ຂ່າວຫຼ້າສຸດ

ຍົກສູງຄວາມສາມາດໃຫ້ພະນັກງານນຳທ່ຽວທົ່ວປະເທດ

659 28 ພ.ພ. 2019 ຂ່າວໜ້າ​ໜຶ່ງ
ຍົກສູງຄວາມສາມາດໃຫ້ພະນັກງານນຳທ່ຽວທົ່ວປະເທດ

    ສະ​ຖາ​ບັນ​ສື່​ມວນ​ຊົນ ວັດ­ທະ­ນະ­ທຳ ແລະ ທ່ອງ​ທ່ຽວ ກະ­ຊວງ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ (ຖວ​ທ) ໄຂ​ຊຸດ​ເຝິກ­ອົບ­ຮົມ​ພະ­ນັກ­ງານ​ນຳ​ທ່ຽວ​ໃນ​ຂອບ​ເຂດ​ທົ່ວ​ປະ­ເທດ ຄັ້ງ​ທີ 26 ຂຶ້ນ​ວັນ​ທີ 27 ພຶດ­ສະ­ພາ-9 ສິງ­ຫາ 2019 ຢູ່​ສະ​ຖາ​ບັນ​ດັ່ງ­ກ່າວ ໂດຍ​ມີ​ທ່ານ ບົວ​ເງິນ ຊາ​ພູ​ວົງ ຮອງ​ລັດ­ຖະ­ມົນ­ຕີ​ກະ­ຊວງ ຖວ​ທ ທ່ານ​ຫົວ­ໜ້າ​ສະ​ຖາ​ບັນ​ສື່​ມວນ​ຊົນ ວັດ­ທະ­ນະ­ທຳ ແລະ ທ່ອງ​ທ່ຽວ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ ແລະ ສຳ​ມະ​ນາ​ກອນ​ຈາກ​ທົ່ວ​ປະ­ເທດ​ເຂົ້າ​ຮ່ວມ.

    ທ່ານ​ນາງ ດາ­ລາ​ນີ ພົມ​ມະ​ວົງ­ສາ ຮອງ​ຫົວ­ໜ້າ​ສະ​ຖາ​ບັນ​ສື່​ມວນ​ຊົນ ວັດ­ທະ­ນະ­ທຳ ແລະ ທ່ອງ​ທ່ຽວ ກ່າວ​ວ່າ: 25 ຄັ້ງ​ຜ່ານ​ມາ ມີ​ຜູ້​ສຳ­ເລັດ​ຫຼັກ­ສູດ​ເຝິກ­ອົບ­ຮົມ​ພະ­ນັກ­ງານ​ນຳ​ທ່ຽວ​ແລ້ວ 1.300 ກວ່າ​ຄົນ ມາ​ຮອດ​ປີ 2013 ໄດ້​ຈັດ​ຕັ້ງ​ທົດ​ລອງ​ປະ­ຕິ­ບັດ​ນະ­ໂຍ­ບາຍ 3 ສ້າງ ຫຼັກ­ສູດ​ດັ່ງ­ກ່າວ ໄດ້​ມອບ​ໃຫ້​ບັນ­ດາ​ແຂວງ​ນຳ­ໄປ​ຈັດ​ຕັ້ງ​ປະ­ຕິ­ບັດ ເຊິ່ງ​ມີ 3 ແຂວງ ຄື: ຫຼວງ​ພະ​ບາງ ຈຳ­ປາ​ສັກ ແລະ ນະ­ຄອນ­ຫຼວງ​ວຽງ​ຈັນ ໄລ­ຍະ​ປີ 2014-2018 ສະ​ຖາ​ບັນ​ສື່​ມວນ​ຊົນ ວັດ­ທະ­ນະ­ທຳ ແລະ ທ່ອງ​ທ່ຽວ ໄດ້​ສົມ­ທົບ​ກັບ​ພາກ­ສ່ວນ​ກ່ຽວ­ຂ້ອງ ສຸ່ມ​ໃສ່​ປັບ­ປຸງ​ຫຼັກ­ສູດ​ໃຫ້​ໄດ້​ມາດ­ຕະ­ຖານ ສອດ­ຄ່ອງ​ກັບ​ມາດ­ຕະ­ຖານ​ອາ​ຊຽນ ມາ​ຮອດ​ປີ 2018 ຫຼັກ­ສູດ​ສະ­ບັບ​ປັບ­ປຸງ​ໄດ້​ສຳ­ເລັດ ແລະ ໄດ້​ຮັບ​ການ​ອະ­ນຸ­ມັດ​ໃຫ້​ຈັດ​ຕັ້ງ​ປະ­ຕິ­ບັດ ຈາກ​ລັດ­ຖະ­ມົນ­ຕີ​ກະ­ຊວງ ຖວ​ທ ຈັດ­ການ​ໄຂ​ຊຸດ​ອົບ­ຮົມ ຄັ້ງ​ທີ 26 ຂຶ້ນ.

