ພ້ອມກັນພັດທະນານະຄອນຫຼວງ ໃຫ້ເປັນນະຄອນທີ່ໜ້າຢູ່ ແລະ ຍືນຍົງ

1.068 24 ພ.ພ. 2019 ຂ່າວໜ້າ​ໜຶ່ງ
ພ້ອມກັນພັດທະນານະຄອນຫຼວງ ໃຫ້ເປັນນະຄອນທີ່ໜ້າຢູ່ ແລະ ຍືນຍົງ

    ກອງ​ປະ­ຊຸມ​ທົບ​ທວນ ແລະ ວາງ​ແຜນ​ເພີ່ມ​ເຕີມ​ຂະ​ບວນ​ແຂ່ງ­ຂັນ “ຮັກ​ຊາດ ແລະ ພັດ­ທະ­ນາ” ຕິດ​ພັນ​ກັບ​ຮັກ​ນະ­ຄອນ­ຫຼວງ​ວຽງ​ຈັນ (ນວ) ໄລ­ຍະ​ຮອດ​ທ້າຍ​ປີ 2020 ຈັດ​ຂຶ້ນ​ວັນ​ທີ 22 ພຶດ­ສະ­ພາ 2019 ຢູ່​ຫ້ອງ​ວ່າ­ການ ນວ ໂດຍ​ເປັນ​ປະ­ທານ​ຂອງ​ທ່ານ ສິນ​ລະ​ວົງ ຄຸດ​ໄພ­ທູນ ເຈົ້າ​ຄອງ ນວ ມີ​ທ່ານ ອາ­ນຸ­ພາບ ຕຸ​ນາ​ລົມ ປະ­ທານ​ສະ­ພາ​ປະ­ຊາ­ຊົນ ນວ ບັນ­ດາ​ຮອງ​ເຈົ້າ​ຄອງ ຫົວ­ໜ້າ​ພະ​ແນກ ເຈົ້າ­ເມືອງ ນາຍ­ບ້ານ ແລະ ພາກ­ສ່ວນ​ທີ່​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ສີ​ຫຸນ ສິດ­ທິ​ລື​ໄຊ ຮອງ​ເຈົ້າ​ຄອງ ນວ ກ່າວ​ວ່າ: ເພື່ອ​ທົບ​ທວນ­ຄືນ​ການ­ຈັດ­ຕັ້ງ​ປະ­ຕິ­ບັດ​ຂະ​ບວນ​ແຂ່ງ­ຂັນ “ຮັກ​ຊາດ ແລະ ພັດ­ທະ­ນາ” ຕິດ​ພັນ​ກັບ​ຮັກ ນວ ເຊິ່ງ​ໄດ້​ເປັນ​ເອ­ກະ​ພາບ​ຈັບ​ມື​ແຂ່ງ­ຂັນ​ໃນ​ຄັ້ງ​ວັນ​ທີ 12 ຕຸ­ລາ 2017 ຕະ­ຫຼອດ​ໄລ­ຍະ 1 ປີ​ກວ່າ​ຜ່ານ​ມາ ສາ­ມາດ​ສັງ​ລວມ​ໄດ້​ຄື: ຄະ­ນະ​ພັກ​ອົງ­ການ​ປົກ­ຄອງ​ແຕ່​ລະ​ຂັ້ນ​ໄດ້​ຖື​ສຳ­ຄັນ ແລະ ເອົາ­ໃຈ­ໃສ່​ວຽກ​ງານ​ການ​ສຶກ​ສາ​ອົບ­ຮົມ​ແນວ​ຄິດ-ການ­ເມືອງ​ໃຫ້​ສະ­ມາ­ຊິກ​ພັກ ພະ­ນັກ­ງານ-ລັດ­ຖະ­ກອນ ກຳ­ລັງ​ປະ­ກອບ​ອາ­ວຸດ ປະ­ຊາ­ຊົນ​ບັນ­ດາ­ເຜົ່າ ແລະ ຊັ້ນ​ຄົນ​ທົ່ວ ນວ ຢ່າງ​ເປັນ​ເຈົ້າ​ການ ເປັນ​ປົກ­ກະ­ຕິ​ຕໍ່​ເນື່ອງ ເຮັດ​ໃຫ້​ເຂົາ­ເຈົ້າ​ຮັບ​ຮູ້​ໄດ້​ເລິກ­ເຊິ່ງ ມີ​ຄວາມ​ອຸ່ນ​ອ່ຽນ ທຸ່ນ​ທ່ຽງ ມີ​ຄວາມ​ສາ­ມັກ­ຄີ​ປອງ​ດອງ​ຊ່ວຍ­ເຫຼືອ​ເຊິ່ງ​ກັນ ແລະ ກັນ ຕັ້ງ­ໜ້າ​ປະ­ຕິ­ບັດ​ສິດ ແລະ ພັນ­ທະ​ຂອງ​ພົນ­ລະ­ເມືອງ ຕາມ​ທີ່​ກຳ­ນົດ​ໄວ້​ໃນ​ລັດ​ຖະ​ທຳ​ມະ­ນູນ ແລະ ກົດ­ໝາຍ ມີ​ສະ­ຕິ​ຕື່ນ​ຕົວ​ເປັນ​ເຈົ້າ​ການ​ເຂົ້າ​ຮ່ວມ​ສ້າງ­ສາ​ພັດ­ທະ­ນາ​ປະ­ເທດ​ຊາດ ກໍ​ຄື ນວ ແກ້​ໄຂ​ຄວາມ­ທຸກ​ຍາກ​ພາຍ​ໃນ​ຄອບ­ຄົວ​ຢ່າງ​ຕັ້ງ­ໜ້າ ເຊິ່ງ​ສະ­ແດງ​ໃຫ້​ເຫັນ​ປະ­ຊາ­ຊົນ​ບັນ­ດາ­ເຜົ່າ ຊັ້ນ​ຄົນ ເປັນ​ເຈົ້າ​ຂອງ​ປະ­ເທດ​ຊາດ ເປັນ​ເຈົ້າ​ຂອງ​ບ້ານ​ເກີດ​ເມືອງ​ນອນ ເປັນ​ເຈົ້າ​ຂອງ​ຊາ­ຕາ­ກຳ​ຂອງ​ຕົນ​ຢ່າງ​ແທ້​ຈິງ ບັນ­ຫາ​ດັ່ງ­ກ່າວ ໄດ້​ກາຍ­ເປັນ​ພື້ນ­ຖານ​ອັນ​ໜັກ​ແໜ້ນ ມີ​ສະ­ຖຽນ​ລະ​ພາບ​ດ້ານ​ການ­ເມືອງ​ສັງ­ຄົມ​ມີ​ຄວາມ​ສະ­ຫງົບ​ປອດ​ໄພ ແລະ ມີ​ຄວາມ​ເປັນ​ລະ­ບຽບ​ຮຽບ​ຮ້ອຍ​ໂດຍ​ພື້ນ­ຖານ ບັນ­ຫາ​ໜຶ່ງ​ອີກ​ທີ່​ອົງ­ຄະ​ນະ​ພັກ​ອົງ­ການ​ປົກ­ຄອງ​ຖື​ເປັນ​ສຳ­ຄັນ ກໍ​ຄື ການ​ຂະ­ຫຍາຍ​ພັກ ການ​ຂຶ້ນ​ແຜນ​ກຳ­ນົດ​ພະ­ນັກ­ງານ​ນຳ­ພາ-ຄຸ້ມ​ຄອງ​ທີ່​ມີ​ຄຸນ​ນະ​ພາບ ສອດ­ຄ່ອງ​ກັບ​ການ​ກຳ­ນົດ​ຕຳ­ແໜ່ງ​ງານ ທັງ​ຮັບ­ປະ­ກັນ​ລັກ­ສະ­ນະ​ສືບ​ທອດ​ປ່ຽນ​ແທນ.

