ຂ່າວຫຼ້າສຸດ

ຖົງຢາງ ແລະ ຖົງບັນຫາ

3.468 24 ພ.ພ. 2019 ນານາສາລະ

    ຕັ້ງ­ແຕ່ 20-30 ປີ​ກ່ອນ ການ​ໄປ​ຊື້​ເຄື່ອງ​ຂອງ​ຕະ­ຫຼາດ​ສົດ ຫຼື ບໍ່​ສົດ ຜູ້​ໄປ​ຊື້​ມັກ​ຖື​ເອົາ ກະ­ຕ່າ ຖົງ​ແພ​ໄປ​ໃສ່­ເຄື່ອງ​ທີ່​ຊື້​ມາ​ແຕ່​ຕະ­ຫຼາດ. ຝ່າຍ​ຜູ້​ຂາຍ​ກໍ​ມີ​ການ​ປະ​ເມີນ​ຄວາມ​ເໝາະ​ສົມ​ວ່າ ຈະ​ເອົາ​ຫຍັງ​ຫຸ້ມ​ຫໍ່​ສິນ­ຄ້າ​ຂອງ​ຕົນ​ໃຫ້​ລູກ​ຄ້າ (ສິນ­ຄ້າ​ແຫ້ງ ສິນ­ຄ້າ​ປຽກ ຊີ້ນ​ປາ) ເພາະ​ບາງ​ຢ່າງ​ກໍ​ໃຊ້​ເຈ້ຍ ໃບ​ຕ້ອງ​ກວ້ຍ ໃບ­ຕອງ​ກຸງ ໃບ​ບົວ​ຫໍ່ ເວ­ລາ​ບໍ່​ໃຊ້ ກໍ​ສາ­ມາດ​ຖີ້ມ​ປະ​ໄວ້​ສາ­ມາດ​ຍ່ອຍ​ສະ­ຫຼາຍ ຫຼື ເປື່ອຍ​ໄປ​ນຳ​ທຳ​ມະ​ຊາດ​ໄດ້.

