ຂ່າວຫຼ້າສຸດ

ປະເມີນໂຄງການສ້າງຂີດຄວາມສາມາດດ້ານວິຊາການ

985 23 ພ.ພ. 2019 ຂ່າວໜ້າ​ໜຶ່ງ

    ກອງ​ປະ­ຊຸມ​ຜ່ານ​ບົດ​ປະ​ເມີນ​ໂຄງ­ການ ເສີມ​ສ້າງ​ຂີດ​ຄວາມ​ສາ­ມາດ​ທາງ​ດ້ານ​ວິ­ຊາ​ການ ເພື່ອ​ພັດ­ທະ­ນາ​ລະ­ບົບ​ການ​ຈັດ​ຫາ​ງານ​ຢູ່​ລາວ ຈັດ​ຂຶ້ນ​ວັນ​ທີ 22 ພຶດ­ສະ­ພາ 2019 ທີ່​ໂຮງ­ແຮມ​ລາວ​ພລາ​ຊາ ເປັນ​ປະ­ທານ​ຂອງ​ທ່ານ ໄທ ແສງ​ອາ​ລຸນ ຮອງ​ຫົວ­ໜ້າ​ກົມ​ພັດ­ທະ­ນາ​ສື​ມີ­ແຮງ​ງານ ແລະ ຈັດ​ຫາ​ງານ ກະ­ຊວງ​ແຮງ​ງານ ແລະ ສະ­ຫວັດ­ດີ​ການ-ສັງ­ຄົມ (ຮສສ) ແລະ ທ່ານ ຈາ​ນົວ ຮາ​ກິມ ຫົວ­ໜ້າ​ໜ່ວຍ​ງານ​ຄຸ້ມ​ຄອງ​ໂຄງ­ການ ADB ມີ​ຄະ­ນະ​ກຳ­ມະ­ການ​ຊີ້​ນຳ​ໂຄງ­ການ​ຈາກ​ກະ­ຊວງ ພະ​ແນກ ຮສສ ແລະ ພະ­ນັກ­ງານ​ຈຸດ​ບໍ­ລິ­ການ​ຈັດ​ຫາ​ງານ​ທີ່​ມາ​ຈາກ 9 ແຂວງ ແລະ ສູນ​ບໍ­ລິ­ການ​ຈັດ​ຫາ​ງານ​ທົ່ວ​ປະ­ເທດ​ເຂົ້າ​ຮ່ວມ.

    ທ່ານ ໄທ ແສງ​ອາ​ລຸນ ກ່າວ​ວ່າ: ໂຄງ­ການ​ນີ້​ເປັນ​ໂຄງ­ການ​ພາຍ​ໃຕ້​ການ​ຊ່ວຍ­ເຫຼືອ​ຂອງ​ປະ­ເທດ​ຍີ່​ປຸນ​ໂດຍ​ຜ່ານ ADB ເຊິ່ງ​ມີ​ຄວາມ​ສຳ­ຄັນ ແລະ ຈຳ­ເປັນ​ທີ່​ສຸດ​ສຳ­ລັບ​ລາວ ໂດຍ​ສະ­ເພາະ ໃນ​ເງື່ອນ­ໄຂ​ປັດ­ຈຸ­ບັນ ເນື່ອງ​ຈາກ​ໂຄງ­ການ​ໄດ້​ສ້າງ​ລະ­ບົບ​ການ​ຈັດ​ຫາ​ງານ​ທີ່​ທັນ​ສະ­ໄໝ ແລະ ສ້າງ​ຄວາມ​ເຂັ້ມ­ແຂງ​ໃຫ້​ພະ­ນັກ­ງານ​ລັດ ໃນ​ການ​ໃຫ້​ບໍ­ລິ­ການ​ທີ່​ມີ​ປະ­ສິດ­ທິ­ພາບ ເປັນ​ການ​ປັບ­ປຸງ​ລະ­ບົບ​ຂໍ້​ມູນ​ຂ່າວ­ສານ​ຕະ­ຫຼາດ​ແຮງ​ງານ ການ​ວິ­ໄຈ ແລະ ການ​ໂຄ­ສະ­ນາ​ປະ­ຊາ­ສຳ­ພັນ ເພື່ອ​ສະ­ໜອງ​ຂໍ້​ມູນ​ຂ່າວ­ສານ​ຕະ­ຫຼາດ​ແຮງ​ງານ ໃຫ້​ແກ່​ຜູ້​ຊອກ​ວຽກ​ເຮັດ ນັກ​ລົງ­ທຶນ ຫົວ­ໜ່ວຍ​ແຮງ​ງານ ແລະ ບັນ­ດາ​ວິ​ສາ​ຫະ​ກິດ​ຕ່າງໆ ເຊິ່ງ​ໂຄງ­ການ​ນີ້​ໄດ້​ເລີ່ມ​ຈັດ​ຕັ້ງ​ປະ­ຕິ­ບັດ​ມາ​ແຕ່​ປີ 2017-2019 ໃນ​ໄລ­ຍະ​ຜ່ານ​ມາ ການ​ດຳ­ເນີນ​ໂຄງ­ການ​ໄດ້​ຈັດ​ຕັ້ງ​ປະ­ຕິ­ບັດ​ຫຼາຍ​ກິດ­ຈະ­ກຳ ໂດຍ​ສະ­ເພາະ ດຳ­ເນີນ​ການ​ສຶກ​ສາ ສ້າງ​ແຜນ​ບໍ­ລິ­ການ​ຈັດ​ຫາ​ງານ ສ້າງ​ລະ­ບົບ​ການ​ບໍ­ລິ­ການ​ຈັດ​ຫາ​ງານ​ດ້ວຍ​ລະ­ບົບ​ອອນ​ລາຍ ຈັດ​ເຝີກ​ອົບ­ຮົມ​ສ້າງ​ຄວາມ​ສາ­ມາດ​ຫຼາຍ​ດ້ານ ໃຫ້​ແກ່​ສູນ​ບໍ­ລິ­ການ​ຈັດ​ຫາ​ງານ​ຢູ່ 9 ແຂວງ​ເປົ້າ​ໝາຍ​ຂອງ​ໂຄງ­ການ.

