົດ­ການ​ນີ້ ໄດ້​ສົ່ງ​ຜົນ​ໃຫ້​ມີ​ການ​ກັດ​ເຊາະ​ພາຍ​ໃນ​ຮາກ​ຖານ ແລະ ເຮັດ​ໃຫ້​ດິນ​ລາ​ເຕຣິດ​ອ່ອນ​ໂຕ​ລົງ ເມື່ອ​ການ​ກັດ​ເຊາະ ແລະ ການ​ອ່ອນ​ໂຕ​ຂອງ​ຮາກ​ຖານ​ເຖິງ​ຂັ້ນ​ໃດ​ໜຶ່ງ​ຄວາມ​ສະ​ເຖຍ​ລະ​ພາບ​ຂອງ​ເຂື່ອນ​ບໍ່​ສາ­ມາດ​ຮັບ­ປະ­ກັນ​ໄດ້​ອີກ​ຕໍ່​ໄປ ແລະ ການ​ເລື່ອນ​ຖະ­ໄຫຼ​ເລິກ​ແບບ​ໜູນ ໄດ້​ເລີ່ມ​ຕົ້ນ​ຂຶ້ນ​ທີ່​ບ່ອນ​ສູງ​ສຸດ​ຂອງ​ເຂື່ອນ​ກັນ​ນ້ຳ ໃນ​ທີ່​ສຸດ​ກໍ​ນຳ­ໄປ​ສູ່​ການ​ແຕກ​ພັງ​ທັງ​ໝົດ​ຂອງ​ຄູ​ກັນ​ນ້ຳ D ແລະ ຊັ້ນ​ຮາກ​ຖານ ເຊິ່ງ​ເຮັດ​ໃຫ້​ມວນ​ນ້ຳ​ມະ­ຫາ­ສານ​ທີ່​ມີ​ຄວາມ​ສາ­ມາດ​ທຳ­ລາຍ​ສູງ ແລະ ບໍ່​ສາ­ມາດ​ຄວບ​ຄຸມ​ໄດ້ ໄຫຼ​ອອກ​ຈາກ​ອ່າງ­ເກັບ­ນ້ຳ ຮາກ​ຖານ​ຂອງ​ຄູ​ກັນ​ນ້ຳ D ແມ່ນ​ກ່ຽວ­ຂ້ອງ​ກັບ​ການ​ແຕກ​ພັງ​ຄັ້ງ​ນີ້.

ຂ່າວທີ່ກ່ຽວຂ້ອງ