ຂ່າວຫຼ້າສຸດ

ການນຳຂັ້ນສູງ ຕ້ອນຮັບຄະນະຜູ້ແທນຫວຽດນາມ

1.080 24 ພ.ພ. 2019 ຂ່າວໜ້າ​ໜຶ່ງ
ການນຳຂັ້ນສູງ ຕ້ອນຮັບຄະນະຜູ້ແທນຫວຽດນາມ

    ວັນ​ທີ 23 ພຶດ­ສະ­ພາ 2019 ທີ່​ທຳ​ນຽບ​ປະ­ທານ​ປະ­ເທດ ທ່ານ ບຸນ​ຍັງ ວໍ­ລະ​ຈິດ ປະ­ທານ​ປະ­ເທດ ໄດ້​ຕ້ອນ­ຮັບ​ການ​ເຂົ້າ​ຢ້ຽມ​ຄຳ­ນັບ​ຂອງ​ທ່ານ​ນາງ ເຈືອງ ທິ ມາຍ ຫົວ­ໜ້າ​ຄະ­ນະ​ຂົນ­ຂວາຍ​ປະ­ຊາ­ຊົນ​ສູນ​ກາງ​ພັກ​ກອມ​ມູ​ນິດ​ຫວຽດ­ນາມ ພ້ອມ​ຄະ­ນະ ໃນ​ໂອ­ກາດ​ເດີນ­ທາງ​ມາ​ຢ້ຽມ­ຢາມ ແລະ ເຮັດ​ວຽກ​ຢູ່ ສປປ ລາວ ໃນ​ວັນ​ທີ 22-24 ພຶດ­ສະ­ພາ​ນີ້.

    ໂອ­ກາດ​ນີ້ ທ່ານ​ປະ­ທານ​ປະ­ເທດ ໄດ້​ຕີ​ລາ­ຄາ​ສູງ​ຕໍ່​ການ​ມາ​ຢ້ຽມ­ຢາມ ແລະ ເຮັດ​ວຽກ​ຂອງ​ຄະ­ນະ​ຜູ້​ແທນ ເຊິ່ງ​ເປັນ​ການ​ປະ­ກອບ­ສ່ວນ​ເສີມ​ຂະ­ຫຍາຍ​ສາຍ​ພົວ­ພັນ​ຄວາມ​ສາ­ມັກ­ຄີ​ພິ­ເສດ ແລະ ຮ່ວມ​ມື​ຮອບ­ດ້ານ ລະ­ຫວ່າງ​ສອງ​ພັກ-ສອງ​ລັດ ກໍ​ຄື ປະ­ຊາ­ຊົນ​ສອງ​ຊາດ​ລາວ-ຫວຽດ­ນາມ ທີ່​ມີ​ມາ​ແຕ່​ດົນ​ນານ​ແລ້ວ​ນັ້ນ ໃຫ້​ນັບ​ມື້​ເຕີບ​ໃຫຍ່​ຂະ­ຫຍາຍ­ຕົວ​ຍິ່ງ​ຂຶ້ນ ແລະ ເຂົ້າ​ສູ່​ລວງ​ເລິກ ພ້ອມ​ນີ້ ທ່ານ​ຍັງ​ໄດ້​ຊຸກ­ຍູ້​ໃຫ້​ສອງ​ຝ່າຍ​ສືບ­ຕໍ່​ຮັດ​ແໜ້ນ​ຄວາມ​ສາ­ມັກ­ຄີ ແລະ ຊ່ວຍ­ເຫຼືອ​ເຊິ່ງ​ກັນ ແລະ ກັນ ດ້ານ​ຕ່າງໆ ຕາມ​ທ່າ­ແຮງ​ທີ່​ສອງ​ຝ່າຍ​ມີ​ຕອນ​ທ້າຍ​ທ່ານ​ຍັງ​ໄດ້​ອວຍ­ພອນ​ໃຫ້​ຄະ­ນະ​ຜູ້​ແທນ ຈົ່ງ​ປະ­ສົບ​ຜົນ­ສຳ­ເລັດ​ໃນ​ການ​ຢ້ຽມ­ຢາມ​ລາວ​ຄັ້ງ​ນີ້​ຕື່ມ​ອີກ.

