ໄດ້ແລ້ວ 23 ນັກເຕະທີມຊາດລາວ ຊຸດໃຫຍ່ ກຽມເຂົ້າຮ່ວມ 2 ລາຍການໃຫຍ່

851 29 ພ.ພ. 2019 ວົງຈອນກີລາ
ໄດ້ແລ້ວ 23 ນັກເຕະທີມຊາດລາວ ຊຸດໃຫຍ່ ກຽມເຂົ້າຮ່ວມ 2 ລາຍການໃຫຍ່

    ຂໍ້​ມູນ​ຈາກ​ສະ­ຫະ­ພັນ​ກີ­ລາ​ບານ­ເຕະ​ແຫ່ງ​ຊາດ​ລາວ ໃຫ້​ຊາບ​ເມື່ອ​ບໍ່​ດົນ​ມາ​ນີ້​ວ່າ: ທ່ານ Sundram Moorthy ຄູ​ເຝິກ​ໃຫຍ່​ທີມ​ຊາດ​ລາວ ຊາວ​ສິງ­ກະ­ໂປ ຕັດ­ສິນ​ໃຈ​ຄັດ​ເລືອກ​ນັກ​ເຕະ​ທີ່​ດີ​ທີ່​ສຸດ​ແລ້ວ 23 ຄົນ ເພື່ອ​ກຽມ​ເຂົ້າ​ຮ່ວມ​ການ​ແຂ່ງ­ຂັນ 2 ລາຍ­ການ​ໃຫຍ່ ຄື: ແຂ່ງ­ຂັນ​ບານ​ໂລກ 2022 ຢູ່​ປະ­ເທດ​ກາ​ຕາ ຮອບ​ຄັດ​ເລືອກ ຮອບ​ທຳ​ອິດ ແລະ ແຂ່ງ­ຂັນ​ບານ­ເຕະ​ຊີງ​ແຊັມ​ອາ­ຊີ 2023 ຮອບ​ຄັດ​ເລືອກ ຮອບ​ທຳ​ອິດ ທີ່​ຈະ​ຈັດ​ຂຶ້ນ​ກາງ​ປີ​ນີ້.

    ຕຳ­ແໜ່ງ​ຜູ້​ຮັກ­ສາ​ປະ­ຕູ ມີ ອຸດ​ທິ​ລັດ ນາມ​ມະ​ໂຄດ (ລາວ​ໂຕ​ໂຢ​ຕ້າ) ໄຊ​ສະ­ຫວາດ ສຸ­ວັນ­ນະ​ໂຊກ ແລະ ສໍ​ລະ​ສັກ ທິ​ລະ​ວົງ (ຊ້າງ​ນ້ອຍ) ກອງ​ຫຼັງ​ມີ ຄູນ​ສົມ­ບັດ ພົມ​ມະ​ໄຊ ທິນ­ນະ­ກອນ ວົງ­ສາ (ປກສ) ທິບ​ພະ­ຈັນ ອິນ​ທະ​ວົງ (ລາວ​ໂຕ​ໂຢ​ຕ້າ) ສອນ​ວິ­ໄລ ສີ​ຫາ​ວົງ ກ້າ­ຫານ ເພັດ​ສີ­ວິ­ໄລ ກິດ​ຕິ​ສັກ ພົມ​ວົງ­ສາ ແລະ ວັນ­ນາ​ບຸນ ຫຼໍ່​ວົງ­ສາ (ຊ້າງ​ນ້ອຍ) ກອງ​ກາງ​ມີ ພຸດ​ທະ​ໄຊ ໂຄ​ຈະ­ເລີນ (ນະ­ຄອນ​ປະ­ຖົມ ຢູ​ໄນ​ເຕັດ ໄທ​ລີກ 3) ມະ­ໂນ​ລົມ ເພັດ​ພັກ­ດີ ພຸດ​ດາ​ວີ ພົມ​ມະ​ສານ (ລາວ​ໂຕ​ໂຢ​ຕ້າ) ສີ​ສະ­ຫວາດ ດາ­ລາ​ວົງ ພູ­ທອນ ອິນ​ນະ​ໄລ (ກອງ­ທັບ) ຄິດ​ສາ­ຄອນ ຈຳ​ປາ­ທອງ (ປກສ) ສົມ​ລິດ ແສງ​ວັນ­ນີ ກຽງ​ທະ­ວີ​ສັກ ໄຊ­ຊະ­ນະ​ປັນ­ຍາ ຈັນ­ທະ​ຈອນ ທິ​ໂນ​ລາດ ແລະ ລັດ​ທະ​ໄຊ ລຸນ​ລາ­ສີ (ຊ້າງ​ນ້ອຍ) ກອງ​ໜ້າ​ມີ ບຸນ​ພະ­ຈັນ ບຸນ​ກອງ ສົມ​ໄຊ​ແກ້ວ ຫາ​ນາມ ແລະ ວັນ­ນະ​ສອນ ດວງ​ໄມ­ຕີ (ຊ້າງ​ນ້ອຍ) ພ້ອມ​ນີ້​ທີມ​ຊາດ​ລາວ ຍັງ​ຈະ​ອຸ່ນ​ເຄື່ອງ 2 ນັດ ພົບ​ກັບ​ທີມ​ຊາດ​ສີ​ລັງ­ກາ ວັນ​ທີ 28 ພຶດ­ສະ­ພາ ແລະ 31 ພຶດ­ສະ­ພາ 2019 ຢູ່​ສະ­ໜາມ​ກີ­ລາ​ແຫ່ງ​ຊາດ.

    ການ​ແຂ່ງ­ຂັນ​ບານ​ໂລກ 2022 ແລະ ບານ­ເຕະ​ຊີງ​ແຊັມ​ອາ­ຊີ 2023 ທີມ​ຊາດ​ລາວ ຈະ​ພົບ​ກັບ ທີມ​ຊາດ​ບັງ​ກະ­ລາ​ເທດ ໂດຍ​ແຂ່ງ­ຂັນ​ກັນ 2 ນັດ ເພື່ອ​ຕັດ­ສິນ ເຊິ່ງ​ນັດ​ທີ 1 ຈະ​ແຂ່ງ­ຂັນ​ວັນ​ທີ 6 ມິ­ຖຸ­ນາ 2019 ເວ­ລາ 18:30 ໂມງ ຢູ່​ສະ­ໜາມ​ກີ­ລາ​ແຫ່ງ​ຊາດ ນັດ​ທີ 2 ຈະ​ແຂ່ງ­ຂັນ​ວັນ​ທີ 11 ມິ­ຖຸ­ນາ 2019 ເວ­ລາ 19:00 ໂມງ ຢູ່​ສະ­ໜາມ Bangabandhu National Stadium ປະ­ເທດ​ບັງ​ກະ­ລາ​ເທດ ສ່ວນ​ຜົນ​ການ​ຄັດ​ເລືອກ​ຄູ່​ອື່ນ​ໃນ​ຮອບ​ດັ່ງ­ກ່າວ ມີ ມົງ​ໂກ​ລີ ພົບ ບຣູ​ໄນ ມາ​ເກົາ ພົບ ສີ​ລັງ­ກາ ມາ​ເລ​ເຊຍ ພົບ ຕີ​ມໍ​ເລ​ສ​ເຕ ກຳ­ປູ­ເຈຍ ພົບ ປາ​ກິດ​ສະ­ຖານ ແລະ ບູ​ຖານ ພົບ ກວມ.

ຂ່າວທີ່ກ່ຽວຂ້ອງ