ຂ່າວຫຼ້າສຸດ

ເບີ່ງບ້ານເຂົາເອົາບົດຮຽນ 23-05-2019

1.360 23 ພ.ພ. 2019 ຫົວຂໍ້ຂ່າວອື່ນໆ

ມື້ນີ້ ທ່ານ​ຜູ້​ອ່ານ​ຈະ​ໄດ້​ຮູ້​ກ່ຽວ​ກັບ​ມາດ​ຕະການ​ຈ້າງ​ແຮງ​ງານ​ແບບ​ໃໝ່​ຢູ່​ກຳປູເຈຍ ຕໍ່​ໃສ່​ເລື່ອງ​ໂທດ​ປັບ​ໃໝ່​ຕໍ່​ຜູ້​ຫຼົບ​ຫຼີກ​ພາສີ​ທີ່​ອັງກິດ ປິດ​ທ້າຍ​ກັບ​ຂ່າວ​ວິທີ​ດຶງ​ດູດ​ນັກ​ທ່ອງ​ທ່ຽວ​ຢູ່​ອິນ​ໂດ​ເນ​ເຊຍ.

   ທີ່ ກຳປູເຈຍ: ຫວ່າງ​ບໍ່​ດົນ​ມາ​ນີ້ ເຊິ່ງ​ເປັນ​ໄລຍະ​ບັນຍາກາດ​ວັນ​ແຮງ​ງານ​ສາກົນ ທາງ​ການ​ກຳປູເຈຍ ໄດ້​ປະກາດ​ເລີ່ມ​ໃຊ້ ໃບ​ອະນຸຍາດ​ເຮັດ​ວຽກ​ແບບ​ໃໝ່ ໃບ​ອະນຸຍາດ​ໃໝ່​ນີ້​ກຳນົດ​ໃຫ້​ວິ​ສາ​ຫະ​ກິດ​ຕ່າງປະເທດ​ຢູ່​ກຳປູເຈຍ​ຕ້ອງ​ຈ້າງ​ແຮງ​ງານ​ຕ່າງ​ປະ ເທດ​ໃຫ້​ສອດຄ່ອງ​ກັບ​ເນື້ອ​ໃນ​ຂອງ​ໃບ​ອະນຸຍາດ ແລະ ໄດ້​ເຕືອນ​ວ່າ ຖ້າ​ໃຜ​ລະເມີດ​ຈະ​ຕ້ອງ​ໄດ້​ແບກ​ຫາບ​ຄວາມ​ຮັບຜິດຊອບ​ເອົາ​ເອງ ໃບ​ອະນຸຍາດ​ເຮັດ​ວຽກ​ແບບ​ໃໝ່​ນີ້ ມີ​ຄຸນ​ນະ​ພາບ​ຮັບປະກັນ​ບໍ່​ໃຫ້​ປອມ​ແປງ​ໄດ້ ເປັນ​ອັນວ່າ​ນັບ​ແຕ່​ເວລາ​ນີ້​ເປັນຕົ້ນ​ໄປ​ທັງ​ນາຍ​ຈ້າງ​ຕ່າງປະເທດ ແລະ ຄົນ​ງານ​ຕ່າງປະເທດ​ກໍ​ລ້ວນ​ແຕ່​ຕ້ອງ​ມີ​ໃບ​ອະນຸຍາດ​ເຮັດ​ວຽກ ຖ້າ​ບໍ່​ດັ່ງນັ້ນ ກໍ​ຈະ​ຖືກ​ປັບ​ໃໝ​ເປັນ​ແຕ່​ລະ​ວັນ​ໄປ ໃນ​ຈຳນວນ​ເງິນ 10 ໂດ​ລາ​ຕໍ່​ວັນ ຂ່າວ​ບໍ່​ໄດ້​ບອກ​ເຖິງ​ສາ​ເຫດການ​ນຳ​ໃຊ້​ໃບ​ອະນຸຍາດ​ແບບ​ໃໝ່ ແຕ່​ກໍ​ພໍ​ຄາດ​ເດົາ​ອອກ​ວ່າ ເພື່ອ​ປ້ອງ​ກັນ​ບໍ່​ໃຫ້​ວິ​ສາ​ຫະ​ກິດ​ຕ່າງປະເທດ​ວ່າ​ຈ້າງ​ແຮງ​ງານ​ຕ່າງປະເທດ​ທີ່​ຜິດ​ກົດໝາຍ ຫຼື ວ່າ​ຈ້າງ​ຕາມ​ລຳ​ຟັງ​ໃຈ ເຊິ່ງ​ຈະ​ສົ່ງ​ຜົນ​ກະທົບ​ບໍ່​ດີ​ຕໍ່​ເສດຖະກິດ​ຂອງ​ຊາດ ກໍ​ຄື ແຮງ​ງານ​ພາຍ​ໃນ.