    ສຳ​ມະ​ນາ​ກອນ​ເຂົ້າ​ຮ່ວມ​ເຝິກ­ອົບ­ຮົມ​ຄັ້ງ​ນີ້​ມີ 64 ຄົນ ທີ່​ຜ່ານ​ການ​ຄັດ​ເລືອກ​ຈາກ 108 ຄົນ ທີ່​ໄດ້​ສົ່ງ​ຄຳ​ຮ້ອງ​ຂໍ​ເຂົ້າ​ຮ່ວມ​ເຝິກ­ອົບ­ຮົມ ເຊິ່ງ​ຈະ​ໄດ້​ລົງ​ເລິກ​ພາກ​ຄວາມ​ຮູ້​ທົ່ວ​ໄປ 6 ບົດ ພາກ​ຄວາມ​ຮູ້​ພື້ນ­ຖານ 5 ບົດ ແລະ ພາກ​ຄວາມ​ຮູ້​ສະ­ເພາະ​ອາ­ຊີບ 13 ບົດ ລວມ 24 ວິ­ຊາ ເພື່ອ​ສ້າງ​ພະ­ນັກ­ງານ​ນຳ​ທ່ຽວ​ໃຫ້​ມີ​ຄວາມ​ຮູ້-ຄວາມ​ສາ­ມາດ​ໄດ້​ມາດ­ຕະ­ຖານ​ລະ­ດັບ​ສາ­ກົນ ໃນ​ນີ້ ຈະ​ໃຊ້​ເວ­ລາ​ເຝິກ­ອົບ­ຮົມ 55 ວັນ.

    ທ່ານ ບົວ​ເງິນ ຊາ​ພູ​ວົງ ກ່າວ​ວ່າ: ໄລ­ຍະ​ຜ່ານ​ມາ ພັກ-ລັດ­ຖະ­ບານ ຍາມ​ໃດ​ກໍ​ໃຫ້​ຄວາມ​ເປັນ​ຫວ່ງ​ເປັນ​ໄຍ​ຕໍ່​ການ​ສ້າງ ແລະ ປັບ­ປຸງ​ຄຸນ​ນະ​ພາບ​ຂອງ​ພະ­ນັກ­ງານ​ນຳ​ທ່ຽວ ດ້ວຍ​ຫຼາຍ​ຮູບ​ແບບ ໃນ​ນີ້ ມີ​ການ​ສ້າງ ແລະ ປັບ­ປຸງ​ຫຼັກ­ສູດ​ການ​ເຝິກ­ອົບ­ຮົມ ຈັດ​ຕັ້ງ​ອົບ­ຮົມ​ພະ­ນັກ­ງານ​ນຳ​ທ່ຽວ​ລະ­ດັບ​ຊາດ ລະ­ດັບ​ແຂວງ ແລະ ລະ­ດັບ​ພື້ນ​ທີ່​ສະ­ເພາະ ຢັ້ງ­ຢືນ ແລະ ອອກ​ບັດ​ນຳ​ທ່ຽວ ອອກ​ນິ­ຕິ​ກຳ​ຕ່າງໆ​ທີ່​ກ່ຽວ­ຂ້ອງ ເພື່ອ​ປົກ​ປ້ອງ ແລະ ຄຸ້ມ​ຄອງ​ພະ­ນັກ­ງານ​ນຳ​ທ່ຽວ ເພື່ອ​ພັດ­ທະ­ນາ​ຕົນ​ເອງ ກ້າວ​ຂຶ້ນ​ມາ​ເປັນ​ຜູ້​ປະ­ກອບ​ການ​ທຸ­ລະ​ກິດ ທີ່​ມີ​ຄວາມ​ເຂັ້ມ­ແຂງ​ປະ­ກອບ­ສ່ວນ​ໃນ​ການ​ສ້າງ­ສາ​ພັດ­ທະ­ນາ​ປະ­ເທດ​ຊາດ.

ຂ່າວທີ່ກ່ຽວຂ້ອງ