    ແຕ່​ໄລ­ຍະ​ຫຼັງໆ ຄວາມ​ສະ­ດວກ​ສະ­ບາຍ​ຫຼາຍ​ຢ່າງ​ມາ​ແທນ ໄດ້​ປັບ​ປ່ຽນ​ນິດ​ໄສ​ຄົນ​ໄປ​ຕະ­ຫຼາດ​ໃຫ້​ເກີດ​ຄວາມ​ມັກ­ງ່າຍ ຄື​ໄປ​ຕະ­ຫຼາດ​ແມ່ນ​ເອົາ​ພຽງ​ແຕ່​ເງິນ​ໄປ​ເທົ່າ​ນັ້ນ ແຕ່​ກໍ​ບໍ່​ມີ​ໃຜ​ຫ້າມ​ບໍ່​ໃຫ້​ເອົາ​ຖົງ ເອົາ​ກະ­ຕ່າ​ໄປ​ນຳ​ປະ­ການ​ໃດ. ສ່ວນ​ພໍ່­ຄ້າ ແມ່​ຂາຍ ກໍ​ບໍ­ລິ­ການ​ສຸດ​ຂີດ ການ​ຫຸ້ມ​ຫໍ່​ຂື້ນ​ກັບ​ປະ­ເພດ​ສິນ­ຄ້າ ແຕ່​ສ່ວນ​ໃຫຍ່​ກໍ່​ບໍ່​ພົ້ນ​ຖົງ​ຢາງ​ປຼັສ​ຕິກ ຫຼື ຊຸມ​ເຮົາ​ເຈົ້າ​ຂ້ອຍ​ເອີ້ນ​ວ່າ​ຖົງ​ຢາງ​ຂອບ­ແຂບ ເຊິ່ງ​ນັບ​ແຕ່​ຊື້​ສິນ­ຄ້າ​ອັນ​ໜຶ່ງ​ກໍ​ແມ່ນ​ມີ​ຖົງ​ຢາງ ອັນ​ໜຶ່ງ​ຕາມ​ຂະ­ໜາດ​ສິນ­ຄ້າ​ມາ​ນຳ ໃນ​ການ​ຫຸ້ມ​ຫໍ່​ບາງ​ຄັ້ງ​ກໍ​ມີ​ໃບ­ຕອງ ເຈ້ຍ ໃບ​ບົວ​ຫຸ້ມ​ຫໍ່​ຈຶ່ງ​ເອົາ​ໃສ່​ຖົງ​ຢາງ ເປັນ​ການ​ເພິ່ມ​ປະ­ລິ­ມານ​ຂີ້​ເຫຍື້ອ​ຖົງ​ຢາງ​ໃຫ້​ໜັກ​ຕື່ມ​ອີກ. ຕາມ​ນັກ­ວິ­ຊາ­ການ​ສິ່ງ­ແວ­ດລ້ອມ​ກ່າວ​ວ່າ ຄົນ​ໃນ​ຕົວ​ເມືອງ​ໃຫຍ່​ຜູ້​ໜຶ່ງ​ສາ­ມາດ​ຜະ­ລິດ​ຂີ້​ເຫຍື້ອ​ສູ່​ສິ່ງ­ແວ­ດລ້ອມ​ໄດ້ ມື້​ລະ​ກິ​ໂລ​ຢ່າງ​ຕ່ຳ ເປັນ­ຕົ້ນ​ສິ່ງ​ທຸ້ມ​ຫໍ່​ອາ­ຫານ ແລະ ສິ່ງ​ຫຸ້ມ​ຫໍ່​ສິນ­ຄ້າ​ຈຳ­ເປັນ​ຕ່າງໆ​ຮັບ​ໃຊ້​ຊີ­ວິດ​ການ​ເປັນ​ຢູ່​ປະ­ຈຳ​ວັນ. ດັ່ງ­ນັ້ນ​ຄົນ​ໃນ​ເມືອງ​ຈຶ່ງ​ກາຍ­ເປັນ​ຄົນ​ອາ­ໄສ​ຖົງ​ຢາງ ໂຟມ ເສດ​ເຈ້ຍ​ຕິດ​ຊູ ແລະ ມີ­ໜ້າ​ທີ່​ຜະ­ລິດ​ຂີ້​ເຫຍື້ອ​ອອກ​ສູ່​ສິ່ງ­ແວ­ດລ້ອມ. ຖ້າ​ບຸກ­ຄົນ​ໃດ​ມີ​ສະ­ຕິ ຮູ້­ຈັກ​ບໍ­ລິ­ຫານ​ຈັດ­ການ​ສິ່ງ­ແວ­ດລ້ອມ​ອ້ອມ​ຂ້າງ​ຕົນ​ເອງ​ໄດ້ ຄື​ບໍ່​ໃຫ້​ເປັນ​ພາ­ລະ​ຄົນ​ອື່ນ​ກໍ​ແມ່ນ​ດີ ຄື​ຮູ້​ຖິ້ມ​ຂີ້​ເຫຍື້ອ ແລະ ຈຳ­ແນກ​ຂີ້​ເຫຍື້ອ​ຖິ້ມ​ໃນ​ບ່ອນ​ຄວນ​ຖິ້ມ.

    ກົງ­ກັນ­ຂ້າມ ພໍ​ຫວິດ​ຕີນ​ຫວິດ​ມື​ຕົນ ແລະ ຄົນ​ບໍ່​ເຫັນ​ຕາມ​ຊອກ​ຊອຍ ຫຼື ບ່ອນ​ຫວ່າງ​ເປົ່າ ແລະ ເປົ່າ​ປ່ຽວ​ຕາມ​ຊານ­ເມືອງ​ແລ້ວ​ຖິ້ມ​ຊະ­ຊາຍ ນັ້ນ​ລະ​ຄື​ຕົວ​ບັນ­ຫາ. ດັ່ງ­ນັ້ນ​ຖະ­ໜົນ​ສາຍ​ປ່ຽວ​ນອກ​ເມືອງ​ຢູ່​ຫຼາຍ​ບ່ອນ ຫຼາຍ​ແຂວງ ຈຶ່ງ​ເປັນ​ສະ­ໜາມ​ຂີ້​ເຫຍື້ອ​ຖົງ​ຢາງ​ໃຫ້​ແກ່​ຄົນ​ບໍ່​ດີ​ຈຳ­ນວນ​ໜຶ່ງ​ຖີ້ມ. ເມື່ອ​ເວ­ລາ​ລົມ​ພັດ​ມາ ໂດຍ​ສະ­ເພາະ​ລົມ​ຫົວ­ກຸດ​ຂະ­ໜາດ​ນ້ອຍ​ປິວ​ພັດ ມັນ​ຈະ​ຫວັ່ນ​ເອົາ​ຖົງ​ຢາງ​ປິວ​ຂື້ນ​ໄປ​ແຕກ​ຢ່າງ​ຊະ­ຊາຍ​ໃສ່​ບໍ­ລິ­ເວນ​ກວ້າງ ເຮັດ​ໃຫ້​ເຫັນ​ຄວາມ​ມັກ­ງ່າຍ​ຂອງ​ຄົນ​ແຖວ​ນັ້ນ ບາງ​ຄັ້ງ​ຄົນ​ແຖວ​ນັ້ນ​ບໍ່​ໄດ້​ສ້າງ​ບັນ­ຫາ​ຊ້ຳ​ຄື​ເຂົາ­ເຈົ້າ​ຖິ້ມ​ຖືກ​ບ່ອນ​ສົມ­ຄວນ​ຖິ້ມ​ແລ້ວ ແຕ່​ຍ້ອນ​ພວກ​ຂາດ​ສະ­ຕິ​ຕ່າງ­ຫາກ​ເປັນ​ຜູ້​ສ້າງ​ບັນ­ຫາ. ກໍ­ລະ­ນີ​ເມື່ອ​ຍາມ​ຝົນ​ຖົງ​ຢາງ​ດັ່ງ­ກ່າວ​ຍັງ​ແຜງ​ລິດ ສາ­ມັກ­ຄີ​ກັນ​ອັດ​ຕັນ​ທໍ່ ອັດ​ຕັນ​ຄູ​ຄອງ​ເຮັດ​ໃຫ້​ນ້ຳ​ໄຫຼ​ບໍ່​ສະ­ດວກ ບາງ​ຄັ້ງ​ເກີດ​ນ້ຳ​ຖ້ວມ​ຍ້ອນ​ກໍ​ມີ.