     ທີ່ ອັງກິດ: ບັນຫາ​ຫຼົບ​ຫຼີກ​ພາສີ​ນີ້​ໄດ້​ກາຍເປັນ​ສິ່ງ​ທ້າ​ທາຍ​ທີ່​ສົ່ງ​ຜົນ​ກະທົບ​ຕໍ່​ລະບົບ​ເສດຖະກິດ​ຂອງ​ຫຼາຍໆ​ປະເທດ ແມ່ນ​ແຕ່​ອັງກິດ​ເຊິ່ງ​ມີ​ລະບົບ​ກົດໝາຍ​ເຂັ້ມແຂງ ກໍ​ຍັງ​ປະ​ເຊີນ​ກັບ​ບັນຫາ​ດັ່ງກ່າວ ແຕ່​ແນວໃດ​ກໍ​ດີ ທ່ານ​ນາງ ເຕ​ເຣ​ຊາ​ເມ ນາຍົກ​ຍິງ​ຂອງ​ປະເທດ​ອັງກິດ ໄດ້​ປະກາດ​ໄມ້​ແຂງ ນັບ​ແຕ່​ທ່ານ​ຂຶ້ນ​ກຳ​ອຳນາດ​ເມື່ອ 3 ປີ​ກ່ອນ​ໜ້າ​ນີ້​ວ່າ: ຈະ​ບໍ່​ໄວ້ໜ້າ​ພວກ​ຫົວ​ໃສ​ໃຈ​ຄົດ ຫຼົບ​ຫຼີກ​ການ​ເສຍ​ພາສີ​ຕາມ​ພັນທະ ໂດຍ​ຈະ​ໃຊ້​ວິທີ​ປັບ​ໃໝ​ໃນ​ມູນ​ຄ່າ​ສູງ​ຈຸ​ເມກ​ເຖິງ 100-200% ຂອງ​ເງິນ​ພາສີ​ທີ່​ຫຼົບ​ຫຼີກ ໝາຍ​ຄວາມ ຖ້າ​ເງິນ​ພັນທະ​ພາສີ 1 ໂດ​ລາ​ທີ່​ບໍ່​ຍອມ​ເສຍ​ນັ້ນ ຜູ້​ລະເມີດ​ຈະ​ຕ້ອງ​ຖືກ​ປັບ​ໃໝ​ສູງ​ເຖິງ 100-200 ໂດ​ລາ ມາດ​ຕະການ​ທີ່​ອອກ​ມາ ໃນ​ຮູບ​ຄຳ​ປະກາດ​ຂອງ​ກະຊວງ​ການ​ເງິນ​ອັງກິດ​ໄດ້​ເວົ້າ​ແຈ້ງວ່າ ຈຳພວກ​ບຸກຄົນ​ຜູ້​ທີ່​ຫຼົບ​ຫຼີກ​ພາສີ​ດ້ວຍ​ການ​ເອົາ​ເງິນ​ໄປ​ຝາກ​ເພື່ອ​ຊຸກເຊື່ອງ​ຢູ່​ຕ່າງປະເທດ​ນັ້ນ​ອາດ​ຖືກ​ປັບ​ໃໝ​ສູງ​ເຖິງ 200% ຂອງ​ຈຳນວນ​ເງິນ​ທີ່​ບໍ່​ແຈ້ງ​ເສຍ ຫຼື ເງິນ​ຄ້າງ​ຈ່າຍ​ພາສີ ຖ້າ​ຫາ​ກວ່າ​ພວກ​ເຂົາເຈົ້າ​ບໍ່​ສາມາດ​ພິສູດ​ຄວາມ​ໂປ່ງ​ໃສ ໃນ​ເດືອນ​ກັນຍາ ປີ 2018 (ມາດ​ຕະການ​ດັ່ງກ່າວ​ຖືກ​ປະກາດ​ອອກ​ໃນ​ເດືອນ​ກໍລະກົດ ປີ 2016) ແຕ່​ຖ້າ​ສາມາດ​ພິສູດ​ຄວາມ​ໂປ່ງ​ໃສ​ດ້ານ​ການ​ເງິນ​ໄດ້​ວ່າ​ບໍ່​ມີ​ຄວາມ​ຕັ້ງໃຈ​ຈະ​ຫຼົບ​ຫຼີກ​ພາສີ​ມູນ​ຄ່າ​ປັບ​ໃໝ​ກໍ​ອາດ​ຫຼຸດ​ລົດ​ຮອດ 0% ໝາຍ​ຄວາມ​ວ່າ​ເຖິງ​ຈະ​ຫຼົບ​ຫຼີກ​ພາສີ ແຕ່​ຖ້າ​ພິສູດ​ໄດ້​ວ່າ​ບໍ່​ມີ​ຄວາມ​ຕັ້ງໃຈ ແລະ ຍອມ​ເສຍ​ພັນທະ​ພາສີ ໂທດ​ປັບ​ໃໝ​ກໍ​ຈະ​ຕົກ​ໄປ.

