ເຊື່ອມຕໍ່ຜູ້ຮ່ວມການຜະລິດ ແລະ ບໍລິໂພກຜະລິດຕະພັນໝາກໄມ້

754 28 ພ.ພ. 2019 ຂ່າວໜ້າ​ໜຶ່ງ
ເຊື່ອມຕໍ່ຜູ້ຮ່ວມການຜະລິດ ແລະ ບໍລິໂພກຜະລິດຕະພັນໝາກໄມ້

    ເພື່ອ​ປະ­ກອບ­ສ່ວນ​ສົ່ງ­ເສີມ ແລະ ຊຸກ­ຍູ້​ໃຫ້​ປະ­ຊາ­ຊົນ​ບັນ­ດາ­ເຜົ່າ​ຢູ່​ແຂວງ​ຫົວ­ພັນ ເວົ້າ​ສະ­ເພາະ​ປະ­ຊາ­ຊົນ​ເມືອງ​ຊຽງ​ຄໍ້ ເມືອງ​ສົບ​ເບົາ ແລະ ເມືອງ​ວຽງ​ໄຊ ເຂົ້າ​ຮ່ວມ​ຂະ​ບວນ​ການ​ສ້າງ​ຄອບ­ຄົວ ແລະ ບ້ານ​ສາ­ມັກ­ຄີ​ປອງ​ດອງ ຕິດ​ພັນ​ກັບ​ການ​ແກ້​ໄຂ​ຄວາມ­ທຸກ​ຍາກ ເຮັດ​ໃຫ້​ປະ­ຊາ­ຊົນ​ຫຼຸດ​ພົ້ນ​ຈາກ​ຄວາມ​ດ້ອຍ​ພັດ­ທະ­ນາ​ເທື່ອ​ລະ​ກ້າວ ວັນ​ທີ 26 ພຶດ­ສະ­ພາ 2019 ໄດ້​ມີ​ພິ­ທີ​ລົງ​ນາມ​ສັນ­ຍາ​ໂຄງ­ການ “ເຊື່ອມ​ຕໍ່​ຜູ້​ຮ່ວມ​ການ​ຜະ­ລິດ ແລະ ບໍ­ລິ­ໂພກ​ຜະ­ລິດ​ຕະ​ພັນ​ໝາກ​ໄມ້” ຂຶ້ນ ລະ­ຫວ່າງ​ທ່ານ​ນາງ ແສງ​ດາວ ບຸ​ພະ​ກອນ​ຄຳ ປະ­ທານ​ສະ­ພາ​ບໍ­ລິ­ຫານ​ບໍ­ລິ­ສັດ ໄພ­ບູນ​ການ​ຄ້າ​ຂາ​ອອກ-ຂາ​ເຂົ້າ ຈຳ­ກັດ ທ່ານ ສີ­ວິ­ໄລ ພົມ​ມະ​ຈັກ ຮັກ­ສາ​ການ​ຜູ້­ອຳ­ນວຍ­ການ ກຸ່ມ​ບໍ­ລິ­ສັດ ພົງ​ສະ­ຫວັນ ຈຳ­ກັດ ແລະ ທ່ານ ຫງວຽນ ຫງັອກ ຢຸ້ງ ປະ­ທານ​ສະ­ພາ​ບໍ­ລິ­ຫານ ຜູ້­ອຳ­ນວຍ­ການ​ສະ­ຫະ­ກອນ​ຫງັອກ​ລານ ສສ ຫວຽດ­ນາມ ໂດຍ​ມີ​ທ່ານ ໄຊ​ສົມ​ພອນ ພົມ­ວິ­ຫານ ປະ­ທານ​ສູນ​ກາງ​ແນວ​ລາວ​ສ້າງ​ຊາດ ທ່ານ​ເອກ​ອັກ​ຄະ​ລັດ​ຖະ​ທູດ ສສ ຫວຽດ­ນາມ ປະ­ຈຳ ສປປ ລາວ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ຈຸດ­ປະ­ສົງ​ເພື່ອ​ການ​ຊື້-ຂາຍ ແລະ ນຳ​ເຂົ້າ​ປະ­ເພດ​ພືດ​ກະ­ສິ­ກຳ​ຕົ້ນ­ໄມ້​ກິນ​ໝາກ​ຈາກ​ແຂວງ​ເຊີນ​ລາ ສສ ຫວຽດ­ນາມ ມາ​ໃຫ້​ປະ­ຊາ­ຊົນ​ປູກ​ຢູ່​ເມືອງ​ຊຽງ​ຄໍ້ ເມືອງ​ສົບ​ເບົາ ແລະ ເມືອງ​ວຽງ​ໄຊ​ແຂວງ​ຫົວ­ພັນ ໂດຍ​ສະ­ຫະ­ກອນ​ຫງັອກ​ລານ ເປັນ​ຜູ້​ສະ­ໜອງ​ແນວ​ພັນ ໃຫ້​ບໍ­ລິ­ສັດ ໄພ­ບູນ​ການ​ຄ້າ​ຂາ​ອອກ-ຂາ​ເຂົ້າ ຈຳ­ກັດ ໂດຍ​ການ​ຂົນ­ສົ່ງ​ຕົ້ນ­ໄມ້​ດັ່ງ­ກ່າວ ຮອດ​ສະ­ຖານ­ທີ່​ປູກ ແລະ ເປັນ​ຜູ້​ຮັບ​ຊື້​ຜົນ​ຜະ­ລິດ​ຄືນ ສຳ­ລັບ​ແນວ​ພັນ​ຕົ້ນ­ໄມ້​ມີ 100.000 ຕົ້ນ ໃນ​ນີ້​ຕົ້ນ​ໝາກ­ມ່ວງ ແລະ ໝາກ​ລຳ­ໄຍ ຢ່າງ​ລະ 30.000 ຕົ້ນ ແລະ ຕົ້ນ​ໝາກ­ພຸກ 40.000 ຕົ້ນ ສ່ວນ​ເຊິ່ງ​ສະ­ຫະ­ກອນ​ຫງັອກ​ລານ ເປັນ​ຜູ້​ຖ່າຍ​ທອດ​ຄວາມ​ຮູ້​ດ້ານ​ເຕັກ­ນິກ ວິ­ຊາ​ການ ເຝິກ­ອົບ­ຮົມ​ໃຫ້​ປະ­ຊາ­ຊົນ​ເລີ່ມ​ແຕ່​ຂັ້ນ​ຕອນ​ປູກ ປົກ​ປັກ​ຮັກ­ສາ ຈົນ​ເຖິງ​ເວ­ລາ​ເກັບ​ໝາກ ແລະ ຮັບ​ຊື້​ຜົນ​ຜະ­ລິດ​ຈາກ​ປະ­ຊາ­ຊົນ.

