ຫວນຄືນມູນເຊື້ອ ຜ່າວົງປິດລ້ອມຂອງກອງພັນທີ 2

643 27 ພ.ພ. 2019 ຂ່າວໜ້າ​ໜຶ່ງ
ຫວນຄືນມູນເຊື້ອ ຜ່າວົງປິດລ້ອມຂອງກອງພັນທີ 2

    ຫ້ອງ​ວ່າ­ການ​ປະ­ທານ​ປະ­ເທດ (ຫປທ) ຈັດ​ປາ­ຖະ­ກະ­ຖາ​ເລົ່າ​ມູນ­ເຊື້ອ​ວັນ​ຜ່າ​ວົງ​ປິດ​ລ້ອມ​ຂອງ​ກອງ­ພັນ​ທີ 2 ວີ­ລະ​ຊົນ​ທີ່​ທົ່ງ​ໄຫ​ຫີນ​ຊຽງ​ຂວາງ ຄົບ­ຮອບ 60 ປີ (19/5/1959-19/5/2019) ຂຶ້ນ​ວັນ​ທີ 24 ພຶດ­ສະ­ພາ 2019 ທີ່ ຫປທ ເພື່ອ​ເຮັດ​ໃຫ້​ສະ­ມາ­ຊິກ​ພັກ ພະ­ນັກ­ງານ​ພາຍ​ໃນ ຫປທ ໄດ້​ຮັບ​ຮູ້ ແລະ ເຂົ້າ­ໃຈ​ເຖິງ​ສະ­ພາບ​ວັນ​ດັ່ງ­ກ່າວ ໃຫ້​ກຽດ​ປາ­ຖະ­ກະ­ຖາ​ຂອງ​ທ່ານ ທອງ​ສະ​ຫວັດ ໄຂ​ຄຳ​ພິ­ທູນ ພະ­ນັກ­ງານ​ບຳ­ນານ ອະ­ດີດ​ກຳ­ມະ­ການ​ສູນ​ກາງ​ພັກ ຫົວ­ໜ້າ​ຫ້ອງ​ວ່າ­ການ​ສູນ​ກາງ​ພັກ ພ້ອມ​ດ້ວຍ​ພັນ​ລະ​ຍາ ມີ​ທ່ານ ຄຳ​ເມິງ ພົງ​ທະ​ດີ ລັດ­ຖະ­ມົນ­ຕີ ຫົວ­ໜ້າ ຫປທ ພ້ອມ​ດ້ວຍ​ສະ­ມາ­ຊິກ​ພັກ ແລະ ພະ­ນັກ­ງານ​ຫຼັກ​ແຫຼ່ງ​ເຂົ້າ​ຮ່ວມ.

    ທ່ານ ທອງ​ສະ​ຫວັດ ໄຂ​ຄຳ​ພິ­ທູນ ໄດ້​ຍົກ​ໃຫ້​ເຫັນ​ປະ­ຫວັດ​ຄວາມ​ເປັນ​ມາ​ມູນ­ເຊື້ອ​ການ​ຕໍ່­ສູ້​ຢ່າງ​ພິ­ລະ​ອາດ​ຫານ​ຂອງ​ກອງ­ທັບ ແລະ ປະ­ຊາ­ຊົນ ມູນ­ເຊື້ອ​ຄວາມ​ເປັນ​ແບບ­ຢ່າງ​ອັນ​ດີ­ງາມ​ຂອງ​ຜູ້­ນຳ​ພັກ-ລັດ.

