ຂ່າວຫຼ້າສຸດ

ອະບາຍຍະມຸກ

1.727 29 ພ.ພ. 2019 ນານາສາລະ

    ຂ່າວ​ທີ່​ສັງ­ຄົມ​ອອກ​ມາ​ຊົມ­ເຊີຍ​ພາກ​ລັດ ເຊິ່ງ​ຖື​ເປັນ​ເຫດ­ການ​ສຳ­ຄັນ ກໍ​ຄື ຂ່າວ​ທາງ​ນະ­ຄອນ­ຫຼວງ ສັ່ງ​ຫ້າມ​ບໍ່​ໃຫ້​ປູກ​ກ້ວຍ​ທີ່​ໃຊ້​ເຄ​ມີ (ສານ­ພິດ) ທີ່​ເປັນ​ອັນ­ຕະ­ລາຍ​ຕໍ່​ສຸ­ຂະ­ພາບ​ຄົນ ແລະ ສັດ ຕະ­ຫຼອດ​ເຖິງ​ສິ່ງ­ແວ­ດລ້ອມ​ອ້ອມ​ຂ້າງ ແລະ ອີກ​ຂ່າວ​ໜຶ່ງ ກໍ​ແມ່ນ​ຂ່າວ​ທາງ​ກະ­ຊວງ​ຖະ­ແຫຼງ​ຂ່າວ ວັດ­ທະ­ນະ­ທຳ-ທ່ອງ​ທ່ຽວ ອອກ​ແຈ້ງ​ການ ເລກ​ທີ 196(4-2012) ເລື່ອງ​ການ​ຢຸດ​ການ​ຜະ­ລິດ​ສື່​ໂຄ­ສະ­ນາ ແລະ ໂຄ­ສະ­ນາ​ເຄື່ອງ​ດື່ມ​ທີ່​ມີ​ທາດ​ເຫຼົ້າ​ທຸກ​ປະ­ເພດ.

    ສິ່ງ​ໃດ​ກໍ​ຕາມ ຖ້າ­ວ່າ​ມີ​ເງື່ອນ­ໄຂ​ປັດ​ໄຈ​ຂອງ​ອົງ​ການ­ຈັດ­ຕັ້ງ​ທີ່​ຄອຍ​ດຶງ​ຖ່ວງ​ຄົນ ບໍ່​ໃຫ້​ໄຫຼ​ລົງ​ເຫວ​ແຫ່ງ​ຄວາມ​ເສື່ອມ​ຂອງ​ຊີ­ວິດ ຖື​ໄດ້​ວ່າ​ສັງ­ຄົມ​ນັ້ນ​ຍັງ​ບໍ່​ຂາດ​ຄວາມ​ສົມ​ດູນ ເຊິ່ງ​ກໍ­ລະ­ນີ​ຕົວ­ຢ່າງ ກໍ​ຄື ແຈ້ງ​ການ​ຂ້າງ​ເທິງ​ນັ້ນ ເພື່ອ​ເຕືອນ​ໃຫ້​ຄົນ​ໃນ​ສັງ­ຄົມ​ໄດ້​ມີ​ສະ­ຕິ ບໍ່​ຈົມ​ດັ່ງ​ໃນ​ໂລກ​ຂອງ​ອະ­ບາຍ​ຍະ​ມຸກ ຈົນ​ໂງ​ຄໍ​ບໍ່​ຂຶ້ນ ເຊິ່ງ​ພະ­ພຸດ­ທະ­ເຈົ້າ​ໄດ້​ສອນ​ໄວ້​ວ່າ: ອະ­ບາຍ​ຍະ​ມຸກ​ຄື​ທາງ​ແຫ່ງ​ຄວາມ​ເສື່ອມ ມີ 6 ປະ­ການ ທີ່​ຄົນ​ເຮົາ​ຄວນ​ຫຼີກ­ເວັ້ນ ຄື: (1) ຕິດ​ສຸ­ລາ ແລະ ຂອງ​ມຶນ­ເມົາ (2) ທ່ຽວ​ກາງ­ຄືນ (3) ຕິດ​ການ​ທ່ຽວ​ຫຼິ້ນ​ບໍ່​ຮູ້­ຈັກ​ໃຊ້​ເວ­ລາ​ໃຫ້​ເກີດ​ປະ­ໂຫຍດ (4) ຕິດ​ການ​ພະ­ນັນ ຄື: ຫຼິ້ນ​ໄພ້ ຫຼິ້ນ​ລົງ​ບານ (5) ຄົບ​ຄົນ​ຊົ່ວ​ເປັນ​ມິດ (6) ຂີ້­ຄ້ານ​ເຮັດ​ວຽກ.