    ໂຄງ­ການ​ນີ້ ຈະ​ຊ່ວຍ​ແກ້​ໄຂ​ຊີ­ວິດ​ການ​ເປັນ​ຢູ່​ຂອງ​ປະ­ຊາ­ຊົນ​ບັນ­ດາ­ເຜົ່າ​ຢູ່​ເມືອງ​ເປົ້າ​ໝາຍ ທັງ​ເປັນ​ການ​ພັດ­ທະ­ນາ​ຊີ­ວິດ​ການ​ເປັນ​ຢູ່​ຂອງ​ປະ­ຊາ­ຊົນ ໃຫ້​ຫຼຸດ​ພົ້ນ​ອອກ​ຈາກ​ຄວາມ­ທຸກ​ຍາກ​ເທື່ອ​ລະ​ກ້າວ ນອກ​ນີ້​ຍັງ​ເປັນ​ການ​ເສີມ​ຂະ­ຫຍາຍ​ສາຍ​ພົວ­ພັນ​ມິດ­ຕະ­ພາບ ແລະ ການ​ຮ່ວມ​ມື​ຮອບ­ດ້ານ ລະ­ຫວ່າງ​ສອງ​ພັກ ສອງ​ລັດ ແລະ ປະ­ຊາ­ຊົນ​ສອງ​ຊາດ ລາວ-ຫວຽດ­ນາມ ຫວຽດ­ນາມ-ລາວ ໃຫ້​ມີ​ບາດ­ກ້າວ​ໃໝ່​ໃຫຍ່​ຂຶ້ນ​ເລື້ອຍໆ.

ຂ່າວທີ່ກ່ຽວຂ້ອງ