    ທີ່ ອິນ​ໂດ​ເນ​ເຊຍ: ມີ​ຂ່າວ​ກ່ຽວ​ກັບ​ຄວາມ​ສະຫຼາດ​ຮູ້​ຍາດ​ໂອກາດ​ດຶງ​ດູດ​ນັກ​ທ່ອງ​ທ່ຽວ​ເຂົ້າ​ປະເທດ​ເວລາ​ມີ​ເຫດການ​ແປກ ໃໝ່ ລະ​ທຶກ​ໃຈ ເລື່ອງ​ມີ​ຢູ່​ວ່າ ໃນ​ວັນ​ທີ 9 ມີນາ ປີ 2016 ໄດ້​ເກີດ​ມີ​ປາກົດການ​ສຸລິຍະຄາດ(ກົບ​ກິນ​ຕາເວັນ) ຢູ່​ນ່ານ​ຟ້າ​ປະເທດ​ອິນ​ໂດ​ເນ​ເຊຍ ປາກົດການ​ທີ່​ວ່າ​ນີ້ ບໍ່​ແມ່ນ​ເລື່ອງ​ທີ່​ຫາ​ເບິ່ງ​ໄດ້​ງ່າຍໆ ໂດຍ​ສະເພາະ ແມ່ນ​ກໍລະນີ​ຕາເວັນ​ຖືກ​ກົບ​ກິນ​ແບບ​ເຕັມ​ດວງ ພໍ​ຮູ້​ເລື່ອງ​ນີ້​ທາງ​ກະຊວງ​ທ່ອງ​ທ່ຽວ​ອິນ​ໂດ​ເນ​ເຊຍ ກໍ​ຮີບ​ຖື​ໂອກາດ​ໂຄສະນາ​ປ່າວ​ປະກາດ​ໃຫ້​ທັງ​ນັກ​ທ່ອງ​ທ່ຽວ​ພາຍ​ໃນ ແລະ ຕ່າງປະເທດ​ໄປ​ຊົມ​ຢູ່​ຈຸດ​ທີ່​ຈະ​ເຫັນ​ປາກົດການ​ໄດ້​ຢ່າງ​ເຕັມ​ຕາ ຜົນ​ຮັບ​ດີ​ເກີນ​ຄາດ ຄື​ມີ​ນັກ​ທ່ອງ​ທ່ຽວ​ປະມານ 1 ແສນ​ຄົນ ໃນ​ນັ້ນ 1 ໝື່ນ​ຄົນ​ແມ່ນ​ຊາວ​ຕ່າງປະເທດ ເຂົ້າ​ຊົມ​ປາກົດການ​ແປກໆ​ນີ້ ໄດ້​ສ້າງ​ລາຍ​ຮັບ​ທາງ​ດ້ານ​ເສດຖະກິດ​ເຖິງ 100 ລ້ານ​ໂດ​ລາ ໃນ​ຊົ່ວ​ພິບ​ຕາ​ດຽວ ເຫັນ​ລະ​ບໍ? ການ​ໂຄສະນາ​ການທ່ອງທ່ຽວ​ນັ້ນ​ຕ້ອງ​ຮູ້​ຈັບ​ໂອກາດ ແລະ ຕ້ອງ​ວ່ອງໄວ​ຈຶ່ງ​ຊິ​ທັນກິນ​ນຳ​ເພິ່ນ!.

ຂ່າວທີ່ກ່ຽວຂ້ອງ