    ໂອ­ກາດ​ນີ້ ທ່ານ​ເຈົ້າ​ຄອງ ນວ ໄດ້​ມີ​ຄຳ​ເຫັນ​ຕໍ່​ກອງ​ປະ­ຊຸມ​ບາງ​ຕອນ​ກ່າວ​ວ່າ: ການ­ຈັດ­ຕັ້ງ​ປະ­ຕິ­ບັດ​ບັ້ນ​ແຂ່ງ­ຂັນ​ຜ່ານ​ມາ ພວກ​ເຮົາ​ໄດ້​ມີ​ຜົນ­ງານ​ພົ້ນ​ເດັ່ນ​ຫຼາຍ​ດ້ານ ໃນ​ນັ້ນ ລະ­ບົບ​ການ­ເມືອງ​ຢູ່​ຂັ້ນ​ຮາກ​ຖານ ໄດ້​ຮັບ​ການ​ປັບ­ປຸງ​ຢ່າງ​ເປັນ​ລະ­ບົບ ວຽກ​ງານ ປກຊ-ປກສ ໄດ້​ຮັບ​ການ­ຈັດ­ຕັ້ງ​ຜັນ​ຂະ­ຫຍາຍ ປາ­ກົດ­ການ​ຫຍໍ້­ທໍ້​ໃນ​ສັງ­ຄົມ ໄດ້​ຮັບ​ການ​ແກ້​ໄຂ​ຢ່າງ​ຕັ້ງ­ໜ້າ ການ​ຈັດ​ສັນ​ຄວາມ​ເປັນ​ລະ­ບຽບ​ຮຽບ​ຮ້ອຍ​ໃນ​ຕົວ​ເມືອງ ໄດ້​ຮັບ​ໝາກ­ຜົນ​ດີ​ພໍ​ຄວນ ການ​ຈັດ​ເກັບ​ລາຍ​ຮັບ​ໄດ້​ລື່ນ​ແຜນ ແລະ ອື່ນໆ.

    ເພື່ອ​ຍາດ​ໄດ້​ຜົນ­ສຳ­ເລັດ​ໃນ​ຂໍ້​ແຂ່ງ­ຂັນ​ດັ່ງ­ກ່າວ ພວກ​ເຮົາ​ການ­ຈັດ­ຕັ້ງ​ທຸກ​ພາກ­ສ່ວນ​ລວມ​ທັງ​ຊາວ ນວ ຕ້ອງ​ຮ່ວມ​ໃຈ​ກັນ​ຈັດ​ຕັ້ງ​ປະ­ຕິ­ບັດ ເຊິ່ງ​ການ​ປະ­ຕິ­ບັດ​ເພື່ອ​ຍົກ​ລະ­ດັບ​ຫັນ­ປ່ຽນ​ໂສມ​ໜ້າ​ໃໝ່​ຂອງ ນວ ອີກ​ບາດ­ກ້າວ​ໜຶ່ງ​ຕ້ອງ​ຄຸ້ມ​ຄອງ​ປົກ​ປັກ​ຮັກ­ສາ​ໝາກ­ຜົນ​ຂອງ​ການ​ແຂ່ງ­ຂັນ​ທີ່​ຜ່ານ​ມາ ເພື່ອ​ສ້າງ ນວ ໃຫ້​ພັດ­ທະ­ນາ​ຂຶ້ນ​ເປັນ​ກ້າວໆ ພ້ອມ​ກັນ​ແກ້​ໄຂ​ບັນ­ດາ​ປາ­ກົດ­ການ​ຫຍໍ້­ທໍ້​ຕ່າງໆ​ໃນ​ສັງ­ຄົມ ຕ້ອງ​ມີ​ຄວາມ​ພ້ອມ­ພຽງ​ກັນ​ບົນ​ຄວາມ​ສະ­ເໝີ­ພາບ​ຄວາມ​ສາ­ມັກ­ຄີ​ປອງ​ດອງ ພ້ອມ​ກັນ​ຈັດ​ຕັ້ງ​ຜັນ​ຂະ­ຫຍາຍ​ຕາມ​ນະ­ໂຍ­ບາຍ​ຂອງ​ພັກ ແລະ ກົດ­ໝາຍ​ຂອງ​ລັດ ເພື່ອ​ພັດ­ທະ­ນາ ນວ ເປັນ​ນະ­ຄອນ​ທີ່​ໜ້າ​ຢູ່ ແລະ ຍືນ​ຍົງ.

ຂ່າວທີ່ກ່ຽວຂ້ອງ