ຂ່າວຫຼ້າສຸດ

ຫວຽດນາມ-ຣັດ​ເຊຍ ລົງ​ນາມ​ເອກະສານ​ການ​ຮ່ວມ​ມືຫຼາຍສະບັບ

780 24 ພ.ພ. 2019 ຂ່າວຕ່າງປະເທດ
ຫວຽດນາມ-ຣັດ​ເຊຍ ລົງ​ນາມ​ເອກະສານ​ການ​ຮ່ວມ​ມືຫຼາຍສະບັບ

    ຂ່າວສານ​ຫວຽດນາມ ລາຍ​ງານ​ວ່າ ໃນ​ຂອບ​ຂອງ​ການ​ຢ້ຽມຢາມ​ຣັດ​ເຊຍ​ຢ່າງ​ເປັນ​ທາງ​ການ​ນັ້ນ ໃນ​ວັນ​ທີ 22 ພຶດສະພາ​ນີ້ ນາຍົກລັດຖະມົນຕີ​ຫວຽດນາມ ຫງວ​​ຽນ​ຊວນ​ຟຸກ ໄດ້​ພົບ​ປະ​ເປັນ​ວົງ​ແຄບ ແລະ​ດຳເນີນ​ການ​ເຈລະຈາ ກັບ​ນາຍົກລັດຖະມົນຕີ​ຣັດ​ເຊຍ ດີ​ມີ​ຕຣີ ເມດ​ເວ​ເດບ.

    ຫຼັງ​ຈາກ​ການ​ເຈລະຈາ​ດັ່ງກ່າວ​ແລ້ວ ນາຍົກລັດຖະມົນຕີ​ທັງ​ສອງ ກໍ​ໄດ້​ເປັນ​ປະທານ​ຮ່ວມ ໃນ​ການ​ປະຊຸມ​ຖະແຫຼງ​ຂ່າວ ເພື່ອ​ແຈ້ງ​ຜົນ​ການ​ເຈລະຈາ ແລະ ​ເປັນ​ສັກຂີ​ພິຍານ ໃນ​ພິທີ​ລົງ​ນາມ​ເອກະສານ​ການ​ຮ່ວມ​ມື 14 ສະບັບ ລະຫວ່າງ​ບັນດາ​ກະຊວງ ຂະແໜງການ ທ້ອງຖິ່ນ ແລະ​ວິ​ສາ​ຫະ​ກິດ​ຂອງ​ປະເທດ.

    ນາຍົກລັດຖະມົນຕີ ເມດ​ເວ​ເດບ ກ່າວ​ຢູ່​ໃນ​ການ​ປະຊຸມ​ຖະແຫຼງ​ຂ່າວ​ດັ່ງກ່າວ​ວ່າ ບົນ​ຈິດໃຈ​ການ​ພົວພັນ​ຄູ່​ຮ່ວມ​ຍຸດ​ທະ​ສາດ​ຮອບດ້ານ ບັນຍາກາດ​ການ​ຮ່ວມ​ມື ແລະ​ມິດ​ຕະ​ພັບ​ນັ້ນ ທ່ານ​ໄດ້​ປຶກສາ​ຫາລື​ກັບ​ນາຍົກລັດຖະມົນຕີ ຫງວ​​ຽນ​ຊວນ​ຟຸກ ກ່ຽວ​ກັບ​ມາດ​ຕະການ​ຕ່າງໆ ເພື່ອ​ຊຸກຍູ້​ການ​ຮ່ວມ​ມື​ໃນ​ທຸກໆ​ຂົງເຂດ ໂດຍ​ສະເພາະ​ກໍ​ແມ່ນ​ເສດຖະກິດ ການ​ຄ້າ ແລະ ​ການ​ລົງທຶນ. ໃນຕໍ່ໜ້າ ສອງ​ຝ່າຍ​ຈະ​ເພີ່ມ​ທະວີ​ເປີດ​ກວ້າງ​ການ​ຮ່ວມ​ມື​ໃນ​ດ້ານ​ພະລັງງານ ການ​ຜະລິດ​ດ້ານ​ອຸດສາຫະກຳ; ສ້າງ​ເງື່ອນໄຂ​ສະດວກ ໃຫ້​ແກ່​ການ​ຮ່ວມ​ມື​ໃນ​ຂົງເຂດ​ນ້ຳມັນ-ແກ​​ັສ ລະຫວ່າງ​ບໍລິສັດ Gazprom ຂອງ​ຣັດ​ເຊຍ ກັບ​ກຸ່ມ​ບໍລິສັດ​ນ້ຳມັນ-ແກ​​ັສ​ຫວຽດນາມ.

    ທາງ​ດ້ານ​ນາຍົກລັດຖະມົນຕີ ຫງວ​​ຽນ​ຊວນ​ຟຸກ ໄດ້​ຢືນຢັນ​ເຖິງ​ແຜນ​ນະໂຍບາຍ​ແຕ່​ຕົ້ນ​ສະເໝີ​ປາຍ​ຂອງ​ການ​ນຳ​ຫວຽດນາມ ທີ່​ຍາມ​ໃດ​ກໍ​ຖື​ເປັນ​ສຳຄັນ ແລະ​ໃຫ້​ບຸລິມະສິດ ໃນ​ການ​ປັບປຸງ ເພີ່ມ​ທະວີ​ການ​ພົວພັນ​ທີ່​ໜ້າ​ເຊື່ອ​ຖື​ຢ່າງ​ເລິກເຊິ່ງ ການ​ເປັນ​ຄູ່​ຮ່ວມ​ຍຸດ​ທະ​ສາດ​ຮອບດ້ານ ກັບ​ສະຫະພັນ​ຣັດ​ເຊຍ; ຕັດສິນ​ໃຈ​ພັດທະນາ​ການ​ພົວພັນ​ໄປ​ໃນ​ທິດ​ທີ່​ມີ​ປະສິດທິພາບ ແທ້​ຈິງ ແລະ​ຍືນ​ຍົງ ໃນ​ທຸກໆ​ຂົງເຂດ ຕອບ​ສະໜອງ​ຕໍ່​ຜົນ​ປະໂຫຍດ​ຂອງ​ສອງ​ປະເທດ.

ຂ່າວທີ່ກ່ຽວຂ້ອງ