ຂ່າວຫຼ້າສຸດ

ກູບາ ໃຫ້ສັນຍາຮັບປະກັນດ້ານນິຕິກຳໃຫ້ແກ່ນັກລົງທຶນຕ່າງປະເທດ

756 24 ພ.ພ. 2019 ຂ່າວຕ່າງປະເທດ
ກູບາ ໃຫ້ສັນຍາຮັບປະກັນດ້ານນິຕິກຳໃຫ້ແກ່ນັກລົງທຶນຕ່າງປະເທດ

    ໃນ​ຖະແຫຼງການ​ຜ່ານ​ສື່​ສັງຄົມ Twitter ເມື່ອ​ບໍ່​ດົນ​ມາ​ນີ້ ປະທານ ມີ​ແກລ ດີ​ອາ​​ສ ຄາ​ແນ​​ລ ຜູ້ນຳ​ກູ​ບາ ໄດ້​ເນັ້ນ​ໜັກ​ເຖິງ​ຄວາມ​ຕັດສິນ​ໃຈ ໃນ​ການ​ນຳ​ໃຊ້​ຄວາມ​ຮັບປະກັນ​ທາງ​ດ້ານ​ກົດໝາຍ ເພື່ອ​ປ້ອງ​ກັນ​ບັນດາ​ບ້ວງ​ເງິນ​ລົງທຶນ​ຂອງ​ຕ່າງປະເທດ ຢູ່​ໃນ​ກູ​ບາ.

    ປະທານ ມີ​ແກລ ດີ​ອາ​​ສ ຄາ​ແນ​​ລ ໃຫ້​ຮູ້​ວ່າ ທີ່​ກ່າວ​ມາ​ນັ້ນ ເປັນ​ໜຶ່ງ​ໃນ​ບັນດາ​ມາດ​ຕະການ​ຕອບ​ໂຕ້ ຕໍ່​ການ​ທີ່​ລັດຖະບານ ສ ອາ​ເມ​ຣິ​ກາ ນຳ​ໃຊ້​ເຕັມ​ມາດຕາ 3 ຂອງ​ກົດໝາຍ ແຮມ-ບູ​ເຕິນ (Helms-Burton) “ເພື່ອ​ບີບຄັ້ນ​ພື້ນຖານ​ເສດຖະກິດ​ກູ​ບາ.”

    ຂໍ້ຄວາມ​ໃນ​ມາດຕາ 3 ດັ່ງກ່າວ ທີ່​ເປັນ​ການ​ຖົກ​ຖຽງ​ນັ້ນ ແມ່ນ​ອະນຸຍາດ​ໃຫ້​ສານ​ແຫ່ງ​ຕ່າງໆ​ຂອງ ສ ອາ​ເມ​ຣິ​ກາ ສາມາດ​ຮັບ​ເອົາ​ບັນດາ​ຄຳ​ຮ້ອງ ທີ່​ທວງ​ໃຫ້​ໄດ້​ຄ່າ​ຊົດ​ເຊີຍ​ຂອງ​ບັນດາ​ພົນລະເມືອງ​ອາ​ເມ​ຣິ​ກັນ ທີ່​ມີ​ຊັບ​ສິນ​ຖືກ​ຫັນ​ໄປ​ເປັນ​ກຳມະສິດ​ຂອງ​ລັດ​ຢູ່​ໃນ​ກູ​ບາ ຫຼັງ​ຈາກ​ການ​ປະຕິວັດ​ກູ​ບາ​ສຳເລັດ​ຜົນ ໂດຍ​ນັບ​ລວມ​ເຖິງ​ພົນລະເມືອງ​ທີ່​ຍັງ​ບໍ່​ທັນ​ຖື​ສັນຊາດ​ອາ​ເມ​ຣິ​ກັນ ໃນ​ຈຸດ​ເວລາ​ທີ່​ມີ​ຊັບ​ສິນ​ຖືກ​ຢຶດ.

    ປະທານ ມີ​ແກລ ດີ​ອາ​​ສ ຄາ​ແນ​​ລ ເນັ້ນ​ໜັກ​ວ່າ ກົດໝາຍ ແຮມ-ບູ​ເຕິນ ເປັນ​ເລື່ອງ “ອຸປະ​ໂຫຼກ​ທາງ​ດ້ານ​ນິຕິ​ກຳ ດ້ວຍ​ທາດ​ແທ້​ຢູ່​ນອກ​ດິນແດນ” ແລະ​ດັ່ງນັ້ນ​ມັນ ຈຶ່ງ​ບໍ່​ມີ​ຜົນ​ບັງຄັບ​ໃຊ້​ຢູ່​ໃນ​ກູ​ບາ.

