ຫາດຊາຍຟອງ ປູກຕົ້ນໄມ້ເພີ່ມຄວາມຂຽວປົກຄຸມໃຫ້ພື້ນທີ່

671 29 ພ.ພ. 2019 ຂ່າວໜ້າ​ໜຶ່ງ
ຫາດຊາຍຟອງ ປູກຕົ້ນໄມ້ເພີ່ມຄວາມຂຽວປົກຄຸມໃຫ້ພື້ນທີ່

    ເພື່ອ​ຈັດ​ຕັ້ງ​ປະ­ຕິ­ບັດ​ຜັນ​ຂະ­ຫຍາຍ​ນະ­ໂຍ­ບາຍ 6 ສ ຂອງ​ນະ­ຄອນ­ຫຼວງ​ວຽງ​ຈັນ ໂດຍ​ສະ­ເພາະ​ແມ່ນ ສ ສີ­ຂຽວ ແລະ ປະ­ຕິ­ບັດ​ໃຫ້​ເກີດ​ຜົນ​ເປັນ​ຈິງ​ໃນ​ທົ່ວ​ເມືອງ​ຫາດ​ຊາຍ​ຟອງ.

    ວັນ​ທີ 25 ພຶດ­ສະ­ພາ 2019 ອົງ­ການ​ປົກ­ຄອງ​ເມືອງ​ຫາດ​ຊາຍ​ຟອງ​ຮ່ວມ​ກັບ​ພະ​ແນກ​ກະ­ສິ­ກຳ ແລະ ປ່າ­ໄມ້ ນະ­ຄອນ­ຫຼວງ​ວຽງ​ຈັນ ຫ້ອງ­ການ​ກະ­ສິ­ກຳ ແລະ ປ່າ­ໄມ້​ເມືອງ​ຫາດ​ຊາຍ​ຟອງ ແລະ ພາກ­ສ່ວນ​ກ່ຽວ­ຂ້ອງ ໄດ້​ສ້າງ​ຂະ​ບວນ​ການ​ປູກ​ຕົ້ນ­ໄມ້​ຢູ່​ຖະ­ໜົນ 450 ປີ ເພື່ອ​ເພີ່ມ​ຄວາມ​ຂຽວ​ປົກ​ຄຸມ​ໃຫ້​ກັບ​ພື້ນ​ທີ່​ສ້າງ​ໃຫ້​ເປັນ​ພື້ນ​ທີ່​ຂຽວ­ງາມ​ສົດ­ໃສ ແລະ ໃຫ້​ກາຍ­ເປັນ​ເມືອງ​ທີ່­ຢູ່ ແລະ ຍືນ​ຍົງ ມີ​ທ່ານ ວົງ​ເດືອນ ບຸນ​ຍະ​ແສງ ເຈົ້າ­ເມືອງ​ຫາດ​ຊາຍ​ຟອງ ທ່ານ ຫຼ້າ​ສາຍ ນວນ​ທາ​ສິງ ຫົວ­ໜ້າ​ພະ​ແນກ​ກະ­ສິ­ກຳ ແລະ ປ່າ­ໄມ້ ນະ­ຄອນ­ຫຼວງ​ວຽງ​ຈັນ.