    ໃນ​ຄ່ຳ​ຄືນ​ຂອງ​ວັນ​ທີ 18 ພຶດ­ສະ­ພາ 1959 ຄະ­ນະ​ພັກ-ຄະ­ນະ​ບັນ­ຊາ​ກອງ­ພັນ​ທີ 2 ພາຍ​ໃຕ້​ການ​ຊີ້​ນຳ​ຂອງ​ສູນ​ກາງ​ພັກ ໄດ້​ໃຊ້​ກົນ­ອຸ­ບາຍ​ຫຼອກ​ສັດ­ຕູ ແລະ ແຕ່​ລະ​ກົມ​ກອງ ພ້ອມ​ກັບ​ຄອບ­ຄົວ ພະ­ນັກ­ງານ​ນັກ­ຮົບ​ທັງ​ໝົດ ໄດ້​ນຳ​ໃຊ້​ຄວາມ​ມືດ​ຖອນ​ທັບ​ໄປ​ທາງ​ທິດ­ຕາ­ເວັນ­ຕົກ​ສຽງ​ໃຕ້ ມຸ່ງ​ໜ້າ​ຫາ​ເຂດ​ບ້ານ​ໂຕນ​ນາ​ແຖງ​ໜອງ​ຕິ້ວ ແລ້ວ​ເຂົ້າ​ປ່າ​ໄປ​ຕາມ​ເສັ້ນ­ທາງ​ຫາ​ບ້ານ​ມາຍ​ຢ່າງ​ປິດ​ລັບ ຕົກ​ມາ​ຮອດ​ເວ­ລາ 7 ໂມງ​ເຊົ້າ​ວັນ​ທີ 19 ພຶດ­ສະ­ພາ 1959 ສັດ­ຕູ​ບຸກ​ເຂົ້າ​ປົດ​ອາ­ວຸດ​ກອງ­ພັນ​ທີ 2 ແຕ່​ພວກ​ເຂົາ​ຕົກ­ສະ­ເງີ້ ເພາະ​ຢູ່​ໃນ​ຄ້າຍ​ມີ​ແຕ່​ຄວາມ​ມິດ​ງຽບ ແລະ ຫວ່າງ​ເປົ່າ​ພວກ​ສັດ­ຕູ​ເຈັບ​ແຄ້ນ​ແໜ້ນ​ໃຈ ແລະ ໄດ້​ຮີບ​ຮ້ອນ​ໃຫ້​ທຸກ​ກຳ­ລັງ​ໄລ່​ຕາມ​ຫວັງ​ດັບ​ສູນ​ກອງ­ພັນ​ທີ 2 ພວກ​ເຂົາ​ໄດ້​ລະ­ດົມ​ເອົາ 6 ກອງ­ພັນ​ທີ່​ຂຶ້ນ​ກັບ​ທະ­ຫານ​ພາກ 2 ເຮືອ­ບິນ​ຊ່ວຍ​ໜູນ​ອ້ອມ​ຂ້າງ​ທົ່ງ​ໄຫ​ຫີນ ເພື່ອ​ໄລ່​ຕາມ​ແຕ່​ບໍ່​ສາ­ມາດ​ຕິດ­ຕາມ​ໄດ້​ທັນ ໃນ​ການ​ເຄື່ອນ​ທັບ 10 ກວ່າ​ວັນ ກອງ­ພັນ​ທີ 2 ໄດ້​ສູ້​ຮົບ​ກັບ​ສັດ­ຕູ​ທັງ​ນ້ອຍ ແລະ ໃຫຍ່ 10 ຄັ້ງ ສຸດ​ທ້າຍ​ກອງ­ພັນ​ທີ 2 ພ້ອມ​ກັບ 91 ຄອບ­ຄົວ​ໄດ້ ຜ່າ​ວົງ​ປິດ​ລ້ອມ​ທີ່​ໜາ​ແໜ້ນ​ຂອງ​ສັດ­ຕູ​ໄປ​ສູ່​ເຂດ​ທີ່​ໝັ້ນ​ຂອງ​ການ​ປະ­ຕິ­ວັດ​ດ້ວຍ​ຄວາມ​ປອດ​ໄພ.

