ສຳເລັດການເຝິກອົບຮົມການຍົກລະດັບຄວາມຮູ້

419 28 ພ.ພ. 2019 ຂ່າວໜ້າ​ໜຶ່ງ
ສຳເລັດການເຝິກອົບຮົມການຍົກລະດັບຄວາມຮູ້

    ພິ­ທີ​ປິດ​ຊຸດ​ເຝິກ­ອົບ­ຮົມ​ໄລ­ຍະ​ສັ້ນ ພາຍ​ໃຕ້​ຫົວ­ຂໍ້: ການ​ບໍ­ລິ­ການ​ທາງ​ການ​ແພດ​ໃຫ້​ແກ່​ທ່ານ​ໜໍ​ແຂວງ​ບໍ​ລິ​ຄຳ​ໄຊ ຈັດ​ຂຶ້ນ​ວັນ​ທີ 24 ພຶດ­ສະ­ພາ 2019 ທີ່​ໂຮງ­ໝໍ​ມະ­ໂຫ­ສົດ ນະ­ຄອນ­ຫຼວງ​ວຽງ​ຈັນ ໃຫ້​ກຽດ​ມອບ​ໃບ­ຢັ້ງ­ຢືນ​ຂອງ​ທ່ານ ພິ­ສິດ ພຸດ​ສະ​ຫວັດ ຜູ້­ອຳ­ນວຍ­ການ​ໂຮງ­ໝໍ​ມະ­ໂຫ­ສົດ ມີ​ທ່ານ ໂຮ​ສິກ ອີ່ມ ຫົວ­ໜ້າ​ອົງ­ການ​ສະ​ຖາ​ບັນ​ວັດ­ທະ­ນະ­ທຳ​ອາ­ຊີ ແລະ ການ​ພັດ­ທະ­ນາ (IACD) ພ້ອມ​ດ້ວຍ​ວິ­ທະ­ຍາ­ກອນ ແລະ ສຳ​ມະ​ນາ​ກອນ​ເຂົ້າ​ຮ່ວມ.

    ທ່ານ ເອ​ຈັ້ງ ລີ​ວາ​ທໍ່ ຜູ້​ບໍ­ລິ­ຫານ​ອົງ­ການ​ຂຶ້ນ​ຜ່ານ​ບົດ​ສະ­ຫຼຸບ​ການ​ເຝິກ­ອົບ­ຮົມ​ດັ່ງ­ກ່າວ​ວ່າ: ອົງ­ການ IACD ແລະ ອົງ­ການ​ກອຍ​ກາ ໄດ້​ໃຫ້­ການ​ສະ­ໜັບ­ສະ­ໜູນ​ເຝິກ­ອົບ­ຮົມ​ທາງ​ດ້ານ​ການ​ບໍ­ລິ­ການ​ທາງ​ການ​ແພດ ແກ່​ທ່ານ​ໜໍ​ແຂວງ​ບໍ​ລິ​ຄຳ​ໄຊ ລວມ​ທັງ​ໝົດ 5 ທ່ານ (ໃນ​ນັ້ນ ມາ​ຈາກ​ໂຮງ­ໝໍ​ແຂວງ​ບໍ​ລິ​ຄຳ​ໄຊ 2 ທ່ານ ໂຮງ­ໝໍ​ເມືອງ​ຄຳ​ເກີດ 1 ທ່ານ ໂຮງ­ໝໍ​ເມືອງ​ວຽງ​ທອງ 1 ທ່ານ ແລະ ໂຮງ­ໝໍ​ເມືອງ​ບໍ​ລິ​ຄັນ 1 ທ່ານ) ໂດຍ​ມີ​ຈຸດ­ປະ­ສົງ​ເພື່ອ​ຍົກ​ລະ­ດັບ​ຄວາມ​ຮູ້​ຄວາມ​ສາ­ມາດ​ໃຫ້​ແກ່​ພະ­ນັກ­ງານ​ຂັ້ນ​ເມືອງ ແລະ ຂັ້ນ​ແຂວງ ແນ­ໃສ່​ສ້າງ​ຄວາມ​ເຂັ້ມ­ແຂງ​ທາງ​ດ້ານ​ວິ­ຊາ​ການ​ໃຫ້​ກັບ​ພະ­ນັກ­ງານ​ແພດ​ໝໍ ພ້ອມ​ທັງ​ສ້າງ​ຄວາມ​ເຊື່ອ​ໝັ້ນ​ໃຫ້​ແກ່​ຄົນ​ເຈັບ​ທີ່​ມາ​ໃຊ້​ບໍ­ລິ­ການ ແລະ ເພື່ອ​ຍົກ​ສູງ​ຄຸນ​ນະ​ພາບ​ຂອງ​ການ​ບໍ­ລິ­ການ​ສຸ­ຂະ­ພາບ (ປິ່ນ­ປົວ) ໃຫ້​ແກ່​ສະ­ຖານ­ທີ່​ບໍ­ລິ­ການ​ສຸ­ຂະ­ພາບ​ໃນ​ແຕ່​ລະ​ຂັ້ນ ພ້ອມ​ນັ້ນ ຍັງ​ເປັນ​ການ​ແລກ­ປ່ຽນ​ທາງ​ດ້ານ​ປະ­ສົບ​ການ ແລະ ນຳ​ເອົາ​ບົດ­ຮຽນ​ໃໝ່ໆ​ຈາກ​ໂຮງ­ໝໍ​ສູນ​ກາງ ໄປ​ນຳ​ໃຊ້​ເຂົ້າ​ໃນ​ການ​ປິ່ນ­ປົວ​ຢູ່​ທ້ອງ­ຖິ່ນ​ຂອງ​ຕົນ.