    ທ່ານ​ນາງ ເຈືອງ ທິ ມາຍ ໄດ້​ສະ­ແດງ​ຄວາມ​ຂອບ­ໃຈ​ມາ​ຍັງ​ທ່ານ​ປະ­ທານ​ປະ­ເທດ ທີ່​ໄດ້​ໃຫ້­ການ​ຕ້ອນ­ຮັບ​ຢ່າງ​ອົບ​ອຸ່ນ ພ້ອມ​ລາຍ​ງານ​ຈຸດ­ປະ­ສົງ​ຂອງ​ການ​ມາ​ຢ້ຽມ­ຢາມ ແລະ ເຮັດ​ວຽກ​ຢູ່​ລາວ​ຄັ້ງ​ນີ້ ເພື່ອ​ແລກ­ປ່ຽນ​ສະ­ພາບ​ການ­ຈັດ­ຕັ້ງ​ປະ­ຕິ­ບັດ​ວຽກ​ງານ​ມະ­ຫາ­ຊົນ​ຂອງ​ພັກ​ກອມ​ມູ​ນິດ​ໃນ​ໄລ­ຍະ​ຜ່ານ​ມາ ທິດ​ທາງ​ຕໍ່­ໜ້າ ທັດ­ສະ­ນະ ຄາດ­ໝາຍ​ສູ້​ຊົນ ແລະ ຍຸດ​ທະ​ສາດ​ກັບ​ສິ່ງ​ທ້າ​ທາຍ​ໃນ​ໄລ­ຍະ​ໃໝ່ ທັງ​ເຜີຍ­ແຜ່​ນະ­ໂຍ­ບາຍ​ຂອງ​ພັກ​ຕໍ່​ບົດ­ບາດ​ອົງ​ການ­ຈັດ­ຕັ້ງ​ມະ­ຫາ­ຊົນ ແລກ­ປ່ຽນ​ວຽກ​ງານ​ຄຸ້ມ​ຄອງ ແລະ ເຕົ້າ­ໂຮມ​ຄວາມ​ສາ­ມັກ­ຄີ​ໃນ​ສັງ­ຄົມ ອົງ​ການ­ຈັດ­ຕັ້ງ​ໃນ​ສັງ­ຄົມ ການ​ຄຸ້ມ​ຄອງ​ການ­ເຄື່ອນ­ໄຫວ ແລະ ເພື່ອ​ປາ­ຖະ­ກະ­ຖາ​ຫົວ­ຂໍ້​ແລກ­ປ່ຽນ​ບົດ­ຮຽນ​ກ່ຽວ​ກັບ​ຊັ້ນ​ຄົນ ແລະ ການ­ຈັດ­ຕັ້ງ​ສັງ­ຄົມ​ກັບ​ພາກ­ສ່ວນ​ກ່ຽວ­ຂ້ອງ​ຂອງ​ລາວ.

    ພ້ອມ​ນີ້ ໃນ​ວັນ​ດຽວ​ກັນ​ທີ່​ສະ­ພາ​ແຫ່ງ​ຊາດ ທ່ານ​ນາງ ປາ­ນີ ຢາ​ທໍ່​ຕູ້ ປະ­ທານ​ສະ­ພາ​ແຫ່ງ​ຊາດ ກໍ​ໄດ້​ຕ້ອນ­ຮັບ​ການ​ເຂົ້າ​ຢ້ຽມ​ຄຳ­ນັບ​ຂອງ​ຄະ­ນະ​ຜູ້​ແທນ ຄະ­ນະ​ຂົນ­ຂວາຍ​ປະ­ຊາ­ຊົນ​ສູນ​ກາງ​ພັກ​ກອມ​ມູ​ນິດ​ຫວຽດ­ນາມ ເຊັ່ນ​ດຽວ​ກັນ.

ຂ່າວທີ່ກ່ຽວຂ້ອງ