    ຫຼັງ​ຈາກ​ນັ້ນ ພວກ​ລັດ­ຖະ­ບານ​ຫຸ່ນ​ວຽງ​ຈັນ ລູກ­ແຫຼ້ງ​ຂອງ​ຈັກ­ກະ­ພັດ​ກໍ​ບໍ່​ລົດ​ລະ​ຄວາມ​ພະ­ຍາ­ຍາມ ໃນ​ການ​ຫວັງ​ທຳ­ລາຍ​ກອງ​ກຳ­ລັງ​ປະ­ຕິ­ວັດ ແລະ ປະ­ຊາ­ຊົນ​ລາວ​ຜູ້​ຮັກ​ຊາດ ເຊິ່ງ​ໃນ​ວັນ​ທີ 18 ກໍ­ລະ­ກົດ 1959 ພວກ​ສັດ­ຕູ​ໄດ້​ຈັບ​ກຸມ​ຄຸມ​ຂັງ​ບັນ­ດາ​ຜູ້­ນຳ​ພັກ ແລະ ແນວ​ລາວ​ຮັກ​ຊາດ 16 ທ່ານ ທີ່​ປະ­ຈຳ​ຮ່ວມ​ລັດ­ຖະ­ບານ​ປະ­ສົມ​ເຂົ້າ​ຢູ່​ທີ່​ຄຸກ​ໂພນ​ເຄັງ ແຕ່​ຍ້ອນ​ການ​ຊີ້​ນຳ​ທີ່​ສະ­ຫຼາດ​ສ່ອງ​ໃສ​ຂອງ​ສູນ​ກາງ​ພັກ ນຳ​ໂດຍ​ປະ­ທານ ໄກ­ສອນ ພົມ­ວິ­ຫານ ແລະ ຄວາມ​ເກ່ງ​ກ້າ​ສາ­ມາດ​ຂອງ​ທ່ານ​ຜູ້­ນຳ​ທັງ 16 ທ່ານ ມາ​ຮອດ ວັນ​ທີ 24 ພຶດ­ສະ­ພາ 1960 ຫຼັງ​ຈາກ​ຖືກ​ກັກ​ຂັງ​ເກືອບ 300 ວັນ ຜູ້­ນຳ​ທັງ​ໝົດ​ກໍ​ສາ­ມາດ​ໂຕນ​ອອກ​ຈາກ​ຄຸກ ແລະ ກັບ​ໄປ​ສູ່​ເຂດ​ທີ່​ໝັ້ນ​ຢ່າງ​ປອດ​ໄພ ພ້ອມ​ກັບ​ຄະ­ນະ​ຊີ້​ນຳ​ສູນ​ກາງ​ພັກ​ສືບ­ຕໍ່​ນຳ­ພາ ພາ­ລະ­ກິດ​ປະ­ຕິ­ວັດ​ຈົນ​ໄດ້​ຮັບ​ໄຊ­ຊະ­ນະ ວີ­ລະ​ກຳ​ຜ່າ​ວົງ​ປິດ​ລ້ອມ​ຂອງ​ກອງ­ພັນ​ທີ 2 ທີ່​ທົ່ງ​ໄຫ​ຫີນ​ຊຽງ​ຂວາງ ແລະ ການ​ໂຕນ​ຄຸກ ແບບ​ລວມ​ໝູ່​ຂອງ​ບັນ­ດາ​ຜູ້­ນຳ​ພັກ ແລະ ແນວ​ລາວ​ຮັກ​ຊາດ ຢ່າງ​ມະ­ຫັດ­ສະ­ຈັນ​ຄັ້ງ​ນີ້ ແມ່ນ​ມີ​ຄວາມ​ສ່ຽງ​ສູງ​ທີ່​ສຸດ​ບໍ່​ມີ​ຜູ້​ໃດ​ຈະ​ຄິດ​ວ່າ​ຈະ​ເປັນ​ໄປ​ໄດ້ ຈຶ່ງ​ຖືກ​ຈາ­ລຶກ​ໄວ້​ໃນ​ປະ­ຫວັດ­ສາດ​ຂອງ​ລາວ​ເຊັ່ນ​ລູກ​ເຊັ່ນ​ຫຼານ.

ຂ່າວທີ່ກ່ຽວຂ້ອງ