    ເວົ້າ​ເຖິງ​ເລື່ອງ​ນີ້ ຜູ້​ຂຽນ​ເຄີຍ​ຂຽນ​ມາ​ຫຼາຍ​ເທື່ອ​ແລ້ວ ແລະ ອົງ­ການ​ປົກ­ຄອງ​ທ້ອງ­ຖິ່ນ ກໍ​ປຸກ­ລະ­ດົມ ອົງ​ການ­ຈັດ­ຕັ້ງ​ມະ­ຫາ­ຊົນ ເປີດ​ຂະ​ບວນ​ການ​ກຳ­ຈັດ​ຂີ້​ເຫຍື້ອ​ປະ­ເພດ​ນີ້ ປີ​ລະ​ບໍ່​ຫຼຸດ 2-3 ຄັ້ງ ເພື່ອ​ປູກ​ຈິດ​ສຳ­ນຶກ​ແກ່​ສັງ­ຄົມ. ແຕ່​ດົນ​ໄປ ກໍ​ປາ­ກົດ​ວ່າ​ເຫັນ​ສິ່ງ​ດັ່ງ­ກ່າວ​ເກີດ​ຂື້ນ​ມາ​ຄື­ເກົ່າ​ອີກ. ເຖິງ​ຢ່າງ­ໃດ​ກໍ​ດີ ຄວນ​ປຸກ­ລະ­ດົມ​ເສີມ​ຂະ­ຫຍາຍ​ສິດ​ເປັນ​ເຈົ້າ​ຂອງ​ປະ­ເທດ​ຊາດ​ຂຶ້ນ​ຕື່ມ​ອີກ ຕ້ອງ​ເຂົ້າ­ໃຈ​ນຳ​ກັນ​ວ່າ ຄວາມ​ສະ­ອາດ​ສວຍ​ງາມ ບ້ານ​ເຮົາ​ເມືອງ​ເຮົາ ຖ້າ​ບໍ່​ເລິ່ມ​ຈາກ​ເຮົາ​ຈະ​ໃຫ້​ໃຜ​ມາ​ເຮັດ​ແທນ​ໃຫ້​ເຮົາ​ໄດ້. ດັ່ງ­ນັ້ນ ຂໍ​ຈົ່ງ​ບໍ­ລິ­ຫານ​ຕົນ​ເອງ ບໍ່​ໃຫ້​ສ້າງ​ຄວາມ​ເສຍ​ຫາຍ​ຕໍ່​ສິ່ງ­ແວ­ດລ້ອມ​ນັ້ນ​ຄື ຄຸນ­ສົມ­ບັດ​ຂອງ​ພົນ­ລະ­ເມືອງ​ດີ​ຜູ້​ໜຶ່ງ​ໃນ​ສັງ­ຄົມ.

ໂດຍ: ຊຽງເອງ

ຂ່າວທີ່ກ່ຽວຂ້ອງ