    ອະ­ບາຍ​ຍະ​ມຸກ 6 ປະ­ການ​ຂ້າງ​ເທິງ​ນັ້ນ ແຕ່​ລະ​ຂໍ້​ມີ​ໂທດ​ຕ່າງ​ກັນ ເຊິ່ງ​ທັງ 6 ຂໍ້ ຖ້າ​ໃຜ​ຫາກ​ຫຼົງ­ໄຫຼ​ຫຼິ້ນ​ກິນ​ຟຸມ​ເຟືອຍ ຕິດ​ການ​ພະ­ນັນ ກໍ​ເປັນ​ທາງ​ນຳ​ມາ​ເຊິ່ງ​ຄວາມ​ເສື່ອມ​ເສຍ​ກຽດ­ຕິ­ຍົດ ແລະ ສັກ​ສີ ຫຼື ເຮັດ​ໃຫ້​ສຸ­ຂະ­ພາບ​ຊຸດ­ໂຊມ ເກີດ​ພະ­ຍາດ​ບຽດ­ບຽນ​ຢ່າງ​ບໍ່​ຕ້ອງ​ສົງ­ໄສ ສັງ­ຄົມ​ໃດ​ກໍ​ຕາມ ຖ້າ​ບໍ່​ສົ່ງ­ເສີມ​ສິ່ງ​ມຶນ­ເມົາ ຫຼື ເຄື່ອງ​ຫຼິ້ນ​ການ​ພະ­ນັນ​ເກີນ​ໄປ ແຕ່​ກັບ​ມາ​ສົ່ງ­ເສີມ​ການ​ສຶກ​ສາ-ວັດ­ທະ­ນະ­ທຳ ຈະ​ເຮັດ​ໃຫ້​ຄົນ​ໃນ​ສັງ­ຄົມ​ເກີດ​ເປັນ​ສັງ­ຄົມ​ແຫ່ງ​ການ​ສຶກ​ສາ ແລະ ຄົນ​ໃນ​ສັງ­ຄົມ​ກໍ​ຮູ້­ຈັກ​ຮີດ­ຄອງ-ວັດ­ທະ­ນະ­ທຳ​ຂອງ​ຕົນ

    ສົ່ງ­ເສີມ​ການ​ສຶກ​ສາ ໝາຍ​ຄວາມ​ວ່າ ສົ່ງ­ເສີມ​ຄູ-ອາ­ຈານ ນັກ­ວິ­ຊາ­ການ ນັກ​ຂີດ​ຂຽນ ໂຮງ­ພິມ​ຕ່າງໆ ເພື່ອ​ຜະ­ລິດ­ຜົນ​ງານ ການ​ຄົ້ນ­ຄວ້າ ຂີດ​ຂຽນ​ໃຫ້​ອອກ​ມາ​ເປັນ​ໜັງ­ສື ຫຼື ຕຳ­ລາ​ໃຫ້​ສະ​ຖາ​ບັນ​ການ​ສຶກ​ສາ​ໄດ້​ກ້າວ­ໜ້າ ເຊິ່ງ​ເປັນ​ທາງ​ໜຶ່ງ​ນຳ​ມາ​ເຊິ່ງ​ສັງ­ຄົມ​ແຫ່ງ​ການ​ຮຽນ​ຮູ້ ດັ່ງ​ທີ່​ໄດ້​ອອກ​ນະ­ໂຍ­ບາຍ​ແລ້ວ ສົ່ງ­ເສີມ​ວັດ­ທະ­ນະ­ທຳ ກໍ​ຄື ການ​ສືບ​ສານ​ຮັກ­ສາ​ໃຫ້​ຕໍ່​ເນື່ອງ ບໍ່​ໃຫ້​ຄົນ​ເຮົາ​ລືມ​ຮາກ​ເຫງົ້າ​ຂອງ​ຕົນ​ເອງ.

    ສັງ​ລວມ​ໄດ້​ວ່າ ມາດ​ຕະ­ການ​ໃດ​ກໍ​ຕາມ ທີ່​ເປັນ​ໄປ​ເພື່ອ​ປະ­ໂຫຍດ​ຂອງ​ສັງ­ຄົມ ແລະ ຄວາມ­ສຸກ ຖື​ໄດ້​ວ່າ​ເປັນ​ການ​ສ້າງ​ຄວາມ­ສຸກ​ໃຫ້​ຄົນ​ໃນ​ຊາດ !

ດັ້ນ​ກີບ​ເມກ

ຂ່າວທີ່ກ່ຽວຂ້ອງ