    ກົດໝາຍ ແຮມ-ບູ​ເຕິນ ນຳ​ອອກ​ມາ​ປະກາດ​ໃຊ້​ໃນ​ປີ 1996 ແລະ ​ກໍ​ເປັນ​ໜຶ່ງ​ໃນ​ບັນດາ​ປຶກ​ແຜ່ນ​ທາງ​ດ້ານ​ນິຕິ​ກຳ ໃຫ້​ແກ່​ການ​ປິດ​ລ້ອມ​ຂອງ ສ ອາ​ເມ​ຣິ​ກາ ເພື່ອ​ຕ້ານ​ກັບ​ກູ​ບາ. ໃນ​ນັ້ນ ມາດຕາ 3 ເປັນ​ການ​ອະນຸຍາດ​ໃຫ້​ບັນດາ​ພົນລະເມືອງ​ກູ​ບາ ທີ່​ມີ​ຊັບ​ສິນ​ຖືກ​ຢຶດ ຫຼັງ​ຈາກ​ທີ່​ຖື​ສັນຊາດ​ອາ​ເມ​ຣິ​ກັນ ແມ່ນ​ມີ​ສິດ​ຍື່ນ​ຟ້ອງ​ຢູ່​ໃນ​ສານ​ແຫ່ງ​ຕ່າງໆ​ໃນ ສ ອາ​ເມ​ຣິ​ກາ ເພື່ອ​ທວງ​ເອົາ​ຊັບ​ສິນ​ນັ້ນ​ຄືນ ຫຼື​ບໍ່​ກໍ​ທວງ​ຄ່າ​ຊົດ​ເຊີຍ.

   ເຖິງ​ແນວ​ນັ້ນ​ກໍ​ຕາມ ນັບ​ແຕ່​ກົດໝາຍ ແຮມ-ບູ​ເຕິນ ກຳເນີດ​ຂຶ້ນ​ມາ ໃນ​ເວລາ​ທີ່​ເຊັນ​ຕໍ່​ກຳ​​ນົດ ກົດໝາຍ​ດັ່ງກ່າວ ປະທານາທິບໍດີ ສ ອາ​ເມ​ຣິ​ກາ ທຸກໆ​ຄົນ​ຕ່າງ​ກໍ​ຍົກເວັ້ນ​ການ​ນຳ​ໃຊ້​ມາດຕາ 3 ຕາມ​ກຳນົດ​ເວລາ 6 ເດືອນ/ເທື່ອ. ແຕ່​ວ່າ ເມື່ອ​ວັນ​ທີ 17 ມັງກອນ​ທີ່​ຜ່ານ​ມາ ປະທານາທິບໍດີ ສ ອາ​ເມ​ຣິ​ກາ ໂດ​ນາ​​ລ ທຣຳ  ໄດ້​ລົງ​ນາມ​ຍົກເວັ້ນ​ການ​ນຳ​ໃຊ້ ມາດຕາ 3 ນັ້ນ ກຳນົດ​ພຽງ​ແຕ່ 45 ວັນ. ນັບ​ແຕ່​ວັນ​ທີ 4 ມີນາ​ທີ່​ຜ່ານ​ມາ ນຳ​ໃຊ້​ສ່ວນ​ໜຶ່ງ ແລະ ​ໂຈະ​ການ​ປະຕິບັດ​ຕື່ມ​ອີກ​ພຽງ​ທີ່ 30 ວັນ. ຕໍ່​ມາ ໃນ​ວັນ​ທີ 17 ເມສາ ສ ອາ​ເມ​ຣິ​ກາ ໄດ້​ປະກາດ​ວ່າ ມາດຕາ 3 ຂອງ​ກົດໝາຍ ແຮມ-ບູ​ເຕິນ ເລີ່ມ​ມີ​ຜົນ​ບັງຄັບ​ໃຊ້ ນັບ​ແຕ່​ວັນ​ທີ 2 ພຶດສະພາ​ເປັນຕົ້ນ​ໄປ.

 

ຂ່າວທີ່ກ່ຽວຂ້ອງ