    ທ່ານ ສົມ​ເຫວີຍ ທຳ​ມະ​ໂຄດ ຫົວ­ໜ້າ​ຫ້ອງ­ການ​ກະ­ສິ­ກຳ ແລະ ປ່າ­ໄມ້ ເມືອງ​ຫາດ​ຊາຍ​ຟອງ ໄດ້​ກ່າວ​ວ່າ: ໃນ​ຜ່ານ​ມາ​ເນື້ອ­ທີ່​ປົກ​ຫຸ້ມ​ປ່າ­ໄມ້​ຢູ່​ປະ­ເທດ​ເຮົາ ແມ່ນ​ຫຼຸດ​ໜ້ອຍ​ຖອຍ​ລົງ​ເຫຼືອ​ພຽງ 40% ຂອງ​ເນື້ອ­ທີ່​ທັງ​ໝົດ ຈາກ​ສະ­ພາບ​ຄື​ດັ່ງ­ກ່າວ ພັກ​ລັດ­ຖະ­ບານ​ໄດ້​ມີ​ນະ­ໂຍ­ບາຍ​ເພື່ອ​ບູ­ລະ­ນະ​ຟື້ນ​ຟູ​ປ່າ­ໄມ້ ແນ­ໃສ່​ເພີ່ມ​ເນື້ອ­ທີ່​ປົກ​ຄຸມ​ປ່າ­ໄມ້ ຮອດ​ປີ 2020 ໃຫ້​ໄດ້ 70% ຂອງ​ເນື້ອ­ທີ່​ທັງ​ໝົດ​ໃນ​ທົ່ວ​ປະ­ເທດ ດັ່ງ­ນັ້ນ ເມືອງ​ຫາດ​ຊາຍ​ຟອງ​ກໍ​ເຫັນ​ໄດ້​ຄວາມ​ສຳ­ຄັນ ແລະ ຈັດ​ຕັ້ງ​ປະ­ຕິ­ບັດ​ເພື່ອ​ຜັນ​ຂະ­ຫຍາຍ​ນະ­ໂຍ­ບາຍ​ດັ່ງ­ກ່າວ ໃຫ້​ເກີດ​ຂຶ້ນ​ເປັນ​ຈິງ ຫ້ອງ­ການ​ກະ­ສິ­ກຳ ແລະ ປ່າ­ໄມ້​ເມືອງ​ຈຶ່ງ​ໄດ້​ຂຶ້ນ​ແຜນ ເພື່ອ​ຫ້າງ​ຫາ​ກະ­ກຽມ​ຈັດ​ຕັ້ງ​ສ້າງ​ຂະ​ບວນ​ການ​ປູກ​ຕົ້ນ­ໄມ້​ປະ­ຈຳ​ປີ 2019 ມີ​ຢູ່ 2 ຈຸດ ໃນ​ນັ້ນ ຈຸດ​ທີ 1 ປູກ​ເປັນ​ຮົ່ມ ແລະ ໄມ້​ປະ­ດັບ​ຢູ່​ຕາມ​ແຄມ​ເສັ້ນ­ທາງ A11 ເຂດ​ເທ­ສະ​ບານ​ເມືອງ ກວມ​ເອົາ 5 ບ້ານ ຄວາມ​ຍາວ 5.200 ແມັດ ຈຳ­ນວນ​ເບ້ຍ​ໄມ້​ທີ່​ປູກ​ມີ 115 ຕົ້ນ ຄວາມ​ສູງ 1,5-2 ແມັດ ມີ​ຕົ້ນ​ຄູນ ຕົ້ນ​ກາ​ເລົາ ແລະ ຕົ້ນ​ດອກ​ໄມ້​ທີ່​ຊົງ​ຟຸ່ມ​ບໍ່​ສູງ​ຈຳ­ນວນ​ໜຶ່ງ ໂດຍ​ມອບ​ໃຫ້​ອົງ­ການ​ປົກ­ຄອງ​ບ້ານ ແລະ ປະ­ຊາ­ຊົນ​ເປັນ​ຜູ້​ປູກ​ຕາມ​ຈຸດ​ທີ່​ກຳ­ນົດ​ໄວ້ ຈຸດ​ທີ 2 ປູກ​ຕາມ​ແຄມ​ເສັ້ນ­ທາງ 450 ປີ ໃນ​ນີ້ ປູກ​ຕົ້ນ​ຫຳ​ງົວ​ທົດ​ແທນ​ຄືນ​ຕົ້ນ​ທີ່​ຕາຍ 31 ຕົ້ນ ສ່ວນ​ຢູ່​ກາງ​ທາງ 450 ປີ ປູກ​ຕົ້ນ​ຈຳ­ປາ​ທົດ​ແທນ​ຄືນ​ຕົ້ນ​ທີ່​ຕາຍ ແລະ ຕົ້ນ­ໄມ້​ຊະ­ນິດ​ທີ່​ບໍ່​ຂະ­ຫຍາຍ­ຕົວ 393 ຕົ້ນ ສ່ວນ​ການ​ປູກ​ໄດ້​ມອບ​ໃຫ້​ຫ້ອງ­ການ​ຕ່າງໆ​ອ້ອມ​ຂ້າງ​ເປັນ​ຜູ້​ຮັບ­ຜິດ­ຊອບ​ປູກ ແລະ ບົວ­ລະ­ບັດ​ຮັກ­ສາ ພ້ອມ​ນັ້ນ ຍັງ​ໄດ້​ປູກ​ຕົ້ນ​ດອກ​ເຈ້ຍ​ສັບ­ຫວ່າງ​ກັບ​ຕົ້ນ​ດອກ​ຈຳ­ປາ​ຕາມ­ໃຈ​ກາງ​ທາງ 450 ປີ ມີ​ຄວາມ​ຍາວ 3.000 ແມັດ ດອກ​ເຈ້ຍ​ທີ່​ນຳ​ມາ​ປູກ​ມີ 2.972 ຕົ້ນ ລວມ​ມູນ​ຄ່າ 59.420.000 ກີບ ນອກ​ນີ້ ຍັງ​ຈະ​ສືບ­ຕໍ່​ລະ­ດົມ​ປະ­ຊາ­ຊົນ ບໍ­ລິ­ສັດ ຫ້າງ​ຮ້ານ ນັກ­ທຸ­ລະ­ກິດ​ຕ່າງໆ ຮ່ວມ​ປູກ​ຕົ້ນ­ໄມ້​ໃຫ້​ໄດ້​ສອງ​ຕົ້ນ​ຕໍ່​ຄົນ​ຕໍ່​ປີ ເພື່ອ​ສ້າງ​ນະ­ຄອນ­ຫຼວງ​ວຽງ​ຈັນ​ໃຫ້​ເປັນ​ນະ­ຄອນ​ສີ­ຂຽວ ແລະ ເປັນ​ເມືອງ​ທີ່​ໜ້າ​ຢູ່.

ຂ່າວທີ່ກ່ຽວຂ້ອງ