    ສຳ­ລັບ​ເນື້ອ​ໃນ​ຂອງ​ການ​ເຝິກ­ອົບ­ຮົມ​ພາກ​ທິດ​ສະ​ດີ ປະ­ກອບ​ມີ ການ​ປິ່ນ­ປົວ​ຄົນ​ເຈັບ​ກໍ­ລະ­ນີ​ສຸກ​ເສີນ ການ​ປິ່ນ­ປົວ​ຄົນ​ເຈັບ​ປະ­ສູດ-ພະ­ຍາດ​ຍິງ ແລະ ການ​ປິ່ນ­ປົວ​ຄົນ​ເຈັບ​ໜັກ​ໃນ​ຫ້ອງ​ຟື້ນ​ຟູ​ຊີບ​ເດັກ ນອກ​ນີ້ ຍັງ​ມີ​ພາກ​ປະ­ຕິ­ບັດ​ຕົວ​ຈິງ ເປັນ­ຕົ້ນ ການ​ສອບ​ຖາມ​ປະ­ຫວັດ​ກັບ​ຄົນ​ເຈັບ ກວດ­ກາ​ຮ່າງ­ກາຍ​ຄົນ​ເຈັບ ຮຽນ​ຮູ້​ວິ­ທີ​ການ​ປິ່ນ­ປົວ​ຄົນ​ເຈັບ ແລະ ພະ­ຍາດ​ກະ­ທັນ­ຫັນ ແລະ ຮຽນ​ຮູ້​ການ​ຄຸ້ມ​ຄອງ​ກໍ­ລະ­ນີ​ຄົນ​ເຈັບ​ໜັກ​ຕ່າງໆ​ທີ່​ມີ​ອາ­ການ​ສົນ ເຊິ່ງ​ໄລ­ຍະ​ການ​ເຝິກ­ອົບ­ຮົມ​ດັ່ງ­ກ່າວ​ເລີ່ມ​ແຕ່​ວັນ​ທີ 24 ເມ­ສາ ຫາ 24 ພຶດ­ສະ­ພາ 2019.

ຂ່າວທີ່ກ່ຽວຂ້ອງ