ຂ່າວຫຼ້າສຸດ

ສ້າງຂະບວນການຕ້ອນຮັບວັນປູກຕົ້ນໄມ້ແຫ່ງຊາດ ແລະ ວັນເດັກນ້ອຍສາກົນ

395 28 ພ.ພ. 2019 ຂ່າວໜ້າ​ໜຶ່ງ
ສ້າງຂະບວນການຕ້ອນຮັບວັນປູກຕົ້ນໄມ້ແຫ່ງຊາດ ແລະ ວັນເດັກນ້ອຍສາກົນ

    ພະ​ແນກ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ ນະ­ຄອນ­ຫຼວງ​ວຽງ​ຈັນ (ຖວ​ທ ນວ) ສົມ­ທົບ​ກັບ​ບັນ­ດາ​ຂະ­ແໜງ­ການ​ກອງ​ວິ­ຊາ​ການ ແລະ ລັດ​ວິ​ສາ​ຫະ​ກິດ​ອ້ອມ​ຂ້າງ​ພະ​ແນກ​ດັ່ງ­ກ່າວ ພ້ອມ​ກັນ​ປູກ​ຕົ້ນ­ໄມ້ ແລະ ອະ­ນາ­ໄມ ຢູ່​ເດີ່ນ​ພະ​ທາດ­ຫຼວງ​ວຽງ​ຈັນ ວັນ​ທີ 25 ພຶດ­ສະ­ພາ 2019 ເພື່ອ​ຕ້ອນ­ຮັບ​ວັນ​ປູກ​ຕົ້ນ­ໄມ້​ແຫ່ງ​ຊາດ ແລະ ວັນ­ເດັກ­ນ້ອຍ​ສາ­ກົນ (1 ມິ­ຖຸ­ນາ) ທີ່​ຈະ​ມາ​ເຖິງ​ໃນ​ໄວໆ​ນີ້ ໂດຍ​ມີ​ທ່ານ ຄຳ​ປະ­ດິດ ເຂັມ​ມາ­ນິດ ຫົວ­ໜ້າ​ພະ​ແນກ ຖວ​ທ ນວ ພ້ອມ​ດ້ວຍ​ຄະ­ນະ​ພະ​ແນກ ກອງ​ວິ­ຊາ​ການ ແລະ ພະ­ນັກ­ງານ-ລັດ­ຖະ­ກອນ ເຂົ້າ​ຮ່ວມ.

    ທ່ານ ຄຳ​ປະ­ດິດ ເຂັມ​ມາ­ນິດ ກ່າວ​ວ່າ: ການ​ອອກ­ແຮງ​ງານ​ຄັ້ງ​ນີ້ ໄດ້​ສົມ­ທົບ​ກັບ​ບໍ­ລິ­ສັດ​ທີ່​ໄດ້​ຮ່ວມ​ຈັດ​ສັນ​ຢູ່​ເດີ່ນ​ພະ​ທາດ­ຫຼວງ ໂດຍ​ສະ­ເພາະ​ບໍ­ລິ­ສັດ ເພັດ​ຖາ­ວອນ​ກໍ່­ສ້າງ​ເຄ­ຫາ​ສະ­ຖານ ແລະ ຊົນ­ລະ­ປະ­ທານ ຈຳ­ກັດ ໄດ້​ສະ­ໜັບ­ສະ­ໜູນ​ເບ້ຍ​ໄມ້​ປະ­ດັບ (ດອກ​ທອງ​ອຸ­ລາ 30 ກວ່າ​ຕົ້ນ) ດິນ​ປູກ 30 ເປົາ ມູນ​ຄ່າ 3 ລ້ານ​ກວ່າ​ກີບ ນອກ​ນີ້ ຍັງ​ມີ​ຕົ້ນ­ໄມ້​ປະ­ດັບ​ຂອງ​ພະ​ແນກ ລວມ 70 ກວ່າ​ເບ້ຍ ເພື່ອ​ເຮັດ​ໃຫ້​ບໍ­ລິ­ເວນ​ພະ​ທາດ­ຫຼວງ​ວຽງ​ຈັນ ປະ­ດັບ​ປະ­ດາ​ໄປ​ດ້ວຍ​ດອກ​ໄມ້​ນາໆ​ຊະ­ນິດ ເປັນ​ສວນ​ທີ່​ມີ​ພື້ນ​ທີ່​ປົກ​ຫຸ້ມ​ດ້ວຍ​ສີ­ຂຽວ ຕາມ​ນະ­ໂຍ­ບາຍ ສ ສີ­ຂຽວ ຂອງ ນວ ທັງ​ເປັນ​ການ​ສ້າງ​ຂະ​ບວນ​ການ​ຄຳ­ນັບ​ຮັບ​ຕ້ອນ ວັນ​ປູກ​ຕົ້ນ­ໄມ້​ແຫ່ງ​ຊາດ ແລະ ວັນ­ເດັກ­ນ້ອຍ​ສາ­ກົນ 1 ມິ­ຖຸ­ນາ ສ້າງ​ຂະ​ບວນ​ການ​ຄຳ­ນັບ​ຮັບ​ຕ້ອນ ກອງ​ປະ­ຊຸມ​ໃຫຍ່​ຂອງ​ບັນ­ດາ​ໜ່ວຍ​ພັກ​ອ້ອມ​ຂ້າງ​ຄະ­ນະ​ພັກ​ຮາກ​ຖານ ກໍ​ຄື ຄະ­ນະ​ໜ່ວຍ​ພັກ​ຮາກ​ຖານ​ພະ​ແນກ ຖວ​ທ ນວ.

    ພະ​ແນກ ຖວ​ທ ນວ ຍັງ​ຈະ​ສືບ­ຕໍ່​ປູກ​ຢູ່​ຕາມ​ສະ­ຖານ­ທີ່​ທ່ອງ​ທ່ຽວ​ສຳ­ຄັນ​ຕ່າງໆ ເປັນ­ຕົ້ນ ຫໍ­ພະ­ແກ້ວ ວັດ​ສີ­ສະ​ເກດ ແລະ ບໍ­ລິ­ເວນ​ເດີ່ນ​ພະ​ແນກ ຖວ​ທ ໂຮງ­ພິມ​ນະ­ຄອນ­ຫຼວງ ສະ­ຖາ­ນີ​ວິ­ທະ­ຍຸ-ໂທລະ­ພາບ ນວ ແລະ ຫ້ອງ­ການ​ອື່ນໆ ທີ່​ຕິດ​ພັນ​ກັບ​ພະ​ແນກ ຖວ​ທ ນວ ນອກ​ນີ້​ຍັງ​ໄດ້​ຮັບ­ຜິດ­ຊອບ​ເສັ້ນ­ທາງ​ຕັດ​ໃໝ່ ບ້ານ​ໜອງ​ບົວ­ທອງ-ບ້ານ​ໜອງ​ບຶກ ເຊິ່ງ​ຕົ້ນ­ໄມ້​ທີ່​ຈະ​ປູກ 300 ກວ່າ​ຕົ້ນ.

ຂ່າວທີ່ກ່ຽວຂ້ອງ