    ນອກ​ນັ້ນ ໂຄງ­ການ​ຍັງ​ໄດ້​ສະ­ໜອງ​ອຸ­ປະ­ກອນ​ໄອ​ທີ ເພື່ອ​ນຳ​ໃຊ້​ເຂົ້າ​ໃນ​ວຽກ​ງານ​ທີ່​ກ່ຽວ­ຂ້ອງ​ໃຫ້​ກົມ​ພັດ­ທະ­ນາ​ສີ­ມື​ແຮງ​ງານ ແລະ ຈັດ​ຫາ​ງານ ສູນ​ບໍ­ລິ­ການ ແລະ 9 ຈຸດ​ບໍ­ລິ­ການ​ຈັດ​ຫາ​ງານ​ໃນ​ທ້ອງ­ຖິ່ນ ແລະ ໄດ້​ສ້າງ​ຄູ່​ມື​ການ​ບໍ­ລິ­ການ​ຈັດ​ຫາ​ງານ ໂດຍ​ສະ­ເພາະ ການ​ບໍ­ລິ­ການ​ຜູ້​ຊອກ​ວຽກ​ເຮັດ​ງານ​ທຳ ແລະ ຜູ້​ໃຊ້​ແຮງ​ງານ ສ້າງ​ນິ­ຕິ​ກຳ ເພື່ອ​ສົ່ງ­ເສີມ​ວຽກ​ຈຸດ​ບໍ­ລິ­ການ ກຳ­ນົດ​ພາ­ລະ​ບົດ­ບາດ ແລະ ໜ້າ​ວຽກ​ຂອງ​ຈຸດ​ບໍ­ລິ­ການ ສ້າງ​ແຜນ​ດຳ­ເນີນ​ງານ​ການ​ໂຄ­ສະ­ນາ​ເຜີຍ­ແຜ່​ວຽກ​ງານ ຈຸດ​ບໍ­ລິ­ການ​ຈັດ​ຫາ​ງານ​ໃນ​ແຕ່​ລະ​ເຂດ​ທົ່ວ​ປະ­ເທດ ເພື່ອ​ເຮັດ​ໃຫ້​ກຸ່ມ​ເປົ້າ​ໝາຍ​ໄດ້​ເຂົ້າ​ເຖິງ​ແຫຼ່ງ​ຂໍ້​ມູນ​ຫຼາຍ​ຂຶ້ນ ແລະ ມາ​ຮອດ​ປັດ­ຈຸ­ບັນ ການ​ດຳ­ເນີນ​ໂຄງ­ການ​ໃກ້​ຈະ​ສິ້ນ​ສຸດ ສະ­ນັ້ນ ທາງ​ໂຄງ­ການ​ຈຶ່ງ​ໄດ້​ມີ​ການ​ປະ​ເມີນ​ຜົນ​ກະ­ທົບ​ຂອງ​ໂຄງ­ການ ເພື່ອ​ກຳ­ນົດ​ຜົນ​ໄດ້​ຮັບ​ຈາກ​ໂຄງ­ການ​ທັງ​ໄລ­ຍະ​ສັ້ນ ແລະ ໄລ­ຍະ​ຍາວ ບັນ­ຫາ​ທີ່​ຍັງ​ຄົງ​ຄ້າງ ແລະ ຖອດ​ຖອນ​ບົດ­ຮຽນ ເພື່ອ​ກຳ­ນົດ​ຂໍ້​ແນະ­ນຳ​ໃນ​ການ​ປັບ­ປຸງ​ການ­ຈັດ­ຕັ້ງ​ປະ­ຕິ­ບັດ ໂຄງ­ການ​ໃນ­ຕໍ່­ໜ້າ​ໃຫ້​ມີ​ຜົນ­ສຳ­ເລັດ.

ຂ່າວທີ່ກ່ຽວຂ້ອງ