ພະແນກວິທະຍາສາດ ທຳລາຍສິນຄ້າປອມແປງຮຽນແບບ

507 28 ພ.ພ. 2019 ຂ່າວໜ້າ​ໜຶ່ງ
ພະແນກວິທະຍາສາດ ທຳລາຍສິນຄ້າປອມແປງຮຽນແບບ

    ພະ​ແນກ​ວິ­ທະ­ຍາ­ສາດ ແລະ ເຕັກ​ໂນ​ໂລ​ຊີ ນະ­ຄອນ­ຫຼວງ​ວຽງ​ຈັນ (ນວ) ຈັດ​ພິ­ທີ​ທຳ­ລາຍ​ສິນ­ຄ້າ​ປອມ​ແປງ ຮຽນ​ແບບ ແລະ ຜິດ​ເຄື່ອງ­ໝາຍ​ການ​ຄ້າ ຂຶ້ນ​ວັນ​ທີ 24 ພຶດ­ສະ­ພາ 2019 ຢູ່​ພະ​ແນກ​ດັ່ງ­ກ່າວ ໂດຍ​ມີ​ທ່ານ ສີ​ຫຸນ ສິດ­ທິ​ລື​ໄຊ ຮອງ​ເຈົ້າ​ຄອງ ນວ ທ່ານ ທະ­ວີ​ໄຊ ເໝົາ​ຊົມ​ພູ ຫົວ­ໜ້າ​ພະ​ແນກ​ວິ­ທະ­ຍາ­ສາດ ແລະ ເຕັກ​ໂນ​ໂລ​ຊີ ນວ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ທະ­ວີ​ໄຊ ເໝົາ​ຊົມ​ພູ ກ່າວ​ວ່າ: ໂດຍ​ປະ­ຕິ­ບັດ​ຕາມ​ກົດ­ໝາຍ​ວ່າ​ດ້ວຍ​ຊັບ​ສິນ​ທາງ​ປັນ­ຍາ (ສະ­ບັບ​ປັບ­ປຸງ) ມາດ­ຕາ​ທີ 58 63 121 124 ແລະ 125 ພະ​ແນກ​ວິ­ທະ­ຍາ­ສາດ ແລະ ເຕັກ​ໂນ​ໂລ​ຊີ ນວ ກໍ​ຄື ຄະ­ນະ​ກຳ­ມະ­ການ​ຄຸ້ມ​ຄອງ​ຕິດ­ຕາມ-ກວດ­ກາ​ວຽກ​ງານ​ຊັບ​ສິນ​ທາງ​ປັນ­ຍາ ໄດ້​ເອົາ­ໃຈ­ໃສ່​ເຄື່ອນ​ໄຫວ​ຕິດ­ຕາມ​ກວດ­ກາ ແລະ ຢືດ​ສິນ­ຄ້າ​ທີ່​ຮຽນ​ແບບ​ເຄື່ອງ­ໝາຍ​ການ​ຄ້າ​ຕາມ​ຄຳ​ຮ້ອງ​ຟ້ອງ​ຂອງ​ເຈົ້າ​ຂອງ​ເຄື່ອງ­ໝາຍ​ການ​ຄ້າ ປະ­ຈຳ​ສົກ​ປີ 2017-2018 ເຊິ່ງ​ໄດ້​ຈັດ​ຕັ້ງ​ປະ­ຕິ­ບັດ​ຕາມ​ສູນ​ການ​ຄ້າ ຫ້າງ​ຮ້ານ ແລະ ຕະ­ຫຼາດ​ຕ່າງໆ​ພາຍ​ໃນ ນວ ແນ­ໃສ່​ເພື່ອ​ຮັບ­ປະ­ກັນ ແລະ ປົກ​ປ້ອງ​ຜົນ​ປະ­ໂຫຍດ​ອັນ​ຊອບ​ທຳ​ຂອງ​ເຈົ້າ​ຂອງ​ຊັບ​ສິນ​ທາງ​ປັນ­ຍາ​ໃຫ້​ຫຼາຍ​ຂຶ້ນ ຜ່ານ​ການ­ຈັດ­ຕັ້ງ​ປະ­ຕິ­ບັດ​ຕົວ​ຈິງ​ສາ­ມາດ​ພົບ​ເຫັນ​ສິນ­ຄ້າ​ຮຽນ​ແບບ​ເຄື່ອງ­ໝາຍ​ການ​ຄ້າ​ທີ່​ລະ­ເມີດ ແລະ ຜິດ​ລະ­ບຽບ ເພື່ອ​ນຳ­ໄປ​ທຳ­ລາຍ​ເຊັ່ນ: ສິນ­ຄ້າ​ປະ­ເພດ​ຍີ່­ຫໍ້​ຊຳ​ຊຸງ ມີ ພາວ​ເວີ້​ແບ້ງ 286 ອັນ ສາຍ​ສາກ​ໂທລະ­ສັບ 80 ອັນ ຊຸດ​ຫູ​ຟັງ 30 ອັນ ບູ​ທູດ 29 ອັນ ເຄດ​ໂທລະ­ສັບ​ມື​ຖື 71 ອັນ ແບັດ​ເຕີ​ລີ 1.051 ອັນ ຫົວ​ປັກ​ສຽບ 109 ອັນ ໂທລະ­ພາບ 10 ເຄື່ອງ.

    ນອກ​ນີ້ ຍັງ​ມີ​ສິນ­ຄ້າ​ປະ­ເພດ​ກະ­ເປົາ​ລອງ​ແຊັມ 37 ໜ່ວຍ ແປ້ງ​ນົວ​ກາ​ຈອງ 20 ຖົງ ແລະ ຊິງ​ຊັ່ງ​ທີ່​ບໍ່​ໄດ້​ມາດ­ຕະ­ຖານ 28 ໜ່ວຍ ລວມ​ມູນ​ຄ່າ 62 ລ້ານ​ກວ່າ​ກີບ.

ຂ່າວທີ່ກ່ຽວຂ້ອງ